Wt/azb/مرجان خانیمین چنلیبئله گلمه یی کوراوغلو داستانی
مرجان خانیمین چنلیبئله گلمه یی
[edit | edit source]
آنا آنلاتیم
- مرجان خانیمین چنلیبئله گلمه یی کوراوغلو داستانی
دئيیللر حسن خانین اۆچ اوغلو، بیر قێزی قالمیشدی. بؤيوک اوغلونونادی احمد، اورتانجیلین آدی حۆممت، کیچیگی‌نین آدی محمود، قێزی‌نین دا آدی مرجان خانیمیيدی. آرادان خئيلی واخت کئچمیشدی. واخت او واخت اولموشدو کی، محمود بؤيويوب گیرری بیر جاوان اولموشدو. او، عاغیللیلیغیينان، قوچاخلیغیينان، تدبیرریلیگینن اؤزگه‌لردن سئچیلیر، قارداشلاریننان فرقله‌نیردی. محمود چوخ يئرده سؤز سالیب اؤيونوردو کی، کور‌اوغلوينان تکبتک مئيدان آچیب کمر-کمره تۇتاشاجام، آتامین، پاشالارین، بَيلرین، تاجیرلرین، سؤودگرلرین قیصاصینی اوندان آلاجام، يا دا اؤز باشیمی بۇ يولدا وئره‌جم. بۇ سس-صدا خوتکارا دا چاتمیشدی. اودو کی، هله گؤرمه‌میشدن اونا مئيیللنمیش، بؤيوک اۆمید باغلامیشدی. بايازید پاشاسی خلیل پاشانین اؤلوموندن سونرا خوتکار محمودو يانینا چاغیریب دئدی:
- – محمود، اوغول! من بئله گؤرورم کی، آتانین کیچیک اوغلو اولسان دا،
- کور‌اوغلودان بیزیم قیصاصیمیزی آلماغا سن لايیقسن. او بیری قارداشلاریندان
- هاي اولمادی. ایندی من بايازیدین پاشالیغینی تاپشیرارام سنین الینه!
- اير کور‌اوغلونو بیر تهر ائلیگیب سسینی کسسن، منیم سؤزوم سؤزدو،
- صدراعظملیک چاتار سنه...
- محمود خان اول-اول سئویندیگیندن اؤزونو ایتیردی. هاچاندانهاچانا
- اؤزونو دۆزلدیب خوتکارا باش ايدی، دیز چؤکوب دئدی:
- – قیبله‌ی-عالم، منیم سؤزوم سؤزدو، يا باشیمی بدننن وئره‌جم،
- يا دا کور‌اوغلونون سسینی کسه‌جم. يا قول زورونا، يا دا حیله
- گۆجونه چوخ چکمز کی، مقصدیمه چاتارام.
- محمود قولونون زورونا، حیله‌سی‌نین گۆجونه گۆونمکده حاقلیيدی.
- بۇ آرالاردا اونون قولونا ياپیشان، آتینین قاباغینا آت سۆرن، شئشپریندن
- جان قۇرتاران، عمودوننان يان دۇران، قێلینجینا قالخان تۇتان، کۆشتوسونده
- آرخاسینی يئره گلمکدن خلاص ائلیين، حیله تورونو گؤره بیلن اولمامیشدی.
- بۇنناری چوخدان بیلن خوتکار محمود خانین بوي-بۇخونونا قددیقامتینه،
- يار-ياراشیغینا، اؤتکملیگینه، دانیشیغینا دا وۇرولدو. اودو کی،
- اونو لاپ شیرنیکدیرمکدن اؤترو گؤزللیگیينن عالمه سس سالمیش باجیسی
- مرجان خانیمی دا ولیهه‌دی امیر خانا نیشانناندیردی.
- آمما مرجان خانیم بۇنو ائشیدنده داش آتیب باشینی تۇتدو، ایکی
- آياغینی بیر باشماغا قويدو کی، من اره گئتمیرم. او، نیشان پالتاری‌نین
- قاتینی آچمادی، اۆزويو ده بارماغینا تاخمادی.
- بلی، گؤزله‌مه‌دیگی گۆنه دۆشوب بیردن-بیره پاشالیغا چاتان محمود
- تئزدیگینن صدراعظم لیيه يئتیشمک اۆچون کور‌اوغلونو بیر ياننیخ ائله‌مک
- حاقیندا فیکیرلشمه‌يه باشدادی.
- قوي محمود پاشا فیکیرلشمکده اولسون، سیزه کیمنن دئيیم، کیمنن
- دانیشیم، رۇم پاشاسی آسدان پاشانین قارداشی قێزی لئيلی خانیمنان. لئيلی
- خانیم عمیسی قێزی مهبوب خانیمین چوخ ایسدکلی سیرداشیيدی. او، مهبوب
- خانیمین چنلیبئله مکتوب يازماغی‌نین سببکاریيدی. لئيلی خانیم ایگیددر
- حاقیندا چوخ شیرین احوالاتدار، ناغیللار دانیشدیغینا گؤره مهبوب
- خانیم اونون آدینی شیرین خانیم قويموشدو. اونلار سؤزبیر ائله‌میشدیلر کی،
- چنلیبئله بیرلیکده گئتسیننر. آمما بیلدیگینیز کیمی، ایش بئله گتیردی کی،
- بللی احمدی سالدیلار قۇيويا. خبر چنلیبئله چاتدی. کوراوغلو دلیلری
- گؤندردی، گئجه ایکن اونو خلاص ائله‌دیلر. مهبوب خانیمی گؤتوردولر،
- آمما لئيلی خانیم اله کئچمه‌دی، قالدی.
- لئيلی خانیم ائله حساب ائله‌دی کی، مهبوب خانیم اونو قصداً، پاخیللیغنان
- قويوب گئدیب. اودو کی، گلیب عمیسینه بیر يالان-قۇراما سؤيله‌دی،
- ایزن ایسته‌دی کی، قوي بیر حیله دۆزلدیم، يا کور‌اوغلونو، يا دا اونون دلیلریننن
- بیر نئچه‌سینی سالیم تورا، وئریم سنین جنگینه، آل قێزی‌نین قیصاصینی.
- شۆکور پاشانین آغلینا بلدسینیز. او ناوموتدا ایناندی قێزین اۇيدورمالارینا،
- باياق ها ایزین وئردی. لئيلی خانیم تله‌سیک گؤتوروب کور‌اوغلويا نامه
- يازدی کی، منیم چنلیبئلده گؤزوم وار، اگر ایگیدسنسه، گل منی آپار.
- بۇ طرفدن ده مهبوب خانیم اؤز آرزوسونا چاتیب چنلیبئله يئتیشمه‌يینه،
- بللی احمد کیمی بیر ایگیده قوووشماغینا باخماياراق، پریشان
- دولانماغا، قملی دۇروب اوتورماغا باشلادی. نیگار خانیم ایشی بئله
- گؤرنده، تئللی خانیما دئدی کی، مننن اۇتانار، سن مهبوبون دردینی
- اؤيرن گؤرک ندی.
- بیر گۆن تئللی خانیم مهبوب خانیمی دا گؤتوروب بیر دسته قێزگه‌لیننن
- سئيره چێخدی. اونلار گلیب سايالیبولاغین باشیندا مسکن ائله‌دیلر.
- قێز-گلین گۆل-چیچک درمه‌يه داغیلیشاندا تئللی خانیم مهبوبدان
- دردینی سوروشدو. مهبوب خانیم يانیخلی بیر آه چکدی، سؤيله‌دی کی:
- – دردیم عمیم قێزی لئيلی‌نین دردیدی. او، منیم جانیم-جیيریمدی.
- شیرینیم-شکریمدی. سؤزوموز اويدو کی، ایکیمیز ده گلک. آمما اونو
- گتیره بیلمه‌دیک. قورخورام، قێزا خیففتدن خطر يئتیشه...
- تئللی خانیم احوالاتی نیگار خانیما دانیشدی. نیگار خانیم دا بۇ
- قرارا گلدی کی، دلیلرین، خانیملارین جمع واختیندا مهبوبون دردینی
- آچسین، کور‌اوغلودان ایزن آلیب قێزی گتیرتدیرسین.
- گۆن او گۆن اولدو کی، کوراوغلو بؤيوک بیر مجلیس دۆزلتدی. بۇ مجلیس
- کئف مجلیسی يوخ، تدبیر، مصلحت، سفر مجلیسیيدی. بیلدیگینیز کیمی، آخی
- کوراوغلو هۆرو خانیمی گتیریب ائيوازا توي ائيله‌میشدی. ایش بۇندادی کی، تويا
- ائيوازین آتاسی قسساب آلی گلمیشدی، آمما آناسی زرقلم خسته اولدوغوندان
- گله بیلمه‌میشدی.
- آمما قسساب آلی تويا گلنده زرقله‌مه سؤز وئرمیشدی کی، تويدان
- سونرا کور‌اوغلودان، نیگار خانیمدان ایزن آلیب گلینیمیزی ده، ائيوازی دا
- گتیره‌جم، بیر توي بۇردا اؤزوموز ائله‌يریک.
- توي قۇرتاراندا قسساب آلی مثلای کور‌اوغلويا آچدی، کور‌اوغلودان
- دا، نیگار خانیمنان دا ایزن ایسته‌دی. آمما نه کوراوغلو، نه ده نیگار
- خانیم بئله تلم-تله‌سیک ائيوازین گئتمه‌يینه راضی اولمادیلار. قسساب
- آلیدان خاهیش ائله‌دیلر:
- – سن گئت، بیز اؤزوموز تئزلیينن اۇشاقلاری گؤندرریک.
- قسساب آلی بیر سؤز دئمه‌دی، قايیدیب زرقله‌مه خبر وئردی کی،
- اۇشاقلار تئزدیينن گله‌سیدی. بلی، ایندی کوراوغلو بۇ مجلیسی قۇرموشدو کی،
- تدبیر تؤکوب مصلحت ائله‌سیننر، گؤرک ائيوازگیلی نه لايیقنان،
- کیملرنن گؤندرسیننر تکه-تۆرکمانا.
- هامی ایسته‌يیردی بۇ سفر ائللره، ماهاللارا سس سالان بیر سفر اولسون.
- کیم ایستردی بئله سفردن قالسین!..
- مجلیسین شیرین يئریيدی. نیگار خانیم فۆرصت گؤزله‌يیردی مهبوبون
- دردینی آچسین. بیر ده دلیلردن ایکیسی گیردی ایچری، يانناریندا دا بیریسی.
- کور‌اوغلونو گؤرستدیلر. بۇ آدام ایره‌لی يئریدی، کور‌اوغلويا بیر نامه وئردی.
- کوراوغلو نامه‌نی اوخويوب مجلیسده‌کیلری حالی ائله‌دی. نامه‌نین لئيلی
- خانیمنان اولدوغونو گؤرنده نیگار خانیم مهبوب خانیمین دردینی
- دانیشدی، اؤزو ده بیلدیردی کی، ائله ایندیجه کور‌اوغلودان ایزن ایسته‌يه‌جکدیم،
- دلیلردن بیر نئچه‌سی گئدیب او قێزی گتیرسین.
- اؤزو چاغریلدیغینا گؤره قوچ کوراوغلو اۆز تۇتدو دلی مئهتره:
- – گتیر منیم آتیمی!
- دلی مئهتر باياق جۇمدو قێراتی يهرله‌مه‌يه.
- ائيواز باخدی کوراوغلو اؤزو گئتمک ایسته‌يیر، ایره‌لی يئریگیب خاهیش ائله‌دی،
- قوي من گئدیم.
- کوراوغلو نیگار خانیمین اۆزونه باخدی، نیگار خانیم دئدی:
- – يوخ، کوراوغلو، بۇ سفره نه ائيواز گئتسین، نه سن. دلیلردن بیریکیسی
- گئدیب قێزی گتیرسین. قوي اونلار قاصیدی ده اؤزلریينن گؤتورسونلر.
