Wt/azb/کوراوغلوینان آیپارا
کوراوغلوینان آیپارا[edit | edit source]
آنا آنلاتیم
- کوراوغلوینان آیپارا- کوراوغلو داستانی
کوراوغلو اوتوروب ماغارادا دلیلردن کۆسموشدو. بۇ طرفدن ده ائيوازی گؤزلهيیردی کی، ائيواز گله. ائيواز گلیب چێخمادی. کوراوغلو چوخ داریخیب دۇروب گلدی قێراتین يانینا، سازینی کؤک ائلهيیب گؤرک نه دئدی:
- قۇربان اولوم قارا تئله،
- ائيوازی يوللادیم گله،
- آل ياناغی دؤندو گۆله،
- قوچوم ائيوازیم گلمهدی.
- هاوالاردا اۇچان دۇنرا،
- قانادلاری بۇرما-بۇرما،
- هم دف چالدیم، هم ده زۇرنا،
- قوچوم ائيوازیم گلمهدی.
- گؤي اۆزونده واردی اۇلدوز،
- هر دلیمه آلدیم بیر قێز،
- ایستر گلین، ایسترسه قێز
- قوچوم ائيوازیم گلمهدی.
- گئدیبن حالاللاشمادی،
- دئدیم گئتمه، باریشمادی،
- قوچ ایچینه قاریشمادی،
- قوچوم ائيوازیم گلمهدی.
- گئدین دئيین او جاوانا،
- گۆل چیچيی قێيدی جانا،
- نؤش گلمهدین سن بۇ يانا،
- قوچوم ائيوازیم گلمهدی.
- قوچوم، ائيواز، قوچوم، ائيواز،
- گئتدین، کؤنول اولدو ناساز،
- دیوانداسان منه سن ياز،
- قوچوم ائيوازیم گلمهدی.
- کوراوغلو آغلايیردی. ائله بۇ دمده ائيواز اؤزون کوراوغلويا يئتیردی.
- کوراوغلو قولونو سالدی ائيوازین بوينونا، اؤپوشدولر. سحری گۆن کوراوغلو
- قێراتی ائيوازا تاپشیریب آشیق پالتاری گئيدی، سازینی قولتوغونا وۇروب چێخیب
- گئتدی.
- کوراوغلو بیر نئچه منزیل يول گئدیب، گلیب چاتدی ایستانبول شهرینه.
- ایندی گلین خبری ایستانبول پاشاسینین قێزی آيپارا خانیمنان وئریم.
- آيپارا خانیم عمیسی اوغلو اوسمانا آداخلی ایدی.
- آيپارا بیلیردی کی، آتاسی خلیل پاشاينان کوراوغلونون آراسی يوخدو.
- آيپارا خانیم ائشیتمیشدی کی، کوراوغلو چوخ شجاعتلی آدامدی. پیس مقامدا
- اولسا دا دۆشمنه بويون اين دئيیل. او، چوخ تلهسیردی کی، کوراوغلونو گؤره.
- بیر گۆن آيپارا ائيواندا گزینیردی، بۇ دمده کوراوغلو آشیق پالتاریندا
- گلیب ائيوانین قاباغیندان کئچدی. آيپارا خانیم گؤردو کی، ائيوانین
- قاباغیندان کئچن اوغلان چوخ گؤزل، مؤحکم آداما اوخشايیر.
- آيپارانین قۇللوقچوسو دئدی:
- – خانیم، بۇ کوراوغلودو!
- آيپارا خانیم دئدی:
- – کوراوغلو آتامین قورخوسوننان بۇ طرفلره گلیب چێخماز.
- قۇللوقچوسوينان خانیمین سؤزو چپ دۆشدو.
- آيپارا خانیم دئدی:
- – ایندی کی بئلهدی، گئت چاغیر اونو، گؤرک کیمدی؟
- قۇللوقچونون آدی صنمدی. آشاغی دۆشوب کوراوغلونو چاغیردی. کوراوغلو
- گلیب داياندی ائيوانین قاباغیندا، گؤردو کی، ایکی قێز يان-يانا دۇروب، بیربیریندن
- گؤزل.
