Wp/chn/Kvnim
Kənim ixt tenas bot, pi maika mamuk lalam pus hal kənim kopa chəqw. Tilixam kopa kanawi iliʔi mamuk kənim. Anqati tilixam khanawi-qha łaska łatwa kopa kənim, pus mamuk əbə x̣luima ikta. Alta wik hayu tilixam mamuk kənim pus łatwa, pi hayu tilixam mamuk kənim pus hihi. Wik hayu kənim t'uʔan sil. Maika mamuk stik, chikəmin, qəl-glis, əbə x̣ələl ikta łaska skin pus mamuk kənim. Ixt əbə hayu tilixam hal ixt kənim.
Kənim łaska nim ikta[edit | edit source]
Q'op kənim: Ixt-ixt qənchi tilixam łaska mamuk ixt kənim, łaska iskəm ixt stik, pi łaska mamuk hayas łxwap kopa yaka. Qənchi łaska hal ukuk kənim kopa chəqw, łaska miłait khapa ukuk łxwap. (wəx̣t łaska mamuk delet tukəti ukuk bot.) Bot kopa elip-sax̣ali piktyur yakwa ixt łush "q'op kənim".
Anqati hayu tilixam khapa ukuk iliʔi mamuk khalakwati-stik pus kənim, pi łaska łap məkhəmək kopa kənim.
Stik-skin-kənim: Anqati hayu tilixam qha san chako mamuk stik-skin pus kənim.
Skin-kənim: Inuit tilixam mamuk ulx̣ayu yaka skin pus kənim. Łaska mamuk makwst skin-kənim: umiaq pi qayaq. Hayu hayak pi wik-til łaska qayaq, pi yaka lalam t'uʔan makwst isik. Alta tilixam khapa kanawi iliʔi mamuk bot kakwa qayaq. Khapa bastən-wawa, "kayak" ixt nim pus inuit tilixam yaka qayaq pi ukuk chxi bot.
