Wp/kus/AZAYA 45

AZAYA 45

1 Zugsɔb la yɛl si'eli nwa', “M gaŋ Sarus onɛ ka m bu'oe malʋŋ kpaam niŋ o zug la, 
ka gban'e o datiuŋ nu'ugʋ zanl, 
ye o nyaŋ buudbanɛ bɛɛ o tuon la 
ka yis na'anamɛ ba na'am gbana zug, 
ka yɔ'ɔs kʋlʋŋ banɛ bɛɛ o tuon 
ka sɔ' kʋ nyaŋi yɔɔ. 
2 M na gaadi fʋ tuon ka birig zuoya la; 
m na kɔ' kʋnt gama nɛ li kʋnt daad la. 
3 M na tisif kpan'am wʋsa linɛ su'a likin 
nɛ zin'ibanɛ an zin'isu'ada la, 
ala ka fʋ na baŋ ye manɛ an Zugsɔb 
onɛ an Israel Wina'am la buonif. 
4 Jakob onɛ aan m tʋmtʋm la zug, 
Israel onɛ ka m gaŋ la yɛla, 
ka m buolif ka tisif na'asi 
la'an nɛ fʋ ba'a kae nɛ man la. 
5 Manɛ an Zugsɔb la, sɔ' lɛn kae; 
ya'a ka' mam, Wina'am lɛn kae. 
M na kpɛmisif, 
la'an nɛ fʋ ba'a kae nɛ man la, 
6 ala ka lin yi winnigi tansid si'eli 
keŋ paae o liib zin'ig 
nidib na baŋ ye sɔ' lɛn kae zem nɛ mam. 
Manɛ an Wina'am ka sɔ' lɛn kae. 
7 Manɛ maal nɛɛsim ka maal lik, 
manɛ maal sumalisim saŋa nɛ sʋnsa'aŋ saŋa; 
man Zugsɔb la tʋm nɛ' wʋsa. 
8 Yanam saŋgbana banɛ bɛ agɔllɛ, niimi pʋpielim wʋʋ saa nɛ; 
kɛl ka saŋgbana la nii li bas na. 
Kɛl ka teŋ la yɔ'ɔg yalʋŋʋ, 
ka faangir yina, 
ka kɛ ka pʋpielim nɔbig nɛ li.” 
Man Zugsɔb la maali li. 
9 † Tɔɔg na paae onɛ nwa'asid nɛ onɛ maal o la, 
o nwɛnɛ ya'ad ka ba ya'abid. 
Ya'ad na nyaŋi bu'os onɛ ya'abid o la ye, 
“Fʋ ya'abid bɔɔ?” 
Fʋn ya'abid si'el la na yɛl ye, 
“Bɔ ka fʋ pʋ maali m nu'usɛ”? 
10 Tɔɔg na paae onɛ yɛl o ba' ye, 
“Bɔ ka fʋ du'am ka m aan nwa',” 
bɛɛ o yɛl o ma ye, 
“Bɔ ka fʋ du'adi ma?” 
11 Zugsɔb onɛ maal Israel ka aan o Wina'am Onɛ An Kasi la 
yɛl si'eli nwa' dinɛ na ti kena la yɛla: 
“Fʋ aan anɔ'ɔnɛ bu'osid mam m biis yɛla? 
Bɛɛ pa'annim dinɛ nar ye m maalɛ? 
12 Manɛ maal teŋgbauŋ la 
ka maal ninsaali niŋi li zug. 
Mam mɛŋ nu'us ka m yadig saŋgbana la; 
nɛ nwadbibis banɛ bɛɛ li ni la. 
13 M na dʋ'ʋs Sarus nɛ m pʋpielim la: 
M na kɛ ka o suoya wʋsa an sappi. 