- آيپارا خانیم خبر آلدی کی، کیمسن؟
- کوراوغلو سازینی سینهسینه باسیب دئدی:
- بیریسینین آياغیندا مستی وار،
- بیریسینین جان آلماغا قستی وار،
- کوراوغلونون بۇ يئرلرده عصری وار،
- کوراوغلويام، گلدیم من باج آلماغا.
- صنم آيپارا خانیما دئدی:
- – گؤردون کوراوغلودو!
- آيپارا خانیم ساچین ساز ائلهيیب گؤرک نه دئدی:
- کوراوغلو گزدیریر قولوندا لاچین،
- صداسی گلنده دۆشمننر، قاچین،
- گؤرمهمیشم دوققوز هؤروک من ساچین
- هانی قێراتین، گلدین باج آلماغا!
- کوراوغلو:
- کوراوغلو کۆسنده مئيدان ائلیگیر،
- بۇراخیب قێراتین سازین کؤکلويور،
- دلیلری چنلیبئلده بسلیگیر،
- کوراوغلويام، گلدیم من باج آلماغا!
- آيپارا خانیم دئدی:
- – سن کوراوغلو دئيیلسن. اگر کوراوغلوسانسا دئ گؤروم اونون ان ياخین
- دلیلری کیملردی؟
- جاوابیندا کوراوغلو دئدی:
- بیر دلیم واردی کی، آدیدی ائيواز،
- ساغیندا، سولوندا دۆشمنی سايماز.
- اۇزاغا گئتسه ده او منسیز دۇرماز،
- کوراوغلويام، گلدیم من باج آلماغا.
- آيپارا خانیم ائيوازین آدینی ائشیدیب يقین ائتدی کی، کوراوغلودو. بۇ
- طرفدن ده کوراوغلو هؤرويونو آيپارايا گؤرستدی. آيپارا خانیم کوراوغلونو
- تانیيیب، عمیسی اوغلو اوسمانین محبتینی اۆرگیندن چێخارتدی. بیر
- کؤنولدن مین کؤنوله وۇرولوب اؤزونو اونا نیشان وئردی:
- آدیمدی آيپارا، نسلیم دۇدومان،
- ياشیل چیمن، آخار سۇلار، شۇخ اورمان،
- آتام خلیل پاشا، آداخلیم اوسمان
- هايیفسان، آي اوغلان، گؤرللر سنی.
- کوراوغلو:
- آدیندی آيپارا، نسلین دۇدومان،
- آي قێز، سنین آداخلیندی اوسمان،
- من گلمیشم آلیم بۇردا قانا-قان،
- وئریب منه نیشان دلیلر سنی.
- آيپارا:
- دلیلرین نولور بۇردا اولايدی،
- ائل-اوبانی چالیب-چاپیب سويايدی،
- آيپاراينان باش ياستیغا قويايدی،
- هئيیفسن، آي اوغلان گؤررلر سنی.
- کوراوغلو بیر آز دا ایرهلی گلیب آيپارا خانیمی تپهدن دێرناغا کیمی
- سۆزدو، سازی دؤشونه باسیب گؤرک نه دئدی:
- من گئدنده بۇردا تیکدیردیم قالا،
- کوراوغلو دؤنوبدو بۇ بۆرجو آلا،
- کوراوغلو بوينونا قۇلاج قول سالا،
- نیشان وئریب منه دلیلر سنی.
- کوراوغلو سؤزونو تامام ائلهدی. ائيوانا چێخیب آيپارا خانیملا قولقولا
- وئریب گیردیلر اوتاغا. کوراوغلو بۇردا بیر نئچه گۆن قالیب آيپاراينان
- کئيف چکمکده اولسون، سیزه دئيیم صنمدن.
