Wp/isv/ISO 639
ISO 639 jest medžunarodny standard Medžunarodnoj organizacije za standardizaciju (ISO), ktory klasifikuje jezyky i jezyčne grupy, a takože oprěděljaje jezyčne kody. Nyně tutoj standard sostoji se iz četyreh sostavov: ISO 639-1, ISO 639-2, ISO 639-3 i ISO 639-5. ISO 639 takože jest važno za Vikipedije: tute kody upotrěbjajut se za medžujezyčne linky, a jezyky bez koda ISO 639 sut izključene iz možnosti vlastnogo projekta.
ISO 639-1
[edit | edit source]Sostav 2-bukvovyh kodov za 184 večinstva glavnyh jezykov světa. Byl utvrdženy v 2002 godu na osnově staršego sostava ISO 639/R iz 1967 goda. Registrujučuji organ jest Medžunarodny informacijny centr za terminologiju (Infoterm), založeny od UNESCO.
ISO 639-2
[edit | edit source]Razširjenje standarda ISO 639-1, založeno v 1998 g. iz pričiny ograničenoj kolikosti možnyh 2-bukvovyh kodov (26² = 676), sostoji se iz 487 3-bukvovyh kodov. Tutoj sostav sodrživaje, kromě jezykov, takože kody za jezyčnyh grup, napr. sla za slovjanske jezyky i art za umětne jezyky. Registrujuči organ jest Biblioteka Kongresa (ang.: Library of Congress).
ISO 639-3
[edit | edit source]Cělj standarda ISO 639-3 jest priznanje 3-bukovyvh kodov vsim jestujučim jezykam, vključno s mrtvymi, historičnymi i umětnymi jezykami, pisanymi ili nepisanymi, ale izključajuči rekonstruovane jezyky i jezyka programovanja. Byl založeny v 2007 g. i nyně sodrživaje 7916 jezykov. Registrujuči organ jest organizacija SIL International.
Od aprila 2024 g. medžuslovjansky imaje kod isv v tutom standardu.
ISO 639-4
[edit | edit source]ISO 639-4 ne jest spisok kodov, ale sodrživaje ukazanja i obče principy za kodovanje jezykov. Služil medžu drugymi za ustanovjenje novogo, objedinjajučego standarda ISO 639/2023.
ISO 639-5
[edit | edit source]Založeny v 2008 g. i sodrživaje «kolektivne kody»: 115 3-bukvovyh kodov za jezyčne familije i grupy. Registrujuči organ jest Biblioteka Kongresa.
ISO 639-6
[edit | edit source]ISO 639-6, založeny v 2009 g., byl prědloženy standard, ktory iměl sodrživati 4-bukvove kody za varianty jezykov, ale v 2014 byl odrěčeny iz pričiny sumněnij o upotrěbimosti. Registrujuči organ byl Geolang.