Wp/dtp/Abaya Sinipak

Kopointutunan

Etnik Kadazandusun nopo nga iso etnik di togumu id Pogun Sabah. Kogumuan nopo do Etnik KadazanDusun diti nga poingiyon id Pantai Barat Sabah om id kokompungan. I nopo gulu po, etnik Kadazan om Dusun nopo nga duo etnik di misuai nga maya do inisiatif politik om tudu do popoiso do tinaru diti dumadi do iso tinaru di tagayo id pogun Sabah.

Koubasanan etnik Kadazandusun nopo nga mororobuat miagal mananom parai om mantad dii, poindalanon diolo o iso karamayan i nointutunan sabaagi Tadau Kaamatan. Karamayan diti nopo nga' ramayon ontok 30 gisom 31 Mikat monikid toun soira olimpupusan do mongomot. Karamayan nopo diti nga sabaagi do iso tanda mongounsikou kumaa di Minamagun tu' osonong kopio karalano do mororobuat yolo om nakaanu asil nomot di osonong. Ontok do karamayan diti, ogumu o ababayan maan powonsoyo miagal do piboian Unduk Ngadau. Poindalanon o ababayan diti sabaagi do mongounsikou om kahandaman kumaa di Huminodun, songulun sumandak di olumis di asaga do luminubuk moi do popotingkod do koinggoritan koposion tongotulun id pomogunon di au kaakan tu i nopo tongotanom diolo nga au sumuni.

Mantad dii, poindalanon di piboi'an Unduk Ngadau diti monikid toun om mampayat nopo nga' mantad watas-watas id pogun Sabah om toinsanan di moi ampayat diti piboi'an mananrasuk do rasuk koubasanan id watas sondii. Iso nopo kawo rasuk di asarau maan rosuko di mampayat nga Abaya Sinipak, abaya do tinaru Dusun Tindal Kota Belud.