Wt/azb/کور‌اوغلونون ارزوروم سفری
کور‌اوغلونون ارزوروم سفری[edit | edit source]
آنا آنلاتیم
- کور‌اوغلونون ارزوروم سفری
گۆنلرین بیر گۆنو کور‌اوغلونون آشیغی جۆنون ارزوروما گلمیشدی. جعفر پاشانین مجلیسینده اوخويوردو. صؤحبت آراسیندا جعفر پاشا دئدی: – آي آشیق، سن سؤيله‌دین کی، چنلیبئللیسن. يقین کی، باشیندا يئددی مین يئددی يۆز يئتمیش يئددی دلیسی اولان کور‌اوغلونو گؤروبسن، تانیيیرسان. بیر اوندان اوخو گؤرک.
- آشیق جۆنون جعفر پاشانین جاوابیندا سازی سینه‌سینه باسیب، آلدی گؤرک نه دئدی:
- قێراتین اۆستونده، ارلر يانیندا،
- داغلاری، داشلاری، گزر کور‌اوغلو.
- هردن آجیقلانیب، نره چکنده
- ياغیلار باغرینی ازر کور‌اوغلو.
- مئيدانا گیرنده هۆنر ائيله‌ير،
- لئش قالار بیر ياندا، کلله سؤيله‌ير،
- يۆز سار گلسه، بیر ترلانا نئيله‌ير
- لاچین تک هاوادا سۆزر کور‌اوغلو.
- مرد مئيداندان قاچمايیبدی ياشیندا،
- دلیلرین جمع گؤرموشم باشیندا،
- دۆشمنی سێندیرار تر ساواشیندا،
- جۆنون دئير شیره بنزر کور‌اوغلو.
- آشیق جۆنونون قوچ کور‌اوغلونو تعریفله‌مه‌سی، اونون ایگیدلیگیندن، مردلیگیندن
- اوخوماسی جعفر پاشايا خوش گلمه‌دی. آنجاق او، مجلیسده‌کی
- قوناقلاردان کئچیب آشیق جۆنونا بیر سؤز دئمه‌دی. آشیق جۆنون جعفر
- پاشانین مجلیسینده اوخوماقدا اولسون، سیزه تئللی خانیمدان دانیشیم.
- جعفر پاشانین تئللی خانیم آدلی گؤزل بیر قێزی وار ایدی. او، آتاسی‌نین
- مجلیسینده آشیق اوخودوغونو بیلن کیمی جعفر پاشانین يانینا آدام
- گؤندریب آشیق جۆنونون گلیب اونون مجلیسینده ده اوخوماسینا ایزن ایسته‌دی.
- جعفر پاشا ایزن وئردی. آشیق جۆنون قالخیب تئللی خانیمین مجلیسینه گلدی.
- تئللی خانیمین يانیندا قێرخ اینجه‌بئل قێز ايلشمیشدی. تئللی خانیم آشیق
- جۆنونو گؤروب دئدی:
- – آي آشیق، هارالیسان؟ آدین ندی؟
- آشیق جۆنون دئدی:
- – آي خانیم، چنلیبئللیيم. آدیم آشیق جۆنوندو.
- تئللی خانیم چنلیبئلین آدینی ائشیتمیشدی. کور‌اوغلونون، اونون قێراتی‌نین
- تعریفی قۇلاغینا چاتمیشدی. اونا گؤره ده جۆنونا اۆز تۇتوب:
- – آي آشیق جۆنون، چنلیبئل نه جۆر يئردی کی، اونون آتی دلی، ایگیدی
- دلیدی! آشیغی دا دلیدی؟
- آشیق جۆنون دئدی:
- – آي خانیم، ائله منیم آتا-آنام قويدوغو آد جۆنوندو.
- تئللی خانیم دئدی:
- – چنلیبئلده قوچ کور‌اوغلونو تانیيیرسانمی؟
- آشیق جۆنون دئدی:
- – چوخ ياخشی تانیيیرام.
- تئللی خانیم دئدی:
- – ائله ایسه کور‌اوغلودان بیر آز اوخو، قۇلاق آساق.
- آشیق جۆنون دئدی:
- – آي تئللی خانیم، سینه‌مه اۆچ خانا سؤز گلیب، ایزین وئر ازل اونو سؤيله‌يیم،
- سونرا دا ایگیدلیکده مرد، داوا گۆنو جومرد دلیلرین باشی، قهرمانلار
- قارداشی کور‌اوغلودان اوخويوم.
- تئللی خانیم دئدی:
- – آشیق، ایزیندی، اوخو.
- تئللی خانیمین جاوابیندا آلدی آشیق جۆنون گؤرک نه دئدی:
- بۇ گۆنکو مجلیسده بیر گؤزل گؤردوم،
- گؤزللر صفینده سانا ياراشیر.
- گئيینیب ساللانان گؤزللر چوخدو،
- ترلان کیمی سۆزمک اونا ياراشیر.
- تۇتینی بند ائيلر شیرین دیللری،
- شۆمشاد بارماقلاری، نازیک اللری،
- گۆلباتین کیمی قارا تئللری،
- تؤکولنده دال گردنه ياراشیر.
- قنیم اۆسته نره چکیب هوولاماق،
- عربات دؤشونه قاتیب قوولاماق،
- سنین کیمی بیر جئيرانی اوولاماق
- جۆنون دئير، قوچ اوغلانا ياراشیر.
- تئللی خانیم آشیق جۆنونون “سنی اوولاماق دا بیر قوچ اوغلانا ياراشیر”
- دئمکله کور‌اوغلويا ایشاره ائتدیگینی بیلیب، دئدی:
- – آي آشیق جۆنون، او اوغلان کیمدی کی، گلیب منی اوولاسین؟
- تئللی خانیمین جاوابیندا آلدی آشیق جۆنون گؤرک نه دئدی:
- ايلشیبدی چنلیبئلین ائلینده،
- دئيیل ایشلرینده ناشی کور‌اوغلو.
