Jump to content

Wp/isv/S.T.A.L.K.E.R.: Těnj Čornobylja

From Wikimedia Incubator
< Wp | isv
(Redirected from Wp/isv/S.T.A.L.K.E.R.: Тєњ Чорнобыља)
Wp > isv > S.T.A.L.K.E.R.: Těnj Čornobylja

S.T.A.L.K.E.R.: Těnj Čornobylja (ang.: S.T.A.L.K.E.R.: Shadow of Chernobyl), takože znana kako prosto S.T.A.L.K.E.R., jest kompjuterna igra roda strělanok prvo-osobovyh, ktora zostala stvorjena ukrajinskym studiom GSC Game World s elementami RPG, prěživanky i strašilky. Zostala izpuščena dlja Majkrosoft Vindovs v 2007 godu.

Prva igra v seriji S.T.A.L.K.E.R. V 2008 godu byla opublikovana druga igra serije, "S.T.A.L.K.E.R.: Čisto něbo", a v 2009 godu tretja, "S.T.A.L.K.E.R.: Poklik Pripjati".

Pověst

[edit | edit source]

Vstupjeńje

[edit | edit source]

Odigrańje igry počinaje se 1 maja 2012 roka. Igrač vidi vvodno video: doždlivoju nočeju težinovozka, prěvozeča těla ljudi, se razbivaje s povodu blěskavicy, ktora porazila tu težinovozku. Nastupnym jutrom někaky stalker nahodi odlomky težinovozki, obgledaje těla ljudij(stalkerov, vojinov, najemnikov) i posrěd njih nahodi jedinsvtenogo prěžitelja - protagonista (to jest glavnu osobu). Želajuči dobyti nagradu, stalker nese prěžitelja do městnogo trgovca na imenu Sidorovič.

Prěklad dialoga s russkogo jazyka medžu Sidorovičem i tym stalkerom:

— Čto jesi privlačil?
— Tělo. S težinovozki[upper-alpha 1] smrti. Imaje označenje...
— Pravila znaš?.. Izkydni go.
— Jednak je on živy!
— Lžeš! Ne može byti!
— Nehaj mene Zona sožre, ako lžem.
— Davaj go ovamo! (imaje na myslji stol)

(Sidorovič obgledaje jego kěšenji, nahodi Osoblivy Kěšensky Kompjuter (OKK), na ekranu ktorogo je nadpis "KILL THE STRELOK", čto znači "UBITI STRĚLCA")

— Tako... Za tutu hrěnovku[upper-alpha 2] dam tobě...

(v tutom migu prěžitelj vyhvataje svoj OKK iz ruk Sidoroviča)

Igrač vidi označenje-tatuaž "S.T.A.L.K.E.R." na rukě protagonista. I tutaj vvodno video se končaje.

Osnovno dějstvo

[edit | edit source]

Glavna osoba budi se v bunkeru trgovca Sidoroviča, jednako ničego ne pametaje iz svojej minulosti, navet svoje ime. Po pričině, že imaje někaky divny-neobičny tatuaž na svojej rukě, Sidorovič daje jemu na ime "Označeny" ("Мічений" po ukrainsku i "Меченный" po russku). Okazyvaje se, že glavnu osobu prěvozila jedna s tak zvanyh "Težinovozok smrti". To ime městni stalkery sut dali težinovozkam, ktore periodičto javjajut se iz Srědišča Zony (to jest ČAES). Nikto ješče, kromě Označenogo ne izbavjal se iz Težinovozki Smrti.

Trgovec povědaje jemu, že on nyně musi malko popracovati na njego, i že on postaraje se najdti někaku vědu o Strělce.

Itak, Označeny, jesm tebe spasl, i v blagorodstvo igrati ne budu: izpolniš za mene malku zadanij i vse dobro. I potom poglademo kako brzo tvoja glava od amnezije projasni se. A po tvojej temě, postaram se doznati se... Hrěn go zna pošto toj Strělec tobě potrěben je, ale! ja v čudže děla ne lězem, htěš ubiti, nu to znači, že ima zašto.

