Wp/hrx/Brësiliaanisch

Brësiliaanisch odder Brasiliaanisch (brësiliaanisch: português brasileiro) is die offiziaal Landsproch fun Brasilje. Es bestehd aus ener Grupp fun Varïeteete fun Portugiesisch, wo in Brasilje gesproch werre un die Influssreichst Forrem fun Portugiesisch weltweid is. Es werd fun neechst alle 203 Millione Inwohner fun Brasilje gesproch un is in de brësiliaanische Diaspora weid ferbreid. Heit bestehd-s aus ungefäer zweu Millione Brësiliaaner, wo in annre Lenner ausgewannerd sin. Mit ener Populazion fun iwer 203 Millione, is Brasilje bei weidem die grest portugiesischsprochich Nazion fun de Welt un die eenzichst in Amerika.

Freddie, en Sprecher fun Brësiliaanisch

Brësiliaanisch unnerscheed sich besonnerst in Fonologie un Prosodie fun Varïeteete, wo in Portugal un protugiesischsprochiche afrikaanische Lenner gesproch werd. In de letste Lenner hod die Sproch en Tëndenz, fer en enger Ferbinnung zum aktuaale ëuropäische Portugiesisch se hon, deelweis wal die Koloniaalherrschaft dart fiel speder geennd hod, un deelweis wechem starrke indigene un diasporische afrikaanische Influss uff Brësiliaanisch. Trotz diesem Unnerschitt zwischich de gesprochne Variante, unnerscheede sich Brësiliaanisch un ëuropäisch Portugiesisch in de formaale Schrift kaum un bleive mutuaal ferstendlich. Weche die zweu owe genennde Grind is awer die Lick zwischich de geschribbne formaale Sproch un de gesprochne Sproch in Brësiliaanisch fiel greser wie im ëuropäische Portugiesisch.