- میسری قێلینج همايیلدی بئلینده
- گئير هر واخت آل-قۇماشی کور‌اوغلو.
- بیر هاي دئسه، آغیر تۆپلر باسیلار،
- قانچیرغادان قانلی باشلار آسیلار،
- نر ایگیده يئتمیش قۇزو کسیلر،
- وئرر آشی، آغ لاواشی کور‌اوغلو.
- بیر جیداسی واردی، باشی قوشا پر،
- مئيدانا گیرنده عصره‌میش بیر نر،
- پاشالار تیتره‌ير، شاهلار تۆک تؤکر،
- يئتمیش يئددی دلی باشی کور‌اوغلو.
- آشیق جۆنون بۇ مجلیسده قالماسا،
- شیرین جانین عشق اودونا سالماسا،
- تئللی خانیم کیمی گؤزل آلماسا،
- چکر، يێخار داغی-داشی کور‌اوغلو.
- تئللی خانیم آشیق جۆنوندان کور‌اوغلونون تعریفینی ائشیتدی، ازل اونا خلت
- وئردی، سونرا الینه قلم آلیب کور‌اوغلويا بئله بیر نامه يازدی: “کور‌اوغلو،
- سنین ایگیدلیک تعریفینی ائشیتدیم. گلیب منی آپارسان بۇ هۆنر سنه حالال
- اولسون، آپارا بیلمه‌سن کیشیلیگی يئره قوي، باشینا يايلیق اؤرت”.
- آشیق جۆنون نامه‌نی گؤتوروب چنلیبئله يول آلدی. او زامان چنلیبئله
- چاتدی کی، کور‌اوغلو کئف مجلیسی قۇرموشدو. آشیق جۆنون تئللی خانیمین
- نامه‌سینی کور‌اوغلويا وئردی. احوالاتی دیل جاوابی ناغیل ائله‌دی.
- دلیلرین هامیسی کئف مجلیسینده، کور‌اوغلونون يانیندا ایدیلر. کور‌اوغلو
- دلیلری باشسیز قويوب ارزوروما تئللی خانیمی گتیرمه‌يه گئده بیلمه‌دی.
- کئيف اۆستو ایدی. بیر باده شراب دولدوروب الینه آلدی. اۆزونو دلیلره تۇتوب
- دئدی:
- – کیم کور‌اوغلونون خاطیرینی ایسته‌يیر، آلسین بۇ شرابی ایچسین، گئتسین ارزورومدان
- جعفر پاشانین قێزی تئللی خانیمی گتیرسین.
- دلیلردن سس چێخمادی. کور‌اوغلو الینده شراب اۆچونجو دفعه تکلیف
- ائله‌ينده دمیرچیوغلو ایره‌لی يئریدی، کور‌اوغلونون الیندن شرابی آلیب ایچدی.
- آلدی دمیرچیوغلو:
- گؤتوروب بئلیمه قێلینج باغلايیب،
- ایزن وئرسن ارزوروما گئده‌رم،
- ياغی دۆشمن غضبیندن قورخمارام،
- ایزن وئرسن، ارزوروما گئده‌رم.
- آختارارام دۆشمانلاری سئچه‌رم،
- باشلارینی يارپیز کیمی بیچه‌رم،
- مرد يولوندا باشدان، جاندان کئچه‌رم،
- ایزن وئرسن، ارزوروما گئده‌رم.
- دمیرچیوغلو، آخیتسالار قانیمی،
- قوچ ایگیده قۇربان دئدیم جانیمی،
- آلیب گتیره‌رم تئللی خانیمی
- ایزن وئرسن، ارزوروما گئده‌رم.
- دمیرچیوغلو سؤزونو سازینان دئدیگی کیمی دیلینن ده دئدی: دمیرچیوغلو
- نه قدر کی، کور‌اوغلونون يانیندا ایدی، هله بیر دفعه ده اولسون
- اۇزاق سفره چێخمامیشدی. برکه-بوشا دۆشمه‌میشدی. دلیلر دئدیلر:
- – آي کور‌اوغلو، دمیرچیوغلو داوا گؤرمه‌يیب، برکه-بوشا دۆشمه‌يیب،
- خامدی. اونو اۇزاق سفره، تئللی خانیمی گتیرمه‌يه گؤندریرسن؟
- کور‌اوغلو باشینداکی دلیلره دمیرچیوغلونون هۆنرلی، گۆجلو بیر ایگید
- اولدوغونو بیلدیرمک ایسته‌دی. کور‌اوغلو بیر آلما گؤتوردو. آلمانین اۆست طرفینه
- بیر اۆزوک تاخدی. دمیرچیوغلونون پاپاغینی گؤتوردو، آلمانی اونون
- باشینا قويدو. آلمانی دمیرچیوغلونون باشینا ائله قويموشدو کی، اوردا
- اۆزويون حالقاسی گؤرونوردو.
- کور‌اوغلو قێراتی يهرله‌يیب میندی، الینه ياي-اوخ آلدی. قێراتی قێزیلقوش
- کیمی جؤولانا گتیردی. ياي-اوخو چیلله‌يه میندیردی. بیر-بیری‌نین دالینجا
- قێرخ اوخ آتدی. يايدان چێخان اوخلارین هامیسی اۆزويون حالقاسیندان کئچدی.
- هئچ بیری خاتا ائله‌مه‌دی. يايینمادی. کور‌اوغلو اوخلاری آتاندا دمیرچیوغلو
- نه يئریندن قێمیلدانمادی، نه رنگی قاچدی، نه گؤزلری قێرپیندی. جانیندان
- قورخمايان قوچ ایگیت کیمی يئرینده مردانه دۇردو. بیر يانا ترپنمه‌دی.