- قاصید بلدچیلیک ائله‌سین، تئز قايیدا بیلسینلر.
- هامی‌نین گؤزو ائيوازدايدی. باخدیلار کی، ائيواز هۆرو خانیمین اۆزونه
- باخدی، سونرا دا باشینی سینه‌سینه سالیب ائله قێزاردی، ائله قێزاردی، اولدو قێپقیرمیزی
- پۇل.
- آشیق جۆنون بۇنا تاب ائله‌مه‌يیب الینی وئردی قۇلاغینا:
- سئلی سێنار داغلارین،
- ائلی سێنار داغلارین،
- ائيوازین قلبی سێنسا،
- بئلی سێنار داغلارین!
- نیگار خانیمین دا اۆرگی تاب ائله‌مه‌دی. ائيوازین شستینی سێندیرماغینا
- پئشیمان اولوب کور‌اوغلويا يالواردی:
- – کوراوغلو، ایزن وئر، قوي ائيواز گئتسین! بۇردا ائله بیر چتین ایش يوخدو.
- قێز حاضیر اولاجاق، قاصید بلدچیلیک ائلیيه‌جک. اینشاللاه، تئزدیينن قايیدیب
- گلر.
- دئمه، ائيوازین حالی کور‌اوغلويا دا اثر ائلیگیبمیش. ایزن وئردی، اؤزو ده
- مصلحت گؤردو ائيواز عرباتی مینسین.
- ائله کی، ایزن وئریلدی، ائيواز گئدیب اۆستدن گئيیندی، آلتدان قێفیللاندی،
- آلتدان گئيیندی اۆستدن قێفیللاندی، عرباتی میندی، قاصیدی ده گؤتوروب دۆشدو
- يولا.
- ائله تزه‌جه چنلیبئلین اته‌يینه يئنمیشدیلر، ائيواز باخدی بۇدو، بۇ
- يان بايازید يولوينان بیر آتدی چنلیبئله طرف ائله چاپیر، ائله چاپیر، گل
- گؤره‌سن. ائيواز اولا!.. قاصیده دئدی:
- – سن ياواش-ياواش سۆر آتینی، من گؤروم کیمدی، بۇ، نچیدی.
- ائيواز عرباتی دؤندریب اؤزونو يئتیردی چاپارا. چاتار-چاتماز –
- دايان، – دئيیب بیر دلی نره چکدی، داغ-داش دیله گلدی. آز قالدی آتلی‌نین
- قۇلاقلاری باتا. قايیدیب باخاندا، گؤردو کی، بۇدو بیر نرین بیری کسیب
- باشی‌نین اۆستونو. اول-اول برک شاشیردی، سونرا بیر تهر اؤزونو
- دۆزلدیب دئدی:
- – آيه، بالام، نیيه باغیریرسان، منی قورخودورسان؟
- ائيواز بیر آز مۆلايیملشدی:
- – قارداش، باغیریب نه دئدیم کی، نیيه سنی قورخوزوم. یعنی دئيیرم
- گؤرک کیمسن، کیمین آدامیسان، هاياننان گلیب هايانا گئدیرسن؟
- يولچو ائيوازین بئله مۆلايیم دانیشماغیننان بیر آز دا قێزیشدی:
- – هايیف سنین زندینه! آي کورافهیم! بَيم کورسان، گؤرمورسن
- کی، چنلیبئله، قوچ کور‌اوغلونون اويلاغینا گئدیرم؟
- ائيواز باخدی بۇندا ایش وار، اؤزونو بیر آز دا عاجیزلیيه قويوب يۇمشاقلیقنان
- دئدی:
- – الله ياخشی يول وئرسین، آي قارداش! داي نیيه آجیغین تۇتور؟ يانی
- دئيیرم گؤره‌سن سنین کور‌اوغلوينان نه ایشین، او قاچاق-قۇلدورنان نه
- آلوئرین اولا؟!
- يولچو بۇ دفعه لاپ اؤزوندن چێخدی، داي دا قێزیشیب باشلادی باغیرماغا،
- سؤيوب سؤيلنمه‌يه کی:
- – آيه، آي زێندیق اوغلو زێندیق! سن کور‌اوغلويا قۇلدور دئيیرسن؟
- مننن قورخمورسان؟ ایندی نئجه‌سن، قايیدام آيیرام بدنیننن باشینی؟
- بیلمیرسن کی، من قوچ کور‌اوغلونون خان ائيوازیيام؟!.
- بۇ يئرده ائيواز اؤزونو ساخلايا بیلمه‌دی، گۆلمک اونو تۇتدو. گۆلگوله
- دئدی:
- – بالام، بَيم بۇ بويدا دا يالان اولار؟ اير من کور‌اوغلويامسا،
- منیم سن نیشاندا ائيوازیم يوخدو آخی! دئ گؤروم سن نه زاماننان
- اولوبسان خان ائيواز؟
- يازیق يولچونون بوغازی قۇرودو، باشلادی اۇدغونماغا، اۆرگینده اؤزونو
- سؤيمه‌يه کی، گرک من بۇنون نره‌سینی ائشیدنده کوراوغلو اولدوغونو
- بیليدیم.
- ائيواز اونون وضعیتینی گؤروب تپیندی:
- – هه! دی دین گؤرک هاردان اولوبسان خان ائيواز!
- “خان ائيوازین” دیلی چوخدان تۇتولموشدو. هاردايدی دینمه‌يه
- اقتداری! ها اۇدقوندو، ها ککله‌دی، سسی چێخمادی. ائيواز باخدی بئله
- گئتسه، بۇ هئچ نه دئيه بیلمه‌يه‌جک، قورخوسوننان باغری ياریلاجاق، دئدی:
- – آيه، بلکه سنی قووان، ائلیين وار، بلکه منیم يانیما گلیرسن،
- بلکه مننیک ایشین-زادین اولا؟
- بۇ سؤزدن آتلی‌نین اۆرگی بیر بالاجا اؤزونه گلدی، اؤزونو سردی
- ائيوازین آتینین آياقلاری‌نین آلتینا کی:
- – کوراوغلو! آتام-آنام سنه قۇربان اولسون! آماندی، منه رحمین
- گلسین! ائله سنین يانینا گلیردیم.
- ائيواز دئدی:
- – نوولو، خوش گلمیسن، ياخشی ائله‌میسن...
- ائيواز اونون گؤزونون ایچینه باخاندا گؤردو گؤزونو يايیندیریر، بیلدی
- کی، بۇندان ایش اسکیک دئيیل. قصداً الینی قێلینجین قبزه‌سینه آتیب سێيیردی،
- باشی‌نین اۆستونده ائله فێرلادی کی، قێلینج گؤي گۇرولتوسوننان بئتر سس وئردی.
- يازیغین گؤزلرینده شیمشک چاخدی. ائله بیلدی کی، باشی بدنیننن گئتدی.
- باياق ها هۇشونو ایتیردی. هاچاننان هاچانا گؤزونو آچدی، باشی يئرینده‌دی،
- باشلادی آغلاماغا، يالوارماغا:
- – ایگید باسدیغینی کسمز، آماندی کوراوغلو! آتالار دئيیب کی، ائلچیيه
- زاوال يوخدو. منی اؤلدورمه، من محمود پاشانین قاصیدیيم. سنه
- نامه گتیرمیشم...
- ائيواز ال آتیب اونو قالدیردی، نامه‌نی ایسته‌دی. قاصید الی اسه-اسه نامه‌نی
- چێخاردیب وئردی ائيوازا. ائيواز نامه‌نی آچیب اوخودو:
- “کوراوغلو، من هامان حسن خانین اوغلويام کی، آتان آلینین گؤزلرینی
- چێخاردیب دۆنيا ایشیغینا حسرت قويدو. سن ده هامان آلینین
- اوغلوسان کی، آتامین ایللرنن يئدیگی چؤرگینه آياق باسیب سنی گتیردی
- اونون اۆستونه. سن ده نامردلیينن اوندان قیصاص آلدین. ایندی هر ياندا
- سنی مرد، ایگید دانیشیرلار. اير دوغرودان دا ایگیدلیگین، هۆنرین وارسا
- گل بايازیده. سننن تکبتک مئيدان آچیب البياخا اولاجاغام، يا
- سنه وئرن الله، يا من”.
- ائيواز باخدی اؤزونو يامان دولاشدیریب. دؤنوب دئسه من کوراوغلو
- دئيیلم، آپار وئر نامه‌نی کور‌اوغلويا، اوندا اولاجاق بۇنون تايی. ایندی ده
- بۇ گۆله‌جک ائيوازین اۆستونه... يوخ، ائله کور‌اوغلولوقدا قالیب بايازیده
- گئتسه، بس کوراوغلو؟ بس رۇم؟ بس لئيلی خانیم؟.. فیکیر ائيوازی
- گؤتورنده قاصیدین جانینا ولوله دۆشدو، جانی‌نین هايینا قالدی:
- – کوراوغلو، بالالاریم آياغی‌نین آلتیندا قۇربان قێریلسین! نه يامان
- فیکره گئتدین؟ بلکه او نامرد اوغلو اوردا سنین قلبینه توخونان سؤز
- يازیب؟ الله ائله‌مه‌میش، بلکه... آماندی کوراوغلو! منه غضب ائله‌مه!
- منیم بورجوم بۇيروق بیتیرمکدی. نئينیگیم، بیر پارچا چؤرک...
- ائيواز فیکیردن آيریلدی. باخدی کوراوغلو اولماقدان ساوايی آيری يولو
- يوخدو، دئدی:
- – سن قورخما، پاشا نالايیق سؤز يازمايیب. آمما ایش بۇدو کی، من
- سننن بايازیده گئتمه‌لیيم. قايتار آتینی سۆر، او گئدنه بیر سؤز دئيیم،
- گلیم.
- قاصید سئوینمیش آتینی دؤندردی گئری. ائيواز عرباتی مهمیزله‌دی لئيلی
- خانیمین قاصیدی‌نین يانینا، لئيلی خانیما بیر نامه يازدی:
- نامن گلیب بیزه چاتیب،
- لئيلی خانیم، لئيلی خانیم!
- نامردلرین باختی ياتیب،
- لئيلی خانیم، لئيلی خانیم!
- آرزولارسان چنلیبئلی،
- اثر سرین-سرین يئلی،
- يارین اولار بیر قوچ دلی،
- لئيلی خانیم، لئيلی خانیم!
- گلیب آچارام مئيدانی،
- دۆشمنلر چکر آمانی،
- سحر گؤزله ائيواز خانی،
- لئيلی خانیم، لئيلی خانیم!
- ائيواز نامه‌نی قاصیده وئریب دیلنن ده تاپشیردی کی، لئيلی خانیم منی
- سحر گؤزله‌سین.
- ائله کی، ائيواز لئيلی خانیمین قاصیدینی سالدی يولا، دؤندردی عرباتین
- باشینی گئری، اؤزونو يئتیردی محمود پاشانین قاصیدینه، اولدو کوراوغلو، اۆز
- تۇتدو بايازیده.
- ائيواز گلمکده اولسون، سن گؤر محمود پاشا نئجه چاغیریردی کور‌اوغلونو
- مئيدانینا! او، خوتکارین يانیننان قايیداننان سونرا چوخ فییکرلشدی،
- چوخ دۆشوندو، چوخ داشیندی، چوخ گؤتور-قوي ائله‌دی، آخیردا بۇ قرارا گلدی کی،
- بیر حیله ایشله‌دیب کور‌اوغلونو تله‌يه سالماسا، عمل يئمه‌يه‌جک. اويدو کی،
- بايازیددن چنلیبئله گئدن يولونون گاه ساغیندا، گاه سولوندا بیربیریندن
- بیر آغاج آرالی يئددی قۇيو قازدیردی، قۇيولارین اۆستونو چؤرچؤپنن
- اؤرتدوروب بیلینمز ائلتدیردی، بۇ يولنان گئت-گلی کسدیردی، سونرا دا هامان
- نامه‌نی گؤندردی کور‌اوغلويا. فیکیرلشدی کی، کوراوغلو نامه‌نی آلان کیمی
- گله‌جک، گلنده ده بۇ قۇيولارین بیرینه دۆشه‌جکدی.
