Wt/azb/کوراوغلونون بایازید سفری
کوراوغلونون بایازید سفری
[edit | edit source]
آنا آنلاتیم
- کوراوغلونون بایازید سفری
احمد آدلی بیر تاجیرباشی واردی. احمد تاجیرباشی هم چوخ دؤولتلی ایدی، همی ده ایگید ایدی. دئيیرلر کی، احمد تاجیره آتا-آناسی اۇشاقلیقدان ياخشی مۇغايات اولموشدو. بؤيوينه کیمی اونو همیشه کیلیم اۆسته گزدیرمیشدیلر. احمدین آياغی هئچ واخت قۇرو يئره ديَمه‌میشدی. اودو کی، احمدین گؤزو يئددی آغاجدان-يئددی آغاجا هر نه قارالتی اولسا سئچردی. احمد تاجیرین باشیندا قێرخ ياراخلی تاجیر واردی. همیشه کاروان ائله‌يیب آل-قۇماشدان يۆک باغلايیب بؤيوک-بؤيوک شهرلره، ماهاللارا سفر ائلیيردیلر.
- يوللاری دا چوخ واخت چنلیبئلین يانیندان کئچیردی.
- آمما سن اونو دئ کی، کور‌اوغلو، دلیلری نه قدر اللشیردیلر، احمد
- تاجیرباشینی تۇتا بیلمیردیلر کی، بیلمیردیلر. نئچه کره دلیلر ائيواز،
- دمیرچیوغلو، حالايپوزان، تۆپداغیدان احمد تاجیرباشی‌نین قاباغینی
- کسمیشدیلرسه ده، اونو تۇتا بیلمه‌میشدیلر. ظالیمین جین گؤزو يئددی
- آغاجلیقدان باخیب بۇنلاری گؤروب، کاروانی اؤزگه يولدان آپارمیشدی.
- بۇ ایش کور‌اوغلويا چوخ آغیر گلیردی. بَيلری، پاشالاری دیزه چؤکدورن
- کور‌اوغلو بیر تاجیرین الینده هاراسان قالمیشدی. دئيیرلر بیر گۆن کور‌اوغلو
- ائشیتدی کی، احمد تاجیرباشی يئنه گلیب چنلیبئلین يانیندان کئچیب گئدیب،
- دلیلر اونو تۇتا بیلمه‌يیبلر. جین وۇردو باشینا. چاغیردی دلیلری، باشلادی
- اونلاری مذمّت ائله‌مه‌يه کی، ياخشی، بیر تاجیری کی، بیز تۇتا بیلمیریک، تاي
- نه قوچ کور‌اوغلو – قوچ کور‌اوغلو دئيیب دۆنيانی سس-کۆيه باسمیشیق.
- دئيیرلر کور‌اوغلو دلیلری مذمّت ائلیينده دلیلر اۆزه دۇروب
- دئدیلر:
- – آي کور‌اوغلو، بیز نئجه ائله‌يک؟ ظالیم اوغلو احمد تاجیر بیر قێزیلقوشا
- دؤنوب. بره‌لری گزیریک، يوللاری باغلايیریق، يئددی آغاجلیقدان بیزی
- گؤرور، يئنه قاچیب گئدیر. تۇتا بیلیرسن اؤزون تۇت دا!
- دئيیرلر کور‌اوغلو دلیلرین بۇ سؤزونون قاباغیندا هئچ بیر سؤز
- دئمه‌دی، گؤزله‌دی. اؤيرندی کی، تاجیر احمد بۇ ياخینلاردا گلیب يئنه ده
- چنلیبئلدن کئچه‌جک. ياواشجا بیر هۆندور قايانین باشینا چێخیب يوللاری
- گؤزله‌مه‌يه باشلادی.
- بلی، او نئجه دئيرلر، بۇ بۇرادا گؤزله‌مکده اولسون، سنه کیمدن
- دئيیم، احمد تاجیرباشیدان. احمد تاجیرباشی اؤز ياراقلی-ياساقلی آداملاری
- ایله گلیردی. گلیب، گلیب ائله کی، چنلیبئلین يئددی آغاجلیغینا چاتدیلار.
- احمد تاجیرباشی چین گؤزلرینی دولاندیریب قايانین باشیندان کوراوغلونون
- قارالتیسینی گؤردو. او ساعت کاروانا امر ائله‌دی کی، ايلنسینلر. کاروان
- ايلندی. آنجاق بۇ دفعه، او نئجه دئيرلر، داش قايايا راست گلمیشدی.
- کور‌اوغلو دا کور‌اوغلويدو. احمده-زادا بئله ایشلرده باج وئرن دئيیلدی.
- ائله کی، گؤردو کاروان داياندی، ياپینجیسینی گؤيه آتدی، بیر سرنیج قاتیغی دا
- اونون دالینجا تۇللادی. اؤزو ده ياتدی يئره.