- کور‌اوغلو بۇندان چوخ شاد اولدو. کؤنلو هاوالاندی، اۆرگی جوشدو، آلدی
- گؤرک نه دئدی:
- دلیلر ایچینده بللی ایگیدسن،
- گؤردوم سێناياندا مردانه سنی.
- شست ایله داياندین مئيدان ایچینده،
- بنزتدیم آلیجی ترلانا سنی.
- چنلیبئل دئدیگین داغلار دامانی،
- مۆخننسلر گلسه چکر آمانی
- باشیندا نیشانه آلدیم آلمانی،
- قورخوتمادی هدف، نیشانا سنی.
- قێرپینمادی گؤزون، قاچمادی رنگین،
- عالمه يايیلار ساواشین، جنگین،
- آللام خراجینی هیندین، فیرنگین،
- گؤندررم ایرانا، تۇرانا سنی.
- چنلیبئل باشیندا مجلیس قۇرولسون،
- خانلارین، بَيلرین بوينو وۇرولسون.
- گل ايلش مئي ایچک، کئفلر دۇرولسون،
- کور‌اوغلو چاغیریر دؤورانا سنی.
- کور‌اوغلو سؤزنن دئدیگی کیمی دیلنن ده دئدی:
- – منی ایسته‌ين دمیرچیوغلونا خلت وئرسین.
- دلیلر، خانیملار دمیرچیوغلونا خلت وئردیلر. دمیرچیوغلو کور‌اوغلونون
- سێناغیندان ياخشی چێخدیغیندان دلیلر اونون مردلیگینه، ایگیدلیگینه
- حئیران اولدولار.
- کور‌اوغلو دئدی:
- – اوغول، ایزیندیر، گئت ياراقلان.
- دمیرچیوغلو يئددی قێلینج، يئددی قالخان، يئددی جیدا، يئددی گۆرز،
- يئددی توپپوز گؤتوردو. کور‌اوغلونون يانینا قايیتدی. کور‌اوغلو گؤردو دمیرچیوغلو
- او قدر ياراغ گؤتوروبدو کی، آلتیندا ترپنه بیلمیر. آلدی گؤرک
- نه دئدی:
- دمیرچیوغلو ارزوروما واراندا،
- ارزوروم دئدیگین گؤله نیسبتدی.
- چوخ ياراق گؤتورمک باشا بلادی.
- قێلینج همايیلدی، بئله نیسبتدی.
- سؤيله‌يیم سؤزلریم، ائيله دیلزبر،
- شیرین نصیحتیم قێل سینه‌دفتر.
- ایگیده لازیمدی، گۆرز، قالخان، شئشپر،
- جیدا بیر بۇينوزلو کله نیسبتدی.
- کور‌اوغلو تک دۆشمنلری سسله‌مک،
- هاي دئينده ياغی اۆسته قصد دئمک.
- آرپا وئریب جاندان بئتر بسله‌مک،
- عربات دئدیگین يئله نیسبتدی.
- دمیرچیوغلو ائله بیلیردی کی، ایگیدین ياراغی نه قدر چوخ اولسا، بیر او
- قدر ياخشیدی. کور‌اوغلونون بۇ سؤزوندن سونرا دمیرچیوغلو ياراقلارین
- هره‌سیندن بیرینی گؤتوردو. کور‌اوغلو اونا بۇ دفعه دئدی:
- – اوغلوم، آتلارین هانسینی مینمک ایسته‌يیرسن، گئت مین.
- دمیرچیوغلو گئتدی تؤوله‌دن عرباتی چکدی، يهرله‌دی میندی، کور‌اوغلونون
- قاباغینا چێخاندا عرباتا بیر قامچی وۇردو. کور‌اوغلو دمیرچیوغلونون
- آتی وۇرماغین گؤرنده گؤتوردو گؤرک نه دئدی:
- سحردن مئيدان باشینا
- عربات چارخاچی گرک.
- عرباتین نه دیر سۇچو؟
- بیر ایگید مینیجی گرک.
- ایگیدین ایگید دستینه،
- گیرنده آبدال پوستونا،
- يولداش يولداشین اۆستونه
- دار گۆنده دؤنوجو گرک.
- کور‌اوغلويام، سؤزوم اوخدو،
- پاشالاردان قورخوم يوخدو،
- بۇ دۆنيادا ایگید چوخدو،
- ایگیدده نر گۆجو گرک.
- دمیرچیوغلو کور‌اوغلو ایله، دلیلر ایله سلاماتلاشیب يولا دۆشدو. بیر آز
- گئتمیشدی بیردن آتینین باشینی چکدی، گئری قايیتدی. کور‌اوغلو گؤردو دمیرچیوغلو
- گلیر. او بئله فیکیر ائله‌دی کی، دمیرچیوغلو قورخوب قايیدیب. دئدی:
- – اوغول، نیيه قايیتدین؟
- دمیرچیوغلو دئدی:
- – ارزوروم بؤيوک شهردی. بلکه گئتدیم تئللی خانیمی تاپا بیلمه‌دیم،
- گۆجوم چاتیب گتیره بیلمه‌دیم، بۇ حاقدا منه تاپشیریغین ندی؟
- دمیرچیوغلونون جاوابیندا آلدی کور‌اوغلو، گؤرک نه دئدی:
- ارزورومون بازارینا واراندا،
- مقامدا دۆشمانی آتماغین گرک.
- گؤردون کی، مطلبین باشا وارمادی
- عربات يالینا ياتماغین گرک.
- ایگید گرک مئيدان آچا، دۆز دۇرا،
- دۆشمن قاباغیندا بێغینی بۇرا،
- آياقلارین اۆزنگیيه برک وۇرا،
- شئشپری-شئشپره چاتماغین گرک.
