Wp/rsk/Мирослав Стрибер
Мирослав Стрибер (*22. юний 1939. - †21. април 1971.), универзитетски професор, социолоґ и белетрист медзи войводянскима Русинами/Руснацами.
| Мирослав Стрибер | |
|---|---|
| Народзени | 22. юния 1939. |
| Умар | 21. априла 1971. (32) |
| Державянство | югославянске |
| Язик творох | руски, сербски |
| Школа | Ґимназия, Нови Сад |
| Универзитет | Правни факултет, Беоґрад |
| Период твореня | 1966. - 1984. |
| Жанри | социолоґия, литература, |
| Поховани | у Дюрдьове |
Биоґрафия[edit | edit source]
Мирослав Стрибер народзени 22. юния 1939. року у Дюрдьове. Оцец Петро и мац Маря родз. Колєсар. Мирослав мал и старшу шестру. После основношколского образованя Мирослав Стрибер закончел ґимназию у Новим Садзе и Правни факултет на Беоґрадским универзитету. Маґистровал на теми зоз социолоґиї "Место и улога интелиґенциї у розвою сучасного югославянского дружтва" (1972)[1]. Од 1963. року по його вчасну шмерц Мирослав Стрибер бул асистент на Общей социолоґиї на Правним факултету Новосадского универзитета.
Мирослав Стрибер бул у малженстве зоз Иванку и мали сина Ваню.
Стрибер перше писал на сербскогорватским язику, а по 1963. року почал обявйовац на руским, цо мало за резултат два мали збирки поезиї, Романса (1969) и 55 писнї (1971). У його поезиї елементи традициї и фолклору попреплєтани зоз модернизмом и еґзистенциялизмом. Трима ше же вон, медзи рускима авторами, “снователь интелектуалней лирскей поезиї”, хтора позбута патосу, над'звичайней страсци або еуфориї[2]. Еґзистенциялизем мал у Стриберови доброго оглашовача, а нємецки експресионизем, зоз становиска аналоґийох патрене, доброго поету сциснутих, згуснутих структурох[3].
Стриберова кнїжка 55 писнї ма за руску литературу винїмкову вредносц.
Мирослав Стрибер припадал ґрупи Руснацох хтори були проукраїнски ориєнтовани.
Мирослав Стрибер и його супруга Иванка погинули у транспортним нєщесцу 21. априла 1971. року при Темишваре, Румуния.
Библиоґрафия[edit | edit source]
Мирослав Стрибер: Романса, "Руске слово", Нови Сад. 1969.
Мирослав Стрибер: 55 писнї, "Руске слово", Нови Сад. 1971.
Литература[edit | edit source]
Владимир Ґарянски, “Поезия Мирослава Стрибера медзи експрезионизмом и фолклором”, Шветлосц, XXXII, 2 (Нови Сад, 1994), б. 115-132.
Striber, Miroslav - Encyclopedia of Rusyn History and Culture, Paul R. Magocsi and Ivan Pop, University of Toronto Press, 2005, p. 478
Референци[edit | edit source]
- ↑ Magistarski radovi, Pravni fakultet, Istočno Sarajevo, маґистерска робота М. Стрибера под ч. 86.
- ↑ Јулијан Тамаш: Русинска књижевност, Матица српска, 1984, б. 329-332.
- ↑ Юлиян Тамаш: Мирослав Стрибер, Дзвони, християнски часопис, юний 1994. ч. 6., б. 12.