- احمد تاجیرباشی باخدی کی، قايانین باشیندان بیر قارا شئي اۇچدو،
- دالیسینجا دا بیر زیل دۆشدو. يولداشلارینا دئدی:
- – بیر شئي يوخدو. يۆکله‌نین، سۆرون گئدک. قاراقوش ایدی. قايانین
- باشینا قونموشدو، زیل آتدی، اۇچدو گئتدی.
- کاروان تزه‌دن حرکته گلدی. کور‌اوغلو او قدر گؤزله‌دی کی، کاروان
- قايانین يانینا چاتدی. کور‌اوغلو قايانین باشیندان ائنیب قێراتی میندی،
- قێزیلقوش کیمی کاروانباشی‌نین اۆستونو آلدی. کاروان اهلی چاخناشیب، بیربیرلرینه
- ديَدیلر. اونلاری بئله گؤرن قوچ کور‌اوغلو آلدی گؤرک نه دئدی:
- آغیر آلايلار دؤشله‌رم،
- تؤک مالینی، گئت، گان!
- چوخ بئله فئللر ایشله‌رم،
- تؤک مالینی، گئت، گان!
- الیمدن گلرسن جانا،
- میسری قێلینج سێغمیر قێنا،
- چکسم بويانارسان قانا،
- تؤک مالینی، گئت، گان!
- سنسن احمد تاجیرباشی،
- تؤکدوررم دیدندن ياشی،
- باشلامامیش تر ساواشی،
- تؤک مالینی، گئت، گان!
- قايا باشیندا دۇرارام،
- ارلر بوينونو بۇرارام،
- سنه بیر عمود وۇرارام،
- تؤک مالینی، گئت، گان!
- کور‌اوغلويام، بیر آج قۇردام،
- چنلیبئلده آغیر يۇردام،
- قان چێخاردار ایندی گوردام،
- تؤک مالینی، گئت، گان!
- تاجیرلر خوشلوغنان ماللارینی وئرمک ایسته‌مه‌دیلر. کور‌اوغلو بۇنو
- گؤروب میسری قێلینجینی چکدی، تاجیرلره هۆجوم ائله‌دی. احمد تاجیرباشی
- حؤکم ائله‌دی، تاجیرلر ده قێلینجلارینی چکیب کور‌اوغلويا طرف يئریدیلر.
- احمد تاجیرباشی قێلینجینی آلیب کوراوغلونون يولونو کسدی. داوا باشلاندی،
- آرا قاریشدی. کور‌اوغلو ایلک الده اؤزونو احمد تاجیرباشیيا يئتیردی.
- آنجاق اونو اؤلدورمک ایستمیردی. قورخودوب دیری تۇتموق فیکرینديدی. ائله
- کی، ياخینلاشدی، کلله‌سیندن ائله بیر عمود وۇردو کی، احمد تاجیرباشی
- باياخ ها، اؤزوندن گئدیب يئره يێخیلدی. کور‌اوغلو اوندان کئچدی، قێراتی
- جؤولانا گتیردی، سولا سۆردو، ساغا سۆردو. قێرات آجیقلاندی. کور‌اوغلو قێزدی.
- کور‌اوغلو عمودو، شئشپری، قێلینجی ایشه سالدی. قێرات دیشی ایله، دال آياقلاری ایله
- تاجیرلرده ساغ يئر قويمادی.
- تاجیرلر کوراوغلونون ضربه‌‌سینه داوام گتیره بیلمه‌يیب آخیردا تسلیم
- اولدولار. کور‌اوغلو تاجیرباشی احمدی بیر آتا چاتدیردی، قالان تاجیرلری
- ده دوه‌لی، قاتیرلی، آل-قۇماشلی قاباغینا قاتیب، قێراتین دؤشونده چارداخلی
- چنلیبئله چێخارتدی. نیگار خانیم، ائيواز، دمیرچیوغلو، بۆتون دلیلر
- تاجیرلرین باشینا يێغیشدیلار. کور‌اوغلو تاجیرلرین ماللارینی بؤلوشدوردو،
- دلیلره، خانیملارا پايلادی. تاجیرلرین بیری آغلايا-آغلايا احمد تاجیره
- دئدی:
- – احمد تاجیرباشی، نه جۆر اولدو کی، سن يئددی آغاجلیقدان کور‌اوغلونو
- گؤرمه‌دین؟
- احمد تاجیرباشی دئدی:
- – کور اولسون منیم آنام. اۇشاق واختی بیر گۆن منی آياقيالین کیلیمین
- اۆستونده گزدیرمیشدی. او اولماسايدی ياپینجی ایله قاراقوشو سئچردیم.
- کور‌اوغلو دلیلرین، خانیملارین آراسیندا اوتوروب يئمکده، ایچمکده
- ایدی.