- پاشا قاصیدی اؤيرتمیشدی کی، قۇيولارا چاتاندا بیر بهانه ایله دالا
- کئچسین، کوراوغلو قۇيويا دۆشنده ده ياندان آتینی چاپیب خبر ائله‌سین.
- اونسوز دا ائيواز آتینی همیشه قاباقدا سۆروب يئتیشدی بايازیدین
- يئددی آغاجلیغینا. بیرینجی قۇيويا چاتاندا عربات ایشی دۇيدو ساپدی يولون
- ساغینا، ایکینجی قۇيويا چاتاندا ساپدی سولونا. ائيواز اولجه آجیقلاندی،
- سونرا اؤزو ده شککه دۆشوب آتین يۆيه‌نینی بوشلادی. عربات قۇيولاردان
- سلامات کئچیب اؤزونو وئردی شهره.
- دئ شهره هاي دۆشدو کی، کوراوغلو گلیر. ائولرده آداممی قالاردی!
- هامی اونو گؤرمک ایسته‌يیردی...
- ائيوازین يولو مرجان خانیمین ایمارتی‌نین يانیننان دۆشموشدو. او،
- ایمارتین يانیننان کئچنده مرجان خانیم دا کۆلفرنگیيه چێخمیشدی
- کی، بلکه کور‌اوغلونو گؤره. قێز بیردن-بیره ائيوازین گؤزونه ساتاشدی.
- ائيواز ائله بیلدی کی، گۆن دؤنوب بۇ طرفدن دوغدو. آتین باشینی چکیب
- گؤزلرینی سیلدی، حئیران-حئیران قێزین جامالینا تاماشا ائله‌مه‌يه باشلادی.
- اونون گؤزو قێزین گؤزلرینه جالاناندا، قێز بنؤوشه کیمی قويدو باشینی
- چیينینه، بوينونو بۆکوب آناسینا حسرت قالمیش جئيران بالاسی کیمی
- باشدادی ملول-ملول ائيوازا باخماغا. ائيواز اولا، بئله باخیش اولا!
- دؤزردیمی؟ میسری قێلینجی ساز ائلیگیب قێزدان دردینی خبر آلدی:
- نیيه بئله ملول-ملول باخیرسان،
- چؤللره بیر مجنون سالمامیسان کی؟
- اؤزون سئودیگیننن واختی چاتمامیش
- آيریلیق تبلینی چالمامیسان کی؟
- مرجان خانیم اللرینی کؤکسونده داراقلادی، يانیقلی بیر آه چکیب،
- حسرتله کؤکس اؤتوردو. ائيواز وجدمی گلدی، بیلمیرم، قئيزمی گلدی،
- بیلمیرم، دئدی:
- کؤکس اؤتوردون، نه‌لر دۆشدو يادینا؟
- اۆرک دؤزه بیلمز بۇ فريادینا!
- دردینی دئ، قوي يئتیشیم دادینا،
- ظالیملار الینده قالمامیسان کی؟
- اؤلونجه قێلینجین چالار ائيواز خان،
- سنی ياغیلاردان آلار ائيواز خان،
- کوراوغلو يۇردونا سالار ائيواز خان –
- او يئرلردن سوراق آلمامیسان کی؟
- آلا گؤزلری دولوب قارالمیش باهار بۇلودونا دؤنموش مرجان خانیم
- اؤزونو آغلاماقدان ساخلايا بیلمه‌دیگینننمی، يوخسا آداملارین چوخالماغیننانمی
- بیلمیرم، بیردن گؤروندويو کیمی بیردن ده يوخ اولدو.
- ائيواز آتی ترپتدی...
- بۇ طرفدن محمود پاشا کور‌اوغلونون قۇيولاردان سلامات قۇرتاریب
- شهره گیردیگینی ائشیدنده اولجه برک قورخويا دۆشدو، جانینی
- اسمه‌جه تۇتدو، بیر تهرریينن اؤزونو توخدادیب امر وئردی کی، قوشون آلسین
- شهری مۆحاصیره‌‌يه. اؤزو ده سئچمه پهلوانلاردان دۆزلتدیگی دسته‌نی
- گؤتوروب چێخدی کور‌اوغلونون قاباغینا. او، يولدا دۆننکی تاپشیریغینی آداملارینا
- بیر ده خاتیرلاتدی:
- – ائله کی، بۆتون ياراق-ياساقدان چێخیب البياخا اولدوق، منیم ایشارمی
- گؤزلرسینیز. ائله من ایشاره ائلیين کیمی تؤکولرسینیز اۆستونه!..
- ائيواز شهر مئيدانینا چاتاندا، باخدی کی، بۇدو محمود پاشا
- باشی‌نین آداملاریينان گلیر. قۆرور، غضب شدّت ائله‌دی، آتی سيیردیب مئيداندا
- بیر دفعه جؤولانا گتیردی، سونرا پاشانین قارشیسیندا شستینن دۇروب
- اونو مئيدانا چاغیردی:
- محمود پاشا، نامه يازدین، چاغیردین،
- سۆر آتینی دی مئيدانا، گلمیشم!
- ایکی جاننان بیری بۇ گۆن لئش اولسون،
- اۆستونده آغلاسین آنا، گلمیشم!
- پاشانی شۆبهه گؤتورسه ده، دقتینن قۇلاق آسدی:
- بیز جومرد اوغلويوق، چتین اۇدوزاق،
- قێلینجیم نامرددن کئچمز يان، اۇزاق.
- بیر آج قۇرد بالاسی، بۇ گۆن يالقوزاق،
- بۇردا دیشیم باتیب قانا، گلمیشم.
- ائل قێلینجی قۇرشامیشام بئلیمنن،
- ائل اوغلويام، آيریلمارام ائلیمنن،
- نئچه پاشا قان آغلايیب الیمنن،
- من نه سايیم، اؤزون سانا، گلمیشم!
- کور‌اوغلونون قۇيولاردان سلامات کئچميی پاشانی برک قورخوتسا دا،
- مئيدانا گلننن باخدی کی، هئچ کور‌اوغلويا دئيیلن نیشانلار بۇ
- آدامدا يوخدو. اودو بیر قدر آرخايینلاشیب نفه‌سینی دردی. گرنشیب
- الینی بئلینه قويدو، مغرور-مغرور ائيوازا تاماشا ائله‌مه‌يه باشلادی.
- بۇنون کیم اولدوغونو کسدیرمکدن اؤتری سؤزونه دقت کسیلدی. بۇ
- دۇروش ائيوازین قۆرورونا توخوندو، قئيزینی داها دا آرتیردی:
- ائله دۇرما، پوزاجاغام حالینی،
- زهر ائده‌جه‌يم شیرین بالینی.
- ائله داغیداجام جاه-جلالینی،
- هئچ قالماسین بیر نیشانا، گلمیشم!
- دۆنيانی تۇتوبدو کوراوغلو، آدی،
- دۆشمنه زهردی الینین دادی.
- گرک حاصیل اولا مطلب-مۇرادی.
- باج وئره‌سن ائيواز خانا، گلمیشم!
- سؤز تامام اولدو. ائيواز عرباتی بیر ده جؤولانا گتیردی. سؤزون سون
- بندینده هم کور‌اوغلونون، هم ده ائيوازین آدینین چکیلمه‌سی پاشانین
- شۆبهه‌سینی داها دا آرتیردی. پاشا امر ائله‌دی کی، قاصیدی گتیرسینلر. او ساعت
- قاصیدی گتیردیلر. پاشا خبر آلدی:
- – کیشی، دئ گؤروم، بۇ کور‌اوغلودورمو؟
- – پاشا ساغ اولسون، کوراوغلو اولموياندا، به کیمدی؟
- – دۆز چنلیبئله قدر گئتدینمی؟
- – پاشا ساغ اولسون، به هارايا قدر گئتدیم؟
- – اونو چنلیبئلدمی تاپدین؟
- – پاشا ساغ اولسون، به هاردا تاپدیم؟
- – نامه‌نی کور‌اوغلويامی وئردین؟
- – پاشا ساغ اولسون، به کیمه وئردیم؟
- – همن يولنانمی گتیردین اونو؟
- – پاشا ساغ اولسون، به هاراينان گتیردیم؟
- – کیشی، ياخشی فیکیرلش!
- قاصید باشلادی هاي-هشیره:
- – پاشا ساغ اولسون، بلکه بخشیش وئرمک ایستمیرسن؟! نئينک! من
- بخشیش آلماقدان ها اؤتری گئتمه‌میشم! من پاشاما بورجومو يئرینه
- يئتیرمیشم، صداقتیمی گؤسترمیشم! من خوتکارا قۇللوق ائله‌میشم.
- ائله دؤيول ها، سنین دؤيلتیننن، چنلیبئلی تانیمايام! گئتدیم، گؤردوم
- چننی، دۇماننی بیر داغدی. آتی سۆردوم دۆز کور‌اوغلونون آلاچیغی‌نین
- قاباغینا. گؤردوم، کوراوغلو يێغیب دلیلری، خانیملاری باشینا، دلیلر،
- خانیملار دا دئيیرم، بیر-ایکی چۇلو جێریخ، قوتور گده، بیر-ایکی ده بالدیری
- آچیق، آياخيالین زنن، هئچ قاپیندا قۇل-قاراواش دا ساخلامازسان. هه،
- يێغیشیب باشینا، دردیکیر...
- ائيواز باخدی کی، پاشا شۆبهه‌له‌نیب، قاصید ده آغلینا گلنی چرننیگیر،
- آتی ياخینا سۆردو، قاصیدین سؤزونو آغزیندا قويوب اؤزونو نیشان وئردی:
- کوراوغلو دئيیلم، پاشا، ياخشی باخ،
- اونون قوچ اوغلويام، خان ائيوازیيام.
- بیر گۆن قويماز گؤزلریننن ایراغا،
- مجلیسی‌نین صؤحبتیيم، سازیيام!
- پاشانین اۆرگی‌نین دؤيونتوسو آزالدی. ائيواز دئدی:
- بۇ دۆنيادا من کامیمی قويمادیم،
- پاشالاری هئي قێردیمسا، دويمادیم.
- تاجیر-تۆججارینی آز ها سويمادیم،
- دؤيوشون ترلانی، بیر شاهبازیيام.
- دۆشمنین اۆستونده اوللام قارا يئل،
- زربیمنن اۆرگی سێزیلدار تئل-تئل.
- اصلیم تکه-تۆرکمان، يئریم چنلیبئل،
- چنلیبئلین باهاریيام، يازیيام.
- پاشانین اۆرگی لاپ يئرینه دۆشدو، قێریشیغی لاپ آچیلدی، گرده‌نینی بیر آز
- دا چکدی:
- – بیلیرم، بالا، بیلیرم. بیر-ایکی دێلغیر گده‌سینیز، داغلاری دا ویران
- قويورسونوز، باغلاری دا. بۇ سؤزه ائيواز آتی بیر قدر ده ياخینا سۆروب
- دئدی:
- قارتال کیمی داغدا يۇوا قۇرموشوق،
- خايینلارین گؤزلریندن وۇرموشوق.
- بیز ائللرین کئشیگینده دۇرموشوق،
- او ارلرین بیر تکیيم، آزیيام.
- خان ائيوازام، آخیدارام قانینی،
- قێررام سۇلطانینی، بَيی، خانینی،
- ال آتیب قێلینجا، آللام جانینی،
- نسلین نه وار، يئر اۆزوندن قاضیيام!
- پاشا نفه‌سینی دریب باخدی کی، گؤزو ائيوازی يئيیر، آياقلارینی بیر آز
- دا آرالی قويوب دئدی:
- – آيه، ائيواز، بالام، آخی من کور‌اوغلويو مئيدانا چاغیرمیشام.