- ایگید اولان نئيلر اللینی، يۆزو؟
- نامردین داوادا دؤرد اولار گؤزو.
- بۇدو کور‌اوغلونون، اوغول، بیر سؤزو
- او تئللی خانیمی تاپماغین گرک.
- دمیرچیوغلو کور‌اوغلودان آيریلیب عرباتی سۆروب ارزوروما طرف يول
- باشلادی. هر يئردن کئچیب گلدی ارزورومون داغلارینا چاتدی. اؤزو يورغون،
- آتی دا آج ایدی. دۆشدو آتی اوتا بۇراخدی، اؤزو ده بیر بۇلاغین باشیندا دیرسکلندی.
- بۇ دیرسکلنمکده دمیرچیوغلونو يۇخو آپاردی. بیر ده قالخاندا
- گؤردو کی، هر يانی دۇمان بۆرويوب، عرباتی دا يوخدو. گؤتوردو گؤرک
- نه دئدی:
- عربات گئتدی الیمنن،
- عرباتی من ایسته‌رم!
- آيری دۆشموشم ائلیمنن
- عرباتی من ایسته‌رم!
- بنناسیز هؤرگو هؤرولمز،
- طبیبسیز خسته دیریلمز،
- باخیرام هئچ يان گؤرونمز
- عرباتی من ایسته‌رم!
- دمیرچیوغلونون بۇ واختی،
- ایگیدم ایسته‌رم باختی،
- اطرافیمدا دۆشمان چوخدو،
- عرباتی من ایسته‌رم!
- دمیرچیوغلو گزدی، عرباتی دۆماندان، چیسگیندن تاپا بیلمه‌دی. آلدی
- يئنه گؤرک نه دئدی:
- دۆنيادا هئچ ایگید يوخسول اولماسین،
- يوخسوللوق ایگیده يامان آد اولو.
- هر کسین کی، واری-دؤولتی اولسا،
- لذت چکر، داهانیندا داد اولو.
- وارلی، کاسیب بۇ دۆنيادان کئچرلر،
- ياخشینی، يامانی آرار، سئچرلر،
- وارین اولسا گلیب يئير، ایچرلر،
- يوخسول اولسان قوهوم، قارداش ياد اولو.
- دمیرچیوغلو ها اوخويار آرادا،
- آرتدی دردیم اولدو هددن ضیادا،
- ياخشی آت میننلر قالسا پیيادا –
- داش دۆشر باشینا، عؤمرو باد اولو.
- دمیرچیوغلو ارزوروم داغلاریندا عرباتی آختاران زامان بیر ناخیرچیيا
- راست گلدی. گؤتوردو، گؤرک، ناخیرچیدان عرباتی نئجه خبر آلدی:
- باشینا دؤندويوم ناخیرچی قارداش،
- منیم عرباتیم گؤردونمو اولا؟
- مرد ایگیدین آتی جاندان عزیزدی،
- منیم عرباتیم گؤردونمو اولا؟
- ناخیرچی:
- باشینا دؤندويوم مرد، ایگید اوغلان،
- سنین عرباتین من داغدا گؤردوم.
- قوچ ایگیدلر قالماسینلار پیيادا،
- سنین عرباتین من داغدا گؤردوم.
- دمیرچیوغلو:
- دۇماندی، چیسگیندی گۆنون قاراسی،
- گؤزومه گؤرونمور داغلار آراسی،
- ایگیدین آتیدی، جیيرپاراسی،
- منیم عرباتیم گؤردونمو اولا؟
- ناخیرچی:
- آدین ندی سنین، هاردان گلیرسن؟
- جومردلرین کؤنول پاسین سیلیرسن،
- جزیب عرباتی تاپا بیلیرسن،
- سنین عرباتین من داغدا گؤردوم.
- دمیرچیوغلو:
- دمیرچیوغلو دولانیبدی ائللری،
- مسکن ائله‌يیبدی چنلیبئللری،
- آرادا ایشله‌ير دۆشمان فئللری،
- منیم عرباتیم گؤردونمو اولا؟
- ناخیرچی:
- مرد ایگید، کؤنلونه گلمه‌سین گۆمان،
- دۆشمانلار الیندن چکرلر آمان،
- آيازیيار اطراف، چکیلر دۇمان،
- سنین عرباتین من داغدا گؤردوم.
- ناخیرچی عرباتی دمیرچیوغلونا نیشان وئردی، گئتدی. بیر آز کئچدی، يئل
- قالخدی، داغلار باشیندان دۇمان چکیلدی. اطراف آيازیدی، هر يان گؤروندو.
- دمیرچیوغلو عرباتی تاپیب میندی، آز گئتدی، چوخ گئتدی، آخشام چاغی
- اؤزونو ارزوروما يئتیردی، بیر قوجا قاریيا راست اولدو. دئدی:
- – آي قاری ننه، قریبم، منی بیر گئجه‌لیيه قبول ائله‌يرسنمی؟
- قاری دئدی:
- – بیزلر قوناغی چوخ سئوریک، نیيه ائلمیرم.
- دمیرچیوغلو دۆشدو، آتی تؤيله‌يه چکدی. اؤزو ده قاری‌نین ائوینه گلدی.
- قاری ننه دمیرچیوغلونا چؤرک گتیردی. يئمکدن سونرا قاری دئدی:
- – اوغول، بۇرايا نیيه گلیبسن؟
- دمیرچیوغلو دئدی:
- – آي ننه، جعفر پاشانین قێزی تئللی خانیمی آپارماغا گلمیشم.
- سؤيله اونو نئجه گؤره بیللم؟
- قاری دئدی:
- – آي اوغول، او قێز چوخ آشیقپرست قێزدی. ایمارتی‌نین قاباغی دا پهلیوان
- مئيدانیدی. صاباح بیر ساز گؤتور، او مئيدانا چێخ، چال اوخو، اوندا تئللی
- خانیم کۆلفیرنگیيه چێخار، گؤررسن.
