Jump to content

Wp/arq/طياب الـجازاير

From Wikimedia Incubator
< Wp‎ | arq
(Redirected from Wp/arq/طياب’ الـجازاير)
Wp > arq > طياب الـجازاير

[1]

طياب الجازاير يتميز بتنوع ينڤلع من لغلة تاع لرض و لبحر.هوا كثر طياب متوسطي ( تابع للبحر الأبيض المتوسط) و طياب صحراوي. يعرض تشكيلة تاع أطباق منوعين على حساب لمناطق و المواسم.ولّي يعطي لوحة طيابات متنوعة.هاذا الطياب لّي يحتاج بزّاف منتوجات من خضرة وحبوب لّي من بكري و دايمن ينتجوهوم بكميات كبيرة فلبلاد.كانو يسمّوه ڨرونيي تاع روما[1] [2][3][4]و مبعد ڨرونيي تاع أوروبا[5] و بزيادة، الماضي المرفه فلجازاير ساهم فتوجيه بزّاف تاع أطباق محلية في بزّاف أوقات و بزّاف بلايص فلموند.فلحقيقة ، لغزوات تاع لجازاير كانت من بين السبايب الأساسيين في التّبدال بين بزّاف شعوب ( أمازيغ، عرب، ترك، أندلوسيين،فرانساويين و سپانيوليين). من بين كامل التخصصات لّي تملكها لجازاير، و مشهورة بزّاف ''الكسكسو'' معروف كطبق وطني و تاني الپاتيسري التقليدي المعروف ب الحلويات الشرقية في بلاد الغرب. و مالڨري تداولوه ب لهدرة برك بكري من جيل لجيل، مي نلقاو بزاف كتابات للطياب لجازايري.

المكونات الأساسية[edit | edit source]

طياب الجزاير فيه بزّاف مكونات و مقادير من خضرة،فاكية،قرايص،لحم،حوت،ثمار البحر،خضرة وفاكية المجفة.الخضرة يستعملوها بزّاف ف الشلايذ،الشوربة،الطواجين،كسكسو و لجوازات.نلقاو بزّاف؛ زرودية، كورجات، بطاطة، لوبيا ماشطو، لوبيا البيضة، اللفت، باتنجال،الفول، القرنون والترفاس.

قرايص و بهارات[edit | edit source]

أنواع تاع الزيتون ف سوڨ الحطاب (عنابة)

القرايص يلعبو دور معروف فالطياب لجازايري و قليل الطيابات لي مايحتاجوهومش فيهم.الزعفران، عشب الحراز، مسمار القروفل، القسبر،السكنجبير، بابريكا، كمون، الحرور، الكركم، هوما لي يخدمو بيهوم بزّاف كامل كيما الكاري،الثوم،و لحبة السودة (مزروعة فلجازاير).الخلطات المعروفة بزّاف تاع القرايص كيما راس الحانوت ( نلقاوه في كل پلاصة فلجازاير وعند العطّار و فالسوڨ)بزّاف لازمة في هاذا الطياب.الفلفلة الحارة هي تاني بزّاف محبوبة.البصل تاني يخدمو بيه بزّاف و القاوي فالطواجين.و يستعملو بزّاف تاني الحشاوش المعطرة باش يزيدو فالڨو و يعطرو لماكلة (المعدنوس،الكليل،الشمرة،الزعتر،العرقسوس،الرند،الريحان،هوما الحشاوش المعروفين بزاف).القرفة شعبية بزاف كيما الحلبة و معروفين بْلّي يداوو بيهوم تاني و كيما اللَلّوشة،السوسن و الحلحال ( لي نلقاوها مابين مكونات راس الحانوت). مازهر ولا ماورد يزيدو مع بعض يزينو الطيابات بصح يدخلو تاني في المكونات شوية تاع الپاتيسري.و كاين عناصر وحدوخرة كيما النّعناع لي يديرو بيه لاتاي تاع النّعناع.

تخصص الطياب[edit | edit source]

ڨرصات و خبز[edit | edit source]

الخبز هو الصح نتاع لماكلة فلجازاير.نلقاوه في كامل المايدات الجزايرية وفي ڨاع وقات لماكلة. كيما لما.الخبز تاني رمزللمعيشة و عادينو نعمة ووهبة من عند الله سبحانو كيما ڨاع لماكلة لي جاية من الڨمح فلجازاير.و نسموه بلجازايرية نعمة ربي يعني براكة تع ربي. اللي يلعب بلخبز ولا يرميه ينعد دار ڏنب كبير و حاجة ماشي مليحة عند الجازاييرين و قادر تاني يدابزوه يلا قاسو فطريڨ.وكاين ناس تجار يلايمو الخبز لقديم و ليابس ويعاودو يبيعوه لناس لي عندهم كوارا و يربو لجاج و الزوايل.

فلجازاير صنيع الخبز بيد المرا فدار في شهر رمضان عادة شايعة و باقية في حياة كل مرا جزايرية . و قليل الديار لي يشرو لخبز من الكوشة ف هاذي الفترة الدينية.

تحضير خبز 'التڨلة' ف القصور

لخبز فلجازاير متنوع و منو بزاف من عوايد الجزايريين. نلقاو كيما ''الكسرة'' خبز مڨرص تاع قسنطينة ايڨزاكت تجي رقيقة بزاف تنحط مع لجوازات ولا بالزبدة و لمعجون الصباح ف التعويفة. لحرشة ولا المبسس لي مصنوع بالسميد ياكلوه بزاف فقهوت الصباح مع المعجون ولا العسل.و كاين خبز الشواط يديروها بلباطاطة وهي من دلس.يطيبوها في طاجين و يرشوها بالسكر.البريوش تاع راس العام الناير عند القبايل و فلعيد و يجي فيه حبة بيض كاملة بقشورها باه يعبرو علا الخير تاع بلادهوم.''لاغروم'' تاع القبايل لي حتى هو فيه بزاف نوايع على حساب كل عرق و قبيلة كيما اغروم اهوال خبز بالنعناع ولا خضرة بلا طياب سپيسيال تاع لقبايل.اغروم نتاسامي تاع وارڨلة. خبز بالخميرة كاين منو بزاف؛ نلقاو ''المطلوع'' لي ياكلوه مع طيابات جدودهوم تاع بكري و لي فيهوم المرقة بزاف كيما الطاجين و الشوربة.''التاڨلة'' خبزة التوارڨ لي يطيبوه ف الرملة و تكون سخونة بزاف و جمرها مڨدي و ييحطوها تاني كطبق رئيسي و تكون مفتتة.''التمتونت'' و هو خبز قبايلي يطيب فالفور ولا ينقلى.خبز الشعير خبز مصنوع من الشعير. و أخيرا خبز الدار ولا خبز الكوشة خبز زمان تاع لمدينة فلجازاير يطيب فالفور و يعطروه بالسانوج و ياكلوه بزلف في شهر رمضان.ونلقاو تاني خبز عادي تاع الواحة؛ كيما ڨرصة يابسة[6] تع واد ريغو.الملوي خبز عربي رقيق بزاف ولي معروف بالتوراق ديالو ولا يڨولولو المورق[7].و نلقاو زاف الخبز لي معروف من طريقة طيابو و بزيادة عاى ''التڨلة'' كيما ''خبز النور'' تاع الساورة لي يطيبوه في كوشة تاع العرب. خبز القُلة تاع أدرار يطيب فوق قُلة سخونة في أرض تكون شاعلة.وكاين المغمومةلي يطيبوها وق حجر سخون. و نلقاو تاني الخبز المحشي يخدموه بزاف و ياكلوه فلجازاير؛ كيما المخالة محشية باللحم مرحي و لخضرة. المختومة تع الصحرا لي هي خبزة محشية تاني بللحم المرحي،طرشية،طوماطيش،زيتون و فرماج معطرة بالزعيترة،و لا تاني ''المطبڨة'' تاع بسكرة و وادسوف بالزرودية،طوماطيش،فلفل أحمر،طرشي و ليدام تاع الخروف ولا الجمل مع زيت الزيتون. وْ حد الخبز التقليدي،كاين تاني ''الباڨيطة'' تع الخبز لي نشوفوها بزاف فلمايدة الجازايرية.وداوه من عند فرنسا كي كانت مستعمرة الجازاير.و هو من بين الخبز الشعبي فلولايات الكبار تاع الشمال. الباڨيطة تسابق خبز الدار، ''المطلوع''، ''الكسرة'' و خبز ''لاغروم'' فلفطور في شهر رمضان. و الباڨيطة تاني نديرو بيها كاسكروط شعبي ب''الكارانتيكا'' و لا ''الكاشير''. و نلقاو تاني خبز الماهوني في برج الكيفان و فلخر كامل الخبز الپروفانسي من اسم الكعكة و يديروه فالشرق بزاف في عنابة و ڨالمة.