- دئيیرلر کور‌اوغلو چوخ قوناقجیل ایمیش. تسلیم اولانلارا چوخ حؤرمت
- ائله‌يرمیش. ائله کی، يئدی، ایچدی، داماغی دۇرولدو، کئيفی بۇلوتدا گزمه‌يه
- باشلادی، آياغا دۇردو، دلیلری يانینا آلیب تاجیرلرین يانینا گلدی. اۆزونو
- اونلارا تۇتوب دئدی:
- – دۆشمان گۆنو دۆشمان، دوست گۆنو دوست! ایندی سیز منیم قوناغیمسینیز.
- بۇيورون، هر نه ایسته‌سه‌نیز حاضیر ائله‌دیم.
- احمد تاجیرباشی فیکره گئتدی. اؤز-اؤزونه دئدی:
- – ایننن سونرا منیم مال-دؤولتیمی، آل-قۇماشیمی کور‌اوغلو گئری
- قايتارماياجاق، گل اونون عوضینی چێخماق اۆچون ائله بیر قوناقلیق ایسته کی،
- او بۇرالاردا تاپیلماسین، اۇزاق يئرلرده اولسون!
- اۆزونه حیله نیقابی چکیب کور‌اوغلويا:
- – اير بیزه ياخشی قوناقلیق وئرمک ایسته‌يیرسنسه، بايازید پاشاسی
- خلیل پاشانین ياخشی ال جئيرانلاری وار، اونلاردان گتیریب بیزه جئيران
- کابابی وئر.
- کور‌اوغلو دئدی:
- – باش اۆسته. سیزه جئيران کابابی وئرمک منه بورج اولسون!
- کور‌اوغلو سفر تداروکونو گؤرمک ایسته‌ينده ائيواز ایره‌لی دۇروب
- دئدی:
- – قوچ کور‌اوغلو، ایزین وئر قوناقلارا جئيران گتیرمه‌يه من گئدیم.
- کور‌اوغلو نه قدر ائله‌دی کی، يوخ، سن گئتمه، اولمادی. ائيوازین قۇلاغینا
- گیرمه‌دی کی، گیرمه‌دی.
- آخیردا کور‌اوغلو گؤردو کی، ائيواز اینجیيه‌جک، علاجسیز قالیب:
- – ياخشی، عرباتی مین، حالايپوزانی، توخماقوورانی دا اؤزونه يولداش
- گؤتور، گئت، آنجاق تئز قايیت.
- ائيواز ياراخلاندی. عرباتی میندی، حالايپوزانی، توخماقوورانی دا
- يانینا آلیب گئتمک ایسته‌ينده، نیگار خانیم، دلیلر تؤکولدولر هامیسی
- يئربيئردن دئدیلر:
- – بۇنلاری بايازید کیمی آغیر سفره نیيه گؤندریرسن؟ گئدرلر، بیر
- ایش اولار، تۇتولارلار، داوا دۆشر، باشلارینا بیر ایش گلر.
- کور‌اوغلو دئدی:
- – کور‌اوغلو سؤزوننن دؤنمز، اونلار گئتمسه، اؤزوم گئده‌جه‌يم.
- گؤردولر کور‌اوغلونو سؤزوننن دؤندرمک اولماياجاق، بۇنلار دا راضی
- اولدولار. کور‌اوغلو اۆزونو ائيوازا تۇتوب، دئدی:
- عرباتی ياخشی ساخلا،
- داشدی بايازید يوللاری.
- يوللار آيریجینی يوخلا،
- بئشدی بايازید يوللاری.
- حالايپوزان سنه نؤکر،
- توخماقووران قهرین چکر،
- عربات نال، مێخین تؤکر،
- داشدی بايازید يوللاری،
- بايازید خوش منظره‌دی،
- تۆلک، ترلانا بره‌دی،
- قايادی، داغدی، دره‌دی،
- قێشدی بايازید يوللاری.
- ایسته‌رم ار باغری ياران،
- قانلی مئيدانلاردا دۇران،
- دۇمان، چووغون، سويوق، بوران،
- قێشدی بايازید يوللاری.
- کور‌اوغلويام هوور-هوور،
- آچما قانلی يارام سوور،
- اوردو قێردیم بئش يۆز کوور،
- لئشدی بايازید يوللاری.
- خان ائيواز، حالايپوزان، توخماقووران کور‌اوغلوينان، دلیلرنن ال
- وئریب آيریلدیلار. بايازیده طرف يولا دۆشدولر. آتلار قاناد آچدیلار، داغ
- کئچدیلر، دره کئچدیلر، هر يئردن کئچیب گلدیلر، بیر آخشام بايازیده
- چاتدیلار.
- بۇنلار چاتماقدا اولسون، سنه دئيیم خلیل پاشادان. خلیل پاشانین
- بیر باغی وار ایدی کی، قۇش قۇشلوغو ایله سکه بیلمزدی بۇ باغدا. پاشا ال
- جئيرانلارینی ساخلادیردی. ائيواز يولداشلاری ایله برابر آتینی سۆروب باغا
- گیردی. آتلاردان دۆشدولر. ال جئيرانلارینی قێریب يۆکلرینی تۇتدولار. ائله
- کی، يۆکلری حاضیر اولدو، ائيواز دئدی:
- – يورولموشوق، گلین بیر آز دینجلک، سونرا گئدریک.
