Wt/ary/هامش:لفونيتيك/لڤواييلات

From Wikimedia Incubator
Wt > ary > هامش:لفونيتيك > لڤواييلات

دّاريجة فيها تلاتة د لڤوييلات مفتوحين ؤلا باينين، ؤ ڤواييلة مخطوفة (شـٖوا) ب لإضافة ل تّدوير (واحد لواو خفيفة كاتجي مورا بعض لحروف). بشكل عام دّاريجة مافيهاش لمد، عكس لعربية، ب معنى بلي دّاريجة ماكاتميّزش مابين ڤواييلات طوال (ب لمد) ؤ ڤواييلات قصار. حتا ف لّهجات د دّاريجة لي كيكونو فيهوم لڤواييلات طوال (مد)، كيكون تقريباً ديما، ؤ مرّة خرة ماكيكونش تمييز بين ڤواييلات طوال ؤ قصار.

لڤواييلات د دّاريجة[edit | edit source]

  • ا /a/: ف لعربية كيتّرمز ليها ب فتحة َ يلا كانت قصيرة ؤ كاتّزاد موراها ليف ا يلا كانت طويلة. لحرف (كونصونة) لي تابعاه هاد لڤواييلة كانڭولو بلي مفتوح. متلاً ف كلمت كاتْب، حرف لكا مفتوح. نّطقان ديال هاد لڤواييلة كيتبدل شوية علا حساب واش لكونصونة لي قبل مغلّضة ؤلا مرقّقة. لاحض متلاً لفرق ف نّطقان ديال ا مابين طار (ڤواييلة /a/ قريبة كتر ل a ديال لفرانساوية) ؤ تار (من لعربية ثار، يثور، نفس نّطقان ديال ا بحال طار) ؤ تار، من لإتارة (ڤواييلة /a/ قريبة كتر ل ا ديال لعربية).
  • و /u/: ف لعربية كيتّرمز ليها ب ضمة ُ يلا كانت قصيرة، ؤ كيتزاد ليها واو يلا كانت طويلة. هاد لڤواييلة كاتّنطق /o/ يلا جات مورا كونصونة مغلّضة، متلاً: طوبّة، طولة، بــٖولة، فــٖوطة، ؤ غيرهوم.
  • ي /i/: ف لعربية كيتّرمز ليها ب كسرة ِ يلا كانت قصيرة، ؤ كيتزاد ليها يا يلا كانت طويلة. شى مرات كاترمز ل لڤواييلة é ديال لفرانساوية بحال ف زيرو، ؤلا مينوط.
  • شـٖوا /ə/: ڤواييلة مخطوفة مابين سّوكون ؤ لحاراكة. باش نوضّحو لموضع ديالها ف لأمتيلة جّاية، غادي نستعملو شرطة عامودية. لاحض متلاً لفرق ف نّطقان مابين لفيعل ضر'ب ؤ سّمية ضـ'رب، مابين لفيعل حبـ'س ؤ سّمية حـ'بس (بلاصة فين كيتحبس بنادم). لكتابة ديال هاد لڤواييلة ب هاد طّاريقة ؤلا شي طاريقة بحالها، ف جميع لكلمات تقدر تجي تقيلة ولاكين تقدر تكون هادي هيا لإمكانية لواحيدة لي كاينة باش نفرّقو مابين بعض لكلمات (شوف لتحت ف لفقرة علا لكتابة ديال شّٖوا).
  • تّدوير: هوّا حالة فونيتيكية خاصة لي كانلقاو غير ف لأمازيغية ؤ دّاريجة، لي كاتجي بحال واو خفيفة مورا بعض لحروف (كونصونات). لاحض متلاً لفرق مابين كـٰم (مقدار)، ؤ كُم (ديال قاميجة). باش تزيد تّعرّف كتر علا هاد لموضوع شوف تّدوير.

تّأتير علا لكتابة[edit | edit source]

لڤواييلات تّلاتة رّائيسيين[edit | edit source]