مقبلات[edit | edit source]

شلايظ[edit | edit source]

طبسي حميص بزيت زيتون

فن طيّاب لجازايري فيه بزّاف لنواع تاع شلايظ السخونّيين و لباردين، لجازايريين يسّڨو شلايظهم بقطرات تاع زيت زّيتون تاع لقبايل لمعروفة بزّاف فلبلاد. الشّلايظ لمعروفين بزّاف هوما شّكشوكة لي ياكلوها باردة ولّا سخونة ، و يقدروا يديروها كيما شلاضة ولاّ طبق كامل بطّوماطيش و الطرشي و لبصل يمتّكوها براس لحانوت و الثّوم، التشّكشوكة تتبدّل على حساب لمناطق ولپلايص و خطرات يديروها معا لبيض ولّا لكفتة فشي پلايص فلجازاير، و الزّيتون و يديرو فيها دايمن الطّرشي. كاين شلاظة تع لحميس لمعروفة بزّاف يديروها بطّرشي مشويّة و زّيت الزّيتون و يرشّوها بثّوم و لمعدنوس و كاين فاني (الزّفيطي) تاع منطقة ولاد نايل يديروه في مهراز تاع اللّوح معا لكسرة لمفتّة و لفلفل لحار . كاين فاني شلايظ تاع لبلاد كيما تاع عنّابة لي يديروها بزّرودية مڨطّعة دويرات دويرات، الزّيتون و لخضرة مرقّدة و الثّوم، كاين لخردل تاع دزاير و تاع بليدة لي هوا شلاضة حلوةو مالحة يديروها بتّفاح، السّفرجل و اللّفت و يزيدولها لاصوص بسّكر و لموتارد والخلّ و كاين النتشوبة تاع دزاير يديروها بطّوماطيش، لونشوا، الزّيتون و الثوّم و كاين فاني الدانييل تاع عنّابة لي هوا شلاضة باردة مصنوعة بسّاردين طايب فلاصوص تاع الزّعتر ورّند و ثّوم. وكاين فاني شلايظ نصيبو فيهم مكوّن غالب كثر على لمكوّنات لوخرين كيما فشّلاظة تاع لبنّجر لمصنوعة بلبيطراڤ (الطّوماطيش، لمعدونس، لبصل،و الزّيتون لكّحل)، البانادورة شلاضة بلقصّبر يديرو فيها الطّوماطيش متبّلة قاوي بلقصّبر ، شلاضة تاع لحشيش (لخبيز) بزيّت الزّيتون ، شلاضة تاع عشبة (بندراڨ)، شلاضة تاع زرودية بشّرمولةو لكمّون يسمّوها الزّرودية لمشرملة و كاين فاني الفول بل كمّون طايب على لفوار و لفوّيلة بل قارص لي هوما شلايظ يندارو بل فول برك .شلاضة تاع لقرنون بلاصوص (الثّوم، لهريسة ، الزّيت و لخل )، الزعّلوكة يديروها بل بادنّجال مقطّع فتايت و طايب بلاصوص حمرا و مرشوش بلخل و كاين فاني لبيض محمر بسّاردين لي هيا غوسات دزيرية و تندار بلبيض مغلّي و محشّي بسّاردين . ف لعراس لجازايرية و في شهر رمضّان، الشّلاضة لي يديروها هيا شلاضة منوّعة و تقليدية تتبّدل على حساب لمناطق يصنعوها بخضرة ماشي طايبة كيما الزرودية مسّكرفجة، الذرا، لبيطراڤ، لخس، لخيار، الطّوماطيش، لكورنيشو، لفرماج فري، لبسباس و الزّيتون و يزيدولهم طون، لبيض مغّلي و خطرات ثمار لبحر و نصيبو فاني الشّلاضة تاع الرّوز مصنوعة بذّرا، الطون، والرّوز . هاذ الشلاظة ياكلوها بزّاف على الشلايظ لوخرين و يديروها فلعراس و في شهر رمضان.

شوربات[edit | edit source]

