Wp/khw/عطاو الرحمن عدیم
| Atta Ur Rahman Adeem عطاو الرحمن عدیم | |
|---|---|
| آژیک |
1 مارچ 1989 (35)  پاکستان |
| ادبی نام | عطاو الرحمن |
| پیشہ | ادیب، شاعر, افسانہ نگار، مضمون نویس |
| ملک |
 پاکستانپاکستان |
| قومیت | چترالی |
| شہریت | پاکستانی |
| تعلیم | ایم اے، بی-ایڈ |
| یونیورسٹی | پشاور یونیورسٹی و ملاکنڈ یونیورسٹی |
| سال | 1989 4 |
| اصناف | حمد، نعت، غزل، نظم، دعا، ہائیکو، غیر منقوطہ کلام، مناجات وغیرہ |
| مضمون | شاعری |
| نویوکو کوروم | تحقیق |
| Website | |
| کھوار اہل قلم | |
عطاو الرحمن عدیم کھوار زبانو نوجوان شاعر آسور-عطاو الرحمن عدیم شاعر 1 مارچ 1989ء حسین آباد اٹانی ( ایونہ) پیدا ہوئے۔
مختصر تعارف[edit | edit source]
کھوار زبانو نوجوان شاعر و ادیب عطاو الرحمن عدیمؔ ولد حاجی رحمت ہادی یکم مارچ 1989ء ضلع چھترار تحصیل مستوجو ای مشہور دیہہ کشمو "چھینیا" پیدا ہوئے، وا ہتیغار گیتی 25 سالاری ایونو حسین آباد اٹانیا اباد اسور۔
تعلیم[edit | edit source]
ہائی سکول بروزا میٹرک کوری، ملاکنڈ یونیورسٹار پرائویٹ گریجویشن کوری، ایم اے وا بی۔ایڈ پشاور یونیورسٹیا ریگولر طالبعلم حیثیتہ کوریکار اچی ڈبگری گارڈن پشاورا میڈیل سٹور گنی دوائیو کاروبار شروع اریر۔
شاعری[edit | edit source]
عطاو الرحمن عدیم اسکولہ اوشٹہ اسیکا تان تت بپو زبان کھوارا شاعری شروع اریر۔ غزلو سم جستہ تقریباً شاعریو تھمام اصنافہ طبع ازمائی کوریسور۔ ای شعری مجموعہ "احساس" زیر طبع شیر۔ ہیغار علاوہ مضمون وا افسانہ نگاریا دی ای خاص مقام حاصل کوریسور- وا تان کھوار نثری مجموعہ " کھوار مضمون، افسانہ و سفر نامہ" دی ترتیب دویان۔ شعر و شاعریا عطاو الرحمن عدیم بو کم عمریا وا بو کم وختہ تان ای الگ پہچان وا خاص مقام حاصل کوریسور، نظمو صنفان سم جستہ نثری اصنافہ دی بو کوروم کوری کامیابی حاصل کوریسور
اردو شاعری[edit | edit source]
عطاو الرحمن عدیمو کھوار شاعریو سم جستہ اردو شاعریہ وا نثر نگاریہ دی بو مہارت شیر، اردو شعری مجموعہ دی ترتیب دیتیسور، مگر کھوار زبانو سم جنونو حدا پت محبتو وجہین وا کاروباری مصروفیاتن وجہین خور زبانانتے خاص توجہہ دیکو نو بوین۔ عدیم تان اردو شعری مجموعہ " پردیسو" دی شاو منطر عامہ انگیکو ارادہ اسور
کھوار اہلِ قلم[edit | edit source]
انجمن ترقی کھوار، مئیر وا کھوار اہل قلمو سم جستہ خور دی تنظیمان سم وابستہ اسور۔ کھوار اہل قلم حلقہ پشاورو صدر حیثیتہ تان فرائضان سرانجام دیاو گوین، وا کھوار اہل قلمو زیر انتظام شائع باک ادبی دو ماہی رسالہ "ادبیات چترالو" معاون ایڈیٹر وا مئیر تنظیمو زیر انتطام شائع باک رسالہ "کھوار نامو" پشاورو خاص نمائندہ حیثیتہ دی کھوار زبانوتے تن خدماتن پیش کوراو گوین۔
ایوارڈز[edit | edit source]
کھوار اہل قلمو زیر انتظام "کھوار زبان و ادبو ترقیو راہا کھیج کوتھاج" موضوعہ کھوار مضمون نویسیو مقابلہ جوو پوزیشن گیتی ایوارڈ گنیسور وا مختلف تنظیمان ویشکیار اسناد دی حاصل کوریسور۔
نظم[edit | edit source]
علم تپ گیر چھویو روشتیو غونہ ویشکی منزلو ای کشتیو غونہ
لاکھیکو بند بُوتھالو وور تیلو غون اُوژوریک ہر ویشکی ووریو غونہ
بوغے چینوتے دی بوغیلیک کی ہوئے مشکی کوسے ہیرو تھروشنیو غونہ
کیہ دی مثال دُوستیو یہ جہانہ نِیکی کتابو سوم دُوستیو غونہ
علم مثال ای سمندرو وا تہ مثال ای قَق بِیرو ماچیو غونہ
سوری عقلو تہ جہالتو پردان پھیرکی پھار ئِی پیچھور قاچیو غونہ
علم ای فرض عورت کُلانو سورا ریتائے ہستی مہ خوش نبؐیو غونہ
اَپاکہ خال کوری لوڑے عدیمے شیرینی فقط ہو ماچھیو غونہ
عدیم
2:- افسانہ "ہردیو رشتہ" تحریر! عطاو الرحمن عدیم
خان فوجیو موژغیشٹی ژور نوشین اوچے اوا بو چیقیاری ملگیری، اوا اسکولہ ترویو جماعتہ اسیکا نوشینو دادا دی توغو اسکولہ داخلہ کوریتاے، ہر چھوچہ تیار بیتی مہ دوری گیکو توغو گنی اسکوتے بیم اچی گیاوا تو گنی انگوم، چیقیو نافہمیو حسین دورو اسپہ ای بیتی تیریتم.. اوا پونجو دیتی ہائی اسکولوتے بیکار اچی زندگیو رنگ ہتے قسمہ نو بہچیتانی، اسکول دودیری بیکین وا اسکولو کوروم زیاد بیکو وجہین پروشٹو غونہ ہر وخت ایغو نسہ ہال بیکو نو بوسی،مہ اوچے ہتو موژی ہردیو ہش مظبوط رشتہ اوشوے کی ہتو پیچھی مہ اسکولوتے بوغارو تان نو گوے بس مجبورئین بیم، اسکولہ بی دی ہسے مہ یادی گیتی لمحہ متے جوش سالو غونہ سریر، اسکول چھٹی بیکو سوم تان دورا توری بستو شارداغیزو ٹیکہ لاکھی شاپیکو دی فہمہ نو گیتی بی کیہ علاجہ توغو سوم تاروم، وا ہسے دی مہ غونہ تان بو بے صبریا مہ انتظارو کوے.. چیقیو نافہمیو وخت، ژانی کیہ غلط سوچ اسپہ نیکی بس ہمیشہ ای بیتی ہال بیکو وجہین ایغو بچے ایمیتی بریوسی، اسکولار گیتی ای بیتی مدرسوتے بیسی اتیغار گیتی ویزینا پت ای بیتی اشٹوک کوری وا دوروتے گیکو ہوشہ نو گیکو شامو تھکنا تھکیا