Wb/nia/Band Simaenaria Lahewa

Add links
From Wikimedia Incubator
< Wb‎ | nia
Wb > nia > Band Simaenaria Lahewa

Band Simaenaria no sambua gangowuloa band[1] nifasindro ba Lahewa me 1972. Band andre göi no band siföföna sibai ba Danö Niha sangoguna'ö fakake musik nifotöi elektronik.[2] Gitar khönia tenga gitar sito'ölö, bahiza gitar sangoguna'ö listrik ena'ö terongo linia. Baero da'ö Band Simaenaria no göi band siföföna sibai mamazaewe zinunö khöra faoma kaset, si tola lafoli ba nomo khöra niha ero zamösana na so khöra wakake nifotöi tape recorder. Ngawalö zinunö ni'anunöisira no moroi ba gumbu si fabö'ö-bö'ö. So ösa nihalöra moroi ba zinunö si no to'ölö la'anunöisi niha ba mbanu-banua misa, so nihalöra moroi ba band nasional (simane Koes Plus, Panbers) ba internasional (simane Beatles ba CCR) (hatö lafazökhi döinia ba li Niha), ba so göi zinunö nifazökhira samösa molo'ö lala wanunö (gaya) ndra band nasional ba internasional andrö.[3]

Töi Simaenaria[edit | edit source]

Moguna listrik ena'ö tola moli gitar electronik simane ni'oguna'ö Band Simaenaria. Tenga simane gitar sito'ölö ia.

Lahalö döi simaenaria moroi ba döi maena ba ngawalö zinunö same'e muhi'a dödö nifotöi ceria ba li Indonesia. Moroi ba da'ö lafasahe ia tobali Simaenaria.

Sifao awö[edit | edit source]

Band Simaenaria tola mufasindro börö Martin Zebua (töi fogaoni khönia Gadi'u) ba Asadin Bu'ulölö, si so nekhe-nekhe wanunö sitedou sibai. Ba aefa da'ö so P. Adelhem Sturm, samösa pastor Katolik, sondrönia'ö band andre. Meluo da'ö mohalöŵö P. Adelhem Sturm tobali misionaris ba Lahewa. Me i'ila wa'onekhe-nekhe sibai ndra Martin awö Asadin, i'osindruhugö tödö wangalui lala ba wanga'asogö fakake band. Börö me so khai-khainia ba zahakhö tödö ba Jerman, tola te'a'asogö band elektronik siföföna sibai ba Danö Niha. Börö ia göi tola lafazökhi kaset, irege tola oya ba alio tefazaewe zinunö khöra ba zi sagörö Tanö Niha. I'anema'ö ba ginötö da'ö göi tebörötaigö tohare tape recorder ba Danö Niha.

Ya'ira sifao awö bakha ba Band Simaenaria (1972-1976) andre ya'ia:[4]

  • Martin (Gadi'u) Zebua (sondrönia'ö zanunö)
  • Asadin Bu'ulölö (gitar, kibord, sanunö)
  • Teos Zebua (sanunö)
  • Trisman Zendratö (sondrönia'ö gitar, 1972-1973)
  • Winay (sondrönia'ö gitar, 1974-1976)
  • Robert Tan (gitar/sanunö)
  • Yusuf/Hiap (gitar/sanunö, 1973-1974)
  • Ui (bas, 1972-1974)
  • Kiat (bas, 1974-1976)
  • Frans (drum)

Sinunö si tehöngö[edit | edit source]

Ba mböröta gofanöŵara la'anunöisi ngawalö zinunö pop nasional si tehöngö ba ndröfia si-70 simane Koes Plus ba Panbers, nibe'era töi ba li Niha. Bahiza lö ara aefa da'ö labörötaigö wo'anunöisi zinunö pop internasional simane sinunö ndra CCR ba Beatles. Tatu manö so ba gotalua zinunöra göi ngawalö zinunö si no to'ölö la'ila niha ba mbanu-banua misa (nifotöi lagu rakyat). Götö we'aso grup band andre, no lafazökhi 3 kaset, i'otarai 1972 me musindro ira irugi me laböhöli ia me 1976.

Bahiza tenga ha famazökhi kaset nifaluara. Asese möi ira göi manörö ba wanunö (nifotöi tur) simane ba Gunungsitoli ba ba Pulau Tello. Tenga na'i ha ba Danö Niha. No göi möi ira manörö manunö ba hulo Sumatera (ba Sibolga awö ba Samosir).

Sinunö fondrege tehöngö ni'anunöisira:

  • Meföna Me Ide-Idedo
  • Hadia Guna Gana'a
  • Sogai Gitö
  • Bululehu
  • Bute Gasagore
  • Tenga Börö Sa Ndra'aga
  • Ba Nakhi
  • Toto Sowöhö
  • Hewisa (Asadin Bu'ulölö)
  • No Abu Sibai Dödögu (Asadin Bu'ulölö)
  • Maena Lahewa 1975

Tola taŵa'ö wa fefu niha sibohou'ebua me ndröfia si-70 si lö tola lö'ö la'ia la'anunöisi zinunö Meföna Me Ide-Idedo. Tola mufondrondrongo fefu zinunö andre yaŵa ba YouTube. Faigi khaikhainia tou ba khaikhai baero.

Bahiza oroma göi moroi ba gangolifa zinunö si tehöngö andrö yaŵa, wa so göi zinunö asli nifazökhira, tenga ha sinunö niwöwöli simane Meföna Me Ide-Idedo nihalö moroi ba zinunö pop internasional. Sinunö Sogai Gitö andrö duma-dumania no sambua zinunö si sökhi sibai manutunö lala wa'auri ndra sogai gitö meföna ba Danö Niha. Simanö göi zinunö Bululehu, sanutunö wa'auri ndraono si lö ama si lö ina.

Bakha ba zinunö Tenga Börö Sa Ndra'aga latutunö zalua khöra ya'ira soloyo ba we'amöi ba wekoli ba ba zinunö Toto Sowöhö latutunö zanandrösa ba wamaisa toto ba fasa Lahewa.

Afuriatania[edit | edit source]

Alimagö lö ara so band andre. Me 1976 labatogö halöŵöra. Bahiza gasa-gasa da'ö no so mato ha'uga grup musik tanö bö'ö sanohugö wamazökhi zinunö pop ba Danö Niha.

Faigi göi[edit | edit source]

Basoŵa[edit | edit source]

Khai-khai baero[edit | edit source]

Umbu[edit | edit source]

  1. ↑ Lafotöi band sambua gangowuloa niha sanunö sangoguna'ö fakake zinunö simane gitar, kibord ba drum.
  2. ↑ Lafotöi elektronik sambua wakake na silötolalö'ö moguna listrik ena'ö tola moli ia. Duma-dumania lö tola moli gitar elektronik na lö lafakhai ia ba listrik.
  3. ↑ Klaus Sturm, Band Simaenaria Lahewa, blog, mufaigi me 13/04/2024.
  4. ↑ Klaus Sturm, Band Simaenaria Lahewa ni'irö'ö ba da'a. Mufaigi me 17/05/2024.
Retrieved from "https://incubator.wikimedia.org/w/index.php?title=Wb/nia/Band_Simaenaria_Lahewa&oldid=6287647"