- صنمین ده گؤزو کوراوغلويا دۆشموشدو. بیر گۆن گیروه تاپیب تکلیکده
- کوراوغلويا دئدی:
- – گل باش ياستیق اولاق.
- کوراوغلو ایکی بارماغیينان صنمین آغزیندان بیر سیلله وۇردو.
- صنمین آغزی، بۇرنو قانلا دولدو. صنم گلیب بۇلاغا ال-اۆزونو يۇدو،
- تئز اؤزونو يئتیردی اوسمانین يانینا. چاتجاغین اونا دئدی:
- – بَيلیک تاختین يێخیلیب؛ آنان قارا گئيسین، نه دۇرموسان. آيپارا
- کوراوغلويا عاشق اولوب. بۇ ساعت اونون يانیندادی.
- اوسمانین احوالی ديَیشدی. او، بیر طرفدن قورخويا دۆشدو، او بیری
- طرفدن ده قئيرت حیسسی اونو بوغدو. اوسمان آت مینیب، قوشون گؤتوروب
- کوراوغلونون اۆستونه يئریدی.
- ایندی ائشیت آيپاراينان کوراوغلودان.
- کوراوغلوينان آيپارا خانیم اوتورموشدولار ائيواندا. چاي ایچیب صؤحبت
- ائلهيیردیلر. بیردن کوراوغلونون گؤزو ساتاشدی يولا، گؤردو کی، اوسمان
- آتدیلارنان اونا ساری گلیر. تئز سازی دؤشونه باسیب دئدی:
- دۆشدو اۆزويومون قاشی،
- اولمامیشدیم من هئچ ناشی.
- ساغ بۇراخدیم قاراباشی،
- چنلیبئلده ائيواز قالدی.
- بۇ سؤزدن آيپارا بیر شئي باشا دۆشمهدی.
- خبر آلدی کی: – نه اولوب؟
- کوراوغلو دئدی:
- نه تمیزدی اۆزو آيین،
- يوخدو رۇم ائلینده تايین،
- صنم چێخدی بیزه خايین،
- دؤرد يانیمی دۆشمن آلدی.
- آيپارا بۇ سؤزو ائشیدن کیمی کوراوغلو باخان طرفه باخیب گؤردو کی،
- اوسمان قوشوننان گلیر. اۆزون تۇتوب کوراوغلويا دئدی:
- – دوغرودو، گلیرلر. آمما معطل قالمیشام کی، صنم بیزی نه
- اۆچون ساتیب.
- کوراوغلو صنمنن اولان احوالاتی آيپارايا دانیشدی.
- آيپارا دئدی:
- – ایندی کی، منی بۇ قدر سئویب وفالی چێخیبسان، گل من سنی داواسیزشاواسیز
- بۇرادان قۇرتاریم.
- کوراوغلو دئدی:
- – من گرک مئيداندا جؤولان وۇرام. اوسمانا قان آغلادام.
- آيپارا خانیم يالواریب قويمادی. دۇروب گلدیلر ائوه. آيپارا خانیم
- کوراوغلويا بیر دست آرواد پالتاری گئيیندیریب بۇ بیری قاپیدان يولا سالدی.
- کوراوغلو آرواد پالتاریندا چێخیب يولون بیر طرفینده گیزلنمکده اولسون،
- سیزه دئيیم اوسماندان. اوسمانگیل بۇ طرفدن گلیب چاتدیلار آيپارانین
- ائيوانینین قاباغینا. ائيوانی دؤورهيه آلیب دايانمیشدیلار کی، کوراوغلو
- سسینین نازیک يئرینه سالیب قێشقیرا-قێشقیرا آتیلیب اۆز قويدو اوسمانین
- قوشونونا ساری.
- اوسمان خبر آلدی کی، آي قاری، نه اۆچون قێشقیریرسان؟
- کوراوغلو دئدی:
- – نئجه قێشقیرمايیم، کوراوغلونون يئددی مین يئددی يۆز يئتمیش
- يئددی دلیسی خلیل پاشانین ائوینی آلت-اۆست ائلهدیلر.