- بَيم بۇ، ایگیده ياراشان صیفتدی کی، اؤزو گلمه‌يیب، بیر سۆده‌مر اۇشاغی
- گؤندریب منیم يانیما؟ آتالار ياخشی دئيیب، ایگیدین آدینی ائشیت، اۆزونو
- گؤرمه. بالام، بۇ هانسی عاغیلنان باش ساخلايیر، هانسی هۆنرنن منم
- دئيیر؟! نه قورخاخمیش بۇ کوراوغلو؟
- ائيواز دئدی:
- – محمود پاشا! اؤزون ياخشی بیلیرسن کی، کوراوغلو سنین دده‌‌ننن
- قورخمايیب. بیل کی، اؤزوننن ده قورخاسی دئيیل. او، پاشالارین اؤزونه،
- سؤزونه، عهدینه، ایمانینا دا چوخ ياخشی بلددی. منی ائله-بئله گؤندردی
- کی، هم من سنی سێنايیم، هم ده سن اؤزونو سێناقدان کئچیره‌سن.
- ایکیمیز ده باخاق، گؤرک سنین کور‌اوغلونو تکبتک مئيدانا چاغیرماغا
- جۆرتین، قئيرتین، حاقین چاتیرمی؟
- پاشا اؤزونو سێندیرمادی:
- – نوولو! باخاق! هئچ من ده او سن دئين ناشوکور بنده‌لردن
- دئيیلم کی، الیمه چێخان تیکه‌نی آغزیما قويمويام، يئره تۇللايام. دی،
- بۇيور، ائن آتدان، چێخ ياراخدان، گیر مئيدانا!..
- ائيواز پاشانین نامردلیگینه بلد اولسا دا، آتدان ائنیب ياراقدان
- چێخدی. پاشا دا ياراقدان چێخیب، شرطی بیر ده هیمنن يانینداکیلارا چاتدیریب
- يئریدی مئيدانا...
- اونلار مئيدانین اورتاسیندا گلدیلر کمر-کمره.
- باياق دئدیک کی، پاشانین گؤزو ائيوازی يئيیردی. ایسته‌يیردی کی، تکده،
- البياخادا دوغرودان دا، اؤزونو سێناسین. ائيوازی بیر تهر ائلیگیب کور‌اوغلويا
- جیيرداغی وۇرسون، آدینی دیللره سالسین.
- ائيواز دا پاشانی سايمادیغیننان اؤزونو بوش قويموشدو کی، پاشا بیر
- آز آتیلیب دۆشسون. اودو کی، پاشا ائيوازی بیر نئچه دفعه او طرف-بۇ طرفه
- چکدی. بیر-ایکی دفعه اؤزونه گۆج وئردی کی، اونو باشی‌نین اۆستونه قالدیرسین،
- باجارماسا دا رۇحدان دۆشمه‌دی. بیر دفعه ده ائيوازی اؤزونه طرف ائله
- دارتدی کی، ائيوازین دیزلری يئره گلدی. ائله بۇ دمده اونون قۇلاغینا بیر
- باياتی سسی يئتیشدی:
- عزیزینم، قارغالار،
- داغدا قارا قار قالار.
- لاچین سايغیسیز اولسا،
- يئریش چکر قارغالار!
- ائله بیل، بۇ سس ائيوازی يۇخودان اوياتدی، قولونا قۆووت، دیزینه تاقت،
- اؤزونه قۆدرت وئردی. پاشانین کمریندن ياپیشیب بیر دلی نره چکدی،
- هوپ، قالدیردی باشی‌نین اۆستونه:
- ایندی بیل، بۇ گۆندن، پاشا،
- باشلاناجاق قالین سنین!
- بئله سنی چالسام داشا
- نئجه اولار حالین سنین؟
- گئيینر پولاددان دونو،
- کوراوغلو قێراتا قونو،
- يئتیشر عؤمرونون سونو،
- ياتیبدی يێغوالین سنین!
- خوتکارا قۇللوق بیتیرمه،
- عؤمرونو باشا يئتیرمه،
- چارا آختار، واخت ایتیرمه،
- داغدی قاباق-دالین سنین!
- قوچ کوراوغلو غضبلنر،
- باشین بدنیننن ائنر.
- سحر گلر او پیر هۆنر،
- تالان اولار مالین سنین!
- ائيواز سنی سالار درده،
- میسری قێلینج اوينار سرده.
- ديَمیشلرین دۇران يئرده،
- لئيسان اولار کالین سنین!
- سؤز تامام اولدو. ائيواز ایسته‌دی کی، پاشانی چالسین يئره، پاشا هیمی نئجه
- ائله‌دیسه، آداملاری تؤکولوب اونون جانینی خلاص ائله‌دیلر، ائيوازین القولونو
- ساریدیلار.
- پاشا اؤزونو دۆزلتدی، نفه‌سینی دریب دئدی:
- – هه! ایندی گتیرین وئرین خان ائيوازین باج-خراجینی، قويون آپارسین!
- کور‌اوغلونون گؤزو يولدادی!
- بیر ياندان پاشانین نامردلیگی، بیر ياننان دا بۇ تنه‌لی سؤزلری
- ائيوازا اثر ائله‌دی، دئدی:
- آي آغالار، خوش کئچرمی
- اوو بالاسیز ملر اولسا؟
- نامرد مرده ال ائله‌يیب
- لووغالانیب گۆلر اولسا؟
- سئچر ياخشی، بیلر يامان،
- نامردلره وئرمز آمان،
- گلر، بۇردا آچار مئيدان،
- قوچ کوراوغلو بیلر اولسا!
- ائيواز ترلاندی، سن سارسان،
- گۆل اۆستونه قونما، خارسان!
- ایستانبولو آددیيارسان،
- او پیر هۆنر گلر اولسا!
- ائيوازین سسینی کیمیيدی ائشیدن، کیمیيدی سؤزونه فیکیر وئرن.
- پاشا امر ائله‌دی:
- – آپارین! قايداسینجا راحتلايیب سالین زیندانا! قوي قوچ کور‌اوغلوسو
- گلیب خلاص ائله‌سین!
- بیچاره ائيواز او زامان هۇشا گلدی کی، بوينوندا کۆنده، قولوندا
- قاندال، آياغیندا قاندالاق قارانلیق زینداندادی. گؤردو بدنی‌نین بۆتون
- عضله‌‌لری سێزیلداشیر، هره‌سی بیر دیل اوخويور. باخدی کی، ساغ قولو اؤزونون
- دئيیل، ها ترپتدی، ترپه‌ده بیلمه‌دی. اوخالانمیش قول هاردان ترپنسین.
- دئ قارانلیق زینداندا دالدی خيالا: ائله بیل ياتمیشدی، يۇخودان اوياندی،
- باشلادی فیکیرلشمه‌يه کی، ائي دیلیقافیل! بۇ نه ایشیيدی من تۇتدوم؟! هارايا
- گئدیردیم، هايانا گلیب چێخدیم! ایندی منی هارادا آختاراجاقلار، هاردا
- تاپاجاقلار! کوراوغلو بۇ ایشه نه دئيه‌جک؟!. فیکیرلشدیکجه چنلیبئل، قوچ
- کوراوغلو، دلیلر، خانیملار، سئيرنگاهلار، جێدیر يئرلری، نیگار خانیم،
- هۆرو خانیم گلیب دۇردو گؤزلری‌نین قاباغیندا، اۆرگی برک قۆبار ائله‌دی،
- اؤز-اؤزونه دئدی:
- قۆربته آتیلدی داشیم،
- جانیم، آي مدد، آي مدد!
- اوف! يامان آغریيیر باشیم،
- قولوم، آغ مدد، آي مدد!
- تله قۇردو محمود پاشا،
- يێغوالیمی وۇردو داشا،
- عؤمور گلیب يئتیر باشا،
- ائلیم، آي مدد، آي مدد!
- بیر گؤرم آلاگؤز ياری،
- آنام نیگار، يارام ساری!
- آرزولايیر هاواداری
- دیلیم آي مدد، آي مدد!
- ائيواز اولوب ایختیياردان،
- مۆشکولدو قۇرتارا داردان،
- چێخار آلاگؤزلو ياردان
- الیم، آي مدد، آي مدد!
- گلین هله‌لیک ائيوازی قوياق زینداندا اؤز دردیينن، گؤرک
- محمود پاشا نئيله‌دی. پاشا ائيوازی زیندانا سالان کیمی خوتکارا بیر
- نامه يازیب گؤندردی کی، بس کور‌اوغلونون خان ائيوازینی تۇتموشام، نه
- لازیمدی، دئ، ائلیگیم! نئجه لازیمدی، فرمان وئر، يئرینه يئتیریم.
- بۇ طرفدن ده محمود پاشادان بیر خئيیر خبر آلمیيان خوتکار
- يامان ناراحات اولماغا باشلامیشدی. هر گۆن دالبادال کور‌اوغلونون واي
- خبری عوضینه، بیر تاجیری سويدوغو، بیر خانی اؤلدوردويو، بیر پاشانین واردؤولتینی
- تالان ائله‌دیگی خبری گلیردی. ایللاهیم دا خوي پاشاسی‌نین اؤلوم
- خبری خوتکاری يئریننن اويناتمیش، وارلیغینی دارا چکمیشدی. اودو کی، يئنه
- بۆتون دیل بیله‌نی، جانی يانانینی، تدبیر تؤکه‌نینی، وزیر-وۆزراسینی، اؤزونه
- ياخین اولان نه وارسا، يێغیب باشینا کور‌اوغلودان داد چکه-چکه شیکايت
- ائله‌يیردی. اونلاری گاه قورخودوردو کی، بیر آز دا بئله گئتسه، گلیب هامیمیزی
- قێلینجدان کئچیره‌جک، وار-دؤولتیمیزه صاحب اولاجاق، گاه دا يۆکسک
- اناملار، بخشیشلر ود ائلیگیردی کی، کیم اونو بیر ياننیق ائلسه، اونا چاتاجاق.
- او، تئز-تئز سۇال وئریر، جاواب آلیر، چاره آختاریر، تدبیر ایسته‌يیردی.
- مجلیسده خوتکارین قارداشی اوغلو، ولیهه‌دی امیر خان واریيدی. امیر
- خان قۆووتده، شجاعتده، بوي-بۇخوندا، ياپ-ياراشیقدا، قدد-قامتده
- ایستانبولدا سايیلان جاوانناردان بیریيدی.
- بلی، مجلیسین قێزغین يئرینده قاپیچی داخیل اولوب محمود پاشادان
- آدام گلدیگینی خبر وئردی. خوتکار تله‌سیک امر ائله‌دی کی، ایچری گتیرسینلر.
- قاصیدی ایچری گتیردیلر. او، محمود پاشانین نامه‌سینی وئردی خوتکارا.
- خوتکار نامه‌نی وزیره اوخوتدو، مظمونوندان حالی اولاندا، قان وۇردو
- بئينینه. غضبیندن اولدو گؤزدری بیر جۆت قان چاناغی، امر ائله‌دی وزیره:
- – گؤتور ياز کی، آي بئلش-ائلش! من ائيوازی نئينیرم! منه
- کوراوغلو لازیمدی! اير بۇ تئزدیينن کور‌اوغلونو بیر تهره چکمه‌سن
- داي بايازیدده دۇرما!
- وزیر او ساعت کاغیذی حاضیر ائله‌دی. خوتکار مؤهورونو وۇروب، وئردی
- قاصیده. دیلنن ده تاپشیردی پاشايا دئينن کی، چاتان کیمی اونون باشینی
- کسسین، گؤندرسین مانا! اؤزو ده گؤزده-قۇلاقدا اولسون. کوراوغلو
- هاياندا اولسا، ائيوازین دالینجا گله‌جک. چالیشسین اونو بیر تهره چکسین!
- يوخسا، اؤز باشیننان کئچمه‌لی اولاجاق. دئ دۇرما، ترپن!