O na lɛbisi mɛɛ m tempʋʋg la 
ka tisim nimbanɛ ka ba gban'e ba la yɔlisim, 
amaa li ka' ye ba yɔ o ligidi bɛɛ tis o si'ela, 
Zugsɔb onɛ an Paŋtita'ar Sɔb la yɛl.” 
14 Zugsɔb la yɛl si'eli nwa': 
“Egipt la'ad nɛ Kus dim banɛ kpiisid la 
nɛ Sabɛa dim banɛ wa'am la, 
ba na kɛɛn ya san'an na 
ka na aan ya din. 
Ba na dɔlli ya nya'aŋi 
ken bi'el-bi'el baans banɛ lɔɔ ba la zug. 
Ba na igini ya tuon 
ka sɔsid suguru yɛt ye, 
‘Sida Wina'am sid bɛ nɛ ya; 
win lɛn kae zin'isi'a.’” 
15 Sida fʋ anɛ Wina'am kanɛ su'a fʋ mɛŋ, 
fʋn Wina'am onɛ an Israel dim Faangid la. 
16 Banɛ maan bada la wʋsa na di nyan; 
ba na la'asi keŋ nɛ nyan. 
17 Amaa Zugsɔb la na faaɛn Israel dim 
ka li anɛ faangir linɛ ka' bɛnnɛ; 
ya kʋ maligin di nyan 
saŋa linɛ ka' bɛnnɛ. 
18 Zugsɔb la yɛl si'eli nwa', 
on kanɛ maal agɔl la onɛ an Wina'am. 
Onɛ maal teŋgbauŋ, ka li zi'e sʋ'ʋŋa; 
o pʋ maali li ka li an zaalim, 
amaa ka maali li ka nidib bɛɛ li ni. 
O yɛl ye, “Manɛ an Zugsɔb la, ka sɔ' lɛn kae. 
19 M pʋ su'a pian' li zin'ikanɛ an lika; 
M pʋ yɛl Jakob yaas la ye, 
‘Ya na ieem ka kʋ nyɛɛ ma.’ 
Man Zugsɔb la pian'ad nɛ asida; 
linɛ dɔl suor la ka m yɛt nyain. 
20 La'asimi taaba kena; 
la'asimi, yanam banɛ zɔɔ widigi kpɛn' teŋ sieba la. 
Zi'ilim dim la ken ka ziid bada banɛ ka ba zaŋ daadi maal, 
ka pʋ'ʋsid wina banɛ kʋ nyaŋi faaɛn baa. 
21 Li'elimi na tu'asini ya antu'a la, 
kɛl ka ba la'asi nwɛ' taaba sɔɔra. 
Anɔ'ɔnɛ dɛŋi yɛl nɛ' yɛla, 
anɔ'ɔnɛ dɛŋi yɛl ka li saŋa yuugɛ? 
Li ka'anɛ man Zugsɔb laa? 
Wina'am si'a lɛn kae ya'a ka' mam, 
Wina'am kanɛ an pʋpiel ka an Faangid la; 
sɔ' lɛn kae asɛɛ mam ma'aa. 
22 Lɛmmini m san'an na ka paam faangir, 
yanam banɛ bɛ teŋ-magbinnin sa la; 
manɛ an Wina'am ka sɔ' lɛn kae. 
23 † M mɛŋ nɔɔr ka m pɔɔ zi'el nɛ kpi'euŋ, 
li anɛ pian'ʋk linɛ kʋ lɛb nya'aŋa: 
Nidib wʋsa na igin man tuon; 
ka zilima wʋsa di kasɛti m yɛla. 
24 Ba na yɛlim yɛla ye, 
‘Zugsɔb la ni ma'aa ka pʋpielim nɛ paŋ bɛ.’” 
Banɛ wʋsa duoe zi'e o yɛla la 
na kɛɛn o san'an na ka o diisi ba nyan. 
25 Amaa Zugsɔb la na tis Israel yaas la bʋʋd 
ka kɛ ka ba nyɛ pʋpielim ka dʋ'ʋs o yʋ'ʋr.