- هره‌سی بیر ياندا اۇزاندی. ائيوازی او ساعت يۇخو آپاردی، آمما يولداشلاری
- ياتمايیب کئشیک چکیردیلر. صاباحا ياخین باغبان باغی يوخلاماغا
- گلدی. گؤردو باغدا بیر سلامات آغاج قالمايیب، آتلار باسیب قێریب. قالدی
- مهتتل کی، بۇ ندی؟ بۇ آتلار کیمیندی؟ بۇ طرفه باخاندا گؤردو ال
- جئيرانلاری دا لئش-لئشه وئریلیب. باخدی کی، يوخ، بۇ ائله بئله دئيیل. دئيسن
- باغا آدام گیریب. او طرف، بۇ طرفی گزیب بیر ده گؤردو کی، بیر آغاجین
- دیبینده اۆچ نفر رۇستام زال کیمی ایگید وار، آمما بۇنلارین ایکیسی اوياقدی،
- بیری ياتیب. باغبان دلیلری گؤرن کیمی دلیلر ده باغبانی گؤردولر.
- حالايپوزان ایسته‌دی کی، باغبانی تۇتسون، باغبان دۇروب قاچدی. بۇ زامان
- حالايپوزان اؤزونو ائيوازا يئتیریب گؤرک نه دئدی:
- قوشون چکیب دؤرد يانیمیز آلارلار،
- بۇ خابی قفلتدن آيیل، ائيواز خان!
- بیزی تۇتوب او زیندانا سالارلار،
- ایگید اولماز بۇنا قايیل، ائيواز خان!
- سنه عرض ائيله‌يیم سؤزون دۆزونو،
- قبول ائتمه مۆخننتین سؤزونو،
- گؤستر جامالینی، قمر اۆزونو،
- گۆن کیمی عالمه يايیل، ائيواز خان!
- اینصافدیمی حالايپوزان تۇتولا،
- قۇلاج قوللار دال گردنده قاتیلا،
- قۇل آدینا بايازیدده ساتیلا،
- دلیلر سرداری سايیل، ائيواز خان!
- باغبان ایشی بئله گؤرنده ياواشجا گلیب باغین قاپیسیندان چێخیب
- گؤتورولدو، حالايپوزان شاققیلتیيا دؤنوب قاپیيا طرف باخاندا گؤردو
- باغباندی. ایسته‌دی دۇروب تۇتسون، باغبان باياخ ها گؤزدن ایتدی. حالايپوزان
- بیر ده ائيوازی سسله‌دی کی:
- – ائيواز، خلیل پاشانین باغبانی بیزی گؤردو، خبره قاچدی. ایندی قوشون
- يئریير، بیزی تۇتارلار. دۇرون قاچاق.
- ائيواز دئدی:
- – بۇرادان داواسیز گئتسک بیزیم بايازیده گلمه‌يیمیزه هئچ کیم
- اینانماز. بیر ده وۇروشمامیش قاچساق اؤز آدیمیزی، کوراوغلونون آدینی باتیراریق.
- دئيرلر کوراوغلونون اۆچ دلیسی گلیب خلیل پاشانین باغیندا جئيران
- اوغورلايیب قاچیبلار. قويون گؤزله‌يک، قوشون گلسین وۇروشاق. ایگیدلیک گؤسته‌رک،
- کوراوغلونون يانینا اۆزواغ گئدک.
- حالايپوزان، توخماقووران ها ائله‌دیلر کی، گئتسینلر، ائيواز راضی
- اولمادی. آخیردا اونلار دا دۇروب قوشونون گلمه‌يینی گؤزله‌دیلر.
- او طرفدن باغبان، او نئجه دئيللر، بیر الینده ایمانی، بیر الینده
- تۇمانی، اؤزونو خلیل پاشايا يئتیریب احوالاتی باشدان-آياغا اونا سؤيله‌دی.
- خلیل پاشا حؤکم ائله‌دی، قوشون آتلانیب باغین دؤرد طرفینی کسدی. ائيواز،
- حالايپوزان، توخماقووران اؤز آتلارینی میندیلر، قێلینجلارینی چکیب خلیل
- پاشانین قوشونونا جۇمدولار. داوا باشلادی، آرا قاریشدی. کوراوغلونون
- دلیلری شیر کیمی قێزدیلار. قوشونو قاتیم-قاتیم قاتلادیلار. آنجاق نه
- قدر هر طرفدن هۆجوم ائتدیلرسه دلیلره باتا بیلمه‌دیلر.