- قاصید نامه‌نی آلدی، باش ائندیریب چێخماق ایسته‌ينده، امیر خان دۇروب
- عمیسینه تزیم ائله‌دی، الینی اؤپوب باشلادی يالوارماغا:
- – ایزن وئر، قوي من ده گئدیم بايازیده. قوي گئدیم، ائيوازا ساغساغ
- داغ چکیم، باشینی اؤزوم کسیب گتیریم!
- خوتکار اول-اول راضی اولمادی، سونرا دا فیکیررشدی کی، الی-قولو
- باغلی آدامدی، قوي گئدیب اؤزو کسسین اونون باشینی، آلسین اوننان قیصاصینی.
- قوي هم اۆرگی سويوسون، هم ده بیر برکدن-بوشدان چێخسین! قوي
- امیرین ظابطه‌سینی محمود پاشا دا گؤرسون! اودو کی، ایزن وئردی، دئدی:
- – گئت، چاتان کیمی ایشی بیتیر! چوخ يۇبانما. تئز قايیت. محمود
- پاشايا دا بیر قۇلاقبورماسی وئر، بلکه کور‌اوغلونو تئزلیگینن بیر تهره
- چکه!
- ایزن وئریلنده، امیر خان ائله بیلدی بۆتون دۆنيايی-عالم اولدو اونون. داي
- واخت ایتیرمه‌يیب خۇبونجا گئيیندی-کئچیندی، بضادی-برتندی، ياراقلاندیياساقلاندی،
- شاهلیغین سئچمه آتداریننان دا بیرینی مینیب قاصیدی آلدی يانینا،
- يول باشلادی بايازیده.
- امیر خانین يولا دۆشمه‌يیننن چوخ کئچمه‌میشدی خوتکار دۆشدو
- پارتدامیيا. دۇروب دینجله بیلمه‌دی. فیکیرلشدی کی، آي منیم اؤيوم
- يێخیلسین! من اونو نیيه گؤندردیم! اونسوز دا ائيوازین باشی کسیله‌جک.
- نه تفاووتو واریيمیش يا امیر خان کسه، يا محمود پاشا؟! بس اۇشاق
- گئدر کور‌اوغلويامی راست گلر، ائيوازنان تکبتک مئيدانامی چێخار!
- آخی جاواننیق ائلیگیب نه‌لر ائله‌مز کی! دئ خوتکار دۇروب دینجله بیلمه‌دی،
- دۆشوندوکجه قارا فیکیرلر يێغیلدی بئينینه، اود دولدو جانینا، درد يئر آلدی
- اۆرگینه. صبری-قراری کسیلدی، تاقتی اۆزولدو. يوخ-يوخ وزیری چاغیردی
- حۆضورونا:
- – وزیر! منیم آغلیم ایتمیشدی، سنه نه اولموشدو؟!
- – قیبله‌ی عالم! الله ائله‌مه‌سین! نه باش وئریب؟
- – وزیر! قايتار امیر خانی! قويما گئده بايازیده.
- وزیرین ال-آياغی يئردن-گؤيدن اۆزولدو، دۆشدو خوتکارین آياغینا
- کی:
- – قیبله‌ی عالم. امیر خان آتین سئچمه‌سینی مینیب، اؤزو ده خئيلی واختدی
- دۆشوب يولا. بۇننان بئله اونا کیم چاتا بیلر کی!..
- – وزیر! اۇشاغین باشینا بیر ایش گلسه، يۇردونو ویران قويارام.
- وزیرین جانین قورخو آلدی. بیر تهرنن خوتکاری ساکیتلشدیریب
- مصلحت گؤردو کی، بیر زیرک آدام گؤندرسینلر دالینجا، چاتار، يولدان
- قايتارار، چاتماز بايازیدده لنگیمه‌يه قويماز. خوتکار راضیلاشدی.
- وزیر بیر قێسا نامه ده يازدی: “محمود پاشا! ائيوازین باشینی کسدیر،
- تئز يولا سال! اۇشاغی لنگیتمه!” خوتکار کاغیذی مؤهورله‌دی. بیر زیرک
- آداما وئریب سالدیلار يولا.
- قوي بۇ قاصید ده يولوندا اولسون، بیز گؤرک آخی امیر خان نیيه بئله
- سئوینمیش گئدیردی بايازیده؟ گؤرک ائيواز اونا نئيله‌میشدی کی، گئدیردی
- اونون باشینی کسیب قیصاصینی آلسین؟
- بیر دفعه امیر خانین يولو قارسا دۆشموشدو. قارس پاشاسی حئیدر
- پاشانین قێزی هۆرو خانیمی گؤروب بند اولموشدو. خبر خوتکارا چاتاندا،
- پیس يئرین قێزی دئيیل، اؤزوموزونکودو، دئيیب ائلچی گؤندرمیشدی، قێزین
- “ه”سینی آلیب نیشان قويموشدو. تويا حاضیرراشاندا، خبر چاتمیشدی کی،
- بس کوراوغلو هۆرو خانیمی آپاریب ائيوازا توي ائله‌يیب.
- بۇ طرفدن ده آخی ایندی ده محمود پاشانین باجیسی، دۆنيا گؤزه‌لی
- اولان مرجان خانیمی نیشانلامیشدیلار اونا. آمما مرجان خانیم امیر
- خان دئيه‌نی دئمیردی، ایپه-ساپا ياتمیردی. ایندی گئدیردی کی، هم ائيوازدان
- قیصاصینی آلسین، هم ده گۆجونو، قۆووتینی، حؤکمونو، ایختیيارینی مرجان
- خانیما گؤسترسین کی، بلکه اۆرگینه بیر بالاجا يول ائلیيه، اونو بیر بالاجا
- مئيله گتیره، هئچ اولماسا، بلکه، بیر دفعه ده اۆزونو گؤره.
- بلی، منیم عزیزدریم! گلین هئچ امیر خانی بۇ شیرین خياللارینان
- آيیریب گۆناه ائلمیيک. قوي او اولسون اؤز يولوندا، بیز بیر چنلیبئله
- قايیداق، گؤرک نئيلیگیللر چنلیبئلده‌کیلر.
- ائيوازین وعده گۆنو کئچدی. او بیری گۆنو ده گؤزله‌دیلر. ائيواز گلیب
- چێخمادی. هامی باشلادی ناراحات اولماغا، گؤزونو يولا تیکمه‌يه. ائله کی،
- آخشام دۆشدو آرايا، نیگار خانیمین اللری قالدی قوينوندا، هۆرو خانیمین
- گؤزلری دؤندو باهار بۇلودونا. چنلیبئل ديَدی بیر-بیرینه. گئجه
- ياریدان کئچدی، ائيواز گلیب چێخمادی کی، چێخمادی! کیمین گؤزونه يۇخو
- گئدردی کی؟ هر آياق سسی، هر آت کیشنه‌مه‌سی نیگار خانیمی دیکسیندیریردی،
- کور‌اوغلونون صبرینی قێلینجلايیردی...
- سحر آچیلماغا آز قالمیشدی. نیگار خانیمی اوتوردوغو يئرده چیمیر
- آپاردی. ائله گؤزونه تزه‌جه يۇخو گئتمیشدی، يۇخودا گؤردو ائيواز بیر
- جئيران قووور. باخدی جئيران قاچیب اؤزونو وئردی بیر اۇچوروما دره‌نین
- دیبینه، ائيواز جئيرانین دالینجا دره‌نین دیبینه يئننده بیردن-بیره
- جئيران دؤنوب اولدو بیر اژداها. قايیتدی ائيوازین اۆستونه. ائله اژداها
- ائيوازی کامینا چکر-چکمز، نیگار خانیم “قويمايین!” – دئيیب قێشقیردی.
- دیکسینیب اؤز سسینه اوياندی. باشلادی تیتره‌مه‌يه، آغلاماغا. کوراوغلو
- ایشی بئله گؤرنده، ياخینا گلیب نیگار خانیمین قارا تئللرینه سێغال چکدی،
- دردینی سوروشدو. نیگار خانیم داها دا کؤوره‌لیب آغلايا-آغلايا دئدی:
- سنه دئيیم، قوچ کوراوغلو،
- يامان بدحالام، آغلارام!
- هۇي دئيه‌رم، گئدر عرشه،
- چاتار آه-نالام، آغلارام!
- الدن اۇچوردوم قۇشومو،
- شاد گؤرمه‌دیم تاي-تۇشومو،
- ياتدیم، بد گؤردوم تۇشومو،
- داردادی بالام، آغلارام!
- من نیگارام، زارا گللم،
- ائيواز دئيیب داغی دللم.
- چوخ چکمز، قۆسسه‌دن اؤللم،
- اینانما قالام، آغلارام!
- کور‌اوغلونون دا اۆرگی برک داریخدی، آمما اؤزونو توخدادیب نیگار
- خانیما تسللی وئردی:
- قم ائيله‌مه، آلاگؤز يار،
- سحر گتیررم ائيوازی!
- قوو، کؤنلونه قويما قۆبار،
- سنه يئتیررم ائيوازی!
- ائيوازسیز آلیشار سینه،
- کؤنول ایسته‌مز کی، دینه،
- چکرم قێرات ترکینه،
- سنه يئتیررم ائيوازی!
- خطر ديَسه بیر تئلینه،
- تالان ساللام رۇم ائلینه.
- اوتوروب قێرات بئلینه،
- سحر گتیررم ائيوازی!
- قێزارام، آچارام مئيدان،
- ياغیلارا اۇددوررام قان،
- بۇ سحر آغاراندا دان،
- گئدیب گتیررم ائيوازی!
- اینان کوراوغلو سؤزونه،
- حسرتم ائيواز اۆزونه.
- قۇربان او آلا گؤزونه،
- سنه يئتیررم ائيوازی!
- آمما نیگار خانیم اؤزونو توخدادا بیلمه‌دی، آغلیيا-آغلیيا گؤردويو
- يۇخونو کور‌اوغلويا دانیشدی. ائله بیل، کور‌اوغلونو ایلدیریم وۇردو. بیر دلی
- نره چکدی، بیر سۇ ایچیمی ساعتدا يئر-گؤي دیله گلدی، بۆتون دلیلر، خانیملار،
- مئهترلر – چنلیبئلده کیم واردیسا اولدو يانیندا حاضیر. کوراوغلو
- گؤزونو دولاندیریب هامینی يانیندا گؤرنده، دلی حسنی سسله‌دی:
- دلی حسن، قالخ آياغا دۇر ایندی،
- نیگار دئيیر، خان ائيوازیم قالدادی.
- چکین منیم قێراتیمی گتیرین،
- کؤمک دئيیب باخیر، گؤزو يولدادی!
- دمیرچیوغلو، سن چکگینن قێلینجی،
- قويمايین داغیلا عسگرین اۇجو.
- آسلان پاشا چوخ حیله‌‌گر، بیلیجی –
- تۇتولوبدو بیر سۇلطانیم الده‌دی.
- هاي ائله‌يین، حالايپوزان اويانسین،
- قێلینجین قبزه‌سی قانا بويانسین.
- خان ائيوازیم هله ضربه دايانسین،
- کمالی سرده‌دی، زورو قولدادی!
- تالان دۆشسون رۇم ائلینه بۇ باشدان،
- نیشانا قالماسین داش اۆسته داشدان.
- الی چێخیب قوچ آتادان، قارداشدان،
- خان ائيوازیم تکدی، قۆربت ائلده‌دی!
- نامردده قايدادی، مرده تور قۇرار،
- ظالیمین صنعتی قۇردورماقدی دار.
- ایندی خان ائيوازیم سیزی آرزولار –
- هاراي! هاراي! – دئير، اۆنو دیلده‌دی!
- هويدو، دلیلریم، ائيله‌يین ساواش،
- هۆرونون گؤزونده گؤرورم قان ياش.
- کوراوغلو اوغول دئر، کۆردوغلو قارداش،
- نیگار بالا دئيین يامان حالدادی!