بشكل عام، سّيستيم د لكتبة لي كيكونو فيه لڤواييلات مبيّنين (ماشي غير ب لحاراكات) غادي يكون مناسب كتر ل دّاريجة، يلا بغينا لكتبة تكون فونيتيكية، حيت ماكاين حتا شي ساباب يخلّينا نبغيو نفرقو مابين هاد جوج حالات (ڤواييلة قصيرة ؤ ڤواييلة طويلة)؛ متلاً نقدرو نكتبو بوطولة بلاصت بُطولة. ف شي حالات، لكتبة ب ڤواييلات مبيّنين كاتكون هيّا طّاريقة لأمتل باش يوضاح لمعنى ديال داكشي لي مكتوب، متلاً باش نفرقو مابين موعلّيمة، معلّمة، ؤ معلامة بلاصت مانكتبوهوم كاملين معلمة. ؤ هاكا كيقدر لقاري يركّز علا لستيعاب د لمعنى ديال داكشي لي مكتوب، بلاصت مايضيّع وقتو ف تّفكير ف لكيفية د لقراية ديال كلمة لي يقدرو يكونو بزاف د لحتيمالات د نّطقان ديالها، ؤ كول واحد فيهوم يقدر يكون عندو معاني مختالفين لي يمكن يأترو علا لفهامة د لمضمون. هاد لكتبة مناسبة كتر ل نّاس لي يالّاه كيتعلّمو ل لقراية ب لحروف د لعربية (دراري صغار، ؤ لكبار لي كيديرو محو د لؤمّية)، ؤلا لي مامولفينش ديجا يقراو ب لعربية.

ب لموقابيل هاد لكتبة لفونيتيكية تقدر تخلي بزاف د لكلمات لي مولفين عليها نّاس تبان بشكل مختالف، شّي لي يمكن يتّقل لقراية ديال نص ب دّاريجة عند نّاس لي قاريين لعربية، سيرتو ف لبدية ديال تخدام هاد سّيستيم. ولاكين بشكل عام، أي واحد يقدر يولّف سّيستيم لفونيتيكي د لكتبة، لي كيما ديجا مدكور عندو أڤونطاج زايد ديال بلي كيسهّل تّمييز مابين كلمات لي لفرق بيناتهوم غير ف تّشكال.

كاين حتيمال تالت، هوّا نكومبينيو هاد سّيستيمات بجوج (لفونيتيكي ؤ لموحافيض) بشكل لي يحافض علا لمقروئية ديال بزاف د لكلمات، ؤ ف نفس لوقت يسهّل لقراية ؤ لفهامة. هاد طّاريقة يقدر يدخل ف إطارها تدريج ديال لكلمات، بحيت يتسكّنو لأصوات ؤ مانكونوش محتاجين أصلاً باش نزيدو ڤواييلات مبيّنين بشكل كبير. متلاً نكتبو كلمة (كْلْمَة)، بلاصت كاليمة (كَلِمَة)، ؤ كاتب (كَاتْب) بلاصت كاتيب (كَاتِب). تّدريج يقدر يكون أيضا ب تخدام كلمات موراديفة عندها نفس لمعنى، متلاً كتاتبي.

ميتال ديال لتيباس ف جوملة: مشينا نشوفو مدافع لجيش.

لّتيباس جاي من كلمة مدافع لي تقدر تّقرا مْدافع (جمع مدفع)، ؤلا مودافيع (لعّاب شاد لمركز ديال دّيفاع ف فرقة د لكورة، ؤ "لجيش" ف هاد لحالة كاتحيل ل لفرقة د لجيش لمالاكي)، ضونك باش نوضحو لمعنى غادي يكون حسن نكتبو لكلمة بشكل فونيتيكي، بلاصت مانخلّيو لقاري حاير ف إينا معنى لي مقصود، ؤ غادي يخصّو يعتامد علا سّياق لي ماكيكونش ديما واضح.

شّٖوا[edit | edit source]

كاينين مجموعة د لأسئيلة لي غادي يخص نجاوبو عليهوم ف ما كيتعلق ب لكتابة ديال شّٖوا ؤلا لحاراكة لمخطوفة:

  • واش خاصنا نكتبوه أصلاً، ؤلا نخلّيوه كيتّكتب غير ف شّروحات لفونيتيكية (بحال ف هاد لپاج)؟
    1. مانكتبوهش ف نّوصوص لعادية: لاڤونطاج هوّا بلي لكتابة غادي تكون سهل ؤ غادية معا لّي مولفين نّاس، سّياق غادي يوضّح كيفاش خاص تّقرا كلمة (متلاً واش حـ'بس ؤلا حبـ'س). لعيب هوّا بلي يقدرو يجيو حالات ديال لّتيباس يلا ماكتبناهش.
    2. نكتبوه ف نّوصوص لعادية وخا غير مرة مرة: لاڤونطاج، نقدرو نميزو مابين كلمات لي لفرق بيناتهوم غير ف لموضع ديال شّٖوا. يلا كتبناه غير ف هاد لحالات، يقدر مايجيش تقيل علا لڭلب.
  • ب إينا رمز نرمزو ليه، متلاً واش نكتبو ضـ'رب، ؤلا ضٰرب ؤلا شي شكل أخور؟
  • يلا كتبناه، واش تكون لكتابة ديالو ختيارية ؤلا إجبارية؟

عيون لكلام[edit | edit source]

محمد المدلاوي المنبهي، العربية الدارجة، الدار البيضاء: مركز تنمية الدارجة زاڭورة، 2019