الجازاير عندها ربع شّوربات تقليّديين و معروفين ياكلوهم ف كامل لبلاد هوما الشّوربة, لحريرة ,الجاري وتشّيشة. هاذو الشّوربات التّقليدية لجازيرية يتسرباو معا لبدية تاع لماكلة كيما لمقبّلات و هوما ف صّح يطيبوهم بلّحم تاع لخروف ، لغنمي ولاّ لجّاج ، الحمّص, الطوماطّيش, لفارميسال, لڨمح, راس لحانوت و بزّاف لنواع تاع لخضّرة و لحبّوب ليابسة. هاذو لنّواع تاع الشّوربات هوما لمشهورين كثر ف شهر رمضان لكريم و لعزيز. من جيهة، من بين ڨاع هاذو لنواع تاع الشّوربات لي كاينين فل جازاير ،نصيبو الشّوربة لمشهورة و لي هيا الشوربة لي ورثناها فل وقت تاع الأتراك لي كانو من قبل فل جازاير .وتتنّوع هاذي الشّوربة و تتقسم لبزّاف أنواع هايلين تاع ليغوسات على حساب لمناطق, لولايات, لواحات و لفيلاجات (دواوير). و نصيببو كيما الشّوربة لبيضا تاع دزاير و لي يستعملو فيها لجاج ولفارميسال وشوية راس لحانوت, الشّوربة فريك اصلها مل الأوراس, قسنطينه و لمناطق لعالية تاع سطيف يستعملو فيها لڨمح خضر مطحون (فريك),الّلحم و لخضرة,الشّوربة فداوش (شّوربة بل ڤارميسال),الشوربة لحمرة بلّحم يستعملو فيها كمية كبيرة تاع لخضرة,الشوربةعدس (شّوربة يديروها بل عدس , زرودية و لبطاطا),الشوربة بل حمام لي يجمرو فيها لحمام و مبعد يديروه ف لمرقة معا لمعدنوس , لقصبر , لكرافس ,الزّنجبيل , الكرويةوالزّعفران لي ينعد هوا لمكون لمهّم,الشّوربة لبحرية كانو يديروها بكري لبحّارة, و يزيدو البّنة للحوت بل كبابة . لحاجة لمتشابهة فكامل هاذو لنواع تاع الشّوربات هيا التعّطار بل قصبر. فل لجازاير الشّوربة يطيبوها كل يوم ف رمضان لكريم و مل عوايد يصدقوها على لفقرا. و فهاذا لوقت ،ولينا نصيبو الشّوربة فل ريسطورات لمشهورة . لحريرة مشهورة بزاف ف وهرن معا الشّوربة فاني وأصلها أندلسي .لماكلة تاع لحريرة دخلت بسبّة الذوّاقة لاندلسيين لي كانو فل جازاير قبل السقوط تاع لاندلس . و فل اصل دخّلوها لبحارة لأندلسيين محمد بن عبّوعون و محمد بن عبدون و فرقة تاع لبحّارة عام 902م عاونوهم لامراء تاع قرطبة لي اسّسو وهرن[8]. هاذ الشّوربة تختلف ف طّريقة تاع الطياب نتاعها، يعني يطيبوها على خطرتين: التڨّطاع يديرو فيه الحبوب ليابسة، النشا و لّحم, و التدويرة يديرو فيها خليط تاع لخميرة باش تولي لحريرة خاثرة. من بين لحريرات لمعروفين بزّاف، نصيبو لحريرة بل خضرة تندار بزّاف فل بلادات تاع تلمسان ، ندرومة و وهرن, الحريرة بزّعتر يديروها فل فيلاجات تاع وهرن , الحريرة تاع سيدس بلعباس لي يخلطو فيها كامل لمكونات قبل ما يطيبوها و لحريرة تاع بليدة [9]لي يديرو فيها لخضرة جديدة و يعطروها بل كروية و ما يديرولهاش التدويرة. الحريرة يديروها فاني فولاية دزاير[10] و بجاية لي داتها على لبربر تاع قرطبة و يسموها لحريرة لقارصة على جال لقارص لي فيها و كاينة فاني في بشّار يديرو فيها لفول و بزّاف راس لحانوت تاع لمنطقة. يندار دايمن معا لحريرة طبق حلو ولا حلوى باش ينحو لقروصة تاعها. االجاري هوا شوربة تقليدية تاع قسنطينية و لوراس ،لجاري يشبّه للشّوربة بزّاف، لفرق بيناتهم بليّ لجاري خفيف على شّوربة و على هاذ السبّة يسموه لجاري. الجاري لي ياكلوه بزّاف هوا لي فيه لڨمح خضر مطحون و يسموه لجاري بل فريك و لا لجاري لحمر، نصيبو فاني لجاري برّوز و لمرقة لبيضا يسموه لجاري بيض و كاين فاني لجاري مقطّفة يديروه بل فول يابس و لعجين تاع ليد و لا فاني لجاري بل فول يديروه بل فول و طوماطّيش. التشّيشة تشبّه لشّوربة و يديروها بدڨّيڨ تاع الشّعير. و تتقسّم فاني لبزّاف انواع مشهورين كيما لحريرة تاع الزّعتر لبرهوش لي اصلها من وهرن و يسّموها تشيشة الزّعتر و كاين التشّيشة تاع لڨمح يديروها بحبّات لڨمح. كاين فاني شّوربات خاصين بمناطق ،ولايات و واحات . نصيبو الدوبارة لي اصلها من بسّكرة و يديرو فيها راس لحانوت ، الحمّص ، الفول و يسّڨوها بزيت الزّيتون ، الببروسة لي هيا شّوربة قديمة تاع دزاير ترجع لوقت الاتراك و يديروها بلّحم لمرحي، العليوةشّوربة اصلها من واحة مرتوتك يديروها بعشبة بريّة يسّموها ايناسنيس، البكّتوف لي هوا شّوربة خاثرة بل قرعة و مشهورة بزّاف عند ليهود لجازايريين ،الفتراشي هيا شّوربة موروثة تاع دزاير يديروها بكورنيات صغار تاع السّميد و يعطّروها بل قرفة ،لاوزان ولا تاحريرت اصلها من قصر بوسمڨون و تشبّه شوية للحريرة،تندار هاذ الشّوربة براس لحانوت تاع لمنطقة و عشبة بريّة ،المرقة لحّارة اصلها مل قصبة دزاير و هيا شوربة حارّة بزّاف فيها الثّوم يديروها للمرا النّافسة و لا فل يوم السّابع تاع لميلود،المدشة هيا شّوربة ب نّعناع خاثرة بسّميد ،البيصارة شّوربة اصلها من لغرب يديروها بل جلبانة يابسة و ياكلوها فشّتا فمنطقة بني سنّوس و لغليلةلي هيا شوربة يخدموها بل برغل .

مورقات و محشي[edit | edit source]

لكوزينة لجازايرية تختالف على لكوزينات لعربية و لقبايلية على خاطرش فيها لمورقات و لمحاشي، فصّح نصيبو فيها بزّاف ليغوسات تاع لمورقات كيما لفطاير(كالدي) محشيين بطرشي، بطوماطيش، بلفرماج، و لحم مرحي ولا طون، و يتباعو بزّاف فلحوانيت تاع لفاست فود وكاين لبوراك لي ورثناه من وقت لعثمانيين ولّي هو سيڨار مقلي مصنوع ب لورق تاع لبريك محشيين على حساب كل منطقة كيفاش يديروه. لبريك لي شكلو يجي كاري يسموه لبريكة ولاّ بوراك لعنّابي على خاطرش أصلو من عنابة، و هوا معروف بلّي شكلو كبير و فيه بزّاف لنواع تاع لحشوات. لمغلف في غلافو هوا سيڨار دزيري محشي بلحم لمرحي، و لبصل، ولبيض مسڨي بصوص متبّلة.ڨاع لنواع تاع لمورقات لي كاينين، نصيبو محاشي بزّاف معروفين عند لڨور لمسيحيين و ليهود لي ساكنين فلجازاير و هوما لكوكا لي مختلفين على كوكا كتلان و هوما شوصون مخدومين بلعجينة مبسّة و محشيين تقليديا ب لفريتا ، وكاين ثاني بوراك لعجين لمقلي يخدموه ف دزاير.

كيميا[edit | edit source]

لكيميا هيا شهيوات تشبّه ل لموزي ولاّ لتاپا ولاّ ل لأنتيپاستي ، لي هوما مقبّلات نصيبوهم فوق لمايدات لجازايرية فل موناسبات كيما رمضان ةلاً كيجو ضّياف. هيا عادة كانو يديروها بزّاف لڨور ليهود و لمسيحيين لي عاشو فلجازاير قبل ليستقلال.لحاجات لي لازم نديروهم فل كيميا تقليدية:

وكاين ثاني لكيميا تاع لفاكية ليابسة و تاع شلاظة و لماريناد عند لڨور ليهود و لمسيحيين لي عاشو فل جازاير لا نيزات دخلت للجازاير من مالطا فعام 1835 و تتحط معا لكيميا.

