Wy/bew/Indonésia

Indonésia atawa Indunisia entu negara kepulan nyang jembar nyang pulonya pating belatakan ngebadek di utekan Garis Belèk Tengah di antaranya Laotan Hindi ama Laotan Anteng. Dengen utan ujannya nyang dempiak-dempiak di 18 rèbu pulonya, Indonésia dipoyokin Jambrutnya Garis Belèk Tengah. Indonésia, mah, paling bekèn pelancongannya, tuh, Bali, cumannya, mah, pulonya nyang dijogrokin ada barang 6.000 pulo nyang, kaga' urungan, pelancongannya juga' roncèt kena disasab.

Indonésia ngasongin dirinya Wonderful Indonesia atawa Indonésia Ajib—ya, èmangnya gitu, kon. Anu budayanya èmang roncèt, kon, ampé-ampé ada, kali, barang 900 kaum ama basa ama daharannya. Udah mana alamnya èdun banget, lagi—biasanya di luar Pulo Jawa, ama keajèrannya, mah, jangan ditanya. Poko'nya, mah, lu bakalan kerasan, dah, ngayeng di mari. Wayah gini, orang-orang deri Èropa nyang udah pada gaèk juga' ada, dah, tuh, nyang ngendon di mari biar kaga' kena musim atis di dia punya negara.

Daèrah

Negara Indonésia, mah, bukan maèn jenggarnya: ada, kali, barang lebi deri 18.000 pulo ama panténya nyang ampé 108.000 km. Tu apsetannya deri Acéh di bekulon ampé Papua di belètan – 4.702 km (2.500 mil). Bahnanya lempengannya di lingir bekulon Cincin Api, Indonésia boga, dah, tuh, ampé 400 gunung api, nyang 129-nya dikata masing idup, ama juga' gunung api bawah laot. Pulo Ginéa Baru atawa Papua entu pulo paling gedé nomer dua di dunia, sementara Burné atawa Kalimantan (nyang 2/3-nya masup Indonésia, sisanya masup Malésia ama Bruné) – nomer tiga, èn Sumatera nomer enem.

Sari-sarinya, mah, tukang ngayab pada demen nyanggrah ke Bali bakal penuju pelesirnya, nyang benernya, mah, sayang amat, masing ngebadek, dah, tuh, tempat-tempat laènnya nyang kudu disaba'in nyang gablek keèdunan ama ranapan budaya nyang kudu disasabin. Jenggarnya tu utekan ama roncètnya tu pulo-pulo nanjain perbédaan budaya nyang kentara tedas nyang ngga' kalah siak, dah.