Wp/isv/Krtek

Amerikansky astronavt Endru Fojstel (napravo) s maskotom Krtekom v Čehiji, 2011 rok

«Krtek» («Krot») ili «Krteček» («Krotik») jest češsky rysovany serial hudožnika Zdeněka Milera. Glavny heroj seriala jest rysovany krot Krtek, ktory često ne osiljaje člověčji svět i izkušaje različne slučaje so svojimi drugami-životinami. Prvy kratky film «Krteka» byl izpuščeny v 1957 roku, poslědnji — v 2002 roku.

Poslě smrti Milera jego vnučka Karolina Milerova dopustila stvorjeńje novogo kitajskočešskogo seriala s Krtekom, «Krtek i Panda».

Historija

Krtek byl vprvo uviděny v Pragě v 1957 roku, kogdy Miler zahotěl stvoriti dětsky rysovany film ob obrabotańju ljna. Jerbo jego silno privlěkli filmy Volta Disni, on rěšil izdělati glavnym herojem životinu. Pozdněje on glasil, čto ideja izdělati glavnym herojem krota prišla k njemu, kogdy on spotknul se o krota v jednu iz pohodok.

Prvy film «Kak Krtek dobyl svoje nogavičke» (češ.: Jak krtek ke kalhotkám přišel) byl premirovany na kinofestivalu v Veneciji v 1957 roku. V prvom filmu koristali češsku rěč, ale Miler hotěl, da by jego filmy byli razumlive vo vsem světu, i v inyh serijah koristal svojih dočer kako povědačnic, ktore govoret toliko medžumetja. Iztvorjeńje slědnyh serij načalo se v studijě «Kratky film» v 1963 roku. Poslědnja serija byla izpuščena v 2002 roku.

V 2014 roku vnučka Zdeněka Milera, Karolina Milerova, podpisala dogovor s kitajskoju telekompanijeju CCTV o filmovańju novyh historij s Krtekom. Suglasno Vadimu Petrovu, kompozitoru muziky v originalnom serialu, Zdeněk Miler ne hotěl izpuska novyh historij o Krteku. Nove serije byli sfilmovane črěz 3D-tehnologiju i personaž Krteka iznova govori v njih. Serial «Krtek i Panda» načeli prědavati v Kitaju v 2016 roku. V marecu 2019 roka Vrhny sud Pragy rěšil, čto Karolina Milerova ne imala dozvoljeńja na Krteka ili prava oddavati dozvoleńje inym producentam i jej dogovor jest nedějuči.

Astronavt Endru Fojstel s igračkoju Krteka v Češskoj akademiji nauk, 2011 rok

Amerikansky astronavt Endru Fojstel v 2011 roku vzel pljuševu igračku Krteka v poslědnje kosmično lětańje prěvoza «Endevor». V 2018 roku on iznova vzel Krteka v kosmos podčas misije «Sojuz MS-08» do Medžunarodnoj kosmičnoj stancije.

Krtek byl maskotom Evropejskogo šampionata po atletikě v poměščenju 2015 roka v Pragě.

Muzika

Muzika igraje važnu rolju v serialu, ibo personaže nikogdy (kromě prvoj serije) ne govoret ničego kromě čuvstvenyh zvukov, najčesty iz ktoryh jest «Ahoj!» («Zdrav!» v češskom). Muzika originalnogo seriala koristaje akustične i elektronične muzikalne orudja.

Kompozitori:

• Miloš Vacek
• Vadim Petrov (1974–1994, boljšest serij)

Spis serij

Vsěgo s 1957 po 2002 roky bylo izpuščeno 49 kratkyh serij, od 5 do 28 minut.