- دمیرچیوغلو گئجه قاری‌نین ائوینده ياتدی. صاباح آچیلدی. آتینی قاری‌نین
- تؤيله‌سینده قويدو. اؤزو آشیق پالتاری گئيدی، آلتیندان ياراق باغلايیب چیينینه
- اۆستدن بیر ساز کئچیریب اؤزونو پهلیوان مئيدانینا سالدی. پهلیوان
- مئيدانیندا جعفر پاشا باشی‌نین آداملاری ایله ايلشمیشدی.
- جعفر پاشانین بیر قارا پهلیوانی وار ایدی. پاشانین يانیندا قالیردی.
- گۆجلو، هئيوره بیر پهلیوان ایدی. قارا پهلیوان دمیرچیوغلونو گۆلشن
- پهلیوان بیلدی. ائله دۆشوندو کی، باشقا تورپاقدان اونونلا گۆلشمه‌يه
- گلیب. اورتايا چێخدی. دمیرچیوغلونو مئيدانینا چاغیردی. دمیرچیوغلو
- قارا پهلیوانین مئيدانینا گیردی. آلدی گؤرک نه دئدی:
- نره چکیب من مئيدانا گیرنده،
- وارمی مئيدانیما گله پهلیوان؟
- تۇتوب کمریندن چالاندا يئره،
- منیم زربی-دستیم بیله پهلیوان؟
- منم شیری-نر تک مئيداندا گزن،
- خێشم ایله دۆشمانین باغرینی ازن،
- تۆلک ترلان کیمی هاوادا سۆزن،
- سونرا ياخان کئچر اله، پهلیوان!..
- دمیرچیوغلويام ياراغا دولارام،
- آج قۇرد کیمی دۆشمن اۆسته اۇلارام،
- قێلینج چکسم، لئش-لئش اۆسته قالارام،
- دؤندررم آل قانی سئله، پهلیوان!
- قارا پهلیوان دمیرچیوغلونون بۇ سؤزوندن آجیقلاندی. اونا هۆجوم
- ائله‌دی. دمیرچیوغلو قارا پهلیوانا آمان وئرمه‌دی. گؤتوروب يئره وۇردو،
- باسیب بیر قولونو دا قێردی، دئدی:
- – سنی اؤلدورمه‌يیرم، بۇراخیرام گئت. جعفر پاشايا سؤيله کی، پهلیوانینی
- يێخدیغیم اۆچون منه بیر کیسه قێزیل گؤندرسین. قارا پهلیوان
- يئریندن قالخدی. جعفر پاشانین يانینا گلدی.
- جعفر پاشا دئدی:
- – قارا پهلیوان، نه اولدو؟ او سنه نه ائله‌دی کی، بئله بیکئفسن؟
- قارا پهلیوان قێریلمیش قولونو جعفر پاشايا گؤستریب دئدی:
- – باخ بئله ائله‌دی، باسیب قولومو قێردی. هله اؤلدوروردو، الیندن بیر
- تهر قۇرتاردیم. منی يێخدیغی اۆچون اۆسته‌لیک بیر کیسه قێزیل دا ایسته‌يیر.
- او واختین عادتینه گؤره بیر پهلیوان بیر پهلیوانی يێخاندا اورانین
- بؤيويوندن خراج آلاردی. جعفر پاشا مطلبی آنلادی، باشینداکی آداملارین
- يانیندا بیابیر اولماماق اۆچون اۆزه وۇرمادی، دئدی:
- – آپارین اونا بیر کیسه قێزیل وئرین، اؤزونو ده منیم يانیما گتیرین.
- پاشانین آداملاری آپاردیلار دمیرچیوغلونا بیر کیسه قێزیل وئردیلر.
- دمیرچیوغلو قێزیلی گؤتوروب جعفر پاشانین يانینا گلدی.
- جعفر پاشا اونون چیينینده اولان سازی گؤروب دئدی:
- – سنین آشیقلیغین دا وارمیش؟! گل اوخو، قۇلاق آساق. کئفیمیز آچیلسین.
- آلدی دمیرچیوغلو گؤرک نه دئدی:
- قالخیب چنلیبئلدن دۆشموشم يولا،
- ارزورومون بازارینا گلمیشم.
- عجل کؤينه‌يینی گئيیب اينیمه،
- جنگ-جیدالین گۆزارینا گلمیشم.
- ايلشمیشدیم اوردا، صؤحبتی کئچدی،
- قالخدی کؤنول قۇشو، دولو مئي ایچدی،
- تئللی خانیم، نامن گلدی يئتیشدی،
- بیر گؤزه‌لین ایلقارینا گلمیشم.
- دمیرچیوغلو، يالان گلمز دیلیمه،
- مۆخننت ياپیشار چتین الیمه،
- میسری قێلینج باغلامیشام بئلیمه،
- ترلانلارین تاوارینا گلمیشم.
- دمیرچیوغلونون سسینه تئللی خانیم کۆلفیرنگیيه چێخدی. گؤردو بیر
- اوغلان ساز چالیب اوخويور. تئللی خانیم کور‌اوغلويا نامه گؤندرمیشدی.
- فیکیرلشدی کی، يقین نامم چاتیب. کور‌اوغلو منی آپارماغا گلیبدی.
- تئللی خانیم قاراباشلاریندان بیرینی يانینا چاغیریب دئدی:
- – آي قێز، گئت او آشیغا دئيینن صاباح من باغا گزمه‌يه چێخاجاغام،
- منیم گۆلشن باغیما گلسین.