- کوراوغلو بۇنو دئيیب گؤزدن ایتدی، درهيه چکیلیب الینی بئلینه قويوب
- داياندی. اوسمان امر وئردی کی، قوشون عمیسینه کؤمهيه قايیتسین. قوشون
- قايیداندا ال آتیب آتدارین بیرینین جیلووونا، چکدی درهيه. آتدینی بوغوب
- آتینی آلدی. قێلینجینی باغلايیب بئلینه، گؤزلهدی. بۇ طرفدن قوشون گؤزدن
- ایتیب گئتدی. او بیری طرفدن ده تک قالان اوسمان اؤزونو يئتیردی آيپارانین
- قاپیسینا. قاپینی دؤيدو. آيپارا خانیم قاپینی آچمادی. بۇ دمده
- کوراوغلو اوسمانا اؤزونو يئتیردی. اوسمانین قولون باغلايیب آتدی بیر يانا.
- آيپارا خانیم ائيواندان باخیردی. بۇنو گؤروب کوراوغلويا دئدی:
- – آت قۇيويا!
- کوراوغلو اوسمانی يئرنن سۆرويه-سۆرويه گؤتوروب سالدی درین بیر
- قۇيويا. آغزینا دا بیر دَيیرمان داشی چئویریب چێخیب گئتدی آيپارانین
- يانینا. اوتوروب کئيفه باشلادیلار.
- دلیلر کوراوغلونون يادیندان چێخمیشدی. کوراوغلو ایکینجی گۆن آيپارانی
- گؤتوروب کئچدی باشقا بیر يئره. خلیل پاشا ایشدن خبردار اولوب
- کوراوغلونون دالیسینجان آدام سالدی. بۇ طرفدن ده صنم کوراوغلونون
- دالیسینجان گزیردی. کوراوغلوينان آيپارانی تاپا بیلمهدیلر. خلیل پاشانین
- اووقاتی تلخ اولوب اعلان وئردیردی کی، کیم کوراوغلونون يئرینی دئسه بیر
- کیسه قێزیل وئرهجهيم.
- کوراوغلو دلیلردن دۆز بیر ایلدی کی، آيریلمیشدی. آيپارادان بیر اوغلو
- اولموشدو.
- دلیلر چوخ گؤزلهدیلر. دوققوز آي باشا چاتاندان سونرا ائيواز دئدی:
- – دلیلر، گرک گئدک کوراوغلونون دالیسیيجان. چۆنکی کوراوغلو
- بیزدن چوخ آيری دۆشسيدی بیر آي دۆشردی. آمما دوققوز آيدی کی، اوندان
- خبر يوخدو. گلین اۆچ آيلیق يولو بیر آيا باشا وۇروب گئدک کوراوغلونون
- دالیسیيجان. دلیلر راضی اولوب قێراتی دا اؤزلریينن گؤتوروب گئتدیلر.
- دلیلر اوبا-اوبا، شهر-شهر گزیب کوراوغلونو آختاریردیلار.
- دلیلر گزمکده اولسون، خبر وئرک خلیل پاشادان. خلیل پاشا
- اعلان وئردیرمیشدی کی، کیم کوراوغلونون يئرینی بیلیب دئسه بیر کیسه قێزیل
- وئرهجک.
- صنم کوراوغلونون الیندن يانیقلیيدی. اؤزلويونده آند ایچدی کی،
- هاردا اولسا کوراوغلونو تاپاجام. دۆشوب اوبا-اوبا اونو گزدی.
- ایندی خبر وئرک کوراوغلودان.