- کوراوغلو سؤزنن دئدیگی کیمی، دیلنن ده احوالاتی دانیشیب ائيوازین
- باشیندا بیر ایش اولدوغونو بیلدیردی. دلی مئهتره هاي وۇردو کی، يهرره
- منیم آتیمی. دلی مئهتر آتی يهرره‌مه‌يه جۇمدو.
- کۆردوغلو ایشی بئله گؤرنده ایره‌لی يئریدی، کور‌اوغلودان ایلتیماس ائله‌دی:
- خان قارداشیمین دالینجا،
- آتا، من گئدیم، من گئدیم،
- بیر دامجی قانیم قالینجا
- آتا، من گئدیم، من گئدیم!
- قارداش قايیتمادی باری،
- جاندا قالدی اینتیظاری.
- اولوم ائيواز هاواداری،
- آتا، من گئدیم، من گئدیم.
- قالخان تۇتوم، شئشپر آتیم،
- دۆراتین يالینا ياتیم،
- قارداشین دادینا چاتیم،
- آتا، من گئدیم، من گئدیم.
- ال آتیم پاشا وارینا،
- تالان سالیم دیيارینا،
- چکیم هبش بازارینا،
- آتا، من گئدیم، من گئدیم.
- کۆردوغلو قێلینجی تئيلر،
- آغیر بعضیرگاننار ايلر.
- قوچ اوغلون ایلتیماس ائيلر،
- آتا، من گئدیم، من گئدیم.
- کوراوغلو باخدی کۆردوغلو يامان حالدادی، سؤزونو دؤندره بیلمه‌دی،
- دلی حسنی بیر ده سسله‌دی:
- – آتینی يهرره! گؤتور کۆردوغلونو! بۇ گئجه ائيوازی بۇردا ایستیگیرم!
- گئجياریدان او يانا کئچسه اؤزوم گلیرم!
- دلی حسن واخت ایتیرمه‌دی. گؤرمه‌لیسینی گؤردو، گؤتورمه‌لیسینی گؤتوردو،
- دۆشدو کۆردوغلوينان يولا.
- بۇنلار گئتمکده اولسون، گؤرک لئيلی خانیم نئيله‌دی. ائله کی، قاصید
- قايیتدی، آسدان پاشا ائيوازین سحر گله‌جه‌يینی بیلدی، آرخايین ایش گؤرمه‌يه
- باشلادی. او، بیر ائو حاضیرلاتدی، قاپی-باجاسینی مؤحکملتدیردی، ایشی تاپشیردی
- لئيلی خانیما کی، آل ائله‌يیب ائيوازی سالسین بۇ ائوه، اود وۇروب ياندیرسین.
- آمما ایش بۇراسیندا دۆزلمیشدی کی، لئيلی خانیم قاصیدی خلوتده
- دانیشدیریب اونون چنلیبئلده گؤردوکلرینی، ائشیتدیکلرینی بیلندن سونرا
- تۇتدوغونا پئشمان اولموشدو. اونا تسکینلیک وئرن اويدو کی، عمیسی اونا
- اینانیب ایشی تاپشیرمیشدی اؤزونه. بۇ دفعه قێز اونو گؤتور-قوي ائله‌يیردی کی،
- ائيوازی نئجه خلاص ائله‌سین، اوننان برابر قاچسین چنلیبئله.
- بلی، دلی حسنگیل ائله گلدیلر کی، مالین آخشام سۇيونون واختیندا
- اؤزدرینی يئتیردیلر رۇما. ائله شهره گیرر-گیرمز، بیریسی ياخینلاشدی
- دلی حسنه:
- – آغا، لئيلی خانیم سیزی گؤزدويور!
- دلی حسنه بۇ لازیم دؤيولدومو؟ سالدی بۇ آدامی قاباغینا کی،
- گؤرست اونون يئرینی! آدام قاباغا دۆشدو، خئيلی گئدندن سونرا بیر ائوی
- گؤرستدی کی، باخ، اوردادی لئيلی خانیم.
- دلی حسنگیل اؤزدرینی يئریتدیلر، آتدان دۆشوب گیردیلر ایچری. ائله
- اونلارین ایچری گیرمه‌يینن قاپی‌نین شاراقق اؤرتولوب باغلانماغی بیر اولدو.
- باخدیلار کی، دۆشدولر تورا. دلی حسن صبرلی ترپه‌نیب ایشین دالینی گؤزله‌يیردی،
- کۆردوغلو دؤزه بیلمه‌يیب ال آتدی کی، قاپینی قوپارتسین، دلی حسن
- قويمادی. کۆردوغلو اوندان سوروشدو:
- – دلی حسن، نیيه گؤزه گؤرونمور،
- دئ گؤروم ها ياندا قارداشیم منیم؟
- ائيوازسیز بیر گۆن ده عؤمر ائتمه‌رم،
- سئل اولار تؤکولر گؤز ياشیم منیم!
- هانی آلا گؤزلر قێيیلا، سۆزه،
- شیرین کلمه‌لری يان-يانا دۆزه.
- دئ گؤروم هاردادی، گؤرونمور گؤزه،
- دار گۆنده کؤمه‌يیم، سیرداشیم منیم؟
- کۆردوغلويام، گؤز آچمادیم قووغادان،
- شئشپریمده کلله، قێلینجیمدا قان.
- هئچ زامان دؤنمه‌رم ائيواز يولوندان،
- بدننن آيریلسا اؤز باشیم منیم!
- دئمه‌دیکمی لئيلی خانیم تۇتدوغونا پئشمان اولموشدو. ایندی قاپی‌نین
- دالیندا دۇروب اؤيرنمک ایسته‌يیردی کی، گؤرسون بۇنون بیری ائيوازدی، بس
- بیری کیمدی. آمما ایچریده‌کی دانیشیقدان آنلادی کی، هئچ بیری ائيواز دؤيول،
- اونو آختاریرلار. اودو کی، قاپینی آچیب گیردی ایچری، دۇردو ماددیم-ماددیم
- اونلارین اۆزونه باخماغا.
- دلی حسن حیرصلی-هیککه‌لی دئدی:
- – خانیم قێز، بۇ نه گیزدنپاچدی بیزنن اوينيورسان؟ دئ گؤروم،
- ائيواز هانی؟
- لئيلی خانیم ایشی باياقدان آنلامیشدی، ائيوازین نامه‌سینی چێخاریب وئردی
- دلی حسنه. دلی حسن نامه‌نی اوخويوب گؤردو ائيواز بۇرا گلمه‌يیب،
- هاراسا باشقا سمته گئدیب. لئيلی خانیم قاصیدین گؤردوکلرینی دانیشیب
- اونو دا اۇيدوردو کی، قاصید قايیداندا عمیمین الینه کئچیب، عمیم احوالاتی
- بیلنده، من ياخشی ترپندیم، دئدیم ایشی تاپشیر اؤزومه، اونو بۇ ائوه
- سالیب اود وۇروم. ایندی گرک سیزی بیر تهر ائله‌يم، سحری گؤزله‌يک،
- گؤرک نه اولور. قێز بۇنلاری دئيیب قاپینی باغلادی، گئتدی. او، تزه‌جه قاپیدان
- آرالانمیشدی کی، قاپی‌نین دالیندا آياق سسی ائشیدیلدی. آسدان پاشا
- قاپی‌نین دالیندان قۆرره‌لی-قۆرره‌لی، تنه‌لی-تنه‌لی دئدی:
- – آيه، ائيواز! بالا، آخی من او کور‌اوغلونو مرد-جومرد ائشیتمیشدیم،
- دئيه‌سن آخی دئيیلنجن يوخويموش. بَيم هئچ اۇتانیب قێزارمادی
- کی، بیر پاشا قێزی‌نین عوضینه ایکی گده اوغلونو گؤندردی منیم جنگیمه؟
- اؤزو ده گده اوغلودو دا! بَيم، نانجیب فیکیرلشدی کی، سنی کیمی يۆز
- قارغانین باشینی بیر يالاغا کسسم، منیم اۆرگیم سويوماز؟! گرک
- اؤزو گليدی او قورخاق!
- سؤزدر کۆردوغلونو چکدی عرشی-فله‌يه. گئنه قاپیيا ال آتماق
- ایسته‌دی، دلی حسن آمان وئرمه‌دی، پاشايا جاواب قايتاردی:
- – پاشا ساغ اولسون، اۆرگینی نیيه سێخیرسان؟ بئله تئز توو اولما. بیل کی،
- کوراوغلو سن دئيننن دئيیل، نانجیب، قدرناشوناس دئيیل. او، مهبوب
- خانیمین قدر-قیيمتینی سننن ياخشی بیلیر. اونا گؤره ده اؤزو سحر يئددی
- مین يئددی يۆز يئتمیش يئددی دلیينن سنین قۇللوغونا تشریف بۇيوراجاق،
- قوناغین اولاجاق. بیزی خبره گؤندریب کی، حاضیرلیق گؤره‌سن!..
- – نوولو! نه دئيیرم! قوي گلسین. ایندی کی، سیز بئله اۆزويولا، بۇيروق
- بیتیرنسینیز، من ده اذیت وئریم، گؤندریم او دۆنيايا-جهنمه.
- اورا دا خبر وئرین، حاضیرلیق گؤرسونلر، سحر کور‌اوغلونو دا اورا گؤندره‌جه‌يم...
- پاشانین تاپدیغی بۇ سؤزلر اۆرگیننن اولسا دا، اۆرگی اۆستونده دۇرمور،
- دیزلری اسیردی. اودو کی، تله‌سیک اکیلیب امر ائله‌دی کی، قێز ائوه اود وۇرسون.
- آرالیغا تزه‌جه سۆکوت چؤکموشدو کی، لئيلی خانیم گیردی ایچری. دلی
- حسن دینمک ایسته‌دی، آمان وئرمه‌دی. اونلاری آپاریب گیزلتدی، ائوه اود وۇردو.
- ائو ياندی.
- آسدان پاشا بیر ياندان راحت اولدو، سئویندی کی، بۇنون عوضینده خوتکاردان
- انام آلاجاق، آدی دیللرده گزه‌جک. او بیری طرفدن ده جانینا
- دۆشن اۆشوتمه، اۆرگینه ده تیترتمه سالمیشدی. قورخوردو کی، کوراوغلو
- سحر دوغرودان دا گلر. اودو کی، قوشونونو ایکیيه بؤلدو، بیر حیصه‌‌سینی
- شهردن کناردا پۇسقودا قويدو، بیر حیصه‌‌سینی ده شهرده ساخلادی کی،
- کوراوغلو گلسه، ایکی طرفدن همله ائله‌يیب بیر ایش گؤرسون.
- لئيلی خانیم آرخايینلاياندان سونرا گلدی دلی حسنگیلین يانینا.
- فیکیرلشیب سحری گؤزده‌مه‌لی اولدولار. خلوتی يوللاردا آدام قويدولار
- کی، ائيواز گلسه، خبر وئرسین.
- چنلیبئلده گئجه ياریدان کئچنده کوراوغلو دۇروش گتیره بیلمه‌يیب
- هاي وۇردو، دلیلرین اۆچ مینی آت بئلینه قالخدی. حالايپوزانی چنلیبئلده
- قويوب دۆشدو يولا. گۆن چئشت يئرینه چاتمامیشدی کی، يئتیشدی رۇما.
- شهره ياخینلاشاندا فیکیرلشدی کی، بئله گئتسه، پاشا اۇشاقلاری قێرار. اودو
- کی، هاي وۇردو، هامی آتدان ائندی. او ایسته‌يیردی کی، دلیلردن بیر نئچه‌سینی
- شهره گؤندرسین، قفیلدن، پاشانین شهردن کناردا پۇسقودا
- قويدوغو قوشون هۆجوما کئچدی. هۆجوم ائله قفیل اولدو کی، آز قالدی دلیلر
- اؤزلرینی شاشیرسین. کوراوغلو ایشی بئله گؤرنده بیر دلی نره چکدی:
- دۆشمن قفیل هۆجوم چکسه،
- ایگید گؤزون سیلسین گرک!
