Wn/shn/ယူႇဢႅတ်ႉသ် ၸႂ်ႉဝီႇတူဝ်ႇ ပၢၵ်ႈပႅတ်ႈ လွင်ႈတႅပ်းတတ်း ၶွင်ႇသီႇၽၢႆႇႁူမ်ႇလူမ်ႈ လိူင်ႈၵႃႇၸႃႇ
ဝၼ်းပုတ်ႉ၊ ၾႅပ်ႇဝႃႇရီႇ 21၊ 2024
မိူဝ်ႈဝၼ်းဢင်းၵၢၼ်းၼၼ်ႉ ဢမႄႇရိၵၢၼ်ႇ လႆႈၸႂ်ႉ ဢႃႇၼႃႇဝီႇတူဝ်ႇသေ ပၢၵ်ႈပႅတ်ႈ ၶေႃႈတပ်းတတ်း ၸုမ်းၸၢတ်ႈၸိုင်ႈလုမ်ႈၾႃႉ ဢၼ်တုၵ်းယွၼ်း တွၼ်ႈတႃႇ လွင်ႈဢိတ်းလူၵူၼ်းသေ ႁႂ်ႈ ပၢင်တိုၵ်း ဢိတ်ႇသရေး ႁႃးမၢတ်ႉသ် ၵိုတ်းယိုတ်းလွင်ႈယိုဝ်းၵမ်းလဵဝ် ၼၼ်ႉယဝ်ႉ။
ၽၢႆႇဢမႄႇရိၵၢၼ်ႇၶဝ် ပၼ်လွင်ႈတၢင်းမၼ်းဝႃႈတႄႉ လွင်ႈတႅပ်းတတ်း ဢၼ်ၼႆႉ မၼ်းတေပၼ် လွင်ႈသုၵ်ႉယုင်ႈ လွင်ႈဢုပ်ႇဢူဝ်း တွၼ်ႈတႃႇႁႂ်ႈ ၵူၼ်းထုၵ်ႇတိၺွပ်းၵႂႃႇၸိူဝ်းၼၼ်ႉ လွတ်ႈဢွၵ်ႇမႃး ၼၼ်ႉဝႃႈၼႆယဝ်ႉ။ တီႈ ၶွင်ႇသီႇၽၢႆႇႁူမ်ႇလူမ်ႈၼၼ်ႉ မီးဝႆႉ မိူင်း 15 မိူင်းသေ ၼႂ်းၵႃႈၼၼ်ႉ မိူင်းပရိတ်ႇတဵၼ်ႇ မိူင်းလဵဝ်ၵူၺ်း ဢၼ်ဢမ်ႇပၼ် ၶႅပ်းၵၢင်ၸႂ်သေ တွၼ်ႈတႃႇ ၶေႃႈလဝ်ႈတၢင်ႇၼၼ်ႉ လႆႈဝႆႉ ၵၢင်ၸႂ် 13 ၶႅပ်း၊ 1 ၶႅပ်းသေတႃႉ ယွၼ်ႉပိူဝ်ႈ ဢမႄႇရိၵၢၼ်ႇ ၸႂ်ႉဝီႇတူဝ်ႇသေ သၢၼ်ၶတ်းလႄႈ ၸင်ႇဢမ်ႇၸၢင်ႈတမ်းဝၢင်းလႆႈ ၶေႃႈတႅပ်းတတ်းဢၼ်ၼႆႉယဝ်ႉ။
ၶေႃႈတႅပ်းတတ်း ၶွင်ႇသီႇၽၢႆႇႁူမ်ႇလူမ်ႈ ဢၼ်တုၵ်းယွၼ်း တႃႇၵိုတ်းတိုၵ်း တီႈၵႃႇၸႃႇၼၼ်ႉ ဢမႄႇရိၵၢၼ်ႇၶဝ် ၸႂ်ႉဝီႇတူဝ်ႇသေ ပၢၵ်ႈပႅတ်ႈၼႆႉ မီးမႃး သွင်ၵမ်းသေ ၼႆႉပဵၼ် ပွၵ်ႈၵမ်းသၢမ်ယဝ်ႉ။ ၸုမ်းႁႃးမၢတ်ႉသ်ၶဝ် ပိုၼ်ၽၢဝ်ႇဝႃႈတႄႉ ဢမႄႇရိၵၢၼ်ႇၶဝ်ၼႆႉ ၶဝ်ပွႆႇၽႆးၶဵဝ် တႃႇႁႂ်ႈသိုပ်ႇ သိမ်းဝႆႉၵႃႇၸႃႇသေ ပဵၼ်တွၼ်ႈတႃႇ ၶႃႈၵူၼ်းတၢႆ ပဵၼ်မူႇပဵၼ်ၽုင်ၼၼ်ႉယဝ်ႉ ဝႃႈၼႆ။