Sidorovič daje Označenomu zadanje najdti stalkera po prězvišču "Brzy", ktory je šel v stalkersky tabor s někoj važnoj vědoj na fleškě, ale izgubil se něgdje v okrugu zelězničnodražnogo mosta. Označeny vyhodi iz bunkera Sidoroviča i vidi prěd soboju maly tabor stalkerov - "Selo Novakov". On podhodi do glavara tabora po kliču Volk, i toj daje Označenomu pistolet Makarova i naboje. Povědaje, da Brzy jest shvačeny razbojnikami i tutčas jest držany v opuščenom Avtotransportnom Prědprijemstvu (to jest v taboru razbojnikov), i že trěba jego osvoboditi. Označeny prihodi na město i sustrěčaje trěh stalkerov, tovarišev Volka. Počinaje se napad na tabor razbojnikov.

Poslě spasenja Brzogo, Označeny bere u njego flešku i, vrnuvši se v Selo Novakov, oddaje flešku Sidoroviču. Toj govori Označenomu, že zapravdu jest taky stalker, Strělec, i že on našel dragu k sěveru, to jest k Srědišču Zony. (Srědišče Zony jest velmi opasno město, ibo jest ohrańjajemo mutantami, vražno-razpoloženymi ljudmi i prěd vsem, "Vypalivateljem Mozgov" - moćnym ustavjenjem, ktory sposobny jest uniščiti razum človeka)

Sidorovič daje Označenomu nastupne zadanje - ukrasti dokumenty iz vojennoj bazy v opuščenom naučnym institutu "Agroprom". Označeny soglašaje se. Po putu do vojennoj bazy Sidorovič daje navodki,[upper-alpha 3] ktory mogut pomogti najdti Strělca. Označeny po svojemu putu sustrěčaje stalkerov, ktorym pomogaje odbiti napady neprijateljev - glavno razbojnikov i vojinov. V koncu dolgogo puta Označeny sustrěčaje stalkera po kliču "Krot", ktory daje jemu navodku o shranu[upper-alpha 4] Strělca. Govori, že shran jest v podzemju Agroproma.

Označeny spuščaje se na dol v podzemje. Tam jemu protivodějut razbojniki, vojiny i mutanty, ale v koncu on nahodi shran Strělca. V shranu jest fleška, ktoru koristal Strělec i jego grupa. Okazyvaje se, že Strělec ne jest stalkerom-jedincem, ale sostoji v grupě iz trěh stalkerov: jego samogo, Kla i Duha. Vědomo jednak staje se, že Kol uměrl, a Strělec odpravil se putom do Središča Zony.

Potom on vyhodi na površinu i okazyvaje se bezposrědno na bazě vojinov. Na bazě sut okolo 20 vojinov, ale uspěvaje i krade dokumenty. Dalje on ide do bara "Sto Rentgenov", kde on je povinnen oddati ukradjeni dokumenty trgovcu po prozvišču Barmen. "Sto Rentgenov" jest najbezpečnym stalkerskim taborom v Zoně.

Tuty razděl dopoka ne jest zakončeny.

Zapisky

[edit | edit source]
  1. ↑ težinovozka jest kamion, to jest voz, ktory prědnaznačeny za prěvoz něčego težkogo. Morfologična analiza: težina + -o- + voz + -ka.
  2. ↑ hrěnovka jest maly nevažny prědment; nepristojno označenje prědmeta, javjenja ili položenja, ako až ne jest razgledano kako nečto zlo.
  3. ↑ navodka jest mala věda, ktora pomogaje najdti něčto, pohodi od slova "navoditi".
  4. ↑ shran jest něčto, čto bylo shovano/shronjeno.

Vněšnje linky

[edit | edit source]

Retrieved from "https://incubator.wikimedia.org/w/index.php?title=Wp/isv/S.T.A.L.K.E.R.:_Těnj_Čornobylja&oldid=6389808"