Wn/khw/ادب

ادب

ادب عربی زبانو لوظ شیر وا مختلف النوع مفہومو حامل شیر۔ ظہور اسلاماری پروشٹی قبل عربی زبانا ضیافت اوچے مہمانیو معنا استعمال باوشتای۔ آچہ ای خور مفہوم دی شامل ہوی کہ ھتوعوتے اسپہ مجموعی لحاظا شائستگی ریکو بوسی۔ عربیان نزدا مینویتی کوریک (مہمان نوازی) لازمہ شرافت جوشونو باوشتای، چنانچہ شائستگی ، سلیقہ اوچے حسن سلوک دی ادبو معنا داخل ہوئے۔ کا کہ مہمان داریا شائستہ ہوی ھسے عام زندگیا دی شائستہ بوی ھیہ مہمان نوازیو وجھین ادبو لوظا شائستگی دی ھائی ۔ ھیارا خوش بیانی دی شامل شیر۔ اسلاماری پروشٹی خوش بیانیوتے اعلٰی ادب رونو باوشتای۔ شوکھور لو ، مہر کوریک ، نرمی اوچے شائستگی ھمی سف اشناری ادبو جزو ساوز ھونی۔ بنو امیو زمانا بصرہ اوچے کوفا زبانو سرمایہ تحریروت مزید فروغ حاصل ہوی۔ ھتے زمانا گرامر اوچے صرف ونحو کتاب نیویشونو ھونی تاکہ ادبہ صحت اندازبیان قائم بہچار۔ جدید دورا ادبو معنی مخصوص قرار دیونو بیتی شینی۔ ادبو بچے ضروری شیر کہ ھیارا تخیل اوچے جذبات بانی ورنہ ہر تحریری کارناموتے ادب رونو بوی۔

خواہش تخلیق انسانو فطرت شیر۔ ہے خواہشو ساری آرٹ پیدا بویان۔ آرٹ اوچے دیگر علوما ھیہ فرق شیر کہ ھیارا کیہ مادی نفع مقصد نو بوی۔ ھیہ بے غرض مسرت شیر۔ ادب آرٹو ای شاخ شیر شاخ شیر کہ ھتوعوتے "فن لطیف" دی ریکو بومی۔ میتھو آرنلڈو نزدا ھتے تمام علم کیاغکہ کتابن ذریعا اسپہ سوم توری شینی، ھتیتانتے ادب رونو بویان۔ کارڈ ڈینل نیومین نیویشیران کہ "انسانی افکار ، خیالات اوچے احساساتن اظہار زبان اوچے الفاظان ذریعا ادب غیروران"۔ نارمن جودک ران کہ "ادباری مراد ھیہ شیر کہ ھتے تمام سرمایہ خیالات و احساساتن سورا تحریرا بدل بیتی شینی وا ھتیتان ھش قسمہ ترتیب دیونو بیتی شیر کہ راکانتے مسرت حاصل بویان۔"

• نیویشک:رحمت عزیز چترالی