User:Slaia/Sandbox

Band Simanenaria Waö-Waö Zinunö Pop ba Danö Niha

Band Simaenaria no sambua angowuloa band nifasindro ba Lahewa me 1972. Band andre göi no band siföföna sibai ba Danö Niha sangoguna'ö fakake musik nifotöi elektronik. Gitar khönia tenga gitar sito'ölö, bahiza gitar sangoguna'ö listrik ena'ö terongo linia. Baero da'ö Band Simaenaria no göi band siföföna sibai mamazaewe zinunö khöra faoma kaset, si tola lafoli ba nomo khöra niha ero zamösana na so khöra wakake nifotöi tape recorder. Ngawalö zinunö ni'anunöisira no moroi ba gumbu si fabö'ö-bö'ö. So zinunö nihalöra moroi ba band internasional, hatö lafazökhi liriknia molo'ö salua ba Danö Niha, ba so göi nifazökhira samösa molo'ö gaya ndra band internasional simane Beatles, CCR ma zui gaya ndra band nasional simane Koes Plus, Panbers, btn.^[1]

Töi Simaenaria[edit | edit source]

Lahalö döi simaenaria moroi ba döi maena ba ngawalö zinunö same'e muhi'a dödö nifotöi ceria ba li Indonesia. Moroi ba da'ö lafasahe ia tobali Simaenaria.

Sifao awö[edit | edit source]

Band Simaenaria tola mufasindro börö me so personil sonekhe-nekhe sibai simane Martin Zebua (töi fogaoni khönia Gadi'u ba Asadin Bu'ulölö ba tatu manö P. Adelhem Sturm, samösa pastor Katolik si tobali misionaris ba Lahewa meluo da'ö. P. Adelhem samösa no göi samösa somasi-masi manunö lagu pop. Me i'ila wa'onekhe-nekhe sibai ndra Martin ba Asadin, isindruhugö tödö wangalui lala ba wanga'asogö fakake band. Börö me so khai-khainia ba zahakhö tödö ba Jerman tola te'a'asogö band elektronik siföföna sibai ba Danö Niha. Börö ia göi tola lafazökhi kaset, irege tola oya ba alio tefazaewe zinunö khöra ba zi sagörö Danö Niha. I'anema'ö ba ginötö da'ö göi tebörötaigö tohare tape recorder ba Danö Niha.

Sinunö si tehöngö[edit | edit source]

Ba mböröta gofanöŵara la'anunöisi ngawalö zinunö pop nasional si tehöngö ba ndröfia si-70 simane Koes Plus ba Panbers. Bahiza lö ara aefa da'ö labörögö wo'anunöisi zinunö pop internasional simane sinunö ndra CCR ba Beatles. Tatu manö so ba gotalua zinunö khöra göi ngawalö zinunö si no to'ölö la'ia niha nifotöi lagu rakyat. Götö we'aso grup band andre, no lafazökhi 3 album kaset, i'otarai 1972 me musindro ira irugi me laböhöli ia me 1976.

Bahiza tenga ha famazökhi kaset nifaluara. Asese möi ira göi manörö (tour) ba wanunö simane ba Gunungsitoli ba ba Pulau Tello. Tenga ha ba Danö Niha. No na'i göi möi ira manörö manunö ba hulo Sumatera (ba Sibolga ba Samosir).

Sinunö fondrege tehöngö ni'anunöisira:

Meföna Me Ide-Idedo
Hadia Guna Gana'a
Sogai Gitö
Bulu Lehu
Bute Gasagore
Tenga Börö Sa Ndra'aga
Ba Nakhi
Toto Sowöhö
Hewisa (Asadin Bu'ulölö)
No Abu Sibai Dödögu (Asadin Bu'ulölö)
Maena Lahewa 1975

Tola taŵa'ö wa fefu niha si bohou ebua me ndröfia si-70 si lö tola lö'ö la'ia la'anunöisi zinunö Meföna Me Ide-Idedo. Tola mufondrondrongo fefu zinunö andre yaŵa ba YouTube. Faigi khai-khainia tou ba khai-khai baero.

Afuriatania[edit | edit source]

Alimagö ara so band andre. Me 1976 labatogö halöŵöra. Bahiza gasa-gasa da'ö no so mato ha'uga grup musik tanö bö'ö sanohugö wamazökhi zinjunö pop ba Danö Niha.