Wp/arq/نشارك في ويكيبيديا

From Wikimedia Incubator
< Wp‎ | arqWp > arq > نشارك في ويكيبيديا
Jump to navigation Jump to search

في هاد الباجة درك تفهمو كيفاش ويكيبيديا تمشي و كيفاش تشاركو و تكتبو فيها.

خيرو قبل اللوغة تع l'interface، لوكان تحبو بالجزايرية ال-code تعها هو arq

(هاد البروجي يستحق تاني ناس فاهمة انفورماتيك، كاين بزاف خدمة تع templates و actualisation تع النسخة هذي تع ويكيبيديا لي قدامت)

واش الفايدة تع ويكيبيديا؟[edit]

الهدف تع ويكيبيديا هو لم كل المعرفة في انسيكلوبيديا حرة في انترنات و تكون مفتوحة للكل و باطل. الويكيبيديا بلاصة تع تبادل بإحترام و مساعدة.

و الحاجة المهمة بزاف و ركزوا عليها مليح، هي أن اكونو كل المعلومات ألي تكتبوها لها مصادر و ما تمثلش رايكم الشخصي. ما رهيش بلاصة وين كل واحد إمد رايو ولا اجيب من راسو. لازم مصادر، و حتى كي تكتبو ما تمدوش رايكم، اكتبو غير المعلومة و المفيد.

خترات كاين سجيات وين الناس عندها مصادر مختلفة و ما يتفاهموش عليهم، مالا كاين بلاصة سبيسيال اسمها "تناقش" (discussion)، روحو فيها و أحكيو على وش ما تفهمتوش عليه, و جربوا تلقاو حل لتمى.

ماهيش بلاصة تاني للدعوة تع أفكار جديدة ولى قديمة، لازم برك تكتبو المعلومات باأبسط كتابة بلا ما تكثروا ولى تمدوا رايكم.

كونوا تاني معتدلين، ماشي كي ما تحبوش سوجي تنحيو المعلومات عليه ولى تكذبوا عليه.

كونوا واضحين و منظمين.

قواعد الويكيبيديا[edit]

1-ويكيبيديا انسيكلوبيديا تلم العلم

2-لازم تكتب بلا ما تمد رايك فلسوجي

3-ويكيبيديا باطل

4-الناس لي تكتب في ويكيبيديا لازم تحكي مع بعضها بإحترام 

5-  ويكيبيديا ما عندهاش قانون باين و مغلوق، هدو برك وصاية من الناس لي جربو و حبو تستفادو منهم

كيفاش تبداو[edit]

كي تكونو جدد، تبانلكم خلوطة. بصح راهي ساهلة على خاطر راهي مبنية بصفة منطقية، لازملكم برك شوية وقت و توالفو بيها,

ماشي مطلوب منكم كي تكتبو على سوجي تحطو كولش، تقدرو تكتبو غير سطر ولى زودج، وش قدرتو عليه، ومبنعد تقدرو تعاودو تولوا بش تزيدوا حاجة. ويكيبيديا مبنية على المساعدة، معناها قادر إجيو منبعدكم ناس وحدوخرٍين إزيدو معلومات على وش نشرتو و هي ماشية.

سجلو رواحكم[edit]

ماشي مفروض عليكم تسجلو روحكم في ويكيبيديا بش تقراو المعلومات ولا تكتبو فيها ولى تبدلو فيها حاجة.

بصح لوكان تسجلو رواحكم تقدروا تديرو حوايج بزاف، الي ماشي مسجلين ما يقدروش إديروهم (كما خلق باجة جديدة، أوبلوود تصويرة) .

باش تسجلو رواحكم راهي لفوق ڨاع، على اليسرى.

كيفاش تكتبو[edit]

ويكيبيديا اكتبو فيها ألاف العباد. كل واحد فينا واش إمد: كاين لي ازيد معلومات و مصادر، كاين لي قاري انفورماتيك و اسڨم الباجة، حصول الكل نتعاونو.

تقدرو إما تصححو الكلمات لي ماشي بالدارجة (و تكتبوها بالجزايرية لوكان تعرفو الكلمة) , ولا تصححو و تطورو سوجيات لي واجدة لباج تاعهم، ولا تقدرو تكتبو على سوجيات جدد (شوفو قبل لوكان موجود هاد السوجي ولا لا، بش ما تخلقوش نفس السوجي مرتين).

أكتبو بأبسط اللغة الممكنة، على خاطر الهدف هو أن لكل يفهم. بسطو الكلمات، ما تديروش كلمات صعاب بزاف، الهدف هو أن لي يقرى يفهم.

أكتبو خاصتاً على السوجيات ألي تعرفوهم مليح (قرايتكم، خدمتكم، حاجة قريتو بزاف عليها، المنطقة ديالكم, حاجة تحبوها....).

تقدرو تترجمو السوجي لي خيرتوه مل الباجة بالفرنسية ولا الإنڨليزية ولا العربية. ماش مفروض عليكم تترجمو كولش، خيرو وش إبانكم ضروري.

1-حوسو على السوجي تاعكم[edit]

كي عرفتو على ماه حابين تكتبو، حوسو الفوق على اليسرى على الكلمة المناسبة للسوجي تاعكم (باللوغة الجزايرية) بهاد الطريقة: Wp/arq/السوجي تاعي

Wp معناهى راكم في الويكيبيديا incubator، معناهى الويكيبيديا التجريبي، مشي الرسمي.

لوكان لقيتها كاينة، أدخل فلباجة و شوف كشما تزيد فيها.

لوكان مكانش، أخلق باجة على السوجي هدا. (درك تخرجلك كتيبة تقولك "هاد السوجي ماشي موجود، هل راك باغي تخلق هاد الباجة الجديدة؟") كليكي عليها.

كاين تاني ليست تع باجات تقدرو تسڨموهم

2-اضغطو على "بدل"[edit]

كي تكونو في ويكيبيديا، تكونو في الباجة تع القراءة برك. شوفو الفوق. مكتوب "قراءة"، و قدمها مكتوب "بدل" . ادخلو لتم.

3-طرق الكتابة[edit]

عندك 2 طرق بش تكتب. لفوق عندك ستيلو، كليكي عليه.

-الطريقة لولى هي الطريقة تع العين (التحرير المرءي)، ساهلة. (éditeur visuel)

-الطريقة الزاوجة فيها هاد الرمز [[ ]] ، راهي صعيبة شوية.

تقدر تبدى تكتب.

4-المصادر[edit]

حط المصادر تع المعلومات ألي راك تكتب فيهم "references"

5-انرجيستريو[edit]

انرجيستري (نشر التغيرات) الخدمة تاعك (الفوق على اليسرى)

1000 سوجي لازم تترجموهم بالجزايرية[edit]

كاين ليست تع 1000 سوجي لازم اكونو مترجمين بكل لغات العالم. كل ما نترجمو منهم كل ما يمشي الويكيبيديا الجزايري و اولي  هكدا رسمي. (بصح ما تنساوش تاني تكتبو على الجزاير والجزايريين)