Wn/cdo/臺灣遊戲《還願》網絡大傳
【2019年2月21號訊】
臺灣遊戲《還願》元宵節（19號）開賣，只幾日網絡懸頂有關其圖片共文字大傳，野価儂討論只芘遊戲，固讓「何老師」上了「热搜榜」。現在做遊戲其儂固無拍算出新其DLC。
好評野価 網絡大傳[edit | edit source]
臺灣有蜀隻獨立遊戲工作室，號𡅏赤燭。昨年發佈《返校》，今年固有《還願》，都是講臺灣其故事。只回其《還願》是講有蜀隻作家，號杜豐于。本底蜀厝儂佮盡好。之後寫𣍐出好劇本，就對老媽做風。諸娘囝病去，帶着伊去看神嬤「何老師」。㑚是講伊是蜀隻光棍，杜豐于乞伊騙去。遘尾老媽行去，諸娘囝死去，杜豐于自家也癲去。遊戲敆Steam平臺其總體評測是「特別好評」，四千幾篇評論裏勢百分之九十五都告好。昨暝敆臺灣，實況視頻其播放突超過十萬回。網絡懸頂有關其圖片共文字大傳，野価儂討論只芘遊戲。
「何老師」五帝搦？何炅：我伓是我無[edit | edit source]
遊戲裏勢其「何老師」，面上是神嬤，其實是光棍，騙去杜豐于野価錢，固讓伊諸娘囝倒浴缸裏勢，蛇酒泡七工，蜀日無遘諸娘囝就死去。網民心肝疼，大嚗「何老師」心肝生𩩍𡅏，微博裏勢「何老師」固登上「热搜榜」。㑚是講有蜀隻主持人，號何炅，伊也乞粉絲告囉「何老師」。看大家𡅏罵「何老師」，伊無辦法，只好發微博講：「此何老師非彼何老師。」
乜辰候發DLC？赤燭：𣍐方便講[edit | edit source]
「何老師」心肝野毒，五帝都伓搦，網民大告「萬人血書求出DLC」，共「何老師」搦去泡酒泡七工。也有客佻其儂分析，遊戲預告片裏固有蜀主儂其故事，㑚是講遊戲裏勢無體現，可能DLC就是講只蜀主儂其故事。這DLC就是下載包，乞遊戲加添有能耐客佻其內容。今旦下晝四點三刻，有儂敆官方QQ群裏勢問「乜辰候發DLC？」，仱運營其儂就回答講：「𣍐方便透露。」
消息來源[edit | edit source]
- Yahoo奇摩電競編輯部. 赤燭《還願》第一天上市超夯，也讓「何老師」登上熱搜榜. Yahoo奇摩電競. 2019-02-20 [2019-02-21].
- 张逸清. 台湾恐怖游戏《还愿》爆火 何炅却无辜躺枪了... 观察者网. 2019-02-21 [2019-02-21].