- تئللی خانیمین تاپشیریغینی آلان دمیرچیوغلو مطلبی آنلادی. قايیدیب
- قاری‌نین ائوینه گئتدی. ائله کی، صاباح آچیلدی دمیرچیوغلو قالخیب عرباتی
- میندی، بیرباش تئللی خانیمین گۆلشن باغینا سۆردو. باخدی کی، تئللی خانیم
- قاراباشلاری ایله گۆلشن باغیندادی. آتی اونا ياخینلاشدیردی، الینی آتیب تئللی
- خانیمی عرباتین ترکینه چکدی. باياخ ها باغدان چێخدی. او طرفدن
- قاراباشلار اؤزلرینی جعفر پاشايا يئتیردیلر، دئدیلر او دۆننکی پهلیوان
- آشیق قێزین تئللی خانیمی قاچیرتدی. جعفر پاشا حؤکم ائله‌دی قوشون آتلانیب
- دمیرچیوغلونون دالیندان دۆشدو. او طرفدن دمیرچیوغلو تئللی خانیم
- دا ترکینده عرباتی سۆروب ارزوروم شهریندن آرالانمیشدی. باخدی
- گؤردو دالینجا قوشون گلیر، آتین باشینی چکدی، داياندی، باشلادی دینجلمه‌يه.
- تئللی خانیم نه قدر يالواردی کی، بۇ يئرده ايلنمه، سۆر آتینی
- گئدک. ایندی قوشون گلیب چاتار، منی ده سنی ده اؤلدورورلر. گؤردو يوخ،
- دمیرچیوغلو گئتمک ایستمیر. آخیردا گؤتوردو گؤرک نه دئدی:
- عثمانلی قوشونو گلیر قۇرد کیمی،
- وار گئت، عجم اوغلو، قالما بۇ يئرده!
- باشین گئدر، گؤودن قالار يۇرد کیمی،
- وار گئت، عجم اوغلو، قالما بۇ يئرده.
- دمسیرچیوغلو اونا جاوابیندا دئدی:
- عثمانلی قوشونو گلسه قۇرد کیمی،
- اؤلر عجم اوغلو، قاچماز بۇ يئردن!
- باشیم گئتسه، گؤودم قالسا يۇرد کیمی
- اؤلر عجم اوغلو، گئتمز بۇ يئردن!
- تئللی خانیم:
- قوشون گلیب، ایندی سنی تۇتارلار،
- قوللارینی دال گردنده چاتارلار،
- قۇل دئيیبن هبشیده ساتارلار،
- قاچ گئت، عجم اوغلو، قالما بۇ يئرده.
- دمیرچیوغلو:
- قوشون دا گلیبن منی تۇتسالار،
- قوللاریمی دال گردنده چاتسالار،
- قۇل دئيیبن هبشیده ساتسالار،
- اؤلر عجم اوغلو، قاچماز بۇ يئردن.
- تئللی خانیم:
- تئللی خانیم ارزین سنه ائيله‌سین،
- دیلی تۇتمور بئش کلمه‌نی سؤيله‌سین.
- بیرجه ایگید مین قوشونا نئيله‌سین؟
- قاچ گئت، عجم اوغلو، قالما بۇ يئرده.
- دمیرچیوغلو:
- دمیرچیوغلو دردین کیمه سؤيله‌سین؟
- شیرین جانین سنه قۇربان ائيله‌سین.
- يۆز مین تۆلکو بیر آسلانا نئيله‌سین؟
- اؤلر عجم اوغلو، قاچماز بۇ يئردن.
- سؤز تامام اولدو. دمیرچیوغلو سؤزنن دئدیگی کیمی دیلینن ده دئدی:
- – تئللی خانیم، من سنی بئله دالاشسیز-داواسیز چنلیبئله آپارسام
- کور‌اوغلو دئيه‌جک اوغورلايیب گتیریبسن، بۇ – ایگیدلیکدن دئيیل، گرک
- قايیدام قوشونلا داوا ائله‌يم، سنی ائله آپارام.
- بۇ طرفدن قوشون گلیب يئتیشدی. دمیرچیوغلو باخدی کی، يولون قێراغیندا
- بیر قالاچا وار. تئللی خانیمی گتیریب هامان قالاچادا قويدو، قالاچانین
- آغزینی دا بیر داش ایله مؤحکمله‌دیب اؤزو قێلینجی چکدی قوشونا
- جۇمدو. دئيیرلر کی، دمیرچیوغلو جعفر پاشانین قوشونو ایله دۆز اۆچ گۆن،
- اۆچ گئجه وۇروشدو. چوخ آدام اؤلدوردو. قوشونو الدن-آياقدان سالدی. جعفر
- پاشا اؤزو ده قوشونون ایچینده ایدی. گؤردو کی، بۇ يوللا اونو اؤلدوره بیلمه‌يه‌جکدی.
- امر ائله‌دی کمند آتانلار گلدیلر. هر طرفدن کمند
- آتیب آخیر کی، دمیرچیوغلونو تۇتدولار. تئللی خانیمی دا قالاچادان چێخاردیب
- شهره گتیردیلر.
- جعفر پاشا ائليدی کی، آجیغیندان قۇدورموش ایته دؤنوب زنجیر گمیریردی.
- امر ائله‌يیب دمیرچیوغلونو پهلیوان مئيدانیندا زنجیرلتمیشدی.
- گۆنده بیر جللاد بێچاغی ائنینده آياق طرفیندن سويدوروب يئرینه سامان
- تپدیریردی.
- دمیرچیوغلو بۇردا قالسین، گلین سیزه چنلیبئلده کور‌اوغلودان خبر
- وئریم. کور‌اوغلو بیر گئجه ياتمیشدی، يۇخوسوندا گؤردو کی، بیر دیشی لاخلايیب،
- آغزی قان ایله دولدو. سکسه‌نیب يۇخودان آيیلدی. ائله بیر دلی نره
- چکدی کی، بۆتون دلیلر يۇخودان قالخدیلار. کور‌اوغلو دلیلری يانینا
- چاغیردی، گؤرک اونلارا نه دئدی:
- آت بئلینه، دلیلریم،
- سیزه قۇربان جان، يئریسین!..