- باشی بدندن گئتمه‌میش
- آتا مینه بیلسین گرک!
- دمیرچیوغلو کئچسین يانا،
- اگر جانی باتسا قانا،
- قويماسین قان لاختالانا،
- دوداغیينان سیلسین گرک!
- کوراوغلو سئل تک چاغلاسین،
- کیملره اۇمود باغلاسین،
- يا بۇدو کی، قان آغلاسین،
- يا دۆشمنلر گۆلسون گرک!
- دلیلر قێزیل قۇش کیمی آتلارین بئلینه قوناندا سؤز هله تاماملانمامیشدی.
- اونلار اؤزلرینی وۇردولار قوشونا. آمما گئنه گؤزله‌نیلمه‌دن
- شهر ياننان قوشونون همله‌سی باشدادی. کوراوغلو باخدی کی، بۇدو آسدان
- پاشا قوشونون قاباغیندا گلیر. مۆحاصیره‌‌نی يادیننان چێخاردیب پاشايا اۆز
- تۇتدو:
- آسدان پاشا، تئز خبر وئر،
- پاشا، خان ائيوازیم هانی؟
- هايقیررام شهرین تالانار،
- پاشا، خان ائيوازیم هانی؟
- دؤرد گۆندو گلیب ائيوازیم،
- زیمیستانا دؤنوب يازیم.
- منیم ترلانیم، شاهبازیم،
- پاشا، خان ائيوازیم هانی؟
- گلمیر کۆردوغلونون سسی،
- کئچیب حسنین وعده‌‌سی.
- تزه آچان گۆل دسته‌سی،
- پاشا، خان ائيوازیم هانی؟
- پاشا گرده‌نینی چکیب دینمک ایسته‌دی، کوراوغلو آمان وئرمه‌دی:
- گؤيدن ایلدیریم تؤکدوررم،
- داشین-تورپاغین چکدیررم،
- يۇردوندا سوغان اکدیررم،
- پاشا، خان ائيوازیم هانی؟
- پئيمانام دولهادولدادی،
- دلیلر ساغی-سولدادی،
- نیگارین گؤزو يولدادی،
- پاشا، خان ائيوازیم هانی؟
- ائيواز چنلیبئلین گؤزو،
- سیننه قويارام کؤزو.
- بۇدو کور‌اوغلونون سؤزو
- پاشا، خان ائيوازیم هانی؟
- آسدان پاشا کور‌اوغلونون دلیلرینی مانسیرادا گؤروب لووغا-لووغا
- قێریلدادی:
- – کوراوغلو، هئچ تلسمه! بۇ ساعت گؤندررم سنی اونلارین يانینا.
- سؤز پاشانین آغزیندا قالدی. قفیلدن تۆپداغیدان اؤزونو قوشونا
- وۇروب قێرغی سرچه‌نی گؤتورن کیمی، اونو يهردن گؤتوردو. اؤزونو باشسیز
- گؤرن قوشون دۆشدو پرن-پرنه. دلیلر اونلارا بیر گلیش گلدیلر، بیر
- گلیش گلدیلر کی، دیلنن دئمک مۆشکولدو. قێریلان قێریلدی، قالان آمان
- ایسته‌دی، آمان آلدی. آرا ساکیتلشنده تۆپداغیدان پاشانی گتیریب قويدو
- کور‌اوغلونون قاباغیندا يئره. کوراوغلو سوروشدو:
- – نامرد، دئ گؤروم اۇشاقلار هانی؟
- پاشا گؤردو اؤلوم آياغیدی، اؤزونو بیر آزجا برکیتدی:
- – هئچ قێشقیرما، کوراوغلو! من سنین اسیرینم. آمما بیل، سن بیر
- ده او اۇشاخلار کی، دئيیرسن، اونلاری گؤرمه‌يه‌جکسن. ياندیرمیشام اونلاری...
- هامی‌نین اۆستونه سۇ الندی. کور‌اوغلونون گؤزلری قێزاردی، نفه‌سی دارالدی،
- قێلینجا ال آتاندا، بێي، بیر ده گؤردولر دلی حسنگیل بۇدو يانلاریندا
- دا بیر قێز گلیرلر. آمما ائيواز يانلاریندا يوخدو. آسدان پاشا ایشی بئله
- گؤرنده بیر بوي کیچیلدی، باشینی بۇلايیب دئدی:
- – منیم دۆشمنیم اوجاغیمین قێراغیندايمیش!..
- کیمیيدی پاشانین سؤزونو ائشیدن. کوراوغلو اۆزونو دلی حسنه تۇتموشدو:
- دلی حسن، تئز جاواب وئر،
- هانی ائيوازیم گؤرونمور؟
- خار آلماسین گۆللریمی،
- باهاریم، يازیم گؤرونمور!
- ائيواز گله‌لی دؤرد گۆندو،
- سینمده داغدی، دۆيوندو.
- اۆرگیم چاتلايیر ایندی،
- هانی ائيوازیم گؤرونمور؟
- کوراوغلو کیمنن سورونا،
- خانلار بلددی زورونا.
- دۆشمه‌سین پاشا تورونا،
- هانی ائيوازیم گؤرونمور؟
- سؤز تامام اولدو، دلی حسن ایره‌لی گلیب احوالاتی دانیشدی، ائيوازین
- نامه‌سینی او دا وئردی کور‌اوغلويا. قاصیدی ده گتیردیلر. قاصید يولدا گؤردوکلرینی
- بیر ده کور‌اوغلويا دانیشدی. بیلیندی کی، ائيواز باشقا سمته
- گئدیب. کور‌اوغلونون اۆرگی يامان داریخدی. ائله بیل اۆمیدی اۆزولموشدو، اۆز
- تۇتدو دلیلره:
- بۇ گۆن ایتیرمیشم ائيواز بالامی،
- يازین، تکه‌لیدن گؤرن اولوببو؟
- ائيوازسیز نئيله‌رم دۆنيا مالینی،
- يازین، تکه‌لیدن گؤرن اولوببو؟
- آلمازدان قێلینجدی، پولاددان يئيه،
- چئينه‌رم دمیری اۆفوررم گؤيه.
- کیم سوراغین وئره، کیم يئرین دئيه،
- يازین، تکه‌لیدن گؤرن اولوببو؟
- آه چکرم، اوف دئمه‌رم دیلیمنن،
- بیر بۆلبولم، آيریلمیشام گۆلومنن.
- بیر ترلانیم اۇچوب چنلیبئلیندن،
- يازین، تکه‌لیدن گؤرن اولوببو؟
- دینمیر، سێنیق دۆشوب سازیم، آي هاراي!
- زیمیستانا دؤنوب يازیم، آي هاراي!
- ایتکین دۆشوب خان ائيوازیم، آي هاراي!
- يازین، تکه‌لیدن گؤرن اولوببو؟
- کور‌اوغلويام، داها يئتیشدیم جانا،
- قێزارام شیر کیمی گیررم مئيدانا.
- ائله‌رم دۆنيانی وئردی-وئرانا،
- يازین، تکه‌لیدن گؤرن اولوببو؟
- سؤز تامام اولاندا دلی حسن قێراغا يئریدی:
- – کوراوغلو دايانماق واختی دؤيول، تدبیرینی دئ!
- کوراوغلو دئدی:
- – بئله گؤرونور کی، ائيواز يا قارسا گئدیب، يا دا بايازیده. سن
- دمیرچیوغلوينان بیر دسته گؤتور اۆز تۇت قارسا، من گئدیرم بايازیده.
- اگر قارسدا اولماسا تئز قايیدین چنلیبئله.
- کوراوغلو آسدان پاشانی، قاصیدی، بیر ده لئيلی خانیمی تاپشیردی تۆپداغیدانا،
- بیر نئچه ده دلی وئریب تاپشیردی کی، آپاریب چنلیبئلده منی
- گؤزلرسن. دسته‌لر اۆز تۇتدولار هره بیر سمته.
- کور‌اوغلونون دسته‌سی هئچ شهردن اۆزولمه‌میشدی، بیر آتلیينان
- قاباقلاشدی. آتلی کور‌اوغلويا ياخینلاشیب سوروشدو:
- – سوروشماق آيیب اولماسین، آي قارداش، سیز کیمسینیز، سفرینیز هايانادی؟
- کوراوغلو باخدی کی، بۇ سؤزدو آداما اوخشايیر، اؤزونو نیشان وئردی. آتلی
- کؤورلدی، آغلامسینا-آغلامسینا دئدی:
- – ائيوازدان خبرین وارمی، آي کوراوغلو؟
- – ائيوازی ایتیرمیشم. خبر سنده‌دی، تئز سؤيله.
- – ائيوازی بايازید پاشاسی محمود پاشا سالیب زیندانا، خبرینی
- گؤندریب خوتکارا. من اوردان سێراغاگوننن چێخمیشام. آماندی، اؤزونو
- يئتیر...
- دئيیللر کوراوغلو بیر دلی نره چکدی، يئددی آغاجلیقدا دلی حسننن
- دمیرچیوغلونون دسته‌سی ائشیدیب گئری دؤندو. کوراوغلو آتین يۆيه‌نینی
- بوشدادی. يۆيه‌نی بوش گؤرن قێرات قانادلاندی...
- قێرات دؤنسون قانادلی ترلانا، گلین، بیز گؤرک بايازیدده نه‌لر اولدو.
- محمود پاشا خوتکارا گؤندردیگی قاصیدین يولونو ایکی گۆن گؤزله‌يه
- بیلدی. آمما اۆچونجو گۆن گؤزله‌مه‌يه تهری اولمادی. خبرین اۆستوندن
- خبر چاتدی کی، بس بايازید ماهالیندا نه قدر الی قێلینج تۇتان ایگید
- وارسا، يێغیلیب سؤزبیر ائله‌يیبلر کی، زیندانی داغیدیب ائيوازی قاچیرسینلار.
- پاشا ایشینی نه قدر ساهماننادی، اؤزونو توختاق ساخلادیسا، داي
- اۆچونجو گۆن دۇروش گتیره بیلمه‌يیب گۆنورتا نامازیننان سونرا بۆتون
- ياخین آداملارینی يێغیب تدبیر ایسته‌دی.
- يێغیلانلارین ایچینده قوچو مئهدی ده واریيدی. او، پاشانین قئيدینه
- قالانی، جانی يانانی، دیل بیله‌نی، تدبیر تؤکه‌نیيدی. قوچو مئهدی تاماهدا
- آدمی، پاخیللیقدا قۇردو، کینده دوه‌نی، حیله‌‌ده تۆلکونو سۇيا سۇسوز
- آپاریب سۇسوز قايتاراردی.
- محمود پاشا هره‌نین تدبیرینه بیر قۇلپ تاخیب آخیردا قوچو مئهدی‌نین
- اۆزونه باخدی. قوچو مئهدی دئدی:
- – پاشا ساغ اولسون. بیزیم خوتکاردان جاواب گؤزده‌مه‌يیمیز ناحاقدی.
- خوتکار ائيوازی آپاریب اوردوسونا سرکرده ائله‌يه‌سی دئيیل ها. اونا بۇنون
- اؤلوسو لازیمدی. سننن يا باشینی ایسته‌يه‌جک، يا دا لئشینی. اونو ساغ ساخلاماق
- ضرر گتیرر. لازیمدی کی، ائيوازین سسینی، نفه‌سینی کسیب جاواب
- گؤزله‌يک. ایندی هر يئریننن قالخان گده کور‌اوغلونون آدینا ایش گؤرمک
- ایسته‌يیر.
- پاشا دینمک ایسته‌دی، قوچو مئهدی قويمادی:
- – بیلیرم نه دئيه‌جکسن. اون نفر قولوزوررو آدام وار. گئجه ایکن
- دار آغاجینی قۇروم، آسیم اونو. سحر ده خبر يايیم کی، گئجه قاچیرمیش،
- کئشیکچیلر تۇتوب آسیب.
