Wb/dtp/Rokian om Bongkoron

Haro-haro kaka di gulu-gulu po nga songulun kusai kingaran Rokian minongoi poniud id bawang. Sangadau no kaka di minoniud om iso no sada tokoro naanu om guutai no minuli. Soira nokorikot i Rokian id walai, boros ka di Rokian, "Osonong da do pogoyo-goyo'on ku po lo sada om onsokon nogi", ka dau. Posuango' no di Rokian ii sada id suang do bangau. Ongoi no isio kano' ii sompiduo' dau om minongoi podsu pogulu minongoi odop. Koodop no di i Rokian i linumu i sada sinumiliu do songulun sumandak di olumis. Minomorisi om minomogonsok i sumandak om suminiliu kaagu sada pogulu do koposik i Rokian.

Kosuabon nodi, posik i Rokian om nokotigoo' isio tu nokoonsok no om odoropi kopio di walai dau. Kosuai'ai isio tu aa isio nokodoropi di walai om aa kaagu nokopogonsok di kosodop dau. Soira minamanau i Rokian mindahu, siliu no kaagu ii sada do sumandak. Soira korikot i Rokian walai, nokotigoo' isio tu' nokoinsodia no ngawi rinapa. Si'ilo tomod dii i Rokion isai kopio minooi pamalangga walai dau om mooi ngawi pogonsok do rinapa dii om nakaanu isio o iso tua' pomusarahan. Insan kosuabon, sodia-sodia no kaagu i Rokian do mooi indahu nga okon i dii minooi indahu nga minooi lisok hiri siriba do tangga. Au alaid nokokito i Rokion songulun sumandak nokosoliwan mantad ii bangau pinoopian dau di sada om minamanau no i sumandak minongoi id dompuran. Ngoyo no dii di Rokian ongoyo ri kulit di sada hiri bangau om posuango dau pakit. Minooi di isio boros-boros di tondu. 'Isai ko?', ka minomigiak di tondu. Kotigo i tondu om sumiliu daa di kaagu sada nga aa no di milo. Boros no i tondu, 'I sada di nosiud nu digulu oku bo ti. Nga milo oku sumiliu do tondu. Nga aa oku no di milo gumuli dumadi do sada tu nokito oku no diya', ka di tondu. Pinokianu no kaka di di tondu i kulit sada di nongoi di Rokian. 'Nuo di doho ri kulit sada ku', ka di tondu. 'Natahak ku no tasu', ka di Rokian. 'Hombo tiso tasu nongoi nu tahako?', ka di tondu. 'Kad aibo, notutudan ku no', ka di kaagu di Rokian. 'Hombo tinutud nu? Aanu ku po da ri tawu dau', ka di tondu. 'Aibo, poimpakit ku', ka di Rokian. Patahako no di dau ii kulit kumaa di tondu om pinataam kaka di tondu i kulit id soliwan do walai nga nokosoliwan kaka ogumu dapu-dapu.

Insan tadau, tanud no i tondu di Rokian minongoi indahu om nokokito i Bongkoron. 'Isai di kopoi no sumandak pointanud diya?', ka dau. Sinusuyan dii di Rokian ii nokosiud isio o sada tokoro om koinsanai di nosiliu om i Bongkoron nga siongoi di poniud kaka. Sosodopon dii, ongoi no i Bongkoron poniud om ogumu sada nosiud dau nga sianu isio sada di tagayo kaka. Au alaid om nakaanu isio. Guutai no di dau minuli om pinoopi id suang do baladi. Ongoi no kaka di lisok om aiso ii kaka nunu-nunu nosiliu. Aa alaid om koodop isio. Sigog id pitangatuong nga koposik isio nokorongou o tuni moput-koput "brut..brut..brut" ka. Ongoi dau intangai nunu ri tuni nga nokokito isio todu-odu momuapui nga montut-ontut. 'Pogkuro da gia lo todu-odu nogi naanu ku', ka di Bongkoron.

Ponontudukan nopo di aanu mantad susuyan diti nga kada kosionuai kohoro-horoon do tulun om kada katamaha.