مقبلات وحدوخربن[edit | edit source]

المعقودة هيا خبيزات صغار يندارو بلبطاطا، ينتكلو سخونين ولا باردين، و نصيبوها بزّاف على لمايدات لجازايرية في شهر رمضان.خطرات يديروها بالطون ولاّ بلسّاردين مشوي ولاّ لكفتة ولاّ لمرڨاز و يعطروها بالمعدنوس، الثّوم، لكركم ولاّ زّعفران. و نرمدوها ممبعد فل فرينة ز نقلوها حتّا تحمار.الكوكلة تشبّه للمعقودة و هيّا خبيزات تاع لّحم، الطعام، لهريسة و ثّوم ياكلوها معا الدفينة لي هيّا ماكلة تقليدية تاع ليهود تاع قسنطينة.و من بين لنواع تاع لمقبلات لي كاينين فطيّاب لجازايري نصيبو لوملات كيما التورتيلا لي تنتكل بزّاف و دوجا و نصيبو ثاني الدوجا بالبصل يديروها بلبصل، لبسباس، ونّعناع جديد و يسقوها بزّيت الزّيتون.مخ الشيخ لي هوا بيض طايب بطرشي و طوماطيش. وفتالي نصيبو الحمّص الزّيتوني لي هوا پوري تاع لحمص فيه زّيت زّيتون، لقارص، عسل ، الثّوم و نعناع.

طيابات تقليدية[edit | edit source]

لجازاير عندها بزّاف مكلات تقليدية لي هيا بزّاف غنية و متنوعة.

الكسكسو[edit | edit source]

طْعَامْ هووا بلا جازايري يطيبوه بطرق كثيرة و متنوعة، على حساب كل منطقة، مدينة، ڥلاج وواحة، كل واحد كيفاش يطيبو على حساب لمناطق, كاين پلايص لي يديرو طْعَاْم بلجاج،لحم غنمي، لحم تاع لجمل، ولاّ لحوت مزوق بلفت، زرودية،لوبيا خضرا، قرعة، لفول و لكابويا.خطرات نديرو طعام ف طبسي و نسقوه بل مرقة متبّلة، جِّي حمرا، صفرا ولا بيضا تتحط معا بزّاف لنواع تاع لخضرا و لحم، ثاني ف لپلايص لبعيدة ولاّ ف ديار تاع لحُظُرْ لي جايين في شمال تاع لبلاد.

نلقاو طْعَامْ تاع لعروبية لي يندار بلحم يابس. و كاين طعام يجي متبّل نصيبوه فل جنوب، يديروا فيه بزّاف توابل و لاعشاب.نلقاو طعام رطب و رقيق يديروه فل مدن تاع شمال، و كاين ثاني طعام بل حوت يديروه فل مدن الصغار لي جايين قدام لبحر ، وطعام لمعروف بل لعشاب ف منطقة لقبايل. نلقاو ثاني طعام لحلو و مالح يسموه ثاني سفا ولا كاين لي يجي حلو برك لي نسموه لمسفوف. هادو هوما لنواع تاع مختلف طعام:

  • طعام دزيري.
  • طعام لمغمومة تاع لاوراس.
  • طعام سراير تاع ورڨلة.
  • طعام لبلوط تاع ورڨلة، (لعوانة) و شنوة.
  • طعام أمقفول تاع لقبايل.
  • طعام معمر تاع وهرن.
  • طعام مزيّت تاع قسنطينة.
  • طعام أوشوتيني تاع غرداية.
  • طعام بل بيصار تاع لقبايل.
  • طعام محوّر تاع قسنطينه.
  • طعام بندراڨ تاع لواد و لواحة تاع توڨورت.
  • طعام تلايڨات تاع مرتوتك.
  • طعام حبات تاع توڨورت.
  • طعام صلتاني عنابة.
  • طعام بو مفور تاع بسكرة و لواد.
  • طعام مستغانم .
  • طعام سودراس تاع لقبايل.
  • طعام كابويا تاع قبيلةواد جلال.
  • طعام حلحال دزيري.
  • طعام الناعلي تاع عنابة.
  • طعام وليمة تاع دزاير.
  • طعام تويشتشود تاع لقبايل.
  • طعام شرشالي.
  • طعام تاسيلت تاع لقبايل.
  • طعام ببوش تاع مستغانم.
  • طعام أوشو و سوفر وادي بني مزاب.
  • طعام لحمامة تاع لأطلس لبليدي.
  • طعام ڨالمي.
  • طعام زريڨا تاع عنابة.
  • طعام بريوش تاع دزاير.
  • طعام بوزولوف تاع لعيد لكبير.

الشكشوكة[edit | edit source]

الشكشوكة هي نوع من الشلايظ ولا ماكلة يسموها غتتويل تاع الخميرة ف شرق لجازاير ،يديرو فيها طوماطيش وطرشي طايبة وكل پلاصة كيفاش يطيبوها ،هاد لغوساتةنقدرو نشبحوها بلبطاطا مقطعة مورصوات رقاق مقلييت في زيت زيتون كحل،فول مفور ولا نقلوها بدهان .فلجازير كاين طريقة يديرو بها تشكشوكة بزّاف معروفة لي فيها لبصل ،طوماطيش ،طرشي وف تالي نكسرو عليها لبيض نخلوها حتى طيب.

البسطيلة[edit | edit source]

أصلها من [[المغرب][11]، الپاستيلة لي يسموها بلّوغة لجازايرية، هيا ڨاطو مخدوم بلعجينة لمورقة و لّوز محمّص بلحم تاع لجاج ولاّ تاع لحمام، ف لجازاير يرشّوها بسّكر ڨلاصي و يزوقوها بلقرفة و معروفة بزّاف ثمّة.و يطيبوها ثاني فل المغرب و معروفة بزّاف تمّة،الطيّاب تاعها اصلو من المغرب.

طيابات حلوين-مالحين[edit | edit source]

لكوزينة لجازايرية تتميز بتنوّع لي فيها تاع لمكلات لحلوّة و لمالحة لي نلقاوهم ف بزّاف پلايص لقدم لي جايين ف شمال لبلاد، خلاوهالهم لمهاجرين تاع لأندلس:دزاير، عنابة، بليدة، شرشال، قسنطينه ، قليعة، ندرومة، وهرن، [[[Wp/arq/تلمسان|تلمسان]]. كاين بزّاف غوسات تاع لمكلات لحلوّة و لمالحة لي لازم يكون فيها لفاكية مبّية و لفاكية ليابسة ولاّ ثاني لفاكية تكون طرية مع مورصو تاع لّحم من مليح يكون غنمي، كاين لي يطيبوه مالح وكاين لي يطيبوه حلو (كرميليزي)، نقدرو نشوفو هاد لاختلاف مع لّحم لحلو وين نلقاو لحم مقسوم مورصوات صغار و مبعد نطيبوه ف سكر حتا يولي كيما كرامال (كرميليزي) ف عنابة، وثاني يطيب مالح متبّل و مقسوم مورصوات كبار ف تلمسان. الطرق لي يطّلبها هاذ طيّاب تندار بدّقة وهاذي هيا لحاجة لي خلاتو يجي بزّاف بنين، ثاني كاين بزّاف مكلات حلوّة و مالحة سورتو فل جازاير وين نشوفو بلي كاين بزّاف لفاكية طريّة لمحشية، وهاد لحاجة نلقاوها ف لّحم بالتّفاح، يطيبو تّفاح محشي بالّوز، لمشيمشة معمرة بنًافل محشي بلپودر تاع اللّوز بلمازهر تاع تشّينة ،سفرجل بلحم لي هوا سفرجل كرميليزي معا مورصوات تاع لحم ،طاجين كاستل يتخدم بلكستناء، طاجين بل بطاطا حلوة و لمازهر نصيبو فيه بطاطا طرية و لمازهر تاع تشّينة يديروه ف عنابة ،شباح السفرة يديروه ف عنابة قسنطينة نديرو فيه صوص تاع سيرو . كروكات تاع اللّوز ،البسيبسي بلحم لي هوا ماكلة تاع لحم يتحط مع لاپوري تاع لقرعة لحلوّة معطرة بلمازهر تاع تّشينة و نزيدولها راس زنجبيل ،هاد لماكلة يديروها ف تلمسان.سفيرية تلمسان هيا ماكلة فيها صوص بزّاف بنينة تنحط مع لوز يجي مرحي و يديروه على شكل معّينات بدقيق معطر بزعفران ،طاجين لحم بل كرموس يتحط معا كرموس طري و لوز محمّص و ثاني معطر براس لحانوت، لخمورية تاع عنابة مخدومة بلحم لبڨري كرميليزي يتحط معا لبصل مسقي بمعجون تمر ،لمرقة بلعسل لي هوا ماكلة يديروها بلحم يتحط معا زبيب معسّل معطر بزغفران ،لمروزية، لتفايا لي هيا مشروب تاع لبصل و زبيب يتحطو معا لبيض مغلي .