ဢွၼ်တၢင်းဝၼ်းၼၼ်ႉ ဝၼ်းၼိုင်ႈၼႆႉ ၽၢႆႇဢမႄႇရိၵၢၼ်ႇၶဝ် လႆႈပိုၼ်ၽႄႈ ၶေႃႈတၢင်ႇလၢတ်ႈ ဢၼ်ၼိုင်ႈၼင်ႇၵဝ်ႇ။ တီႈၶေႃႈတၢင်ႇလၢတ်ႈ ဢမႄႇရိၵၢၼ်ႇၼၼ်ႉ ဢဝ်လွင်ႈၵိုတ်းတိုၵ်းၸူဝ်ႈၵႅပ်ႉ လႄႈ လွင်ႈတႃႇပွႆႇပၼ်ၵူၼ်းၶိုၼ်းၼၼ်ႉ ၵွင်ႉၵၢႆႇၵၼ်ဝႆႉသေ တွၼ်ႈတႃႇပၼ်လႆႈတၢင်းၸွႆႈထႅမ်ၼၼ်ႉ ၶဝ်တုၵ်းယွၼ်းဝႆႉ တႃႇပၢၵ်ႈပၼ် လွင်ႈမၵ်းၶၼ်ႈၸိူဝ်းမီးဝႆႉၼၼ်ႉ ဝႃႈၼႆယဝ်ႉ။
သိုၵ်းဢၼ်ၼႆႉ လႆႈတႄႇမႃး မိူဝ်ႈ ဢွၵ်ႇထူဝ်ႇပႃႇ 7 ဝၼ်း လုၵ်ႉတီႈ ၸုမ်း ႁႃးမၢတ်ႉသ် ဢၼ်ၵုမ်းၵမ်ၵႃႇၸႃႇဝႆႉၼၼ်ႉ ၶဝ်ႈတိုၵ်း ဢိတ်ႇသရေးသေ ၸွမ်းၼင်ႇ သဵၼ်ႈသၢႆမၢႆ ၽၢႆႇဢိတ်ႇသရေးၶဝ်ဝႃႈ ႁႃးမၢတ်ႉသ်ၶဝ် လႆႈဢဝ်ၵူၼ်းတၢႆ 1,200 ၵေႃႉ တိၺွပ်းၵႂႃႇ ၵူၼ်း 253 ၵေႃႉၼၼ်ႉယဝ်ႉ။ လွင်ႈတွပ်ႇတႅၼ်းၶိုၼ်းၼႆသေ ၽၢႆႇဢိတ်ႇသရေးၶဝ် လႆႈႁၢင်ႈသိုၵ်းၸူးတီႈ ၵႃႇၸႃႇသေ ၸဝ်ႈၼႃးတီႈ ၽၢႆႇပၢႆးယူႇလီ တီႈၵႃႇၸႃႇ မွၵ်ႇလၢတ်ႈဝႃႈ ၵူၼ်းပႃးလဵတ်ႈသတၢႆး ဢၼ်လႆႈတၢႆၵႂႃႇ မီးၸမ် 29,000 လႄႈ တူဝ်ၵူၼ်းၸိူဝ်းႁၢႆဝႆႉ ၶမ်ဝႆႉယူႇ တီႈဢၼ်လူႉဢၼ်လဵဝ်ၸိူဝ်းၼၼ်ႉၵေႃႈ မီးဝႆႉယူႇ ႁူဝ်ႁဵင်မၼ်း ဝႃႈၼႆယဝ်ႉ။
ငိူၼ်ႈငဝ်ႈတိုၼ်း[edit | edit source]
- VOA News. "ဂါဇာအပစ်ရပ်ရေး ကုလလုံခြုံရေးကောင်စီဆုံးဖြတ်ချက် ကန် ဗီတိုသုံးပယ်ချ" — VOA News, February 21, 2024
- Michelle Nichols. "US blocks ceasefire call with third UN veto in Israel-Hamas war" — Reuters, February 21, 2024