- کوراوغلودا بیر خاصيت واردی، همیشه ایشی برکه دۆشنده، يا پیس
- يۇخو گؤرنده چێخیب هۆندور بیر يئرده ناماز قێلاردی. کوراوغلو دلیلری
- يۇخودا گؤروب، احوالی بیر آز ديَیشمیشدی. قالاچانین تپهسینه چێخیب ناماز
- قێلیردی. صنم ده ائل-اوبانی گزیب گلیب چێخمیشدی بۇرا. بیردن گؤردو کی،
- اۇجادان سس گلیر. صنم يئریدی ایرهلی، گلیب يئتیشدی قالاچايا، باخیب
- دقت ائتدی کی، کوراوغلو بۇردادی. آيپارانین دا قۇجاغیندا اۇشاق ائيواندا
- گزیشیر. تئز اؤزونو خلیل پاشايا يئتیریب دئدی:
- – کوراوغلونون يئرینی تاپمیشام. قێزین آيپارا خانیم دا اونون يانیندادی.
- خلیل پاشا امر وئردی کی، قوشون حاضیر اولسون. قوشون حاضیر اولدو. صنم
- قوشونو بیرباش گؤتوروب چێخارتدی کوراوغلو اولان يئره. صنم قوشونا
- سرکردهلیک ائدیب قوشونو داغین دؤشونده گیزلتدی. گئجهدن خئيلی کئچمیشدی
- کی، صنم قوشونو گؤتوروب گلدی کوراوغلونون قالاچاسینا. صنم
- کمند آتیب دۆشدو هيته. قاپینی آچیب قوشونو چکدی ایچری. ائيوانا چێخیب
- گؤردو کی، کوراوغلو آيپارا خانیمنان ياتیب. اۇشاغی دا قويوبلار اؤزلریندن
- بیر آز آرالی. امر وئریب تئز کوراوغلونون، آيپارانین ال-آياغینی
- باغلاتدی. بیر وعده کوراوغلو اۇشاغین سسینه آيیلیب گؤردو کی، دۆشمن دؤرت
- طرفی آلیب. بۇردا بیر قاپا قاپدی کی، گل گؤرهسن.
- کوراوغلو بیر اۇشاغا، بیر ده آيپارايا باخیب دئدی:
- درهلرده اۇجالیبدی بول قامیش،
- قامیشی قێرماغا گلیبدی جامیش،
- بیز ياتمیشیق، صنم چوخدان اوياقمیش،
- اويان، قوللاریمی صنم باغلادی.
- آيپارا خانیم سس آيیلدی. آمما يۇخولويدو. اوتوروب يئرینین ایچینده
- باخیردی، بیلمیردی کی، نه اولوب. ایستهدی گؤزلرینی اووا کی، يۇخوسو قاچسین،
- گؤردو قوللاری باغلادی. کوراوغلو آلیب دۆباره دئدی:
- دۆشمان گلیب دؤرد طرفیم هاخلادی،
- کوراوغلونون اۆرگینی داغلادی.
- بۇ مجلیسده کوراوغلودو آغلادی،
- آيیل، قوللاریمی صنم باغلادی.
- کوراوغلو دارتینیب قوللارینی آچدی، اوغلونون قولونا بیر بازو بند باغلادی.
- صنم آيپارا خانیمی، کوراوغلونو، بیر ده اۇشاغی گؤتوروب قاتدی
- قوشونون قاباغینا. اۆز قويدولار خلیل پاشانین ایمارتینه ساری. صنمگیل
- يولدا کوراوغلونون اۇشاغینی بیر داشین دیبینه قويوب چێخیب گئتدیلر.
- خلیل پاشايا خبر چاتدی کی، کوراوغلو تۇتولوبدو. پاشا امر ائلهدی کی،
- کوراوغلونو آپاریب سالسینلار قۇيويا. قێزی آيپارانی دا زیندانا سالدیردی.
- کوراوغلونو گتیریب بیر درین قۇيويا سالدیلار.