- تۇتولوبدو دمیرچیوغلو،
- ایگید، پهلیوان يئریسین!..
- ياغیلار چکسین آمانی،
- گؤزوم گؤرمه‌سین يامانی،
- لئش-لئشه وئرک دۆشمانی،
- آخسین، قێزیل قان يئریسین!..
- قوچ کور‌اوغلو گلر جوشا،
- پولاد قالخان تۇتار باشا،
- ایگیدلر دۇرسون ساواشا،
- قێراق سۇلطان، خان يئریسین!..
- دلیلر ایشی بئله گؤرنده ياراخلانیب آتلاندیلار. کور‌اوغلو اؤزو ده میسری
- قێلینجینی بئلینه باغلادی، قالخان آسدی، نیزه گؤتوردو، سێچرايیب ترلان قۇش
- کیمی قێراتین بئلینه قوندو. چنلیبئلدن ایلدیریم کیمی ائندیلر. اۆز تۇتوب
- ارزوروم سنسن گئتدیلر. داغلاری، داشلاری اۆز ائله‌دیلر، دره‌لری، تپه‌لری
- دۆز ائله‌دیلر. اؤزلرینی ارزوروما يئتیردیلر.
- کور‌اوغلو يئنه ده دۆشمانی يوخلاماق اۆچون آشیق پالتارینی گئيینیب،
- دلیلری ارزورومون داغلاریندا قويوب اؤزو تک شهره گیردی. گزه-گزه
- گلیب چێخدی مئيدانا. گؤردو جعفر پاشا باشی‌نین آداملاری ایله بۇرادادی.
- جعفر پاشا اونو گؤرجک يانینا چاغیرتدیریب دئدی:
- – آشیق، کور‌اوغلونون بیر دلیسینی تۇتدوروب دریسینی سويدورورام.
- دئيیرلر او دلی چوخ ایگیددی، بیر اوندان اوخو قۇلاق آساق.
- کور‌اوغلو بئله باخاندا گؤردو کی، پهلیوان مئيدانی‌نین بیر طرفینده
- دمیرچیوغلونو زنجیره باغلايیبلار. جللادلار آياق طرفیندن سويوب
- دریسینه سامان تپیرلر. جعفر پاشا اونون يانینا گئدیب سوروشدو:
- – هه دلی، نئجه‌سن، اینجیگیرسن؟ قورخورسانمی؟
- دمیرچیوغلو پاشانین جاوابیندا دئدی:
- – قوچ کور‌اوغلونون دلیسی هئچ قم چکیب قورخارمی؟
- کور‌اوغلو دمیرچیوغلونون بۇ سؤزونو ائشیدیب آلدی گؤرک نه دئدی:
- دمیرچیوغلو، دلیلریم
- قیصاصینی آلار ایندی.
- سۇلطانا، پاشايا، خانا
- میسری قێلینج چالار ایندی.
- اولوم من سنین قۇربانین،
- مرد ایگیدسن قێيدین جانین،
- جومرد دلیلر دۆشمانین
- يانار اودا قالار ایندی.
- اۇيماز ياغیلار فعلینه،
- گرک کور‌اوغلو بیلینه،
- قێزیب ارزوروم ائلینه،
- بیر ولوله سالار ایندی.
- کور‌اوغلو گؤردو دمیرچیوغلونون ياراسیندان قان آخیر، تاقتدن دۆشوب.
- ملول-ملول باخیر، آلدی ال اۆستو گؤرک نه دئدی:
- ملول-ملول نه باخیرسان،
- دمیرچیوغلو، دمیرچیوغلو؟!
- جانیم اودلارا ياخیرسان،
- دمیرچیوغلو، دمیرچیوغلو؟!
- دوست دوستدان آرالی گرک،
- قووغايا وارالی گرک،
- ایگیدلر يارالی گرک،
- دمیرچیوغلو، دمیرچیوغلو!..
- قوچ کور‌اوغلو ائيلر ساواش،
- کسر، تؤکر چوخ قانلی باش،
- تئللی خانیم سنه پئشکاش،
- دمیرچیوغلو، دمیرچیوغلو!..
- کور‌اوغلو اۆزونو دمیرچیوغلونا تۇتوب اوخويوردو. جعفر پاشا دئدی:
- – آشیق، اونون ایندی بوينونو وۇردوراجاغام، اوندا باخارسان، اوخو.
- دئيیرلر کور‌اوغلو نره چکنده نره‌سیندن داغ-داش تیترگیر. کور‌اوغلو
- کیمی نره چکه بیلرسنمی؟
- کور‌اوغلو دئدی:
- – چوخ ياخشی نره چکه بیله‌رم.
- آلدی گؤرک نه دئدی:
- قۇل دئيرلر قۇلون بوينون بۇرارلار،
- قۇللار قاباغیندا گئدن تیرم من.
- حسابلیيا داغ دا اولسام ايیللم،
- بدهئسابا يامان کینلیگیرم من.
- قێررام قوشونونو خاکی-پاي کیمی،
- بیر قێلینج وۇرارام امیراي کیمی.
- من جوشموشام بوز بۇلانیق چاي کیمی،
- اینانما کی، نئچه ایله سؤنم من.
- کور‌اوغلو دا ياتیب-ياتیب اويانمیش،
- میسری قێلینج قێزیل قانا بويانمیش،
- من پولادام، دمیرچیده دايانمیش،
- شۆشه‌يممی ال ديَنده سێنام من؟
- کور‌اوغلونون نره‌سینه دلیلر داغلاردان تؤکولوب هر ياندان قوشونو
- قێرماغا باشلادیلار. کور‌اوغلو جعفر پاشانی يئره وۇروب سینه‌سینه چؤکدو.