20161201 211344 rechta

معجنات غذائية[edit | edit source]

[12][13][14][15] [16] [17]

فرامج[edit | edit source]

فن الطيّاب لجازايري معروف بزّاف بليّ يستعّملو فيه لحليب؛ و هاذ شي نلاحظوه سورتو من لنواع تاع لفرامج التّقليديين لي كاينين فل جازاير ؛ و هوا الطيّاب لعربي لقبايلي لوحيد لي فيه بزّاف لفرامج على حساب ما قال الشاف تاع لفرامج اندروي تاع ݕاري. لفرامج ينصنعو كثر في بلاد لقبايل كيما لاغوغلو[18] عند لقبايل لي يشبه للجبن و لي هوا فرماج مصنوع بل حليب تاع لبقرة و كاين لي مصنوع بتاع لمّعيز ؛ و مبعد يعصروه و يزيدولو لما تاع لكرموس . لعول[19] هوا فرماج تاع التوارڨ لي يسكنو فل هڨّار يصنعوه بل حليب تاع نعاج لي يديروه في شكارة مصنوعة بل جلد تاع لمعّيز يسمّوها الشكوة. البوهزة[20] يصنعوه بل حليب تاع لمعزة و لا تاع نعجة و اصلو من لبلادات تاع لوراس كيما باتنة ؛ خنشلة ؛و ام لبواقي ؛ يمّلحوه و يڤطروه و يصّفوه داخل الشكوة ومبعد يزيدولو لفلفلة حمرا حارة . الاباكباكان[21] تاع لوراس يصنعوه فاني بنفس لحليب لي يصنعو بيه البوهزة ؛ و يتميز بشعير لي يزيدوهولو و يحطوه يومين حتى لخمسيام يخمر في بلاصة سخّانة تاعها تكون 20 درجة. ليقونان[22] تاع لقبايل يصنعوه با للّبا برك و يديروه في مواعين تقليديين يدّهنوهم قبل ب زيت الزيتون تاع ليد. الكليلة هوا فرماج تاع لقبايل نصيبوه في كامل لبلاد سورتو ف لبلايص لعالييين و هوا فرماج بيض ناشف و شاد في بعضو بعض[23]. لودي وان اولي[24] هوا فرماج تاع التوارڨ يشّبه للفرماج لبيض يقسموه مورصوات صغار و ياكلوه فري و لا ناشف. التكامارت[25] لي معناها صحراوي هوا مل فرامج تاع لهڨّار يصنعوه بمورصوات تاع رايب تاع لمعيز و يعجنوهم فوق حصاير بل عيدان تاع لبسباس لي يعطولو بنّة و مبعّد يحطوه يومين فشّمس و مبعد يخلوه ييبس فظّل . و فتالي نصيبو التكماريت[26] تاع مزاب و نّعامة يصنعوه غير بل حليب تاع لمعيز برك و ياكلوه كيما ديسار فل مناسبات و يسڨوه بل عسل و لكاوكاو و يسربوه معا لتاي بنعّناع. كاين فاني فل جازاير فرماج لحر لبلدي اصلو عربي يسموه لجْبن لي هوا فرماج بيض و فري يزيدو يعطروه بزّعتر و كاين فاني فرماج بيض تقليدي ياكلوه كيما لياغورت لي هوا الرايب تاع الترك لي حنايا ورثناه من عند الشعب التركي لي كانو ساكنين فل جازاير من قبل في وقت لعثمانيين و لي منّا جا لاسم نتاعو.

الديسيرات[edit | edit source]

الحلويات[edit | edit source]

اديسيرات لجزايرية كثرتها متكونة من حلويات فيها لكريمة بدڨيق و لحبوب هي عادة قديمة تتسربى مورا لفطور و تاني في وقت لفطور من بين هذو لي ديسير لي فيهم لكريمة و لي معروفين بزاف :نلقاو ساتلاج[27] فدزاير و لمحلبي في قسنطينة الي هو كريمة تاع روز تقليدية اساسها لحليب و ماوردالتشّينة و السكر مشبح مليح و معطر بلقرفة. لبالوزة: في دزاير اساسها لحليب و لمايزينة لمعطرة بمازهر و ما زهر لبرتقال معمر عموما بلفاكيه المجفة ولا بكريمة تاع فاكية مطحونة جديد و مذرية مالفوق و لا ''البزيد'' في قسنطينة الي هوا مقبلة متكونة من ديسيرات تقليدية :مخ اشيخ و لعصيدة. منبعد،لحلويات الي اصلها دقيق فلجزاير عددها ما ينحصاش لعصيدة الي تتوجد من دقيق و سكر تنتكل ما بين فطور تاع صباح ; الغداعلى خاطر ثقيلة و فيها الزبدة بزاف.كاين الطمينة تانيت و الي هي ديسيير جاي شغل عجينة مصنوعة مالسميد و الزبدة و العسل و عجينة التمر ومعطرة بالقرفة الي تميل لشعال من نوع تاع شباح.اطمينة و لغرس المصنوع م التمر.طمينة بيضاء مصنوعة من سميد بيد.و طمينة اللوز المصنوعة ماللوز وتاني طمينة الحرور اصلها قاع مالقرايس. كاين تانيت حلوات اصلها حبوب كيما زريرة الي هيا اختصاص ناس عنابة.مصنوعة من لقمح لمطحون رقيق و زبدة و العسل و لا زريرك لحبوب المعمرة بالمكونات لمطحونة (قمح، عدس، حمص؛ جلجلان مقلي والمسقي بالعسل و الزبدة و المشبح بالفاكية اليابسة.

الڨاطو[edit | edit source]

لڤاطو فلجزاير ينتكل بزاف في سهرات رمضان و لا في مناسبات كبيرة بلا الموسكوتشو[28] الي ينتكل يوميا و الي هو ڤاطو بسيط و مرات يكون مرخم بشيكولا ولي مصنوع من زاست تاع ليم و كثرتها مشبح ب لمعجون تاع لمشماش بزاف قريب لڤاطو بالياغورت و جينواز هو القاطو الباين في لكوزينة لجزايرية ليستة تاع لقاطو لجزايري متكونة من جهة خرى من خبز الباي الي هو ڤاطو تاع لجزاير لعاصمة ڤريب للبابا لمصنوع ملخبز لمرحي و لوز، لبسبوسة لاصلية تاع شرق تجي خفيفة و معروفة تاني بزاف فلوروپ و لمغرب لكبير قلب اللوز:الي هو كاري تاع سميد قلبو لوز مسڤي بسيرو لعسل و ما زهر لموجد بحرفية فلاخر،كاين لڤاطو تاع لقبايل تقليدي سموه ''تاحبولت'' و لا مشوشة و لا مرا مقتولة بدڤيق سميمدة بلبيض ولعسل ونلقاو لمدربل اصلو شرق لجزايري هو ڤاطو مطلي بلمعجون و مغلف بتوت وبعجينة راپي و لوز ايفيلي معطر بليم لخضر و ما ورد تشينة.