Spis serij «Krteka»

№	Češska nazva	Prěvod	Rok	Trvańje
01	Jak krtek ke kalhotkám přišel	Kak Krtek dobyl svoje nogavičke	1957	13:04
02	Krtek a autíčko	Krtek i avtočko	1963	14:26
03	Krtek a raketa	Krtek i raketa	1965	08:22
04	Krtek a tranzistor	Krtek i tranzistor	1968	08:12
05	Krtek a žvýkačka	Krtek i žuvačka	1969	07:26
06	Krtek a zelená hvězda	Krtek i zelena zvězda	1969	06:57
07	Krtek v Zoo	Krtek v zooparku	1969	06:09
08	Krtek zahradníkem	Krtek-sadovnik	1969	06:59
09	Krtek a ježek	Krtek i ježik	1970	08:34
10	Krtek a lízátko	Krtek i lizatko	1970	08:10
11	Krtek a televizor	Krtek i televizor	1970	05:30
12	Krtek a paraplíčko	Krtek i doždnik	1971	07:11
13	Krtek malířem	Krtek-maljar	1972	09:17
14	Krtek a muzika	Krtek i muzika	1974	05:00
15	Krtek a telefon	Krtek i telefon	1974	05:12
16	Krtek a zápalky	Krtek i zapalky	1974	05:08
17	Krtek chemikem	Krtek-hemik	1974	05:25
18	Krtek a buldozér	Krtek i buljdozěr	1975	05:43
19	Krtek a koberec	Krtek i koverec	1974	05:22
20	Krtek a vejce	Krtek i jajce	1975	05:15
21	Krtek fotografem	Krtek-fotograf	1975	05:33
22	Krtek hodinářem	Krtek-časodělatelj	1974	05:08
23	Krtek na poušti	Krtek v pustynjě	1975	05:52
24	Krtek o Vánocích	Krtek v Rodžeńju	1975	05:26
25	Krtek a karneval	Krtek i karnaval	1975	05:14
26	Krtek ve městě	Krtek v gradu	1982	28:28
27	Krtek ve snu	Krtek vo snu	1984	28:01
28	Krtek a medicína	Krtek i medicina	1987	28:04
29	Krtek filmová hvězda	Krtek-kinoznamenitost	1988	27:47
30	Krtek a orel	Krtek i orel	1992	28:05
31	Krtek a hodiny	Krtek i časovnik	1994	28:04
32	Krtek a kachničky	Krtek i mali katky	1995	05:21
33	Krtek a kamarádi	Krtek i prijatelji	1995	05:19
34	Krtek a oslava	Krtek i slavjenje	1995	05:20
35	Krtek a robot	Krtek i robot	1995	05:21
36	Krtek a uhlí	Krtek i vugolj	1995	05:20
37	Krtek a víkend	Krtek i konec tydnja	1995	05:20
38	Krtek a houby	Krtek i griby	1997	05:20
39	Krtek a maminka	Krtek i mama	1997	05:20
40	Krtek a metro	Krtek i metro	1997	05:20
41	Krtek a myška	Krtek i myška	1997	05:19
42	Krtek a sněhulák	Krtek i sněžny člověk	1998	05:09
43	Krtek a zajíček	Krtek i zaječek	1997	05:11
44	Krtek a pramen	Krtek i iztočnik	1999	05:19
45	Krtek a šťoura	Krtek i kistočka	1999	05:22
46	Krtek a flétna	Krtek i flejta	1999	05:16
47	Krtek a vlaštovka	Krtek i lastovica	2000	05:50
48	Krtek a rybka	Krtek i rybka	2000	05:17
49	Krtek a žabka	Krtek i žabka	2002	05:20

Nagrady

Serial dostal slědne nagrady:

• Veneciansky festival filma (1966) — najlěpši rekreacijny dětsky film (za seriju «Krtek i raketa»)
• Medžunarodny festival filma v Zlinu (2001) — nagrada od publiky (za seriju «Krtek i mama»)

Vněšnje linky

• Tutoj članok imaje prěvod iz članka "O krtkovi" v Vikipediji na češskom (spis avtorov; dozvoljeńje CC BY-SA 4.0).
• Tutoj članok imaje prěvod iz članka "Mole (Zdeněk Miler character)" v Vikipediji na anglijskom (spis avtorov; dozvoljeńje CC BY-SA 4.0).