دورو روے گیتی اسپہ گنی دورانتے الونی، اتوارو انوس تھے ویزینا پت ای بیتی کیہ وت مہ دوری کیہ وت ہتو دوری بی اشٹوک کوری انوس بی شامتو دوئے.. نوشین دی پونجو دیتی ہائی اسکولوتے بغاے وا اوا اوشٹو جماعتہ بغاتم، تھے اسپہ مصروفیت زیاد ہونی مگر وا دی ہر انوس نمازگرو وختہ کھاران ٹیکہ برونہ نیشی لوا چاکوسی، بو شھیلی زندگی، دنیار بے خبر تان دنیا مست ہمیشہ ہوساو ہال بوسی.. ہسے اوشٹہ بیکو اوا جوشو دیتی نتیجہ گیکو انتطارا اسیتام مہ دادا متے ریتاے کی "اے ژاو جوشہ جام نمبر گنی پاس کی ہوو کالجہ میڈیکلوتے داخلہ کورے، اوا انگار دی سبق ریکو نو بیتم تسوم موقعہ شیر وخت شیر جام سبق رے لوٹ موش بوس" ریکو مہ ہردیو ٹیکو ورینز پرائے، زندگیا اویلو دفعہ بو زیاد غمگین ہوتم، دادوتے انگار سورانالی "جام لا دادا" رے جواب پریتم مگر مہ ہردی نوشینو سر جدا بیکو باالکل نو مشکاوشتائے، ہے وختہ ہوش نو کوراوشتام مہ موژا ہتو بچین کیہ ہش جذبات و احساسات اوشونی کی مہ ہتو سر دودیری بیکو نو لآکاوشتانی، ہتیغار اچی ہر وخت غمگین ہال بیکا پریتم، نوشین بشار گنیکو دی کیہ مہقول جواب نو لے لوو خوری غیریم، ہے موژی جوشو نتیجہ ہانی اسکولہ بیکو پتہ ہوے کی اے گریڈا پاس بیتیسوم، استازان متے اسپہ موخو روشت ارو اسپہ سورو ژانگ ارو رے بو دعا دیتی سرٹیفیکٹو متے پرانی، ہتے لوٹ خوشانیو موقعہ مہ موخہ ژینگی نو گیک دی ای لوٹ سوال اوشوے، مگر ہے سوالو جواب مہ تانتے دی پتہ نو اوشوے، دورا گیکو دادا دی بو خوشان بیتی متے بو پیسہ پراے شیرینی بوژیتانی دوری ہلاگل ہوے، مہ ژانوتے قبال بیتی اف نیسی برونہ بی ڈوک دیتی نیشیتام ہے موژی نوشین دی مہ نسہ گیتی بمبارکی کوری مسوم لوا چوکیکا پراے، ہسے پروشٹو غونہ تان ہوساو مسوم لوا چوکیکا پراے، مگر اوا خود بیتی نیشی غیچھان چپ نو کوری تو موختو لوڑاو ہال ہوتم، ہتو موختو لوڑیکو مہ ہردیو ٹیکہ شرو باوشتاے وا ہے سوم جستہ ہیہ سوچو دی کوراوشتام کی ہمو سر دودیری بی کیچہ بیتی ہال بوم؟ ہے انوس بو زیاد مشقولگی مسوم اریر، ہتے موژی ہسے مہ درونگار خاموشیو وجہین تہ مسوم لو دیارو نو گوین رے کروئی ناچیت کوری پھار غیری نیشیکو مجبوران اپاک پھت کوری توغو خیشیتام، ہسے تو کھیوتے غمگین اسوس نہ لو دوسن، نہ ہاسیسان، ایمیتی بدیل بیتیسوس کیہ وجہ رے مہ ڈانگ دوسی بشار گنیتاے، اوا توغو تن پروشٹہ نیشے شوے بی تو موختو لوڑی توغوتے ہیہ خاموشیو راز مہ تانتے دی پتہ نکی دادا کالجو لوو دیکار اچی اوا ہاموش بیتیسوم ریتم، ہسے متے کالجوت بوغاوا وا خفا بونیا؟ روئے کالجو نامو گنیکو تان خوشان بونیان کیہ رے مہ سورا ہوسیتاے، ہے وختہ مہ احساس ہوے کی نوشینو سر جدائی مہ موژا ای خاموش ہونو شکلہ گیتی کالجو راہا کوتھاج ساوز بیرو بیرائے، مگر ہسے ہمی لوان ہوش نو کوراوشتاے، ہوستہ چوکی اہئے ریپھے مہ گنی دوروتے راہی بیکو وا ہردیار توغو لوڑاو راہی اریتم.. کالجہ داخلہ کوری ہاسٹلہ ہال ہوتم، ہفتہ ای دفعہ دوروتے بی نوشینو سوم ملاو بوم مگر کوشش کوری دی پروشٹو غونہ توغوتے شوئے بیکو وا ہتے قسمہ ازاد لوا چوکیکو نو بوم، شاید زمانہ بدیل بیتی اوشوے مگر صرف مہ بچین۔ ہسے ہتے قسمہ تان ہوسی مذاق کوراو مسوم لوا چاکور مگر مہ موژا پروشٹو غون بیکو ہمت ختم بیتی اوشوے، ہے وختہ اویلو دفعہ مہ احساس ہوے کی مہ ہتو سوم محبت بیتی اوشوے، پروشٹو ہتے ہوست لیگے مذاق کوریک توغوتے عزت کوریکا بدیل بیتی اوشوے وا لو دیاوا لاپرواہی احترامو شکلہ غیچی گیاوشتاے.. ہسے دی جوشو جماعتہ بی پھوک سنجیدہ غونی ہوے وا مہ غونہ ہسے دی پھوک اچی غیستی بیتی اسپہ ہتے چیقیو آزاد وا حسین دورو مودا پورا ہوے، دوشنبہ انوس ہاسٹلوتے بیکو انوس متے گوربسی وا شنبہ ہاسٹلار گیکو انوس نیمیژ خمیک اوشوے، پورا سوت بس ہتو پوشیکو ارمانہ ہال بیتی کیہ وت کی دورا توراوشتام خور کھیو فہمہ نو گیتی سفان سر نست نوشینو بشارو گنیم، ہتو سورا غیچ توریکو مہ ہردی تن ژاغا گوے وا متے سریر کی بس گھڑیو شونج ہیہ ژاغا کی ریپھوئے وا اوا قیامتہ پت غیچھان ای چپ نو کوری ہمو موختو تان لوڑاو کی ہال بوم، نوشینو سوم حدار زیادہ محبت کوراوشتام مگر شون سوئی اوشونی۔ ہاسٹلہ بی ہمیشہ غیژی تان ای گوچہ بی کیڑاو ہال بوم، ہردی مہ ہانی مجبور اریر کی ایمیتی گدیری بیکو ہوتم، چھویو نوشینو بارا سوچ کوری اورارو نو گیاو شاپیکو فہمہ نو گیتی لاہازہوتم فقط بیکار بیتی بغاتم، ہے موژی دادا مہ پوشی واہم بیتی کالجہ گیتی متے چھٹی گنی علاجو بچین مہ گنی پشاروتے الیکو تیاریو اریر، پشاورو نامو گانیکو تان مہ کھوڑو ورینز پراے کو ریکو اوا کیہ دی صورتہ کیہ دی حالتہ نوشینو سر ای ساعت دی دودیری بیک نو مشکاوشتام، نانو چکے دادوتے رے پشاوروتے بیکو کینسل کوری ہئی تان ڈاکٹرو پاشے دوائی گنی دوروتے ہاتم، دورا گیتی نوشینو سورا مہ غیچ توریکو بو خوشان ہوتم، ہسے دی شاو شاو گیاو مہ بشارو گنی مسوم مشقول بوے، مہ بو زیاد خیالو کوے، ہے موژی اوا جوہجوو امتحانو پریتم وا نوشین جوشو دیکار اچی وا سبق نو رے دورا تان ہال ہوے.. ای انوس نمازگرو وختہ مہ موبائلہ مسیج ہاے ہسے! السلام علیکم. اوا! وعلیکم السلام. ہسے! کیچہ اسوس لا مہ یار؟ اوا! جام کیہ برار تو کیچہ اسوس؟ ہسے! اوا برار نو کیہ اوا خور کا اسوم؟ اوا! تہ ہوش نو اریتم تان لوو دیت؟ ہسے! اوا ہسے اسوم لا مہ کیچہ ہوش نو کوسان؟ اوا! ہسے کا؟ مہ کا ہسے نکی وا. ہسے! اوا ای ژاغا تہ پوشی تہ گدیری بیتیسوم تسوم محبت کومن۔ ریکو اوا ائندہ وا ہیا مسیج نو کورے رے وا جواب نو پریتم. ہتیغار اچی ہتے نمبرار بار بار مسیج گونی مگر اوا جواب نو دوم ای انوس متے ہش مسیج اریر کی اوا جواب دیکا مجبور ہوتم. ہسے! تو کوسوم کی محبت کوسن ہسے متے پتہ کیہ ہسے تان متے لو دیتیسور. اوا! کا تتے لو دیتیسور؟ متے دی لو دیت کی. ہسے! تو کوس بچین کی لاہاز بیتی کالجو پیچھی دورا گیتیسوس ہسے۔ اوا! کا؟ نوشین تھے نو؟ ریکو وا مسیج نو اریر، اچہ ہتے نمبرو کوس پاشیکو متے لو پرانی کی ہسے نوشینو تان دورو نمبر براے، ہسے مسر ہآل نیزیتاے یا مسوم مزاق کوریکو اوا بلاواسطہ تان محبتو اظہارو اریتم، ہتیغار اچی جو بسہ پت وا مسیج نو ہائے، مہ ذہنہ قسمہ قسمہ سوالات پیدا ہونی، ہے جو بس مہ اورارو حرام ہوے وا ای ساعتوتے دی متے سکون نو ہوے، بو سوچ کوریکار اچی مہ برداشت نو بیتی ترویو انوس مہ ہیہ لوو سورا کی خفا بیرو برائے معافی مشکیم رے اوا تان مسیج کوری نوشینو سوم ہے بارا لو پریتم، تھے ہسے دی تان محبتو اظہارو کوری ریتاے کی "اسپہ ہیہ رشتہ ہردیو کیہ، اسپہ قیامتو ملگیری کیہ، ہیہ لوو کار کوری ننار نوغ اژیتم وا ای ڈشٹ خو بوردیتم، وا متے تو کالجوت بوغاوا اچی غیستی بیکو تان مہ شک بیتی اوشوے رے ہوسیتاے.. محبتو اظہار بیکار اچی دوبارہ پروشٹو غونہ ایغو سم ملاو بیکا پریتم، زندگی دنیا تان اسپتے جنت غیریتاے، ہیہ دنیا شا اشپیوا رے اسپتے پتہ نو اوشوے ای دفعہ ایغو موختو لوڑیکو دنیو تھمام غم دودیری بیتی ہیہ دنیا بو حسین بیتی غیچی گیاوشتاے.. ہے موژی مہ دوری دی اسپہ بارا پتہ بیکو مہ دادا متے وا توغو سم ملاو نو بوس کوس عزتہ داغ مو چاکاوے، ریکو اوا سر_عام نوشینو سوم تان محبتو اظہارو دادو نسہ کوری نوشینو ہتے دیرو لوو پریتم "اسپہ ہیہ رشتہ ہردیو کیہ، اسپہ قیامتو ملگیری کیہ" وا سفا لو پریتم اوا نوشینو سوم ہردیار محبت کومن ہیرو سر غیر ہال بیکو نو بوم، دادا مہ تان نسہ نیشئے شھیلی طریقہ مہ نصیحت کوری ریتاے کی اے مہ بلبل! ہمی دنیو روے صفا وا ہردیار محبتوتے نو لاڑینی کوستے کی پتہ ہوے ہیتان عزتہ داغ چاکور رے وا مہ توغو سوم ملاو بیکو راہو بند کوری ریتاے کی ہسے تہ ہانی کی خوش ہتو تتے ویچھی سبقو کی پورا ارو تھے تتے انگوسی ہانیا پت اوا کیاغ کی ریمان مہ لوو کار کورے، ہتیغار اچی نوشینو سوم روبرو ملاو بیکو بند اریتم، وا دودیریا ایغو لوڑی تھروشنی غیچھان اوغ پئیکا پریتم، ہر وخت مسیجہ لوا چوکاو تن ہردیو لوان ایغو سم دیاو ہال باوشتم چھویو مسیجہ لوا چوکی تن خوشپان دنیو شھیلی کوری ساوزیکو موژی روشتی پستہ دوے.. ہے موژی نوشینو لاہورا موشانتے دونیان رے شا خبار مسوم توریکو مہ سورو اسمان چھیتی خومیتاے، دادو نسہ بی کیڑی لو دیکو مہ دلاسہ دیتی اوا فوجیو سوم لو دیتی نوشینو تتے مشکیم ریتاے، ہے انوس ویزینا پت بیقرار بیتی دادو اچہ کوسیتام، مگر ہسے کورمان سوم چوکی ویزینہ پت تو غوش نو بیکو اوا بوتہ کروئی شاپک نو ژوتی پوریتم، دادا مہ نسہ گیتی پریشان مو بوس اوا چھوچی راغیشٹی تان پھار بی تو تہ نامہ کوری گوم ریکو مہ ژان ژاغا ہاے، ہے چھویو ای ٹک بیکو نو بیتم، پھاتوکتو دار دیتی روشتیو خامیتام، چھوچی بیکو دادا پھار بی نوشینو تتو سوم لو دیکو ہسے صفا انکار کوری اوا تن ژورو لاہورا موشانتے دومن ہیہ موژی ہتیت مو ویچھاو گونیان ریتاے۔ دادا توغو سوم بو چوکی ہیا تان شویا تان موژی رشتہ کی اریتم جام، مہ ژاو تہ ژورو سم محبت کوین کیہ دی صورتہ اف ہتے رشتو ختم کورے ریکو نوشینو تت قہری بیتی ریتاے کی اوا کوستے کی تن ژورو دومن ہسے کالجہ پرنسپل، سالہ چھور دفعہ بیریو ملکو دوروتے بیران تروے ژاغا تو بنگلہ شینی، تہ ژاوو سوم کیاغ شیر؟ تہ ژاو کیہ اشناری نہ تو سبق پورا بیتی شیر، نہ تو نوکری شیر، نہ تہ کیہ سرکاری نوکری شیر مہ ژورو چھوئے کوری تان مریمی ریکو دادا دی قہری بیتی توغوتے ریک نو ریکان رے اچی ہاے۔ دادا دوری گیتی مہ نصیحت کوری ریتاے کی اے ژاو مسوم بو بےعزتی ارینی تو مہ مجبور کوریکو ہتیرا بیستام تان دادو عزتو کی خیالو کوسن تہ موژا غیرت کی شیر وا ہے بارا سوچ تان مو کورے.. دادوتے جام وا توغو سوم ملاو نو بوم ریتم مگر ہردی مہ قابوا نو اوشوے، نوشینوچے مہ موژی کھوشت مسیجہ لو باوشتاے ہسے متے اوا ہتے پنجابیو کیہ وت دی نو الوم اوا تسوم گیکوتے تیار مہ اوشٹوراوے رے زور دیاوشتاے، مگر مہ دادو "کوس عزتہ داغ مو چکاوے" رے ہتے لو مہ ذہنا غیردیکو مہ ہردی نو ماناوشتاے۔ ہردیو ٹیکہ بوخت لاکھی نوشینوتے تن تتو مجبور کوری ہے رشتو ختم کورے رے زور دیکا پریتم، ہسے تن تتوتے مہ لوو دیتی اوا دی ہتو سوم محبت کومن ہتو الومن، پنجابیو نو تان الوم ریکو توغو تت الٹا اسپہ سورا الزام لیگے مہ ژوروتے کیاغ کوری ہموش ارینی رے چیق دی ضد کوری اف ہتیتان مشکے رشتو پکہ اریر،وا ہے موژی تان نوشینو ویشیتانی رے شا خبار مسوم توریکو بےہوش باو ہوشا گیاو سوت بس ہسپتالہ داخلہ بیتی کیہ جم بیکو راہ نو بیکو اچی ہاتم، مہ ہردی نس نس بیتی اوشوے،وا کیہ امید نو بہچی اوشوے، مہ موژا زندہ ہال بیکو ارمان ختم ہوے، ہیغار اچی ای ہش تنہائی اختیار اریتم کی ہیہ دنیو سر پورا ای ویشکی بیتی گوچ گوچہ بی ہوس بیتی نیشاو کیڑاو ہال بیکا پریتم، کیڑی کیڑی خیخوڑ باو ہال بیتی غیچی اشرو دی ختم ہونی، مہ ہردی ریپھی اوشوے، مہ پوشی دورو روے دی بو پریشان ہال بیکو ہمیتان غیچھار پوتھوری کی ہوتم کم ازکم ہمیتان ہردیو نو شینیم رے دوبارہ کالجہ داخلہ کوریکو ارادہ اریتم.. چھوے مس اچہ نوشین گیتیسور رے خبار گیکو پھوکے دادو موختو لوڑیکو توغو ژان پولی مہ چوچھو تسلی دیکو کوششو اریر، ہردی نس نس بیکو سوم جستہ دادو پروشٹہ تان سورو ڈانگ ژونی ثابت کوری پھک بیتی ہال ہوتم، ہے موژی نوشین تان ننو سوم بیتی دواختہ ئی نسیکو مہ غیچھار اشرو تنار یو گیکا پرانی، نوشین مہ ننو گوڑی چوکی بو کیڑیتاے ئی مہ اشرو موخو دوکو دیتی پستہ چھوریکا پرانی، متے سلام کوری بشاراحوال کوریکو مہ ہواز قائی بیتی ئی نو نسیتاے، براداشت کوریکو نو بیتی ہے ویشکی دواختہ پھار نیسی نیشو کمران شارانی بی کیڑی کیڑی خیخوڑ ہوتم، ہے موژی نوشین دی دورو رویان غیچھوتے لوڑی مہ اچہ پھار ہاے، مہ نسہ پستہ تان نیشی مسوم لوا چوکیکو مہ ہردی اوخے گیتی بوکتو توری ہواز ئی نو نیسیکین جواب دیکو نو بیتام.. نوشین دورا ہال ہوے ہتے موشو کیہ داراک و سارک نو ہوے وا خور کا دی توغو اچہ نو ہانی، نہ کا تو پوشاو ہانی، نہ کا تو بشارو گانیتانی وا نہ ہتے موش کیہ رابطہ اریر، نوشینو تت دی تان ہتے جمارو بارا ای کٹک لو نو دوے۔ ہے موژی ای سالوچے پھت پھار بیکو توغو ننو شک بیتی نوشینو تتو سوم جنجال کوری توغو ڈانگ دوسی بشار گنیکو تھمام حقیقت سورا نیسیتانی.. نوشینو کیہ موشوتے کی دیتیستانی ہتے پنجابی صحیح پرنسپل براے مگر انگلینڈا ای کالجو، ہتو ای بوک وا جو اژیلی پروشٹی تان استآنی، ہتو گنی انگلینڈا بی ہال بیتی ہیہ موژی سوت مسی کیہ پراجیکٹو بچین بوکو پھار پیچھی پاکستانوتے گیتیسور، ہیا گیکو کا توغوتے چھترارتو ارزانہ بوک ملاو بویان ریکو چھترارا گیتی نوشینو سوم شادی کوری اف اتی کورا کرائین فلیٹ گنی (چنگی ہیہ مہ رے) ہتیرا ہالیسور، سوت مسہ ہتو پراجیکٹ پورا بیکو نوشینو طلاق دیتی تو دادوتے ٹیلیفون کوری اوا انگلینڈوتے بیمان اچی گیکا پت تان ژورو اہئی اتی ہالاوے رے بہنا کوری اف مشکیکو نوشینو دادا اف توری توغوتے ہے لو سف پتہ بیکو تان کردوار پیشمان بیتی نوشینو گنی اچی انگیتیسور.. ہیہ قصہ مہ کارا توریکو مہ ہیش کیہ عقل نو توری توغو تان سر بشار گنیکو ہش دردناک قصہ متے اریر کی مہ پوچ اووژ ہونی، نوشینو غون جام، سنجیدہ وا سفا ہردی والا انسانو سوم ہمی کوروم بیک کیہ مانیکو بش لو نو اوشونی مگر وجہ توغو تتو ہتے ضد اوچے لالچ اوشونی.. وخت پھار شوخچاو ہاے اوا ای دفعہ دی نوشینو موخہ ژینگی نو پوشیتام ہر قسمہ تو سمجھاو کوریکو،وا تسلی دیکو کوششو اریتم مگر سف بیکار، ہتو ہش حالتہ پوشی مسر برداشت نو باوشتاے، اوا ہے وختہ دی توغو سوم شادی کوریکو بچین تیار اسیتام مگر موقع مناسب نو اوشوے ہتو دوری ہے وختہ ماتھمو فضا قائم بیتی اوشوے، کیچہ کوری ای دفعہ دی ہو موخہ خوشانی پیدا کوم رے بو کوشش کوری کامیاب نو باوشتام،ہے وختہ مہ ہردیہ نوشینو محبتو سم جستہ وختو مناسبتہ ہتو سوم ہمدردیو جذبہ دی پیدا بیتی اوشوے، نوشینو ہردیا ہمیشہ غمان طوفان بہچی تو کمزور کوراو الاے، ہر وخت لاہاز بیکا پراے توغو ہردیو سورو بو امبوخ غمان میخ ہش چوکیتانی کی اندریناور توغو وش وش کوری پیچھیتانی، وا توغو سم بیرو ہتے دردناک واقعات توغو ذہنہ ژاغہ گنی تو مفلوج ارینی، وا ای انوس ہش منحوس بیتی ہاے کی نوشین تان بربادیوچے دنیو رویان غلط غلط لوانتے سوچ کوری گدیری ہوے. ڈاکٹرانان پاشیتانی علاج ارینی دام، لاشٹاو، کھوشوکو، تائیت وا کیاغ نو بہچیتانی مگر توشو موڑو اوغ، ہتوتے علاج نو ہوے.. نوشین ہے گدیریئو حالتہ دی مہ نو روخچیتاے، سفان سر بیگانہ ہوے مگر اوا توغو ہردیہ ہتے قسمہ تان بہچیتام۔۔ کو ریکو اسپہ ہیہ رشتہ ہردیو اوشوے دماغو یا ذہنو نو.. ہانیسے دی کی مہ پوشیتاے تو غیچھار اشرو روان بونی، وا چیقیو ای لو ہانیسے دی توغوتے یاد ہر مہ پوشیکا ہتے ای لوو تان دوے..
