Wn/shn/ၵူၼ်းႁူဝ်ႁဵင်မၼ်း ဢွၼ်ၵၼ်ၸွမ်းသူင်ႇ မႃႇသႃႇ Alexey Navalny
ဝၼ်းသဝ်၊ မၢတ်ႉၶျ် 2၊ 2024
_-_Crimea_disputed.svg)
မႃႇသႃႇ Alexey Navalny ဢၼ်ပဵၼ် ၽူႈဢွၼ်ႁူဝ် ၽၢႆႇသၢၼ်ၶတ်း ဢၼ်လႆႈသဵင်ႈၵၢမ်ႇၵႂႃႇတီႈၼႂ်း ၶွၵ်ႈရတ်ႈသျႃး မိူဝ်ႈပူၼ်ႉမႃး 2 ဝူင်ႈၼၼ်ႉ ၸိူဝ်းပဵၼ် မုင်ႉႁိူၼ်းမၼ်း လႆႈၸတ်းႁဵတ်း ပၢင်မႃႇသႃႇ တီႈ ဝဵင်းလူင်မွတ်ႉသ်ၵူဝ်ႇ ယဝ်ႉ။ တီႈၽၢႆႇၼွၵ်ႈၵျွင်းၽြႃး ဢၼ်ႁဵတ်းပၢင်မႃႇသႃႇမၼ်းၼၼ်ႉ လႄႈ တီႈၽၢႆႇၼွၵ်ႈ ၶုမ်ပႃႇႁဵတ်ႈ ဢၼ်ၽင်တူဝ်တၢႆမၼ်းၼၼ်ႉ ဝႆႉၵူၼ်းၽၢႆႇႁူမ်ႇလူမ်ႈတင်းၼမ်သေတႃႉ ၸိူဝ်းဢၼ်မႃး သူင်ႇသင် ၶၢဝ်းတၢင်းလိုၼ်းသုတ်းမၼ်းၼၼ်ႉ မီးၵူၼ်းႁူဝ်ႁဵင်မၼ်းယဝ်ႉ။
တီႈ ပၢင်ၵႅဝ်ႈယွၼ်းသူး ဢၼ်ႁဵတ်းတီႈ ၵျွင်းၽြႃး တီႈဢၼ် Navalny ယူႇမႃး တီႈ ၸဵင်ႇၸၢၼ်းဝၼ်းဢွၵ်ႇ မွတ်ႉသ်ၵူဝ်ႇ ၼၼ်ႉ ၼႂ်းၵႃႈ ၽွင်းၼွၵ်ႈမိူင်းၵမ်ႈၽွင်ႈ ၸိူဝ်းၶိုၼ်ႈႁွတ်ႈမႃးၼၼ်ႉ ပႃးၸဵမ် ၽွင်းမိူင်း ဢမႄႇရိၵၢၼ်ႇသေၼႆ ၽူႈဢဝ်ၶၢဝ်ႇ ၸိူဝ်းမီးယူႇ ၽၢႆႇၼွၵ်ႈၵျွင်းၽြႃးၼၼ်ႉ လၢတ်ႈဝႃႈၼၼ်ယဝ်ႉ။ ဝၢႆးသေ ပၢင်ယွၼ်းသူးယဝ်ႉတူဝ်ႈၵႂႃႇ တေႃႉဢဝ်ၶၢပ်ႈတူဝ်မၼ်း ၵႂႃႇတီႈ ပႃႇႁဵဝ်ႈ ႁိမ်းၼၼ်ႉသေ မိူဝ်ႈပႆႇၽင်ၶၢပ်ႈတူဝ်မၼ်းၼၼ်ႉ မုင်ႉႁိူၼ်းမၼ်း လႆႈပိုတ်ႇဝႆႉပၼ် ၵွမ်ႇမၼ်းလႄႈ ၵူၼ်းမိူင်းၸိူဝ်းမႃး သူင်ႇသင်မၼ်း လႆႈႁၼ် ၶၢပ်ႈတူဝ်မၼ်းမႃးယဝ်ႉ။