الپاتيسري[edit | edit source]

التشاراك المسكر ولا قرن الغزال

لباتيسري لجزايري بمصطلح باتيسري شرقي[29] و لاغلبية متكون من فاكية يابسة:،و سيرتو لوز لمعطر بماء ورد تشينة و العسل. هذي لاباتسيري تجمع اختصاصات تقليدية:كيما ''دزيريات''، ''تشاراك''، ''لكعك''، ''الڨريوش''، لمحنش و ''لمخبز''،و زيادة على هدا ''لمقروض'' ; والي هو اختصاص تقليدي لي تلقى بزاف تاثيرات مطبخية ،سيرتو مع لاجئين البربريين تاع لاندلس و الي جابو معاهم في 1492 مونتيكاوس المشهورة و الي يقولولها ''الغريبية''.

كي كانت دزاير في بريود تاع تراكا نعرف لباتيسري كيما ''لبقلاوة'' و ''لكنافة'' و ''ليلوكو'' ، ''لهلفا''، رفدت لاسم بلعربية لجزائرية سماوات كيما لبقلاوة قطابف وحلوة لحلقوم،،حلوة ترك حتى اوروبا ساهمت في لحلوة لجزايرية على خاطر تلقى وين يبيعو لباتيسري بزاف قاطو سبيسيال فرنسي كيما ''ليماكارون'' و لا ''لميفاي'' الي هو بزاف معروف فدزاير. دزاير بدلت في طريقة تاع ليروسات كيما لكنافة لي مافيهاش لعقدة تاع لحليب بصح فيها فاكية ناشفة. لحلوى دزيرية تقسمت لبزاف صناف و على حساب طريقة طياب نتعهم: لي بل قليان،بلا طياب،فلكوشة،فوق طاجين،كيما هو لحال ''لصامصة''، ''لكفتة''،''حلوة طابع'' و ''لمبرجة'' و زيد على هذا بزاف نواع ، تاع طريقة طياب لي تميز لحلوة لجزايرية و لي ترجع لطريقة توجاد: بلعسل، بلفاكية يابسة و لفاكية مصبرة ، بلمعجون ، عجينة مرملة بنواد كوكو. و هاذو لنواع تاع طريقة توجاد متعلقة بلنواع تاع لحلوة من بلاد لختها في بلادات كيما قسنطينة لمقروط يطيب فلكوشة، في تلمسان يديرولو لبيض و في دزاير الوز و في سوق اهراس نشكلوه بلفرينة حتى في وهران يندار بلقرايس. لحلوى لجزايرية تنصنع سبيسيال للمناسبات وقاع لنواع و كل وحدة تتبدل على حساب طيابها. في لعراس تتسرب كيما ديسير لي يتسربي في لخر لوليمة.بصح في لمناسبات دينية كيما لعيد صغير ينتكل قاطو. ليوم لحلوى لجزايرية راهي معروفة بزاف فلعالم.و هاذا راجع لزماقرة و حتي ليشان تاع سميرة تيفي[30]. و لي امسيو تع مدام بو حامد في كنال الجيغي . فالميليو نتع طياب لي راه نوغمال ومع لي زالجيغيان مشاو لبلادات لي قدامنا . ولى لقاطو نتع لالجيري بزاف معروف فالمغرب العربي . كيما حال المغاربة . كيما هديك لا سبيسياليست نتع الكوزينة المغرابية و التطوانية فطيمة رحوني[31] . وين نصيبوا بزاف الحلوة الجزايرية معلقة بلي زالجيغيان[32] . مين داروا تراكا لفتوحات فالقرن ربعطاش والفرانسويين فالقرن تسعطاش نقدروا نصيبوا دوك شي حلوة معروفة فالمغريب اصلها مالجازاير كيما محنشة . تشاراك مسكر يقولولو كعب لغزال . قطايف . بقلاوة . مشوك . مخبز . مقروط اللوز .

پاتيسري دزيري : من التقاليد للعصرنة[edit | edit source]

لنواع نتاع الحلوة دزيرية فمستغانم بجنب الحلوة تقليدية . الحلوة دزيرية يميزها بزاف وجها لملون ولا فوغم متقونة . فلخر نتع القرن عشرين الحلوة دزيرية بدات تطور بوحد لابداع دوبلي . هادي وحدة من لحلوة لي محبوبة فالجزاير و المغرب العربي تاني . ورجعت لمتريال نتغ الكوزينة التقليدي بصح خير منه باش يفيني مليح الزواق والقلاساج لبزاف لحلوة كيما تشاراك قلاسي والمخبز و الكعك . كورني دزيرية . تاج لملوك . سليلات . فهاد لاقام نتع الحلوة نلقاو دي موتيف مالطبيعة كيما الدالية . الورد . الياسمين . ولا تانيك بارسوناج تاع زواج مع الشابو نتع العرسان . براوات دزيرية . صبيعات لعروسة . مخدات . رزمات لعروسة

مشروبات[edit | edit source]

ݴتاي[edit | edit source]

تارڨي يْوجد فلاتاي بالنعناع

لاتاي بالنّعناع مع القهوة هوما المشروبات السخونة لي يستهلوكوهم بزّاف فلبلاد مي لاتاي بالنّعناع هو سيرتو طقس يديروه فالمناسبات الخاصة. نشوفوه بزّاف عند ناس الجنوب تاع الجازاير وين هو عنصر مركزي فالحياة الجتماعية[33].كيما نلقاوه تاني فلولايات تاع الشمال. يْوجدوه بلاتاي پودغ و معطر بورق تاع النّعناع خْضر ولا يابس. هاذا المشروب التقليدي يتبّع قواعد باينة مليح و كي يولو يطَيبو فيه:

 1- نغسلو البودرة تاع لاتاي في ما مغلي.
 2- نصُبّو لاتاي.
 3- نزيدولو نعناع خضر ولا يابس و خبز السكر ولا نزيدولو السكر.
 4- نخلطو لاتاي مليح.

كي يجو يحطّوه، البقراج تاع لاتاي يْترفد لفوق بزّاف باه يْهَوو لاتاي و الكاس لازم يتسربى فيه عند النُّص ديالو باه اللّي يشرب مايحرقوش من صباعتيه. أما بالنسبة للذوق ماشي مليح ينسفو عليه ملفوق باش يْبردوه، بصح مليح يرشفو رشفة بلفور[34].

كي يْجو يسربو لاتاي بالنّعناع، الضَّيف لازم يشرب ثلث كيسان على حساب العادات، و ما ينصحوش باش تقول لالا على الزوج كيسان الباقيين من باب التكبار و المقادرة.

 << الكاس اللّول حْلُو تاني كيما الحياة، الكاس ازّاوج فور تاني كيما الحب، و الكاس الثّالث مُر كيما الموت. >>
    --مْثْل جازايري على لاتاي. 