"اسپہ ہیہ رشتہ ہردیو کیہ، اسپہ قیامتو ملگیری کیہ"
"اسپہ ہیہ رشتہ ہردیو کیہ، اسپہ قیامتو ملگیری کیہ"
مہ محترمان! ہیہ افسانو بارا تان تاثراتن اظہارو خواہ مخواہ کورور کوریکو پسہ شھیلی شھیلی کمنٹان پوشی بو حوصلہ افزائی ملاو بوین مزید نویشیکو شوق پیدا بوین، وا تحریری غلطی یا خور کیہ کوتاہی کی بیتی شینی نشاندہی کورور بو مینادار بوم.. وا کرداران نام کوس نامو غونہ کی بیرانی ہردیہ مو گانور پیشگی معزرت مشکیمان.
شکریہ
3:- نظم "قلم"
زیاد کھونگورو سری شیر موژا طاقت قلمو کی استعمال نو ارو کیہ وت دی غلط قلمو
بوغے ماضیا لوڑے شینی بو مثال تہ بچے سورا بدیل بیتی شیر بو قومان حالت قلمو
ای ویشکی تآن قلمو ای ویشکی ضمیرو لاکھی نیمارا کم تھے نو ہوئ لوڑے تہ حرکت قلمو
کی تہ بستیو حسن بی ہسے ویرآن بیتی شیر لیگیتائ وآغ ہے ژاغا ہوش کورے البت قلمو
نیزہ ویشوان سری تیر اوچے خنجران سری پورا دنیوتے ہنون بو شیر ضرورت قلمو
اے مہ نافہم قآتل ہوستہ تآن تھوئیکو ژاغا گنی حاصل کورے کی علموچے حکمت قلمو
ہردی برق پھت عدیمو نویشی ہردیو لوان ای ہردی پھت کاغذا گنی ہردی پھت قلمو
عدیم
4:- چھترارو پسماندگیو وا منتخب نمائندگانن نااہلیو بارا
لو دیور پارلیمنٹو رویان اوا پسہ تان نوا؟ کو اوا گدائے ہیارا، ہیہ مہ وطن نوا؟ امنو علامت جہانہ ملکو اوا شان نوا؟ نان بیلئیو سلوکو مسوم کوس اوا چھوغوا ہا؟ مانیمان پنجاب اوا نو مگر پاکستان نوا؟
روم ژونو بردو گیتی سف سورا مسلط ہونی ثابت سف کردو ہتے سوچ مہ ہنون غلط ہونی تہ حکمرانیا عوام، ہوالوتے چت ہونی ہوستو کی ہوست گوڑو شینی اپاکی زبان نیکیا؟ پاز نیزی تن لوو دیکو بش تو ای جوان نوا؟ مانیمان پنجاب اوا نو مگر پاکستان نوا؟
تہ ہتو مستیو بچین میٹرو بس چلوران وا مہ گاڑی جمعہ انوسو ٹھک ای بس چلوران وا مہ حالو بشار کیہ کوسان ہوئے تھے بس چلوران وا تہ دستخط کردو کاغذو چھیردو نس چلوران وا مانیمان نا اہل رویان اسپہ منتخب کوسیان ہوئے ہتیت بہتی اسونی تو مہ حکمران نوا؟ مانیمان پنجاب اوا نو مگر پاکستان نوا؟
ای دھرنا اسپہ بچین دی بیروا کیانی بیسیر گنی مہ چھترارو رویان دیروا کیانی بیسیر راولییا پوشاو مہ رویان گیروا کیانی بیسیر صوبہ حکومتو ای ٹھون چھترارا دی شیر وا تہ پشاور پنجابو تانا تو اسپہ کپتان نوا؟ مانیمان پنجاب اوا نو مگر پاکستان نوا؟
ایوالی بنوار اوشوئے بنوو جنت اریر مردانو ہوتی ساوزیتائے لوڑور کیہ حالت اریر نیسے نوشہرو واری شیر کورمان دی البت اریر حرام کی موژاری ہیتان کا اسپہ سوم چت اریر اسپہ خور ملکھو باشندہ نو اسپہ انسان نوا؟ مانیمان پنجاب اوا نو مگر پاکستان نوا؟
سندھا پی پی پیو بھٹو بی بی دی زندہ اسور
ہیتانتے ووٹ دیاک ہیارا ہمیش ترسندہ اسور
اولویاو شریک چئیرمین فقط پرندہ اسور حرام کی بشار نو گنی پھوک دی شرمندہ اسور زپ دور شاپک کو نو دوسن اسپہ غریبان نوا؟ مانیمان پنجاب اوا نو مگر پاکستان نوا؟
تو دی کو پرپی غیریتاو ضلع حکومت تہ شیر نیوسان دشمان لوڑیکو نورانی صورت تہ شیر کیاغ مشکیسان خور مہ ضلع ہرونی عزت تہ شیر راولیا سلوکو مسوم احساس تھے البت تہ شیر اسلامو جماعت کی تہ ہیس اسپہ مسلمان نوا؟ مانیمان پنجاب اوا نو مگر پاکستان نوا؟
نبیو وارث کیہ پسہ جماعت علمان کیہ تہ حقوق العبادو لوان دونیان دشمانان کیہ تہ تو دی کو روخچی نیشیتاو اسپہ کارکنان کیہ تہ ای انوس داسیر ہوالی چھترارو رویان کیہ تہ کم از کم تہ دئیلی اوشوئے ای غیری بیان نوا؟ مانیمان پنجاب اوا نو مگر پاکستان نوا؟
لوڑور کی چھترارو سورا کندوری افت ہانی سیلاب زلزلہ و جہاز خور دی مصیبت ہانی ہیہ سال تھے ہر غزارہ نوغ نوغ مکافت ہانی واریا ایگان غیچو دیاک چھترارا ای چت ہانی ہال بیک چھتراری بیتی یا لو دیور کی گران نوا؟ مانیمان پنجاب اوا نو مگر پاکستان نوا؟
ہیہ سیاست کی پسہ، اسپہ ضرورت نکی ہوئے اسپہ بشارو گانک یارا کا البت نکی کا ریتائے چھترارو رویان ہوست پونگ سلامت نکی اسپہ تان کوری پاشیسی پسہ کی غیرت نکی چھترارو رویان نظریہ #عدیمو داستان نوا؟ مانیمان پنجاب اوا نو مگر پاکستان نوا؟
عدیم
5:- ویداچو
تو اشپیرو چھیرو غونہ اوا شاپٹ داخت ویداچو
تو ٹمبوکی گلو ای چھان اوا زوخ ای ژاخت ویداچو
تو خوش قسمت شھیلی، مہ غون شاترونگ رویو بخت ویداچو
اے شھیلی توت ریکو ریتائے پھیکے اے کمبخت ویداچو
ریتام کی تو سخت شھیئیلی ریتائے کی تو سخت ویداچو
ریتائے تو بادشاہ دی کی ہووء تہ تاجو چے تخت ویداچو
رے ہسے ڈاز باز ریپھیتائے تہ نسہ ہوئے وخت ویداچو
شاپٹ شاترونگ بیک مہ عیب کی نو کو بدبخت ویداچو؟
ریتام تو کو کیچہ کوروس؟ کی ہوئے تھے خوش بخت ویداچو
"شاگوغو لو" نو کیہ کوستے تو جگرو لخت ویداچو
نہ تاجو چے تخت شھیئیلی نہ شیمینی چخت ویداچو
عدیمے ہردی خو شھیلی کیانی بوئے کی بخت ویداچو
عدیم
6:- افسانہ "وعدہ"