ဝၢႆးသေ Navalny လႆႈတၢႆၵႂႃႇတီႈၼႂ်း ၶွၵ်ႈလူင်ရတ်ႈသျႃး ဢၼ်မီးတီႈ ပွတ်းႁွင်ႇတူင်ႇမူၼ်းဢႃႇတိၵ်ႉ ၼၼ်ႉယဝ်ႉသေ ၸဝ်ႈၼႃႈတီႈၶဝ် ဢမ်ႇပၼ် မႄႈမၼ်းတူၺ်း တူဝ်တၢႆမၼ်း ၵမ်းလဵဝ်၊ မိူဝ်ႈတႄႇမၼ်း ၵမ်ၵိၼ်းမႄႈမၼ်း ႁႂ်ႈသွတ်ႉသႅတ်ႉႁဵတ်းပၢင်မႃႇသႃႇဝႃႈၼႆယဝ်ႉ။ ယွၼ်ႉပိူဝ်ႈသင်လႄႈ လႆႈတၢႆၵႂႃႇဢၼ်ဝႃႈၼၼ်ႉ တေႃႇထိုင်ယၢမ်းလဵဝ် ဢမ်ႇပႆႇလႆႈႁူႉၸႅင်ႈလႅင်းလီၼင်ႇၵဝ်ႇ။ တီႈၸႄႈတွၼ်ႈ Maryino ဢၼ် Navalny ယူႇမႃးမိူဝ်ႈဢွၼ်တၢင်းၼၼ်ႉ မိူဝ်ႈပႆႇလႆႈ ၶႂၢင်ႉတီႈ ၸဝ်ႈၼႃႈတီႈ တႃႇၽင်တူဝ်တၢႆၼၼ်ႉ ၵျွင်းၽြႃးၵမ်ႈၽွင်ႈ ၸိူဝ်းမီးတီႈ မွတ်ႉသ်ၵူဝ်ႇၼၼ်ႉ ဢမ်ႇႁၢပ်ႇ တႃႇၸတ်းႁဵတ်း ပၢင်မႃႇသႃႇ ၼႆ ၸိူဝ်းပဵၼ် ၵူၼ်းႁဵတ်းၵၢၼ်ၸွမ်းမၼ်း လႆႈမွၵ်ႇလၢတ်ႈၼႄယူႇယဝ်ႉ။
ဝၢႆးသေဝႃႈ ၶၢဝ်ႇ Alexey Navalny လႆႈတၢႆၵႂႃႇယဝ်ႉၼၼ်ႉ ဢွၵ်ႇမႃးယဝ်ႉၼႆ တီႈၼႂ်း ဝဵင်းမွတ်ႉသ်ၵူဝ်ႇၼၼ်ႉ ဢွၼ်ၵၼ် တႆႈတဵၼ်းသေၵေႃႈ ၼႄၵၢင်ၸႂ်ဝႃႈ လႆႈယိၼ်းမွင်ၸႂ်လႄႈ ၸိူဝ်းလႆႈထုၵ်ႇတိၺွပ်း မီးၵႂႃႇ ဢမ်ႇယွမ်း 100 ၵေႃႉ ဝႃႈၼႆယဝ်ႉ။ ဝၼ်းပၢင်မႃႇသႃႇမၼ်းၼၼ်ႉၵေႃႈ ႁူမ်ႈဝႃႈ မီးၽေး ဢၼ်တေၸၢင်ႈ ထုၵ်ႇၺွပ်းၼႆသေတႃႉ ၵူၼ်းႁူဝ်ႁဵင်မၼ်း လႆႈၸွမ်းသူင်ႇ ၶၢဝ်းတၢင်းလိုၼ်းသုတ်းမၼ်းယူႇယဝ်ႉ။
ငိူၼ်ႈငဝ်ႈတိုၼ်း[edit | edit source]
- Cindy Saine. "Thousands Defy Putin to Pay Respects to Navalny" — VOA News, March 1, 2024
- VOA News. "Alexey Navalny နောက်ဆုံးခရီး လူ ထောင်ချီ လိုက်ပါပို့ဆောင်" — VOA News, March 1, 2024