- دلیلر شیر کیمی داوا ائله‌مکده اولسونلار، بۇ تايدا قوشون بؤيوکلری
- قالمیشدیلار مات-مهتتل. نه قدر قوشون وار ایدی هامیسینی تؤکموشدولر
- اورا. آمما گل کی، قوشون هامیسی بۇ اۆچجه دلی‌نین الینده عاجیز
- قالمیشدی. اونلاری تۇتا بیلمیردیلر کی، بیلمیردیلر. ائيواز بیر طرفدن،
- حالايپوزان بیر طرفدن، توخماقووران دا بیر طرفدن قوشونو قێریب
- چێخمیشدیلار باشا. آخیردا قوشون بؤيوکلری مصلحتلشیب بئله بیر فیکره
- گلدیلر کی، بۇنلارا بیر شئي ائله‌مک اولماياجاق، بۇنلارین آتلارینی وۇراق
- کی، پیيادا قالسینلار، بلکه اوندا تۇتا بیلک.
- قوشون بؤيوکلری‌نین امرینه گؤره ياي-اوخلاری ایشه سالیب دلیلرین آتلارینی
- وۇردولار. ائله کی، دلیلر پیيادا قالدیلار، قوشون بیر طرفدن هۆجوم
- ائله‌يیب اونلاری آراکسمه‌يه سالیب تکله‌دیلر. دلیلر يئنه ده داوادان ال
- چکمه‌دیلر.
- هره‌سی بیر دسته‌نی قاباغینا سالمیشدی، قێریردی. تاي بیر-بیرلریندن
- خبرلری يوخ ایدی. ائيواز بیر آغیر دسته‌نین آراسیندا وۇروشوردو. قوشونو
- پئنجر کیمی بیچیب يئره تؤکوردو. چالیشیردی کی، اؤزونو يولداشلارینا يئتیرسین.
- او، شیرین داوايا مشغول ایکن آياغی ایلیشیب يێخیلدی، قوشون اونون اۆستونو
- آلدی. تۇتوب قوللارینی باغلادیلار. حالايپوزانلا توخماقووران ائله کی،
- دلیلرین سرداری ائيوازی تۇتولموش گؤردولر، اللری بوشالدی، ایستر-ایسته‌مز
- تسلیم اولدولار. خلیل پاشا دلیلرین بازبوروتونا باخیب مات قالمیشدی.
- اۆزونو اونلارا تۇتوب دئدی:
- – دئيین گؤروم کیمسینیز؟ نه جۆرتله منیم جئيرانلاریمی قێردینیز؟
- خلیل پاشانین جاوابیندا ائيواز دئدی:
- – بیز کوراوغلونون دلیلرینده‌نیک.
- خلیل پاشا اونلارین کور‌اوغلو دلیلری اولدوغونو بیلجک حؤکم ائله‌دی،
- دلیلرین بويونلارینی وۇرسونلار. وزیر، وکیل تورپاغا دۆشوب دئدیلر:
- – پاشا ساغ اولسون، بۇنلارین بويونلارینی وۇرماق آساندی، آمما کوراوغلونون
- جاوابینی وئرمک چتیندی. اونا شاهلارا، خوتکارلارا قان اۇددوران،
- بَيلره، پاشالارا تۆک سالدیران، تاجیرلری سويان، يوللاری کسن، بره‌لر
- پۇسان قوچ کور‌اوغلو دئيرلر. هئچ کسده قیصاصینی قويماز. بیزیم
- بۇنلاری اؤلدورمه‌يیمیزی بیلسه، دلیلری تؤکوب، هامیمیزی قێرار. سن بیزیم
- سؤزوموزو ائشیت، بۇنلاری هله‌لیک زیندانا سالدیر. دلیلرین تۇتولماسینی
- کور‌اوغلو بیلسه داللارینجا گله‌جک. باجاریرسان اوندا کوراوغلونون اؤزونو
- تۇتدور، اؤلدور. جانیمیز قۇرتارسین. خوتکار دا سنه بؤيوک اناملار وئرسین.
- سونرا بۇنلاری قێردیرماق آساندیر.
- خلیل پاشا، وزیر، وکیلین تدبیرینه راضی اولوب حؤکم ائله‌دی، دلیلری
- زیندانا سالسینلار. ائيوازین دا، يولداشلاری‌نین دا آياقلارینا کۆنده، بويونلارینا
- زنجیر وۇروب زیندانا سالدیلار. آغزینا قێفیل وۇردولار، يۆز ياراقلی
- آدام دا اونلارا کئشیکچی قويدولار. بۇنلار بۇرادا قالسین، گؤرک کور‌اوغلو
- نه ائله‌دی.
- ائيوازین وئردیگی وعده‌‌دن چوخ کئچمیشدی. اونلارین بايازیتده تۇتولماسی
- باره‌ده چنلیبئلده سؤز گزیردی. دلیلر، خانیملار، بیر-بیرلرینه
- ديَمیشدیلر. نیگار خانیم کور‌اوغلونو اود قويوب اودلايیردی. کوراوغلونون
- دریسینه ایستی کئچمیردی. نیگار خانیمی ساکیت ائله‌يیب، دئيیردی:
- – آي نیگار خانیم، اۇزاق سفرین ایشینی بیلمک اولماز. بیر آز دا گؤزله‌يک،
- گلیب چێخارلار. آمما نیگاری ساکیت ائله‌مک مۆمکون اولموردو.