- میسری قێلینجی چکیب باشینی کسمک ایسته‌ينده تئللی خانیم اؤزونو آتاسی‌نین
- اۆستونه سالدی، باشیندان يايلیغینی آچیب کور‌اوغلونون آياغی‌نین آلتینا آتیب
- دئدی:
- – کور‌اوغلو، ایگید باسدیغین کسمز. بۇ دفعه آتامی منه باغیشلا.
- کور‌اوغلو جعفر پاشانین سینه‌سی‌نین اۆستوندن قالخدی. دئدی:
- – گئت، سنی تئللی خانیما باغیشلادیم. آنجاق بیر ده قاباقلاشساق
- الیمدن جان قۇرتارا بیلمه‌يه‌جکسن.
- جعفر پاشانین قوشونو قێریلان قێریلدی، قێریلمايانلاری قاچیب داغیلدی.
- کور‌اوغلو داوادان ال چکیب تئللی خانیمی، دمیرچیوغلونو گؤتوروب چنلیبئله
- يولا دۆشدی.
- کور‌اوغلو ایله ائيواز دلیلرین قاباغیندا گئدیردی. يولون چوخونو گئتمیشدیلر،
- آزی قالمیشدی. چنلیبئله ياخینلاشمیشدیلار. بیر ده کور‌اوغلو
- اۆزونو ائيوازا تۇتوب دئدی:
- – ائيواز، گئت گؤر دمیرچیوغلونون ياراسی نئجه‌دی، ساغالیرمی؟
- ائيواز دمیرچیوغلونون يانینا گلدی. گؤردو ياراسیندان قان او قدر
- آخیب کی، رنگی آغاپپاق آغاریب، ائله ضعیفله‌يیب کی، دیلی يوخدو دانیشا.
- نفه‌سی زورلا گئدیب-گلیر. کور‌اوغلونون يانینا قايیدیب دئدی:
- – دمیرچیوغلونون ياراسی چوخدو، ساغالاسی دئيیل، بۇنو بۇ حالدا
- چنلیبئله نیيه آپاریرسان؟ گل بۇرالاردا بیر يئرده قوياق، راحت اؤلسون.
- ائيوازین جاوابیندا آلدی کور‌اوغلو گؤرک نه دئدی:
- بینادان گؤزل اولمايان
- تئلین قدرینی نه بیلر؟
- گؤيده اۇچان بوز سرچه‌لر
- گۆلون قدرینی نه بیلر.
- کل قوشوب کوتان اکمه‌ين،
- نانین سۆفره‌يه تؤکمه‌ين،
- آرینین قهرین چکمه‌ين
- بالین قدرینی نه بیلر.
- اۇتان، ائيواز خان، بیر اۇتان،
- داغلارین دامنین تۇتان،
- نامردلیکله باشا چاتان،
- ائلین قدرینی نه بیلر.
- کور‌اوغلو ساز ایله دئدیگی کیمی سؤز ایله ده دئدی:
- – ائيواز، من دلیلرین هره‌سینی بیر يئرده آتیب گئتسم، اوندا باشیمدا
- آدام قالماز. دمیرچیوغلونو چنلیبئله آپاراجاغام. حکیم تاپاجاغام.
- ياراسینا درمان قويوب ياغلاياجاغام. اگر ساغالسا بیر ياخشی
- توي ائيله‌يیب تئللی خانیمی اونا وئره‌جه‌يم. ساغالمايیب اؤلسه، اوندا دا
- چنلیبئلده باسدیراجاغام.
- ائيواز سهوینی باشا دۆشوب دینمه‌دی. گلیب چنلیبئله چاتدیلار. نیگار
- خانیم قاباغا چێخدی. دمیرچیوغلونو يارالی، رنگی قاچمیش گؤرنده
- اؤزونو ساخلايا بیلمه‌يیب آغلادی. نیگاری آغلار گؤرن کور‌اوغلو آلدی گؤرک
- نه دئدی:
- آغلاما آلاگؤز نیگار!
- دمیرچیوغلو ساغالاجاق.
- باغریما باسما کؤز، نیگار!..
- دمیرچیوغلو ساغالاجاق.
- چنلیبئلدی منه پناه،
- کؤکسون اؤتوروب چکمه آه،
- تاپدیراجام حکیم، جرراه،
- دمیرچیوغلو ساغالاجاق.
- کور‌اوغلو هئچ ايمز بويون،
- تۇتاجام تئللیينن تويون.
- کسه‌جم تۇنجو، قوچ، قويون،
- دمیرچیوغلو ساغالاجاق.
- کور‌اوغلو بیر حکیم تاپدیریب گتیرتدی.
- دئدی:
- – حکیم، دمیرچیوغلونون ياراسینا ياخشی ملهم ائيله ساغالسین.
- سنه خلت وئره‌جه‌يم. ياخشی باخماسان، دمیرچیوغلو ساغالماسا يقین
- بیل کی، سنی اونون يئرینه اؤلدوره‌جه‌يم.
- حکیم بیلیردی کی، کور‌اوغلونون سؤزو سؤزدور. جانی دیلنن دمیرچیوغلونون
- ياراسینا الیندن گلن قدر ياخشی داوا-درمان ائله‌مه‌يه
- باشلادی. بیر قدر کئچدی، دمیرچیوغلو ساپپاساغ اولوب آياغا قالخدی.
- کور‌اوغلو حکیمه خلت وئریب يولا سالدی.
- کور‌اوغلو چنلیبئلده گؤزل بیر مجلیس دۆزلتدیریب بیر ياخشی توي
- قۇردوروب، تئللی خانیمی دمیرچیوغلونا وئردی.
قایناق‌لار
- Azadliq . org