Wp/niu/momoi

From Wikimedia Incubator
< Wp‎ | niuWp > niu > momoi
Jump to navigation Jump to search

Momoi

Ko e puhala ke foaki e tau mena kai mo e falu koloa kai ke he tuuta kaina, magafaoa, kapitiga mo e falu. Ne fa mahani e tau kaina taki taha kaeke ke fuke e umu, helu mogoia e taha kapiniu kai mo e taatu ke kai e tuuta kaina. Ko e mahani momoi nei kua to lahi e aoga he tau vaha fakamua atu ha ko e mena ai fai puha momoko poke filita ke tuku aki e tau kai tuga e tau ika mo e tau vala puaka kaeke ke olatia ka finatu ke takafaga. Ko e puhala naia ke foaki atu ke fakaoga he falu. Ai ko e mena foaki e kai mo e amanaki ke fai taui, ko e toka ni ke he logona hifo he tagata ne kua foaki atu e kai ki ai, to hoko ni ke he taha mogo to momoi mai a ia ke he matakainaga ne momoi atu kia ia fakamua. Ko e tau Aho Tapu Fanau mo e Aho Kilisimasi ko e tau aho lalahi a ia ne fa mahani ke loga lahi e tau momoi ka uta viko he maaga. Ko e kehe mai e momoi mai he foaki mena fakalofa ke lata mo lautolu ka ahiahi mai ke he haau a kaina poke tuku fenoga atu ke he falu motu.