Wp/sdh/عەلی ئەشرەف دەرویشیان

عەلی ئەشرەف دەرویشیان (۳ خەرمانان ۱۳۲۰ لە کرماشان- ) نۊسەر کورد خەڵق کرماشان و ئەندام بنکەێ نۊسەرەیل ئیرانە. دەرویشیان بڕێگ لە نۊسیاوەیل خوەی وەرلە ئنقڵاو وە ناو «لەتیف تەڵخستانی» و «عەلیجان دەرویش» بڵاو دەکردیاد. ئەوە وەر و دۊا لە ئنقڵاو چەندین کەڕەت وە سەر چالاکیەیل سیاسی کەفت لە بەندیخانە.

ژیان

عەلئ ئەشرەف دەرویشیان لە ڕووژ 3 خەرمانان 1320 کووچی ھەتاوی لە بنەماڵەێگ کارکەری لە مەحەلەێ ئاوشووران لە شار کرماشان لە داڵگ پێیا بۊ. لە ساڵ 1337 زانینخانەێ سەرەتایی ویەڕاند و بۊ وە موعەڵم ئاواییەیل دەورووەر کرماشان و گیەڵان. لە ساڵ 1345 چیە تێران و لە زانستگەێ تێران دەس کرد وە یاێ گرتن ئەدەبیات فارسی و وە دواێ گرتن وەڵگەێ کارناسی ڕشتەێ خوەی گووڕان وە ڕەوانناسی پەروەردە کردن و ھاوکات لە زانینخانەێ واڵاێ تێران لە ڕشتەێ ڕاوێژکاری و ئاموجیاری وانەخواندن کارناسی واڵا گرت. دەرویشیان لە چەرخەێ حەکوومەت مارزا پاڵەوی لە ساڵ 1350 تا 1357 ئڕاێ نۊساێن کوومەچێروک «لە ئەی وڵات» و چالاکیەیل سیاسی سێ کەڕەت گیریا و لە نوساێنیش قێخە کریا. ئەوەڵ کەڕەت لە کرماشان ئڕاێ 8 مانگ گیریاد وەڵێم پاش لە 2 مانگ لە تێران دجارە دەسگیر کریاد و وە 7 مانگ بەندیبۊن تاوانبار کریاد. دەرویشیان وە ئەی تاوانە لە زانستگەیش دەر کریا و ئجازەێ موعەلمییش لە لی گیریا. سوەم کەڕەت لە ساڵ 1353 گیریا ک وە دۊاێ ئەی دەسگیریە وە 11 ساڵ بەندیبۊن تاوانبار کریا. دەرویشیان لە ئەی ڕێکەفتە چیە بەندیخانە و تا سەرکەفتن شوڕش بێمەن 1357 لە بەندیخانە مەن. دەرویشیان ھەلەێوا لە دۊاییەیل ساڵ 1352 شاناز دارابیان ماڕە کرد.