لاتاي ينجمو يشربوه مع الحليب في شي بلايص فلبلاد. سيرتو في تلمسان وين يسمِّيوه ناقوس لاتاي يعني سونات اتاي.

قهوة[edit | edit source]

الجازاير عندها تنوع كبير فالقهوة التقليدية ولّي تبقى حاجة مايستغناوش عليها الجازايريين في حياتهم تاع دايمن. نقدرو نلقاو القهوة التركية لي منتاشرة بزّاف و عندها بزّاف سماوات: قهوة زواوة في عنابة. قهوة الجوزوة فدزاير و قهوة جزفي في قسنطينة.كامل هاذو لسماوات هوما أصلهوم من الهدرة التركية و يهدرو على الماعون التقليدي اللّي يطَيبو فيه القهوة: الجزفي[35]. هاذي القهوة يخدموها و يشربوها من خمسميات سنة من قبل فلمدينات تاع الشمال لي لقاو بزاف تأثير العثمانيين فالطياب تاعهم. كاين بزّاف قهاوي تقليدية شعبية فلجازاير وين نلقاو قهوة نص-نص[36] و يسمّوها تاني الناقوس، كلمة تعني دا حد دّا نص-نص و الناقوس لّي يعادل ''قهوة نوازات'' لّي يشربوها فالتعويفة الصباح و فالڨوتي. و تاني القهوة الدزيرية النمودجية تاع العاصمة المعطرة بمازهر التشّينة. نلقاو تاني بزّاف قهاوي نمودجية يطَيبوها في شي بلايص فلبلاد. وهو الحال مع قهوة النايلي تاع قبيلة ولاد نايل لّي يشربوها في جوايه بوسعادة و الجلفة و لّي تبقى شوية حارة زيادة و فيها مْرارْت الحرور و قشور القرفة.

مشروبات تقليدية[edit | edit source]

فلجازاير كاين بزّاف أنواع تاع مشروبات تقليدية. نلقاو في كامل البلاد مشروبات تقليدية جِهوية و حضْرية (تاع المدينة). فالشّمال تاع الجازاير, المشروبات لّي يشربوهوم معاودين و مصفيين كثر, نلقاو عصير تاع القارص الجازايري اللّي صنع السمعة تاع البليدة و بوفاريك واللّي يسمّوها شاربات مصنوع من القارص معصور و النّعناع لخضر. اللّخشف لّي هو مشروب حلو تاع قسنطينة مصنوع من ماورد و العنب اليابس، القرفة و ما ورد التشينة. شاربات مازهر تاع دْزاير يديروها في كي يروحو للحمام وين يكون المكوّن تاع الصّح هو ماورد التشّينة. شاربات مليانة ولّي هي السيرو تاع حب الملوك، الرمّان، القارص و العنب أصلها من مليانة. وكاين تاني مشروبات وحدوخرين يداويو بيهوم كيما حبة الحلاوة و ليانسون لخضر. سماغ لعربي باللّصقة تاع لعرب ولا معجون الحرور ولّي هو مشروب متبّل بالحرور, ميلونج تقليدي تاع قرايص فلجازاير. و كاين مشروبات متبلين سبيسيال بناس الصحرا كيما تاڨروايت تاع المْزاب بالتمر، القارص، و الاس (عشبة معطرة) و القرايص (زعفران و لب الجوزة) و لعشاب المعطرة ولي هي مشروب ينَحّي العْطش و يْشَربوه للعريس نهار عرسو. الوزوازة في ورڨلة واللّي هي مشروب مْوجد من ربعين عشبة و التمر في شهر رمضان و اللّي معروفة بفاضايلها لّي تنشط و اللّي تداوي و لاّ تاني اللّڨمي اللّي هو عصير تاع نخل الصحرا.

حليب[edit | edit source]

الحْليب فلجازاير هو تاني دايرينو مشروب اللّي يشربوه كل يوم في ڨاع حالاتو كيما كان لبن و رايب وفي ڨاع البلايص. مي ماهوش نفسو في ڨاع البلاد. مَثلن فالصحرا حليب المعزة والجمل وهو اللي يمشي بزّاف فالجنوب مي فالشّمال كاين حليب البقرة. فشّمال تاع لجازاير, الحليب يْنشرب كل يوم الصبّاح ومرّات فاللاّخر تاع النهار مخلط بالقهوة. عندو قيمة رمزية تاني في شهر رمضان لاخاطرش يمشي بزّاف باش يكسرو بيه الصيام عند الفطور متبعين بيها سنة الرسول محمد (ص) مي هو تاني دلالة على الكُرمة و الخصوبة على هاديك شريب الحليب عادة راسخة يديروها للعرسان نهارعرسهم.

ڨازوز[edit | edit source]

پيبليسيتي قديمة تاع ڨازوز سيليكتو

فلجازاير نشوفو بزّاف الڨازوز حاضر. نلقاو اللّيموناد البَيْضة حمّود بوعلام اللّي صنعوها فْ ألف و تمنميةو تمنية وسبعين و اللّي يشربوه سيرتو فدْزاير العاصمة. كولا سيليكتو اللّي راهُم يصَدروها للخارج ضرْوك. أكبر خط انتاج تاع ڨازوز فرْويتي دّاتو لامارك تاع اِيفري و تاني ڨوازيز خاصّة بكل مدينة و منطقة كيما ڨازوز ماركت بونة في عنّابة و سْليم فدْزاير. و كاين تاني الڨازوز التّقليديمونادة تاع الشّمال-الشرقي. ڨازوزة فالوسط تاع البلاد و ليموند فشّمال-الغربي لي كان الڨازوز القديم في قرعة خضرة قابْلة للرسكلة. لكل هادا نزيدو ماركات تاع الخارج كيما كوكاكولا فونتا سْپرايت اللّي يبقاو شويّة ماهومش شعبيين كي نقارنوهوم مع الماركات تاع البلاد. و نشوفو مليح بلّي الڨازوز أورونجينا يشربوه من بكري فلجازاير لاخطرش فالبليدة وين صنعوه ومن التشّينة المعصورة تاع بوفاريك.

كحول[edit | edit source]

على جال سّبايب تاع الدّين تاع الجازايريين شريب الكحولالشّْراب ما يسيبورتوهش و مايبغوش يشوفوه فلجازاير مي ماهومش مانعينو فلقانون وهادا الشّي اللّي ما يمنعش الحصايد تاع الدّالية باش يصنعو أنواع تاع شّراب من أصل التّل تاع معسكر، المدية و تلمسان. البّيرة و نواع وحدوخرين تاع الشّراب الخفيف شويا يشربوهوم فلجازاير مي يشربوها بلخزنة و التّخبية و العادات تاع الشعب يبقاو متحفظين عليه.

لاكريم و شْربات[edit | edit source]

لاكريم و الشْربات فلجازاير نشوفوهوم بزاف فلمدينات تاع الشّمال. الشْربة الشّعبية بزّاف فلبلاد هي الكريپوني شْربة تقليدية بالقارص (اللّيم) جابها ڨيلبر صوريانو في وَهرن. الكريبوني ياكلوه بزاف فلولايات تاع الشمال لي ثلقاو عتبة من شعب لبلاكفوت كيما عنّابة، دزاير، قسنطينة، وهرن، سيدي بلعباس ... نلقاو تاني بزّاف أنواع تاع الشربات بلي ڨو تقليديين لّي نسمّوهوم لي برود بالطومااطيش، فاكية حَمرة، القهوة، دڨلة نور، الحرة، لاتاي بالنّعناع، فاكية حمرة، زرّيعة القهوة ولاّ الياسمين تاع العْرب. و فالتّالي نلقاو مع الشْربات التقليدية لاكريم الطالياني لي شعبي بزّاف.