نوشین مہ گرامبیشو وا مہ بو چیقیو ملگیری اوشوئے، ای بیتی اسکولا وا مدرسہ سبق ریستم، چیقیو نافہمیو دورو ای بیتی بو شھیلی تیریستم،لوٹ بیتی دی اسپہ چیقیو ہتے فیہیل بدیل نو بیتی اوشوئے، ہسے جوشو جماعتہ اسیتائے اوا دی، اسکول چھٹی بیکو ایغو ویسی ای بیتی دورا گیتی چاشٹ ژوتی اسکولو کورمان برونا بی نیشی ای بیتی کوراوشتم، ہوساو مزاق کوری وختو ہوش نو کوری یور ڈوکو بیلا بیکو دوروتے گیاوشتام، ای ساعت دی ایغو سر جدا بیتی ہال بیکو نو بوسی، ہیہ دنیار دودیری اسپہ تان ای شھیلی دنیا اوشوئے، ہتے دنیا کیہ پریشانی کیہ غم، درد ہیش کیاغ نو اوشونی، اسپہ تان ہتے دنیا مست اسیتام، ہے حسین دنیا اسپہ ہر ای ارمان پورا اوشونی، اسپہ ایغو سر غیر خور کھیو بارا سوچ تان نو کوراوشتم، اسکولو سبقان ای بیتی رے ہمیشہ ہسے تان اسکولہ اوا تان اسکولہ اویل نمبر گوسی، ہے وجہین اسپہ ہر وخت ای بیتی ہال بیکو سورا اسپہ نن تتان کیہ اعتراض نو اوشوئے، بلکہ ہتیت ہیرو قدرو غیچھین لوڑاوشتانی وا اسپہ بچین فائدہ مند جوشاوشتانی. ای انوس اسکولوتے بیکو وختہ نوشینو انتظارو کوری بو گور ہوئے مگر ہسے نو ہائے، اوا ہتو اچہ توغو دوری بیکو نوشینو نان متے ہتو انداو کوین پوریسور ریکو اسکولوتے گور بیکو وجہین تو نو پوشی غیژی تان اسکولوتے بغاتم، نوشینو سر غیر ہتے انوس متے پھار نو بغائے، کیہ وت دورا توری توغو سورا مہ غیچ تارور رے انتظار کوری ہردی ٹھوخ بلوئی اخیر اسکول چھٹی ہوئے، ای دم دے دورا توری ہتو دوری بیکو توغو نان "ہتو گنی ہسپتالوتے بیکو ہمو سوم پارانو لاہازی شیر رے تو داخلہ ارینی" ریکو مہ ہردی نیسی بغائے، دورا بی شاپیک دی نو ژوتی مسجدوتے بی نمیژ کوری تو بچین بو دعا اریتم. مسجدو سلام پایو یو خوماوا نوشینو ہتے شھیلی صورت وا ہتو مہ موختو لوڑی چھوم ہوسیک مہ خیالی گیتی مہ زبانہ توغو بچین دعا تنار تان نیسیکا پرانی، ہے دونیکو موژی ہوش تان نو کوری کیہ وت دورا توریرو بیراتم، نان مہ دوچھارا گیتی ہے حالتہ مہ پوشی بو پریشان بیتی بشار اریر "اے مہ ہردیو بتین کیانی ہوو، تہ کیاغ چھمینیانا؟ ریکو نو لہ نان ہش کیہ لو نیکی انگار تتے ہش سریران رے دوری بغاتم، نوشینو سر غیر مہ دنیا بے رنگ بیتی بی اوشوئے، ہے پریشانیو حالتہ متے سکون نو بیتی ہے ہئی بغاتم، ژانوتے قبال بیتی ہردی اوخے بوکتو توریکو اخیر نوشینو پوشاو ہسپتالوتے بیکو فیصلو اریتم، ننوتے ہسپتالتو بیمان ریکو ہسے دی مہ پریشانیو وجہو ہوش کوری جام لا مہ ژان بوغے ریکو راہی اریتم. بازارا توری گاڑی والا کرایان دیور ریکو جیپو درونگ ہوتم کی خاڑاو تراویح کوین، اوا تختان کوری دورار گیکو موژی جیپوتے خیال تان نو کاردو بیراتم، گاڑیو شاگہتو شوت دیتی تن مجبوریو لوان دیکو دی نو منی متے ریک نو ریکان ریکا پرائے، ہے موژی مہ نسو نیشیرو ای اکھابیر موش "اے مہ ژاو جنجال مو کورور اوا دوم" رے مہ کرایان دی پرائے. ہسپتالہ بیکو نوشین زنانہ وارڈا داخل بیرائے، ہیش کھیوتے مہ خیال نو بیتی نوشینو نسوتے اہئی بیمان ریکو ای موش مہ بازوا دوسی ہیہ زنانہ وارڈ ہئی کولانو بیک منع ریکو مجبوران اچی ہاتم، بیری توغو دادو سم ملاو بیتی بشار گنیکو ڈاکٹر ہمو سوم پرانو لاہازی شیر ٹیسٹان کی اریتم پتہ بوئے رے ہمو داخلہ کوریسور ریتائے, مہ ہردی بیقرار بیتی ہے ہئی کوسیکا پریتم، ہتے موژی کھڑکیو نسین پھار نیساوا مہ غیچ اہئے بغائے کی نوشین کھڑکیو گوچو تان بیڈا پوریسور، شیشوتے شوئے بی اندرینی کوری توغو لوڑیکو موژی مہ چھاغ تو سوری نیسیکو ئی لوڑیتائے، توغو موختو لوڑی مہ ہردی تیز تیز ڈوپھیکا پرائے، مہ اشرو تنار یو ہانی، مہ موژا شیرو انجان جذبات سورا نیسی بو ہردیار توغو لوڑیکا پریتم، ہسے دی غیچھان چیپ نو کوری مہ موختو لوڑی چت شونان بیلینجی ہوسیتائے، ہے وختہ ہمو موخہ ہیہ ہوسیک ہمیشہ ہیہ قسمہ تان کی بہچور وا اوا ہمو موختو لوڑاو تان کی ہال بوم رے سریتائے، زبان بند اوشونی مگر ہیہ وخت اسپہ ہردیہ شیرو تھمام کھوشت رازان سورا نیزی اسپاتے ویریغ اریر، نوشینو سر پھوک وختو ہے جدائی مہ ہش بیقرار کوری اوشوئے کی ہے وختہ "کی دے بی ہیرو گوڑی چاکوم" رے سریاوشتائے مگر حالات وا موقع تن جذباتن اوچے احساساتن تن ہردیا تان کھاڑیکا مہ مجبور اریر، اسپہ ہش ایغو لوڑاو بہچیتام، ہے موژی نوشینو نان مسوم مخاطب بیکو زران بیتی پھار لوڑیتام، پتہ نیکی کیاغ ریتائے شیشو موژین مہ کارا نو پرائے مگر اسپہ خور دنیار انگیتی ہیہ دنیا پیچھیتائے، ہر نمیژار اچی نوشینو بچین کیڑی دعا کوراو ہتے ہال ہوتم، ہے انوس کرایہ مسوم نو بیکو وجہین دوروتے گیکو نو بیتم، نوشینو دادا متے کرایہ دیسیر مگر اوا تان نوشینو سر جدا بیک نو مشکاوشتم ہے وجہین زندگیا اویلو دفعہ اسکولوتے دی جو بس نو بی ہتئے ہال ہوتم. جو بس اچہ مہ دادا نوشینو پوشاو اہئے گیتی تو اسکولوتے نو بی ہئی کیاغ کوسن رے متے قہری بیکو کرایہ نو اوشونی رے بہنہ کوری بچ ہوتم. ہے انوس ڈاکٹران گیتی نوشینو