Wp/mui/Baso Pelémbang

From Wikimedia Incubator
< Wp‎ | muiWp > mui > Baso Pelémbang
Jump to navigation Jump to search

Baso Pelémbang, galak disebut pulo baso Musi, yolah baso apo dialék yang dipakék wong di daérah Pelémbang singgo muaro Sungi Musi. Baso ikak pulo jadi baso penganter sari-ari di Pelémbang.

Baso ikak banyak lugatnyo. Lugat-lugat itu becacak pulo caro ngomongnyo. Ado yang maki vokal o di ujung kato, ado pulo yang maki /é/ apo /e/. Ado pulo perobahan cak /e/ dalam kato berobah jadi /a/ (cuntunyo: amen jadi aman). Dari galo-galo lugat itu, lugat Kuto Palémbang (Ilir) yang galak dipaké wong. Lantak lugat Kuto Palémbang banyak yang maki, lebih-lebih lagi tesebar liwat midia (tipi, kuran, radio), lugat ikak jadi standarnyo Baso Musi. Lantak itu pulo, baso ikak lebé populér diarani Baso Pelémbang.

Baso ikak masé galak dipaki, tapi pecaknyo elah nak nglengit. Idak banyak lagi wong Palémbang, utamonyo budak mudo, yang tereti caro bebaso Pelémbang sari-ari ngan bener, apolagi bebaso ngan alus. Baso Palémbang elah kadang dipaké penuh, galak becampor Baso Melayu ngan Baso Indonésia. Contonyo kato pacak, mak ini galak diganti wong samo kato biso yang diembék dari Baso Indonésia bisa.

Rumpun ngan Asak[edit]

Baso ikak ngasuk kerebat (dulur) Baso Melaya sadi rumpun baso Austronésia. Sakerebat ngan baso ikak yolah Baso Melayu, Baso Minang, Baso Banjar, teko baso negaro, Baso Indonésia. Baso-baso Melaya ikak mentuk nyan namonyo dialect continuum, yolah kumpulan baso-baso nyan batas-batas basonyo dak pulok ceto nian. Laju galak tecampur sikok baso ngan laénnyo.

Baso-baso Melaya pulo ngasuk ung kerebat nyan disebut baso-baso Melayik nyan sekerebat ngan Baso Acéh, Baso Jawo nan Baso Sasak. Dulur jao Baso Pelémbang (sesamo Austronesia) cuntunyo Baso Tagalog di Pilipin, Baso Hawaii, ngan Baso Malagasy di Medegaskar.

Sejarah[edit]

Baso Musi asaknyo yolah sadi dialèk Melayu nyan dipaké wong Melayu di Sumatera Selatan maso abad ko-17, jaman Kesultanan Palémbang Darussalam. Uji William Marsden di bukunyo History of Sumatra (Sejarah Sumatera), wong Palémbang biaso jaman itu maké baso campuran Melayu ngan Jawo.[1] Wong jabo ngan jero istana betutur baso alus nyan berogat sadi Baso Jawo Kramo, lantak Sultan-Sultan Palémbang itu turunan Jawo. Asimilasi antaro wong Palémbang ngan wong jabo(Jawo, wong Ulu, Cino, Ayip) ngayoi kato-kato, milu nulung prosès tebuatnyo Baso Palémbang.

Jaman itu, cumo baso alus nyan dipaké buat nulis. Baso Palémbang sari-ari cumo jadi baso betutur baé. Baso Musi dialék Pelémbang aslinyo ditulis ngan hurup Jawi, hurup Arab nyan dirobah supayo pacak buat nulis Melayu. Dialék nyan laén pernah ditulis ngan Surat Ulu, picak variasi semekuknyo, cumo mirip sikok samo laénnyo. Surat Ulu ikak kudai dipaké pulo ulih wong Besemah nan Lampung, sampé berobah jadi cak kéné. Mekéné, Baso Pelémbang ditulis ngan hurup Latin. Cumonyo belom ditemukĕ ortogerapi nyan sesoi supayo pacak jadi standar buat nulis Baso Palémbang.

Kamus Baso Palémbang belom ado nyan buat lengkap. Studi Baso Palémbang nan karya ilmiahnyo jugo sikiit. Animo masarakat buat belajar Baso Palémbang masih kalah dibanding baso asing. Cumo mekéné elah mulai ado peningkatan minat ngan Baso Palémbang. Ikak pacak tijingok sadi tren busana oléh-oléh nyan banyak maké Baso Palémbang. Midia-midia pulo mulai belumbo nak ngenjuk kontèn-kontèn budayo Palémbang, temasuk pulo basonyo.

Ponologi[edit]

Tato swaro baso Palembang dak pulok laen sadi baso-baso Melayu umumnyo. Cuman ado sikok nyan pacak langsung teciren amen didengerke. Caro nguji urup R di baso Palembang yolah dengan uvular trill (getaran uvular), di buri tenggorokan sano. Pitur ikak laen ngan baso Indonesia di mano R diucap ngan lida samo langit-langit mulut (getaran alveolar).

Baso apo dialek?[edit]

Uji Hudson (1976: 12) dalem kajian baso Melayu dipaki aran isolect yang lebe netral daripado baso apo dialek. Uji dio jugo, "galo-galo unti baso dienjok namo tepisah oleh uwong yang ngomongnyo, telepas dari apo itu, dari teknisnyo, dialeknyo, apopun basonyo". Nah jadinyo baso Palembang ini jadinyo masih ditengah-tengah apo baso apo dialek.

Catetan[edit]

  1. Marsden, William. Sejarah Sumatera (terjemahan History of Sumatra)