Wt/ary/هامش:لفونيتيك/تسكين

تّسكين هوّا حالة فونيتيكية لي كاتكون فيها كونصونة ماتابعاها حتا ڤواييلة. لعكس ديال تّسكين هوّا تّحريك، يعني فاش كاتكون حاراكة تابعة لكونصونة. متلاً، ف سمْسَار، لميم مسكّنة ؤ سّين لي تابعاها محرّكة.

تّسكين ديال لحروف هوّا واحد من لمزايا لواضحين ديال دّاريجة، يلا قارنّاها معا لعربية. سّوكون يقدر يجي ف أي موضع ف كلمة د دّاريجة، سوا ف لبدية ؤلا ف لوسط ؤلا ف لّخر، ؤ يقدرو يكونو حتا جوج د سّوكونات متّابعين (؟). ف لعربية ب لموقابيل، كانلقاو بلي سّوكون ممنوع ف لبدية ديال كلمة (داكشي علاش كاتزاد ليف ف لبدية يلا كان لحرف لّول فيه سوكون، متلاً ف لعربية كانكتبو اقْتصاد، ماشي قْتصاد)، ؤ ممنوع يجيو جوج سوكونات متّابعين.

تّأتير علا لكتابة

لكلمات لي جايّين من لعربية ؤ لي كيبداو ب سوكون، يقدرو يتكتبو ب كل باساطة بلا ليف ف لبدية (متلاً نكتبو قتيصاد/قتصاد، بلاصت اقتصاد)، حيت سّوكون ف لبدية ديال لكلمات شي حاجة لي عادية ؤ مقبولة ف دّاريجة. ؤ يلا درنا قاعيدة باش نكتبو لكلمات لي كيبداو ب سوكون ب ليف زايدة ف لبدية، غادي يولّيو عندنا شلا كلمات مكتوبين هاكا بلا فايدة.

عيون لكلام

محمد المدلاوي المنبهي، العربية الدارجة، الدار البيضاء: مركز تنمية الدارجة زاڭورة، 2019