ہسپتالار فارغ ارینی، توغو طبیعت دی جام ہوئے، ای بیتی دوروتے ہاتم گاڑی نیشی نوشین پھوکیاو مہ موختو لوڑیکا پرائے، غیچھان زریعہ تان ہردیو پورا لوان ایغوتے پریتم مگر زبان بند تان اوشوئے، ہردیہ پیدا بیرو ہتے نوژان احساسو وجہین ہتے انوسار اچی دورا گیتی نوشینو سوم پروشٹو غونہ ملاو بیکو مہ شرم بیکا پرائے، ہش ازاد وا ہوساو لوا چوکیک متے گران باو ہائے، ہسے دی پھوک اچی غیستی غونی ہوئے ایغو نسہ نیشی دی پھیک پھیک ہال بیکا پریتم، مگر ہے احساسو اسپہ ہوش نو کوراوشتم شاید ہے وختہ اسپہ چیقیو دوستی محبتہ بدیل بیتی اوشوئے. ای انوس کیہ کورمو بچین نوشینو دورا کوری کال کوریکو ہسے تان اوسنیتائے، سلام، بشار احوالار اچی کورمو لوو پریتم، مگر وا موبائلو بند کورارو نو ہائے، ہسے دی ہے ہئی چکے لوان الائے، وا اوا دی ہے وختہ کیہ شرم نو کوری بو لوا چوکیکار اچی بند اریتم، ہے انوسار اچی نوشین متے میسیج شروع اریر، متے ہیہ طریقہ واہچ سرے ہے ہئی چکے غیردئے محبتو اظہارو کوششو اریتم، مگر ہسے مہ ہتے لوان باالکل ہوش نو اریر، یا ہوش کوریکو سوم جستہ تان سورو نامہم ساوزیتائے، مہ ہردی براق پھت بیتی اخیر تان محبتو کھلم کھلا اظہارو فیصلو اریتم،مہ ہردیو لوان کار کوری ہسے دی لوا پوری متے اوا اویلہ تان تہ ہوش کوریستام مگر تہ چکے صفا اظہار کوریئک مشکاوشتم رے ہوسیتائے، ہتو ہتے ہوسیکو تان محبتو جواب جوشی بو خوشان ہوتم، ہیغار اچی اسپہ زندگی پورا بدیل ہوئے بس ہمیشہ ایغو بارا سوچ کوراو ہال بیکا پریتم، ہردیار محبتو حسین جذبہ اسپہ موژا بیکو وجہین زندگی چیق دی شھیلی باو ہائے، مہ موژا ای عجیب خوف ہمیشہ بہچاوشتائے "ناگاہ کی نوشین مسر جدا ہوئے" کیچہ بوم رے، ہر لوا نوشینوتے وعدہ کورے وعدہ کورے ریک مہ عادت اوشوئے، مگر نوشین وعدو بو پابند انسان اوشوئے ہتو کتابہ وعدہ خلافی لوٹ جرم اوشوئے، کیہ وت کی توغوتے وعدہ کورے راوشتم ہتو ای جواب اوشوئے، ہسے ہیہ کی اوا تسوم خور کیہ وعدہ کوریکو نو بوم مگر ای وعدہ تسوم کوم " کیہ دی حالتہ، کیہ دی صورتہ تسر جدا نو بوم تہ پیچھی نو بیم" ہیہ لوو کار کوری مہ ہردیوتے سکون ملاو بیکو وجہین توغو چکے بار بار ہیہ وعدو کوریئاوشتم، وا ہسے دی مہ خوشانیو بچین بار بار ہیہ وعدو مسوم کوراوشتائے، ہسے ای دفعہ دی ئی غیری مہ چکے کیہ وعدہ نو کوریستائے، پتہ نکی ہیرو وجہ ہتو مہ سورا پختہ یقین اوشوئے یا اسپہ محبتو کوڑومی توغوتے پتہ اوشوئے، بس کیاغ دی کی اوشوئے اسپہ ای ژان جو قالپو مثال اوشوتم. جوشو پاس کوری اوا کالجہ داخلہ اریتم ہسے دورا تان ہال ہوئے، "کجا عاشق کجا کالج کی بکواس" کالجہ بی دی ہر وخت مہ خیال نوشینو سوری تان بہچاوشتائے، ہاسٹلہ ہال بیکو نو زوئی نوشینو بچین ہر انوس دوروتے گوم، دورا گیتی ہتو نسہ نیشی سبق ریم، مگر مہ خیال بار بار ہتو سوری بیر، ایگانہ مذاق کوری توغوتے ہش ریکو پھار غیری نیشی دی راوے ریکو مہ ہردی براق پھت بیتی اچی تو سوم سبق ریم رے وعدہ کوری تو ئی غیریم، نوشین بو چنتا،خسمتگار، نیک وا قابل کمورو اوشوئے، ہتے وجہین مہ دورو رویان دی بو خوش، چیقی گنی ای بیتی ہال بیکو وجہین مہ اوچے ہتو دورو روئے ہر وخت ای بیتی ہال بیکو دی اسپتے کیاغ نو رینی، کالجار گیاوا نوشین دورار بیری نیسی برونا نیشی مہ انتظارو کوئے دودیریا تان مہ پوشی اہئے ریپھی نسہ گیکو ہوسی متے سلام کوریکو ہتو موخہ تان محبتوچے خلوصو پوشی مہ تھمام خسمتی نیسیر وا مہ پوشی ہسے دی دونئین ای بوئے. ای انوس کالجار گیتی لوڑیتام کی نوشین برونا نیکی، مہ ذہنہ ای ہزار قسمہ سوال پیدا ہونی، ہسے لاہاز ہویا؟ کوئے بغایا؟ مسر خفا وغیرہ... ئی شوئے لوڑیتام کی سورو موڑو دیتی پھوک پھارو بی نیشیسور، اوا دی توغو نسہ گیتی نیشی سلام کوریکو سورو اسنیتائے کی غیچ غیچہ اشرو ٹیپ،، اویلو دفعہ نوشینو غیچی اشروان پوشی مہ ہردی نیسی بغائے، کیہ نو کیہ لوٹ لو شیر، کی نو ہیہ ہموش نو کیڑیر رے ہوش اریتم، بشار گنیکو جواب دیکو ژاغا چیق دی کیڑیکو توغو چوچھو دلاسہ دیتی تو اشروان تن ہوستین مژی تو ہوستہ چوکی اہئے تیپھے ئی گئے دوروتے بیسی رے تو گنی دوروتے ہاتم، شاپیک ژیبوسی ریکو نو ریتائے، مگر اوا دی ہیہ شاپک نو ژوتیسور رے ہوش کوری تو کی نو ژیبوسن اوا دی نو ژیبوم رے شرط لاکھیکو جو لوسنوک اریر، اچی توتے شوئے بی تو غیچہ لوڑی متے لو دیت کھیوتے پریشان اسوس رے بشار گنیکو ریتاے کی "مہ موشانتے دونیان، مہ مامو ژاو سلیم رے ای وکیل اسور ہسے ہنون مہ مشکی ویشیستائے ریکو مہ غیچ چھوئے ہونی، تہ دادا کیاغ ریتائے رے بشار گنیکو دوری سف دیکوتے تیار اسونی ریکو اسمان چھیتی مہ سورو خومیتائے، سلیم مہ تان بو شوئے ملگیری وا بو جام خسمتگار ڈق اوشوئے، مگر ہتو وجہین نوشینو غیچی اشروان پوشی مہ توغوتے بو قہر گیاوشتائے، ہتو کیہ قصور دی نو اوشوئے کو ریکو ہتوتے دی اسپہ محبتو بارا پتہ نو اوشوئے، اوا تان دادو