Wp/rsk/Максимилиян Буїла

Максимилиян Буїла (*10. юний 1904 - †23. новембер 1993.), инициятор и перши предсидатель Союзу руских школярох (СРШ), священїк и писатель.

Максимилиян Буїла
Народзени	10. юния 1904.
Умар	23. новембра 1993. (89)
Державянство	австро-угорске, югославянске
Язик творох	руски
Школа	Фолдерс (Австрия), Травник
Универзитет	Католїцки богословски факултет, Заґреб
Период твореня	1924 - 1968.
Жанри	священїцтво, литература
Поховани	на Новим теметове у Новим Садзе

Биоґрафия

Максимилиян Буїла ше народзел у Новим Вербаше 10. юния 1904. року, алє його родичи, оцец Теодор и мац Юлияна, нар. Радвански бивали у Коцуре. Окрем Максимилияна (Максима), мали ище єдну дзивку у трох синох. Понеже були худобни, Максимилиян уж на свойо 10 роки мушел пойсц през лєто служиц и чувац крави и швинї и так себе заробиц на живот и школованє. Понеже бул добри школяр, тедишнї коцурски катехет и капелан Юрий (Дюра) Павич го предложел владикови др Дионизийови Нярадийови же би го приял до семинариї на безплатне школованє. Владика ше з тим зложел, и послал го до интернату Бенедиктанцох у Фолдерсу при варошу Гал, 13 километри оддалєного од Инсбруку (Тирол). Там ше школовали кандидати за священїкох, учительох и за рижни други професиї. Там Максимилиян Буїла закончел пейц класи ґимназиї, та го владика послал до исусовацкей ґимназиї у Травнику, а вец на Католїцки богословски факултет до Заґребу, а вец до Львова на Теолоґийни факултет. За священїка Максимилиян Буїла рукоположени 31. марца 1929. року у Заґребе. Пред тим, 24. фебруара 1929. року, вон ше повинчал зоз Марию Оросову, шестру священїка Миколи Ороса зоз Миклошевцох.

Душпастирске служенє

Од 1. априла 1929. по 31. авґуст 1930. року службовал як управитель парохиї у Драґох (Жумберак), вец преходзи на парохию у Липовлянох (при Загребе), дзе служи од 31. авґуста 1930. по 31. авґуст 1933. року. Вец преходзи на службу до Коцура, дзе служи по 31. авґуст 1945. року. Од 31. авґуста 1945. року водзел парохию у Новим Садзе скоро полни 23 роки. У половки юлия 1968. року ше поцагнул до пензиї. И надалєй остал жиц у Новим Садзе, дзе и умар 23. новембра 1993. року. Поховани є на Новим теметове.

Литературна и дружтвена робота

Ище як ґимназиялєц Максимилиян Буїла ше почал занїмац з литературу. Перше почал писац писнї, а познєйше и приповедки. Вон уж 1928. року написал свойо найлєпши писнї. Медзи нїма найинтересантнєйши циклус писньох под насловом Жимски чувства. Шицки штири писнї вязани за мотиви жими алє вони у себе маю єдну глїбшу рефлексивну димензию у рамикох хторей ше шпива о чловековей судьби.

Кратки приповедки Максимилияна Буїли у складзе зоз вимогами медзивойновей фельтонистики и литератури хтора задоволює кратки, забавни и лєгки текст. Шицки його приповедки у основи маю анеґдоту. Приповедаю о шмишних збуваньох хтори, источасно, виказую и єдну универзалну поруку о людскей природи. Буїла схопно, кратко описує атмосферу, способ живота и психолоґию руского медзивойнового валалского жительства у традициї найлєпшей прози гевтого реализма у хторим ше на шицко, на дружтво и на чловека, патри зоз гумористичного становиска. Праве у кратких приповедкох Максимилиян Буїла виказал можлївосц своєй приповедацкей надареносци.

Свойо твори обявйовал у Руских новинох и Руским календаре. Його фельтони у Руских новинох тедишнї редактор високо оценьовал, а и читаче их дзечнє читали.

Ище як богослов, Максим ше повязал зоз предняками РНПД-а и на предлог подпредсидателя Дюри Биндаса иницировал и орґанизовал Сновательну схадзку студентох и стредньошколцох рускей народносци, на котрей принєшена одлука о снованю Союзу руских школярох (СРШ), а за його предсидателя вибрани Максимилиян Буїла.

Литература

1. о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и „Максима“ друкарня и видавательна хижа, Петроварадин, 2016, б. 75-81.

2. Др Юлиян Тамаш: История рускей литератури; Завод за уџбенике и наставна средства, Београд, 1997, б. 105-106 и 511-512.