Wn/nia/Muhede WhatsApp Sanandrösa Zangoguna Sawu'a Lumalö ba Aplikasi Bö'ö

From Wikimedia Incubator
< Wn‎ | nia
Wn > nia > Muhede WhatsApp Sanandrösa Zangoguna Sawu'a Lumalö ba Aplikasi Bö'ö

WikiTuria – Baŵa 15 Maret 2021, inötö tebörögö mufatörö goi-goi sibohou privasi WhatsApp no ahatö, börö da'ö no tobali ia börö wa fuli lafuli lafaigi niha goi-goi andrö. Aplikasi wakesesa okhöta Facebook andrö no ifa'anö mbeka si bohou angombakhata khö ndra sangoguna'ö ya'ia. Beka andre moguna sibai börö edöna iröi WhatsApp niha si lö fao dödö ba wamohouni andrö.

Simane si no i'ombakhaö, edöna so gangombakhata si fao fangoroma'ö visual sabölö atöla ba dödö. Ohitö dödönia, mangozara hadia zi fabö'ö ba si lö tebulö ba goi-goi andrö.

"Ma'ila muzaewe oya informasi sala sanandrösa wamahouni andre. Börö da'ö moguna sibai khöma wangadölö'ö kuyu-kuyu si tumbu moroi ba informasi sala andrö." iŵaö WhatsApp ba gangombakhata nisura Zumaha, 19 Februari 2021.

Simane si no ta'ila, goi-goi privasi WhatsApp irai oya lafatunö, ba so na i zamagölö'ö ya'ia faoma fayaŵasa dödö aplikasi wakesesa fondrege sebua andrö. Börönia, itugu mangiwa dödö zangoguna na WhatsApp andre ibe'e fefu data ba ösi wakesesa khö nina perusahaan Facebook.

Lua-luania, so zangoguna sangetu'ö awu'a khö aplikasi wakesesa tanö bö'ö simane Telegram ba Signal, ba oroma göi wa wa'oya zangoguna zi dombua andrö i'anema'ö manaoka oya. Huo-huo ba gotalua ndra sangoguna WhatsApp i'anema'ö mutema'ö faoma versi wamohouni same'e wa'aoha si lö ba WhatsApp ba zi lalö, so na i fitur same aoha khö zangoguna findra faoma fefu kese-kese moroi ba zi lalö.

Tenga sa wa lö i'ila da'ö WhatsApp. Ba gangombakhata safuria, iŵaö WhatsApp wa ba ginötö andre so göi ösa zomasi wamaigi fitur nihönagö aplikasi tanö bö'ö.

Iŵaö göi WhatsApp wa so ha'uga aplikasi bö'ö sanguma'ö wa lö labaso kese-kese zangoguna. Ba hiza inönö WhatsApp, "Moguna mu'ila wa na sambua aplikasi lö khönia do'uasa nifotöi enkripsi end-to-end, eluahania aplikasi andrö tola mombaso kese-kese zangoguna ya'ia."

Hulö itötöi Telegram ba da'a WhatsApp. Aplikasi moroi ba Rusia andrö lö khönia do'uasa enkripsi end-to-end, ba hiza so khönia "Kese-kese Rahasia" na omasi zangoguna wa kese-kesera ha toba mubaso ba wakake ni'oguna'ö ba wama'ohe'ö ba fakake ni'oguna'ö ba wanema wakesesa andrö.

Aefa da'ö iŵaö WhatsApp wa so aplikasi bö'ö sanguma'ö wa abölö sökhi ia börö me ambö oya i'ila zi fakhai ba zangoguna ya'ia moroi ba nono perusahaan Facebook andrö. Hulö na itötöi Signal ba da'a WhatsApp, börö me sindruhu göi no mufazökhi sibai Signal ena'ö ha ma'ifu ni'irö'önia sanandrösa ba zangoguna, buku alamat, grafik sosial, waö-waö wakesesa, lokasi, avatar zangoguna, fa'awösa ba grup ba töi grup.

Ifaduhu'ö WhatsApp wa so khönia lala wamaigi ösa data ena'ö tola ifahöna layanan sahono ba saro dödöda, ba molo'ö WhatsApp, da'a ni'alui zangoguna aplikasi wakesesa. "Ma faigi-faigi sibai hewisa wangai angetula ba lö aetu ma'alui lala si bohou ba wamalua noro dödö andrö faoma ha ma'ifu informasi, tenga abölö oya," iŵaö WhatsApp.

Arakhagö ba gahe gangombakhata, ifaduhu'ö WhatsApp wa ifolakhömi fefu ira si no manolo ena'ö te'ala wa'aombö dödö andre. "Ba si lö tola lö'ö so ndra'aga ba da'a wanema li gofu hadia nisofu."

Sanura: Sirus Laia
Kota: London
Baŵa: 20/2/21

Fabaliŵa lala[edit | edit source]

Kategori: AgamaBudayaEkonomiHukumIlmu PengetahuanNasionalOlahragaPendidikanPolitikTeknologiUmum

Bale zato: OlayamaAngombakhataBawagöli zatoMonganga afoNahia wamakoriNga'örö spesialNgawalö wanoloSafuria tebulöSanandrösaSangai halöŵö