- سسی بالاسینی ایتیرمیش مارال کیمی چنلیبئلی باشینا گؤتورموشدو.
- دئيیرلر کی، يئنه ده بیر گئجه نیگار خانیم ائيوازین فیکریله ياتمیشدی.
- يۇخودا گؤردو کی، ائيواز قان درياسیندا اۆزور. دیک قالخدی. اوخ ديَمیش
- جئيران کیمی ياتاغیندان سێچرايیب اؤزونو کوراوغلونون اۆستونه سالدی، سازی
- دؤشونه باسیب، دئدی:
- وئردیگین وعده‌‌دن کئچدی،
- گلمه‌دی ائيواز، گلمه‌دی!
- ياغیلار قانینی ایچدی،
- گلمه‌دی ائيواز، گلمه‌دی!
- چنلیبئلین اوباسیندا،
- کؤنلوم خان ائيواز ياسیندا،
- چالخانیر قان درياسیندا،
- گلمه‌دی ائيواز، گلمه‌دی!
- دۆشموشدون بوغاز لويونا،
- يوللاندین جئيران اويونا،
- قۇربانام ائيواز بويونا،
- گلمه‌دی ائيواز، گلمه‌دی!
- سردار اؤلسه، الم ياتار،
- مۇخننت مقصده چاتار،
- چنلیبئلیم ياسا باتار،
- گلمه‌دی ائيواز، گلمه‌دی!
- ائيوازی يوللادین شاما،
- قێلینجیننان قانلار داما،
- وعده وئرمیشدی آخشاما،
- گلمه‌دی ائيواز، گلمه‌دی!
- بايازید قێراغی سازدی،
- چؤللرینده اؤردک، قازدی،
- دۆشمان چوخدو، اونلار آزدی،
- گلمه‌دی ائيواز، گلمه‌دی!
- ائيوازا بسله‌دیم گۆللر،
- اؤتوشمز شئيدا بۆلبوللر،
- آي نیگار، باشینا کۆللر،
- گلمه‌دی ائيواز، گلمه‌دی!
- نیگارین آلا گؤزلریندن آخان ياش کور‌اوغلونو جوشدوردو. سازی گؤتوروب
- گؤرک اونون جاوابیندا نه دئدی:
- اۆرگیمی ائله‌يیب قان
- آغلاما، نیگار، آغلاما!
- اولوم گؤزلرینه قۇربان،
- آغلاما، نیگار، آغلاما!
- ایگید اولان جفا چکر،
- دوست يولوندا قانین تؤکر،
- آغلاماغین باغریم سؤکر،
- آغلاما، نیگار، آغلاما!
- قملی کؤنول دمه گلمز،
- دردی اولان آغلار، گۆلمز،
- قورخاقلار ار قدرین بیلمز،
- آغلاما، نیگار، آغلاما!
- دلیلریم گلر جوشا،
- مۇخننت ائيلر تاماشا،
- قان قۇساجاق خلیل پاشا،
- آغلاما، نیگار، آغلاما!
- مئيداندا نره چکرم،
- گؤيدن اود-آلوو تؤکرم،
- ائولر داغیدار، سؤکرم،
- آغلاما، نیگار، آغلاما!
- قێزیب جوشمامیشام هله،
- جیداينان قۇماش اؤلچوله،
- اسیر گلر چنلیبئله،
- آغلاما، نیگار، آغلاما!
- کور‌اوغلويام، ال گؤتوررم،
- من بايازیده يئتیررم،
- ائيوازی آلار، گتیررم،
- آغلاما، نیگار، آغلاما!
- کور‌اوغلو حؤکم ائله‌دی يئددی مین يئددی يۆز يئتمیش يئددی دلی آتلاندی.
- اؤزو ده قێراتین بئلینه قالخدی. چنلیبئله گؤز گزدیردی. مئهترلری قمگین
- گؤردو. نیگاری بوينو چیينینده، گؤزو ياشلی دۇران گؤردو.
- احمد تاجیرباشینی، يولداشی تاجیرلری ائله‌دیکلریندن پئشیمان گؤردو.
- کور‌اوغلو اؤزو ده چوخ ميوس اولدو. بۇنا باخیب دلیلر ده بیکئف اولدولار.
- نیگار خانیم عؤمرونده بیرینجی دفعه ایدی کی، کور‌اوغلونو، سفره چێخاندا
- بئله قمگین گؤروردو.
- کوراوغلونون يانینا گلدی، اونو ساکیت ائله‌دی، دلیلره اۆرک وئردی. اؤزو
- کور‌اوغلويا، دلیلره شراب پايلادی. هامی ایچدی، کئفلر دۇرولدو.