سوم اسپہ بارا لو دوم تو پریشان مو بوس رے نوشینو دلاسہ دیتی پھار ویشیتام. دی مہ دادو سوم ہے بارا لو دیک تان بریکوتے دعوت دیکو غونہ اوشوئے، کو ریکو اوا تن دادو پوشی بو بوختیکو وجہین تو نسہ ہوسکیو لوو دی دیکو نو باوشتام، چیق دی اسیتم،وا کالجہ سبق دی پورا نو بیتی اوشوئے، بو سوچ کوریکار اچی اویل ننو سوم ہے بارا لو دیتی ہتو چکے دادو سم لو دئیم رے فیصلہ اریتم. نان مہ دادو سم ہے لوو دیکو متے انگار چوکیتائے،اوا غیچ غیچہ اشرو کوری سورو موڑو دیتی تو پروشٹہ ریپھیکو مہ غیچی اشروان پوشی جام اوا نوشینو دادو سم لو دوم رے مسجدوتے بغائے، اوا دی مسجدہ کیہ نوشینو دادو سم ہے بارا لو دویا رے دادو اچہ مسجدوتے اہئے بغاتم، ہتے انوس دادا ہتو سوم کیہ ویزی نو اریر، دوروتے ہاتم، شاپکو فہمہ دی نو گیتی تان کمرائی بی پوریتم، ہے چھویو اورارو متے حرام ہوئے، پھاتوکتو دار دیتی روشتیو خامیتم، چھوچی بیکو دی دادا ہتے بارا کیہ لو نو دیکو اخیر ناامید بیتی کالجوتے راہی کوریکو مہ اشرو غوچھار ہونی، کالجوتے نو بی زومو ٹیکا بی نیشی کیڑیکا پریتم، دونی دونی سست ہردی باو کیڑیکو موژی تان پیشین ہوئے، نوشینو سوم دی کیہ رابطہ نو اوشوئے، میسیج کوریکو ناگاہ خور کا پاشینی رے بوختی مہ ہمت نو باوشتائے، دورا گیکو دادا مہ نسہ گیتی نیشی اوا پھار بیستام، نوشینو دادو سوم ہے بارا لو دیکو نو مانیتائے، ہسے نوشینو تن ای رشتہ دارو ژاو سلیموتے دیتی اساک بیرائے، ہتے روئے ہنون توغو ویچھاو گیاک بیرانی، ہتے ڈق وکیل وا لوٹ مالدار موشو ژاو بیرائے رے متے نصیحت شروع کوری" اے ژاو اسپہ غریبان روئے، تو دی چیق اسوس، تہ سبق دی پورا نو بیتی شیر، نصیبہ البت نیکی، تو تن سبقو ویشکی خیال کورے ریتائے، ہے وختہ مہ پورا خیال نوشینو وا خاص کوری ہتو ہتے وعدو سوری اوشوئے، کو ریکو متے پتہ اوشوئے کی نوشین وعدہ خلافی نو کوئے، کیہ نو کیہ راہ نیزیر رے انگار تآن تن سورو دلاسہ پریتم. ہتے چھویو دی گور بسی اریتم، چھوچی راغیشٹی کا دروازہ ٹھاخیکو دادا متے " اے مہ ژاو لوڑے ہیس کا اسور؟" ریکو دواختو کھلاو اریتم کی نوشینو دادا... تیز تن دادو ہیا ویشاوے نوشین لاہاز بیتیسور ریکو مہ غیچ تپ چھوئے بیتی توغو گوچھین نیسی دے بی نوشینو نسہ توری لوڑیتام کی اپاکین پھینو گوین، مہ ویشکی لوڑی شونان پھار بیلینجی ہوسیکو مہ غیچ غیچہ اشرو بیتی توغو ژینو گوچو نیشیتام، ہتے موژی ہوستو متے ئی رو انگیکو لوڑیتم کی ای کاغذ توغو ہوستہ شیر، ہتو تن ہوستو موڑتو دیکو سوم دادو چیت دی پھار توری مہ دادا توغو ورازہ بی یکدم کلمہ شروع کوریکو، اوا کیڑی "اے دادا ہمو گنی ہسپتالوتے الوسی ریکو موژی تان خڑیک کوری امانت پیژیمیتائے.. مہ اوچے نوشینو ہتے پھوک دنیا ویران بیکو مہ دی دنیو سر امید وا زندگیو افس اوچھیتائے، نوشینو سوم جستہ مہ خوشانی، امید، جذبہ وا احساس پوتھور ہونی، ہتے کاغذو کھلاو کوری لوڑیتام کی
" اے مہ دنیوچے قیامتو ملگیری تسوم مہ ہردیار محبت اوشوئے شیر وا بہچور، اوا تسوم کیہ وعدہ کی کوریستم، ہتو دنیا پورا کوریکو نو بیتم، کو ریکو ہیہ دنیا اسپہ ہردیار محبتو، خلوصو، وفو وا ہے موژی بیرو وعدان کیہ وت دی ہوش نو کونی، اوا خور کوس بیروا مہ وعدہ چھئیسیر ہتے وجہین ہیہ فیصلو اریتم، ہیہ فیصلو ہتیغین اریتم کی اسپہ موژی بیرو وعدہ چھیکو سر پھتوکی بیک جام، اوا قیامتو انوس اللھو سر تہ مشکیم، وا مہ اللھو سورا مہ یقین کی اسپہ ہیہ محبتو وا اسپہ ہیہ وعدو ہتے انوس پورا کوئے، کیہ وت کی تہ یادی ہاتم مہ ہمی الفاظن لوڑے، ہر لفظہ اوا تہ غیچی گوم. خدایار"
نوشینو لوو غونہ ہتے کاغذو ہر ای لفظہ ہتو شھیلی صورت مہ غیچی گوین، وا کیہ وت کی لڑیمان ہسے مہ پروشٹہ نیشی مسوم لو دیروو غونہ سریران، نوشین تان ژانو قربان اریر مگر تان وعدو نو چھینیتائے، وا دنیوتے ای سبق دیتی بغائے کی کوسوم چنگی وعدہ مو کورور، وعدہ کی اریتامی ہتو کیہ دی حالتہ وا کیہ دی صورتہ پورا کورور ہے بچین تان ژانو قربان کوریلیک کی ہوئے دی دریغ مو کورور..
تحریر:- عطاو الرحمن عدیم
7:- مسافریا اساک برارگینیان نامہ، ای برارو فرمائشہ نویشیرو کلام...
دودیری بو دودیری اوا تن دورار دودیری اسوم پردیسا ہنون نن تتان نسار دودیری
کیچہ تہ ژان نو پولیر پردیسئے تہ وجہینین ہونی نن تت دودیری نن تتان جگار دودیری
اسوم ہردیو ٹیکا بوخت لاکھی مجبور ہیارا اوا یارو سری وا مسری مہ یار دودیری
اللھے کورے کی لا رحم اسپہ سفان سورا کا تن دیہار دودیری کا ہیہ ملکھار دودیری
اہل بیرو دودیری، چیقیو یاران دودیری برارو سر کاے دودیری کایو سری برار دودیری
بیران مجبور کیچہ بوے نو بیکا پت جمار ڈاقو پیچھی شابوکو ہوستی نکریزیو رنگار دودیری
ای پھولوک، زارو ژیری وا کوس نمشیرکانو ہونی مسافر مجبورئین نن تتان غیچھار دودیری
عدیموت سف دودیری دوراری دودیری بیکین سرینیان ای ورقا شیرو مہ اشعار دودیری
عدیم