Wn/cdo/福州進入「瑪利亞」10級風圈 海墘拍風盪雨 市區感覺明顯

From Wikimedia Incubator
< Wn‎ | cdo
Wn > cdo > 福州進入「瑪利亞」10級風圈 海墘拍風盪雨 市區感覺明顯
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

【2018年7月11號福州訊】

今年第8號風颱「瑪利亞」敆七月五日生成,今旦早頭(11號),福州已經進入了「瑪利亞」10級風圈,海墘拍風盪雨,敆市區有明顯其感覺。

夜間風颱固敆向福建寧德靠近,遘早頭六點,福州已經裏10級風圈範圍,天懸頂都是烏雲,固盪雨囝。烏雲汔暗,風吹𡅏沙,目睭擘都儥起,蜀步都無辦法行。蜀斤重其花鉢含不蜀時乞風吹上天空,再盪遘地兜,發出「嘭」其悶響。不斷聽遘乞風吹遘地兜其鼎囝、碗囝、瓢瓢、盆盆發出叮叮噹噹其聲音,𣗬箬漫天飛舞,塑料布發出「嘩啦嘩啦」聲。 敆福州其長樂區,早頭五點半開始,天烏烏其,欄門囝乞風吹其玻璃野響。敆7點39分其前後,福州市氣象臺通過網絡共短信發布了暴雨橙色警報,八點其前後,雨真其也開始逿下來。馬尾區其雨也是敆八點其前後逿下來其,敆三江口,對面其山差伓多都看𣍐遘了。

閩侯縣大學城其福州大學,風颱吹落番檨,地兜都是,學生笑講「送食其來了」。

今旦早頭,連江蜀主人家,涼臺花鉢滿世亂躃
敆風颱臺中其長樂

消息來源[edit | edit source]

原創報導
這報導有維基記者第一手新聞。可以看討論頁了解詳情。