طيابات بسماوات ماشي نورمال[edit | edit source]

بزاف طيابات جازايرية قديمة هوما من فن الطبخ و التذوق الدزيري يرفدو سماوات مشي نورمال بمفهومات هزلية، شهوانية، متعلقة بالموت ولاّ بالملك. نلقاو مثلا :

مراجع[edit | edit source]

  1. http://www.algerie-monde.com/histoire/romaine/
  2. https://books.google.fr/books?id=nNujOajraiAC&pg=PA447&lpg=PA447&dq=alg%C3%A9rie+grenier+de+rome&source=bl&ots=TGzlk8NZMG&sig=D-RyUkU2QuucaoyEQeNqwZ2brd4&hl=fr&sa=X&ei=qLwPU8_TNsiY0AW4w4CADQ#v=onepage&q=alg%C3%A9rie%20grenier%20de%20rome&f=false
  3. https://books.google.fr/books?id=j2upw1xXlOkC&pg=PA98&dq=alg%C3%A9rie+grenier+de+rome&hl=fr&sa=X&ei=LL4PU6zfFMrJ0QXdzYDIBg&ved=0CDUQ6AEwATgK#v=onepage&q=alg%C3%A9rie%20grenier%20de%20rome&f=false
  4. https://books.google.fr/books?id=6IUUAAAAYAAJ&pg=PA7&dq=alg%C3%A9rie+grenier+de+rome&hl=fr&sa=X&ei=LL4PU6zfFMrJ0QXdzYDIBg&ved=0CEUQ6AEwBDgK#v=onepage&q=alg%C3%A9rie%20grenier%20de%20rome&f=false
  5. https://web.archive.org/web/20170319105053/http://ici.radio-canada.ca/nouvelles/dossiers/algerie/histoire.html
  6. http://touggourt.zzl.org/recettesdecuisin/page19.html
  7. https://web.archive.org/web/20160911085930/http://www.dziriya.net/saveurs/article10.php?p=401&title=lemouarek
  8. https://web.archive.org/web/20140726095123/http://www.oraninfo.com/Fondation-de-la-ville-d-Oran
  9. http://forum.doctissimo.fr/grossesse-bebe/Mamans-Algerie/harira-rectte-donner-sujet_1082_1.htm
  10. https://books.google.fr/books?id=Sc2ULvSA7vkC&pg=PA87&lpg=PA87&dq=harira+de+cherchell&source=bl&ots=zEFJkUAcOA&sig=MuTDqqqwTPoW9xqEMicJlKJK8Qs&hl=fr&sa=X&ei=R62eU822JsrD0QW-zICgBA&ved=0CG0Q6AEwDA#v=onepage&q=harira&f=false
  11. https://fr.wikipedia.org/wiki/Pastilla
  12. http://www.tuniscope.com/article/10077/vie/alimentation/consommateurs-262211
  13. http://www.businessnews.com.tn/details_article.php?temp=1&t=520&a=20635
  14. https://books.google.fr/books?id=OQCQ7g8vkxQC&pg=PA47&dq=trida+alg%C3%A9rie&hl=fr&sa=X&ei=pOLLU42FLeTT0QXF1IGoBg&ved=0CCUQ6AEwAQ#v=onepage&q=trida%20alg%C3%A9rie&f=false
  15. https://books.google.fr/books?id=7aTg8X3bA5wC&pg=PT146&dq=trida+alg%C3%A9rie&hl=fr&sa=X&ei=pOLLU42FLeTT0QXF1IGoBg&ved=0CB8Q6AEwAA#v=onepage&q=trida%20alg%C3%A9rie&f=false
  16. https://fr.wikipedia.org/wiki/Cuisine_alg%C3%A9rienne#cite_note-16
  17. http://www.djazairess.com/fr/liberte/138954
  18. http://androuet.com/Aghoughlou-1434.html
  19. https://books.google.fr/books?id=0NqkKbor-w4C&pg=PA238&lpg=PA238&dq=aoules+fromage&source=bl&ots=Ey5yqIm53E&sig=eT1jyvGCD-ZNdsZ_yznZFEn7G2w&hl=fr&sa=X&ei=3FilU6LeLIGr0gWj8YDoCA&ved=0CCAQ6AEwAA#v=onepage&q=aoules%20fromage&f=false
  20. http://www.androuet.com/Bouhezza--1430.html
  21. http://www.androuet.com/Ibakhbakhane-1437.html
  22. http://androuet.com/Ighounane-1435.html
  23. https://cuisinea4mains.wordpress.com/tag/klila/
  24. https://books.google.fr/books?id=rncuw97ubn0C&pg=PA110&lpg=PA110&dq=Oudi+(fromage)&source=bl&ots=_cmTgtoYlK&sig=KttS9olmMBMv5Y403TVtAMlzeeg&hl=fr&sa=X&ei=e0ylU97cN6Kt0QW-7oG4Ag&ved=0CF0Q6AEwCw#v=onepage&q=Oudi%20(fromage)&f=false
  25. http://www.androuet.com/Takammart-1436.html
  26. http://androuet.com/Kemaria-ou-Takemarit-1432.html
  27. https://azititou.wordpress.com/author/azititou/page/2/
  28. http://www.amourdecuisine.fr/article-mouskoutchou-mouscoutchou.html
  29. https://books.google.fr/books?id=WJu4--_adNcC&pg=PA43&dq=p%C3%A2tisserie+alg%C3%A9rienne&hl=fr&sa=X&ei=1bALU6HTMYea1AWt7YDgAg&ved=0CEQQ6AEwAw#v=onepage&q=p%C3%A2tisserie%20alg%C3%A9rienne&f=false
  30. https://web.archive.org/web/20170205082612/http://www.samiratv.tk/
  31. https://web.archive.org/web/20140228040425/http://www.saveursetcuisinedumaroc.com/content/view/112/58/lang,fr/
  32. http://marocrecettes.com/la-cuisine-de-tetouan/domain.expired
  33. https://books.google.fr/books?id=a0NlrExdkgEC&pg=PA84&dq=th%C3%A9+%C3%A0+la+menthe+alg%C3%A9rien&hl=fr&sa=X&ei=Tz9mU-j7C8vO0AXoqoGYDQ&ved=0CGEQ6AEwBA#v=onepage&q=th%C3%A9%20%C3%A0%20la%20menthe%20alg%C3%A9rien&f=false
  34. https://books.google.fr/books?id=Pt9-5sbgUjMC&pg=PA145&dq=th%C3%A9+%C3%A0+la+menthe+alg%C3%A9rien&hl=fr&sa=X&ei=Tz9mU-j7C8vO0AXoqoGYDQ&ved=0CFoQ6AEwAw#v=onepage&q=th%C3%A9%20%C3%A0%20la%20menthe%20alg%C3%A9rien&f=false
  35. https://archive.org/details/motsturksetpersa00bencuoft
  36. https://books.google.fr/books?id=sdE9CvuPh6cC&pg=PA91&dq=caf%C3%A9+alg%C3%A9rien+lait&hl=fr&sa=X&ei=2Gt_U8TmM6We0QW1nYCoDw&ved=0CDkQ6AEwAQ#v=onepage&q=caf%C3%A9%20alg%C3%A9rien%20lait&f=false