Wp/kus/azaya 18

AZAYA 18

 Zugsɔb la pian' Kus yɛla 
1 Teŋgban si'a bɛ Kus kɔldaug nɔɔrin la, 
anina ka ba nwɛ'ɛdi ba kpʋkpama ka maan tʋkpiidʋg. 
Tɔɔg na paae teŋgbauŋ nwa'! 
2 Ba tʋm nidib ka ba kpɛn' anrima kenna, 
ba dɔl ku'omin kenna. 
Ayei, lɛmmi, yanam banɛ ka ba tʋmi ya ka ya tun'e zɔɔg hali la, 
kemi ya nimbanɛ wa'am ka ba niŋgbina saalim la ni, 
bam banɛ ka nimbanɛ bɛ lalli nɛ yammin zɔti ba la. 
Teŋ kanɛ dimi mɔr paŋ ka nɔŋ zaba 
ka kɔldaad bɛɛsi ba teŋ la. 
3 Yanam nimbanɛ bɛ dunia nwa' ni, 
yanam banɛ bɛ teŋgbauŋ zug la, 
ba ya'a ti ʋk tanp tuuta zuoya la ni, ya na nyɛ, 
ba ya'a ti pieb zaba na'atan ya na wʋm. 
4 Zugsɔb la yɛlim si'eli nwa': 
“M na an baanlimm m bɛllim zin'ig 
ka gɔsid dinɛ na niŋ; 
wʋʋ nintaŋi na dʋt na nɛ tʋʋlʋg, 
bɛɛ mɛligim na li bunib saŋa.” 
5 Bunib saŋa ya'a nam pʋ paae, ka puum la sʋʋgi naae, 
ka wala la yʋ'ʋn bi'ig, 
o na nwaae wila la nɛ sʋ'ʋg, 
o ya'a nwaae naae o na pɛs wilbibis la. 
6 Li wʋsa na kpɛn dig 
ka niis banɛ bɛ zuoya ni la nɛ wɛog bʋnkɔnbid na dit: 
niis na dii li ɔnsir saŋa 
ka wɛog bʋnkɔnbid mɛ na diti li waad saŋa. 
7 Saŋkan la nimbanɛ wa'am ka ba niŋgbina saalim ka ba mɔr paŋ ka nɔŋ zaba ka kɔldaad bɛɛsi ba teŋ, ka nimbanɛ li'eli ba nɛ banɛ bɛ lalli zɔti ba la, na mɔr piini na tis Zugsɔb onɛ an Paŋtita'ar Sɔb la. Ba na mɔr piini la kɛn Zion Zuorin zin'ikanɛ ka Zugsɔb Paŋtita'ar Sɔb la yʋ'ʋr bɛ la.