- کور‌اوغلو دۇروب لازیمینجا گئيیندی، اۆستدن آشیق پالتاری گئيیب، چیينینه
- ده ساز کئچیرتدی. ائله کی، هامی حاضیر اولدو، کور‌اوغلو اۆزون دلیلره
- تۇتوب دئدی:
- – من قاباقجا گئدیم، سیز دالجا گلین. شهرده سیزی گؤزله‌يه‌جه‌يم.
- شهره چاتاندا آتلاری بیر قێراخدا ساخلايین، پیيادا شهره دولون،
- اؤزونوزو تانیتمايین، اؤزو ده من خبر ائله‌مه‌میش داوا باشلامايین.
- دلیلر کور‌اوغلونو ائله بیرجه بۇنو دئين گؤردولر. کور‌اوغلو قێراتین
- اۆستونده بیر بوغاناق اولدو، گؤزدن ایتدی. بیلمه‌دیلر هايانا گئتدی.
- دلیلر اونون دالینجا آتلارینی سۆروب يولا دۆشدولر. کور‌اوغلو هر يئردن
- کئچیب بیر صاباح ائرته‌سی اؤزونو بايازیده يئتیردی. قێراتی بیر ياندا باغلايیب
- اؤزو آشیق لیباسیندا شهره گئتدی.
- بۇ طرفدن دلیلر ده گلیب چاتدیلار، آتلارینی بیر ياندا قويوب،
- شهره دولدولار.
- کور‌اوغلو گزه-گزه گلیب بیر يئره چێخدی. گؤردو يۆزه قدر ياراقلی
- آدام بیر دامین قاپیسیندا کئشیک چکیر. کئشیکچیلر اونو گؤرجک آشیق بیلیب
- سوروشدولار.
- – آ کیشی، آشیقسانمی؟
- کور‌اوغلو دئدی:
- – آشیغام، بیر مجلیس آختاریرام کی، بیر آز اوخويام، خرجلیک يێغام.
- کئشیکچیلردن بیری دئدی:
- – ياخشی گلیبسن. بۇ گۆن خلیل پاشانین باجیسی نرگیز خانیمین
- تويودو، گئت اوخو، ياخشی خئيرین اولار.
- کور‌اوغلو دئدی:
- – بس سیز بۇرادا نه ائلیگیرسینیز؟
- کئشیکچی دئدی:
- – کوراوغلونون اۆچ دلیسی بۇردا دۇستاقدی، اونلارا کئشیک چکیریک.
- کور‌اوغلو بیر ایسته‌دی ال قێلینجا آتیب کئشیکچیلری قێرسین، دلیلری آزاد
- ائله‌سین، سونرا بۇ فیکریندن داشیندی. کئچیب خلیل پاشانین باجیسی‌نین تويونا
- گلدی.
- خلیل پاشا کور‌اوغلونو گؤروب دئدی:
- – آي آشیق، دلی کور‌اوغلودان نه بیلیرسن بیر آز اوخو قۇلاق آساق.
- پاشانین جاوابیندا آلدی کور‌اوغلو، گؤرک نه دئدی:
- – ائيواز دئيیب چنلیبئلدن گلمیشم،
- ایندی بۇردا محشر قۇرارام، پاشا!
- دلیلریم تۇتدوغونو بیلمیشم،
- گئدر زیندانینی قێرارام، پاشا!
- جوشوب اوخويارام دؤوران ایچینده،
- گؤررسن اؤزونو آل-قان ایچینده،
- شیر کیمی قێزارام مئيدان ایچینده،
- هايقیریب باغرینی يارارام، پاشا!
- ایندی من ائيله‌رم يامان حالینی،
- يێخارام قالانی، جاه-جالالینی،
- سويارام، آپاررام دؤولت، مالینی،
- تاختینا اود-آلوو وۇرارام، پاشا!
- بیر نره چکرم دلیلر يئریر،
- گۆنون قاباغیندا جسه‌دین چۆرور،
- دۇمان تک يۇردونو، يۇوانی وۇرور،
- تامام داغی، داشی سارارام، پاشا!
- کور‌اوغلو قايیتماز، خراج آلماغا،
- جیدا ایشلتمسه، قێلینج چالماسا،
- بۇ گۆن ائيواز خانی اله سالماسا،
- دیشلرینی بیر-بیر قێرارام، پاشا!
- خلیل پاشا دئدی:
- – بۇ نئجه آشیقدی؟ آغزیندان قان ایيی گلیر. اؤللم-اؤلدوررم دئيیر.
- وزیره امر ائله‌دی کی:
- – قووون بۇنو گئتسین!
- وزیر دئدی:
- – پاشا ساغ اولسون، آشیغی قووماق اولماز، گئدر بیزی اؤزگه يئرلرده
- پیسله‌ير، بیيابیر ائله‌ير. سن دئدین کور‌اوغلودان اوخو، او دا کور‌اوغلودان
- اوخودو. کوراوغلونون سؤزلری آسماقدان، کسمکدندی ده!
