Wn/shn/ၵႅမ်ၸွမ်ၸိုင်ႈဢေႇၵႂႃႇတေႃႇၵဝ်ႇ ဢၼ်ၺႃးၺွပ်းၼၼ်ႉ လႆႈတၢင်ႇႁူင်းယႃဝႆႉ

ဝၼ်းဢင်းၵၢၼ်း၊ ဢေႇပရႄႇ 9၊ 2024 

ၵႅမ်ၸွမ်ၸိုင်ႈဢေႇၵႂႃႇတေႃႇၵဝ်ႇ Jorge Glas

ႁူဝ်းႁေးၵလၢသ်ႉ ဢၼ်ပဵၼ် ၵႅမ်ၸွမ်ၸိုင်ႈဢေႇၵႂႃႇတေႃႇၵဝ်ႇ ၼၼ်ႉ ဝၢႆးသေ မၼ်းလႆႈထုၵ်ႇၺႃးၺွပ်းတီႈၼႂ်း လွင်ႈၶဝ်ႈၺွပ်းလုမ်းၽွင်းတၢင်လူင်မႅၵ်ႇသီႇၵူဝ်ႇ တီႈဝဵင်းလူင်ၵီႇတူဝ်ႇသျီႇယဝ်ႉ မၼ်းဢမ်ႇၵိၼ်တၢင်းၵိၼ်ယဝ်ႉလႄႈ လႆႈဢဝ်တၢင်ႇႁူင်းယႃဝႆႉၼႆ ဢၼ်ပဵၼ် ၽူႈမီးပုၼ်ႈၽွၼ်းၽၢႆႇၶွၵ်ႈၶဝ် လႆႈမွၵ်ႇလၢတ်ႈဝႃႈၼၼ်ယဝ်ႉ။

ၵလၢသ်ႉ ဢၼ်ဢႃႇယုမီး 54 ပီၼၼ်ႉ လႆႈၶိုၼ်ႈႁူင်းယႃတပ်ႉၼမ်ႉဝႆႉ တီႈၼိုင်ႈယဝ်ႉ။ မၼ်းလႆႈထုၵ်ႇၵူတ်ႇထတ်း လွင်ႈၵိၼ်သူးၵိၼ်လၢပ်ႈသေ မၼ်းလႆႈသေႃႉယူႇတီႈ လုမ်းၽွင်းတၢင်လူင် မႅၵ်ႇသီႇၵူဝ်ႇ တီႈ တီႈဝဵင်းလူင်ၵီႇတူဝ်ႇသျီႇ မႃး ၸဵမ်မိူဝ်ႈ လိူၼ်တီႇသႅမ်ႇပႃႇ ပီႈၵၢႆယဝ်ႉသေ မိူဝ်ႈ ဢေႇပရႄႇ ဝၼ်းထိ 5 ၼၼ်ႉ ၽူႈမီးဢၢမ်းၼၢတ်ႈဢေႇၵႂႃႇတေႃႇၶဝ် လႆႈၶဝ်ႈၺွပ်း ၼႂ်းလုမ်းၽွင်းတၢင်လူင်သေ လႆႈႁွင်ႉမၼ်းၵႂႃႇယဝ်ႉ။

ၽၢႆႇမႅၵ်ႇသီႇၵူဝ်ႇၶဝ် တိုၵ်ႉႁႃပၼ်မၼ်းပဵၼ် ၵူၼ်းပၢႆႈၽေးၵၢၼ်မိူင်း ၼႃႈမၼ်းတေထုၵ်ႇၺွပ်း ၼၼ်ႉၵူၺ်း။ မိူဝ်ႈ ဢေႇပရႄႇ 8 ဝၼ်းၼၼ်ႉ လႆႈႁွင်ႉၸိုဝ်ႈၵူတ်ႇထတ်းၵူၼ်း တီႈၼႂ်းၶွၵ်ႈ ဢမ်ႇလႆႈငိၼ်း ၵလၢသ်ႉ တွပ်ႇၶိုၼ်းလႄႈ ၸင်ႇလႆႈဢဝ်တၢင်ႇႁူင်းယႃ ၼႆယဝ်ႉ။ သိုဝ်ႇၶၢဝ်ႇၼႂ်းမိူင်းဢၼ်ၼိုင်ႈဝႃႈတႄႉ ၵလၢသ်ႉၼႆႉ ယွၼ်ႉယႃႈယႃပၢႆးၸႂ်တူၵ်းလႄႈ မၼ်းလႆႈပဵၼ် ၵူဝ်ႇမႃၵႂႃႇဝႃႈၼႆယဝ်ႉ။

မႅၵ်ႇသီႇၵူဝ်ႇ၊ မိူင်းလႅတ်ႉတိၼ်ႇဢမႄႇရိၵ ၵမ်ႈၽွင်ႈလႄႈ ဢီးယူႇ၊ ၽူႈယႂ်ႇယူႇဢႅၼ်ႇ ၶဝ် လႆႈသႄႉသွမ်းလၢတ်ႈဝႃႈ လွင်ႈဢၼ်တပ်ႉၸုမ်းၶိုၵ်ႉတွၼ်းဢေႇၵႂႃႇတေႃႇ လႆႈၶဝ်ႈတိၺွပ်းၵူၼ်း ၼႂ်းလုမ်းၽွင်းတၢင် မႅၵ်ႇသီႇၵူဝ်ႇၼႆႉ ပဵၼ်လွင်ႈပူၼ်ႉပႅၼ် လွင်ႈႁၢၵ်းၶေႃႈမၼ်ႈၵႅၼ်ႇ ဝီႇယႅၼ်ႇၼႃႇ 1961 ၼႆသေ၊ မႅၵ်ႇသီႇၵူဝ်ႇတႄႉ လႆႈတတ်းၶၢတ်ႇ ၵၢၼ်ၽွင်းတၢင်မိူင်းတင်း ဢေႇၵႂႃႇတေႃႇသေ လႆႈတွပ်ႇၶိုၼ်းဝႆႉဝႃႈ တေႇ တိူင်ႇလၢတ်ႈထိုင်တီး လုမ်းတတ်းသိၼ် ICJ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Sophie Tanno လႄႈ Richard Roth. "Ecuador faces outrage after storming Mexican embassy to arrest former VP" — CNN, April 8, 2024
• Al Jazeera and News Agencies. "Ecuador ex-VP Jorge Glas hospitalised after capture from Mexico embassy" — AL JAZEERA, April 9, 2024
• Regina Garcia Cano လႄႈ Gabriela Molina. "Mexico severs diplomatic ties with Ecuador after police storm its embassy to arrest politician" — Associated Press, April 7, 2024