- سیزه خبر وئرک بیر قاریدان. ياخینلاردا بیر قاری اؤزونه ائو تیکمیشدی،
- هيتینده تويوق-جۆجه ساخلاماقلا مشغول اولوردو. قارینین بیر ایتی
- وار ایدی. ایت تزهجه دوغموشدو. ایت بیر گۆن بیر چاققال سسی ائشیدیر، چێخیب اۆز
- قويور سسه طرف. گلیب بیر داشین دیبینده آي ياریملیق بیر اوغلان اۇشاغی
- تاپیر. ایتین اۇشاغا يازیغی گلیر. ایستهيیر اونو آپارسین، گؤرور کی، اۇشاق آجدی.
- باشلايیر اۇشاغا سۆد وئرمهيه. بیر نئچه گۆن ایت بۇ اۇشاغی بۇردا اؤز سۆدو ایله
- ساخلايیر. قاری ایتدن شکلهنیر. بیر گۆن ایتین دالیسینجان دۆشوب گلیب چێخیر
- همین داشین دیبینه. گؤرور کی، داشین دیبینده بلکلی بیر اۇشاق وار، ایت اونو
- عمیزدیریر. قاری تئز اۇشاغی گؤتوروب ائوینه گلیر. باشلايیر اۇشاغی ساخلاماغا.
- سیزه دئيک کوراوغلونون دلیلریندن. دلیلر گلیب چاتمیشدیلار ایستانبولا.
- قێراتدا بیر خاصيت واردی کی، کوراوغلو هانسی دلیکلی داشدا اولسايدی
- ایينن گلیب اونو تاپاردی. ائيواز قێراتی بۇراخمیشدی قاباغا. قێرات گلیب
- اؤزونو يئتیردی آيپارا خانیمین ائيوانینا. بۇرانی دولانیب ایيلهدی. سونرا
- اؤزونو يئتیردی بیر قۇيونون آغزینا. آياقلارینی دؤيدو يئره. ائيواز بیلدی کی،
- کوراوغلو بۇردادی. سس وئردی. کوراوغلو سسدن بیلدی کی، دلیلریدی، دئدی:
- – کمند آتین.
- دلیلر کمند آتیب کوراوغلونو قۇيودان چێخارتدیلار. آلدی، کوراوغلو:
- دلیلرله باریشاندا کوراوغلو،
- يئدیردر اونلارا ناباتنان نوغلو،
- سحرسی کسدیرر يۆز اللی توغلو،
- آيپارام قالیبدی دۆشمن الینده.
- سمندین قولوندا قێزیل بازوبند،
- خلیل پاشا بۆرجدن آسیلسین گرک.
- قێيمايین الده قالا بیر آيلیق سمند،
- آيپارام قالیبدی دۆشمن الینده.
- هیندیدن رۇماتک سالارام سوراق،
- دلیلریم اولور قێرات تک قووراق،
- يێخیبان خلیلی بۇ ائلدن قوواق
- آيپارام قالیبدی دۆشمن الینده.
- کوراوغلو سؤزونو تامام ائلهدی. قێراتی چکیب آياق قويدو اۆزنگیيه،
- دلیلره دئدی:
- – گلین دالیمجان.
- اونلار آتلارینی سۆروب يئتیردیلر شهره. خلیل پاشانین نه کی قوشونو
- واردی، هامیسینی قێریب-چاتدیلار باشا. کوراوغلو خلیل پاشانی اؤز الیينن
- اؤلدوروب امر وئردی کی، سمندی تاپسینلار. اؤزو ده آيپارانی آختارماغا
- گئتدی.
- کوراوغلو آيپارانی تاپدی. اونلار بیر-بیرینه ساریلدی. کوراوغلو سمندی
- خبر آلدی.
- آيپارا خانیم آغلادی. کوراوغلو بیلدی کی، سمند يوخ اولوب، چوخ
- هئيیفسیلندی. دلیلر آختاردیلار، صنمی ده تاپا بیلمهدیلر.
- کوراوغلو دلیلرینی يێغیب شادلیق مجلیسی قۇردو. دلیلرنن بیر يئرده
- اۆچ گۆن، اۆچ گئجه کئيف چکدیلر. سیز ده بۇردا کئفده، داماقدا اولون.
قایناقلار
- Azadliq . org