- خلیل پاشا دئدی:
- – ياخشی، اوخوسون.
- کوراوغلونون دالینجا دلیلر ده مجلیسده آداملارین آراسینا دولوشدولار.
- کور‌اوغلو قێزمیشدی، گؤزو آياغی‌نین آلتینی گؤرموردو. بیر ده گؤز
- گزدیردی، دلیلری مجلیسده گؤردو. آلدی گؤرک نه دئدی:
- خبر اولسون بايازیدین ائلینه،
- آپاررام ائيوازی، قالا قويمارام!
- دئيین سۇلطانلارا کؤچ ائله‌مه‌سین،
- بۇ قیصاصی رۆستم زالا قويمارام!
- بیلمیرم باهارام، يوخسا کی، قێشام،
- قورخ او زاماندان کی، قاينايام، جوشام،
- قێریلماز قايايام، ترپنمز داشام،
- فرهاد کۆلويونو چالا قويمارام!
- آلادی گؤزلری، قاشلاری ياغی،
- نیگار اولوب خان ائيوازین دۇستاغی،
- چنلیبئلدی کوراوغلونون اويلاغی،
- شاه دا گله چنلیبئله قويمارام!
- دلیلر کوراوغلونون نره‌سینی ائشیدیب، قێلینجلارینی چکدیلر، پاشايا،
- وزیره، وکیله، قوشون بؤيوکلرینه هۆجوم ائله‌دیلر. قوشون خبر تۇتوب
- يئریدی. کور‌اوغلو حالی بئله گؤروب آشیق پالتارینی آتدی، میسری قێلینجی چکیب
- اؤزونو خلیل پاشايا يئتیردی. خلیل پاشا ال قێلینجدا، کور‌اوغلويا هۆجوم
- ائله‌دی. کور‌اوغلو بیر همله‌ده خلیل پاشانین قێلینجینی الیندن آلیب، کنارا
- آتدی. بوغازیندان تۇتوب آياغی‌نین آلتینا سالدی. باشینی کسمک ایسته‌ينده
- خلیل پاشانین باجیسی نرگیز خانیم اؤزونو يئتیردی، يالواریب دئدی:
- – کور‌اوغلو، قارداشیمی منه باغیشلا!
- کور‌اوغلو خلیل پاشانی باجیسینا باغیشلادی. خلیل پاشا قوشونو ایله
- کور‌اوغلويا تسلیم اولدو. کور‌اوغلو داوادان ال چکیب، اؤزونو زیندانا يئتیردی.
- بیر گۆج وئریب زیندانین قاپیسینی قێردی. ایچری گیریب دلیلری زنجیرلردن
- آزاد ائله‌دی. خلیل پاشا قورخودان کور‌اوغلويا يئددی ایلین باج-خراجینی
- وئردی.
- کور‌اوغلو علاوه خلیل پاشادان اۆچ يهرلی، يۆينلی آت آلیب ائيوازا،
- حالايپوزانا، توخماقوورانا وئردی. حؤکم ائله‌دی دلیلر آتلاندیلار. چارداقلی
- چنلیبئله يولا دۆشدولر. هر يئردن کئچدیلر، گلدیلر ساغ-سلامات
- چنلیبئله چاتدیلار. آتلاردان دۆشدولر. يئنه کئيف مجلیسی قۇردولار.
- قويون کسیب کاباب چکدیلر. يئدیلر، ایچدیلر، داماغلاری دۇرولدو، کئيفلر
- چاغالدی. کور‌اوغلو سازی سینه‌سینه باسیب آلدی گؤرک نه دئدی:
- مجلیس قۇردورام همیشه،
- ایشرتیم، داماغیم اولا،
- املیکلر چکدیرم شیشه،
- بیر آغیر يێغناغیم اولا.
- چنلیبئلده کؤچوم، قونوم،
- آتلاسدان بیچدیرم دونوم،
- اورتادان قالخمايا خونوم،
- گۆنده يۆز قوناغیم اولا.
- وۇرام خوتکار، تۇتام پاشا،
- خانلار مندن چکه هاشا،
- بۇ دؤورانیم وارا باشا،
- سؤنمه‌ين سێراغیم اولا.
- ائيواز ایمدادیما چاتا،
- دلی حسن شئشپر آتا،
- سێچرايام، مینم قێراتا،
- بللی احمد داياغیم اولا.
- شیر قانی اولا قانیمدا،
- قورخو اولمايا جانیمدا،
- دلیلر اولا يانیمدا،
- قێررام يۆز مین ياغیم اولا.
- دۆشمن قانین ایچم دويام،
- مۆخننت گؤزلرین اويام،
- چکم گانلار سويام،
- تاجیرلر دۇستاغیم اولا.
- کور‌اوغلويام، ساواشیمدا،
- قێلینج ياراسی باشیمدا،
- نیگار ايلشه قارشیمدا،
- کئچن جاوان چاغیم اولا.
قایناق‌لار
- Azadliq . org