Wp/kus/Azaya 25

AZAYA 25

Wɔ'ɔgim Zugsɔb la 
1 Zugsɔba, fʋ anɛ m Wina'am; 
m na dʋ'ʋsi fʋ yʋ'ʋr ka wɔ'ɔgif. 
Fʋ maal linɛ dɔl suor nɛ yɛlmɛŋir, 
linɛ ka fʋ da pʋn dɛŋi gban'e li yɛla la, 
fʋ tʋmi li ka li an tʋʋmnyalima. 
2 Fʋ kɛya ka tempʋʋs nwa'ae ka li tampiga la dig kuda-kuda, 
tɛɛns banɛ an kpi'euŋ zin'is la lieb dabɔɔd. 
Tempʋkanɛ an saam kpi'euŋ zin'ig la lɛn kae, 
ba kʋ lɛm mɛɛ li ya'asɛ. 
3 Alazugɔ, nimbanɛ kpi'em la na na'asif, 
tempʋbanɛ nidibi an bugusnam la na tisif girima. 
4 Fʋ anɛ nɔŋ dim la suak zin'ig, 
ka banɛ an fara dim kpɛn'ɛdi fʋ ma'asimin la. 
Yɛla ya'a ti paae ba, fʋ anɛ kpi'euŋ dɔkanɛ na lusi ba 
ka sisi'em kʋ paae baa, 
bɛɛ walʋsʋg daami baa. 
Bugusnam la mugusʋg nwɛnɛ sisi'etita'ari na 
da'adi nwɛ'ɛd zaŋguom nɛ, 
5 bɛɛ nwɛnɛ pipirisin tʋʋlʋgʋ an si'em la. 
Fʋ kɛya ka saam banɛ maan tʋkpiidʋg la lɛbi fɔn. 
Wʋʋ saŋgbana na lus nintaŋ si'em la, 
bugusnam la yʋ'ʋma la ma'ae nɛ sillimm. 
6 Zuokaŋa ni ka Zugsɔb onɛ an Paŋtita'ar Sɔb la na maal diib, 
dikanɛ an sʋm hali tis nidib wʋsa; 
ni'im nɛ daam kanɛ malis hali. 
7 Zuokaŋa ni ka o na san'am linɛ an sʋnsa'aŋ 
ka nwɛnɛ kansiŋ kanɛ lusid nidib wʋsa la, 
o na yis kum linɛ nwɛnɛ futita'ari pil buudi wʋsa la. 
8 † O na vɔl Akum san'am o paŋ 
ka kum kʋ lɛm bɛɛ. 
Zugsɔb onɛ an Paŋ Sɔb la na duus ninta'am sɔ' wʋsa nindaan, 
o na yis o nidib wʋsa nyan pɔɔgin, dunia ni wʋsa. 
Zugsɔb la pian'ʋkʋ la. 
9 Daakan la ba na yɛl ye, 
“Sida ti Wina'am la nwa'; 
ti gur o ka o faaɛn ti. 
Zugsɔb kaŋa ka ti niŋ o yadda, 
kɛlli ka ti maal sumalisim o faangir la zug.” 
10 Zugsɔb la paŋ na bɛ zuokaŋa zug; 
amaa ba na nɔ Moab dim la lɛbis teŋin 
wʋʋ sa'ad ka ba nɔɔdi kpɛn'ɛsid bugulimin si'em la. 
11 Moab dim la na yadigi ba nu'us 
wʋʋ onɛ lugid ku'om yadigid o nu'us si'em la. 
Wina'am na sigisi ba nyɛɛsim la teŋin 
la'an nɛ ban mɔɔd nɛ nimmua si'em la. 
12 O na nwa'ae ya zaŋguom kpi'ema la, 
o na sigisi li wʋsa digil teŋin 
ka li lieb titan.