- پاشا تدبیری بَيندی، هامی آفرین دئدی. اون نفر پهلوان آيریلدی،
- قوچو مئهدی اولدو اونلارا سردار. تاپشیریلدی کی، او نه دئسه عمل ائله‌سینلر.
- مجلیس داغیلاندا، پاشا قوچو مئهدینی تک ساخلايیب آرانی خلوت
- ائله‌يندن سونرا دئدی:،
- – سنین کمالینا احسن. مئهدی، الله گؤيده شاهیددی کی، سن منیم
- اۆرگیم، دیرگیمسن. من هر سیرریمی، ایشیمی سنه اعتبار ائله‌يیرم. بیلمیين
- بیتمز، سن ده ساغ اول، ياخشی ترپه‌نیرسن. آمما بیلیرسن کی، بۇ
- ایش باشقا ایشدره بنزه‌مز. بۇردا احتیاط گرکدی. اولا، بۇدو کی، او
- دلدوزو ائله‌جه قانداللی-زاددی آس، قوي خاتا-ماتاسی اولماسین...
- قوچو مئهدی دینمک ایسته‌دی، پاشا آمان وئرمه‌دی:
- – سؤزومو کسمه. ياخشی قۇلاق آس! او، گؤزلرینی قێيیب آغزینی قوچو
- مئهدی‌نین قۇلاغینا ياخینلاشدیردی، – من سانا اؤزگه بیر ایش ده تاپشیریرام
- کی، بۇ ایش ائيوازین ایشیننن چتیندی...
- قوچو مئهدی قوقئزده‌نیب يالتاقلاندی:
- – من جانیمی سنین يولوندا قويموشام، پاشا.
- – جانین ساغ اولسون! بۇ فۆرصتی الدن وئرمک اولماز... گرک بۇ گئجه،
- سنه سیرر وئریرم ها! هه، گرک بۇ گئجه کانکانوغلونو دا ائيوازنان
- برابر آساسان! سحر ده بئله خبر يايارسان کی، گئجه زیندانا باسقین
- ائلیگیف ائيوازی قاچیریرمیش، کئشیکچیلر ایکیسینی ده تۇتوب آسیب. بلکه اوندان
- جانیم قۇرتارا، خوتکارنانسا دا قوهوملوغوم باش تۇتا. اؤزون گؤرورسن
- کی، آياغیما چیدار اولوب، منیم آمانیمی قێریب. ائلین زهمیننن ده بیر
- بهانه تاپیب آرادان گؤتوره بیلمیرم. اصیل فۆرصتدی، باشینا دؤنوم،
- مئهدی! آمما گرک...
- قوچو مئهدی آمان وئرمه‌يیب الینی گؤزونون اۆستونه قويدو:
- – او دا باخ، بۇ گؤزوم اۆسته! منیم قیبلم! سن ده ياخشی بیلیرسن
- کی، نه قدر جانیمدا جان وار، سنین قۇللوغوندايام. الله قويسا، سحر
- ایکیسینی ده دار آغاجیندا گؤررسن. آمما...
- ایندی ده پاشا قوچويا آمان وئرمه‌دی:
- – منیم بۆتون وار-دؤولتیم سنیندی! الله قويسا، صدرزملیک
- الیمه کئچن کیمی، بايازیدین پاشاسی سنسن!
- قوچو مئهدی ایسته‌دی چێخسین، پاشا داياندیردی:
- – داي بیلمیرم، مئهدی! گرک ائله ائله‌يه‌سن کی، سحره قدر اونون
- تۇتولدوغونو هئچ کس بیلمه‌يه. هم ده ایشینی ایندیدن ائله قۇر کی، بیردن
- بیر يانا گئدر، الدن چێخار...
- قوچو مئهدی پاشانی لاپ خاطیرجم ائله‌يیب چێخدی. او، ال آلتیننان اؤيرندی
- کی، کانکانوغلو بیر آت مینیب شهردن چێخیب، پیيادا قايیدیب بیر آت دا
- مینیب گئدیب همین يولنان. دئمه‌دیکمی قوچو شیطانا آلتی يوخ پاپیش
- تیکردی. بیلدی کی، نسه بۇردا وار، کانکانوغلو بیر ده قايیداجاق. همین
- يولدا پۇسقو قۇردو.
- آخشامترفیيدی. گۆنش داغلارین دالینا جان آتیر، کانکانوغلو دا شهره
- تله‌سیردی. ائله قان-ترین ایچینده، شهرین گیره‌جه‌يینده‌کی دره‌يه ائننده،
- قفلتن باشینا پالاز آتیب تۇتدولار، ال-آياغینی ساریيیب گؤتوردولر!..
- کانکانوغلو او زامان گؤزونو آچدی کی، زینداندا ائيوازین يانیندادی.
- ال-آياق يێغیشیب شهر يۇخويا گئدن کیمی قوچو مئهدی باشدادی ایشه.
- دار آغاجلارینی حاضیر ائله‌دی. گئجه ياریدان کئچر-کئچمز، آداملاریينان
- گلدی زیندانین يانینا. اونلارا دئدی:
- – باخ منیم ایشیم زیندانین قاپیسینی آچماق، سیزین ایشینیز ده، بئش بیربئش
- بیر اونلاری قامارریيیب ائله قانداللی-مانداللی گؤتوروب آسماقدی.
- آمان وئرمه‌يین ها!
- قوچو مئهدی‌نین آداملاری اونون دئدیگیننن ده جلد ترپندیلر،
- قاپی آچیلان کیمی، قورخولو-قورخولو ایکیسینی ده گؤتوردولر، آسدیلار...
- خوروزلار بانناشیب اوباشدانی خبر وئرنده محمود پاشايا خبر
- وئردیلر کی، خوتکاردان قاصید گلیب. پاشا تله‌سیک اونو يانینا گتیرتدیردی.
- قاصید تلسدیگیندن سلامی دا اۇنوتدو، خوتکارین امرینی وئردی پاشايا.
- پاشا اوخودو: “محمود، ائيوازین باشینی کس، تئز گؤندر گلسین! ایشی لنگیتمه!”.
- پاشا تئز امر ائله‌دی کی، قاصیدی آپاریب راحت ائله‌سینلر. ال آلتیننان دا
- تاپشیردی کی، مست ائله‌يین، دۆنيادان خبری اولماسین.
- قاصیدی باشیننان ائله‌ين کیمی، پاشا قوچو مئهدینی چاغیرتدیردی.
- – دئ گؤروم، نئيله‌میسن؟!
- قوچو مئهدی برکدن شاققاناق چکیب گۆلدو، اۇغونا-اۇغونا دئدی:
- – آي جانی ساغ اولموش! داي نه وار نئيلیيم! ساغلیغینا، ایکیسینی ده
- تنابلامیشام گئجه ياریدان! سن آرخايین يات. آند اولسون او قۇرآننان
- عزیز باشینا، اۆرگی بیر تويوخ اۆرگیجن يوخويموش! آفرین منیم زهمیمه!
- ائله کی، قاپینی آچدیم، زهمیمنن ایکیسی ده بیردن “واي دده!”
- ائله‌دی، هۇشونو ایتیردی. هايیف کی، ائيواز آسیلاندا دا بیلمه‌دی کی، آنالار نئجه
- اوغوللار دوغوب!..
- محمود پاشا سئویندیگیننن اونو قۇجاقلادی، باسدی باغرینا:
- – آفرین، آ بخدور! ایندی ایش آيریدی: بۇ ساعت خوتکاردان آدام يئتیشیب.
- خوتکار امر ائله‌يیب کی، ائيوازین باشینی کس گؤندر. گؤر يێغوالیمیز نه
- درجه‌‌ده کسرریدی کی، قاصید ایندی گلیب. سحر گلسيدی، ایشی بیله‌جکدی،
- خوتکارین يانیندا اولاردیق بدنام. من ده مست ائلتدیرمیشم اونو.
- ایندی دۇرما، آ بايازیدین گله‌جک پاشاسی. تئز ائيوازی ائندیر، کس باشینی،
- قێرمیزی بیر خونچا بزه، قوي ایچینه، گؤنده‌رک خوتکارا...
- قوچو مئهدی سوروشدو:
- – بس کانکانوغلونو نئيلیگیم؟
- – هه! شاددیغیمنان لاپ باشیمی ایتیرمیشم. هئچ دئنن قاصیددن
- بیزیم بهلولو سوروشدوممو؟.. هه، اونو تک دار آغاجیندا قويماق
- اولماز. يئندیر، باش-گؤزونو برک قێلینجلا، آت زیندانین يانینا. سحر ده
- خبر ياي کی، زیندانا باسقین ائله‌يیب، کئشیکچیلر اؤلدوروب. پاشا گۆله-گۆله
- بیر گؤزونو قێيدی، – بیر کئشیکچینی ده قۇربان ائله اونا!..
- قوچو مئهدی ایسته‌دی چێخسین، پاشا داياندیردی:
- – ائيوازین بدنینی آس شهرین آلاقاپیسیننان، قوي بیر گؤزداغی اولسون
- قۇدورغاننارا!
- قوچو مئهدی گئتدی، پاشا نئجه تاپشیرمیشدی، ائله ده ائله‌دی.
- بلی، منیم عزیزدریم! کوراوغلو بايازیده او زامان يئتیردی کی،
- ائيواز اولوب باشسیز بدن، آسیلیب شهرین آلاقاپیسیننان...
- کوراوغلو اولا، ائيوازی بئله گؤره!.. دۆنيا چارخ اولدو دولاندی باشینا.
- آتدان آشیریلدی، مئيیتین قێچالارینی باسدی باغرینا...
- پاشايا خبر چاتدی. پاشا حاضیر ساخلادیغی قوشونو يئریتدی.
- کوراوغلو او زامان باشینی قالدیردی کی، قێرات آدام کیمی دؤيوشده‌دی.
- باخدی کی، هر طرف اتدن قات-قات قالادی. او، قێزمیش نر کیمی اؤزونو آتا
- يئتیردی. آمما هانسی طرفه يؤنلدیسه، اؤزونه يول آچا بیلمه‌دی. ایشی برک
- چتینه دۆشدو، اۆرگی داریخیب تئللندی. ائيوازی هارايا چاغیردی:
- ایشیم يامان دارا دۆشدو،
- ایمدادیما چات، ائيوازیم.
- مین دۆراتی، گل هايیما،
- يالمانینا يات، ائيوازیم.
- دؤرد يانیمدی اتدن قالا،
- قولوم تۇتمور قێلینج چالا.
- کۆردوغلوينان ساغا، سولا
- شئشپرینی آت، ائيوازیم!
- آل کوراوغلو صداسینی،
- کئچ دريالار آداسینی،
- پاشاسینی، گداسینی
- بیر-بیرینه قات، ائيوازیم!
- بۇ دمده دلی حسننن دمیرچیوغلو يئتیشدی. دلیلرین دلی
- نره‌سی عالمه لرزه سالدی. پاشانین قوشونو بوغاناغین قاباغیندا بۇرومبوروم
- اولان چؤر-چؤپ کیمی بۆکولوب اۆز قويدو قاچماغا...
- کوراوغلو هاي وۇردو کی، پاشانی تۇتوب گتیرین! شهر اهلی عرض ائله‌دی کی،
- پاشا چوخدان قاچیب. کوراوغلو يامان بد حالدايدی. دردیننن، قمیننن،
- حیرصیننن-هیککه‌سیننن هۇشو اؤزونده دؤيولدو. نره تپدی کی،
- شهره اود وۇرون. دلی حسن شهرین آغساققاللاریينان ایره‌لی يئریدی کی،
- بس شهر اهلی‌نین ندی گۆناهی؟ کوراوغلو يۇخودان آيیلان کیمی اولوب
- اؤزونه گلدی. آغساققاللارین قاباغیندا دیز چؤکوب عۆذر ایسته‌دی..
- دئ شهرین کور‌اوغلونو ایسته‌ينلری يئریگیب خاهیش ائله‌دیلر کی، مئيیدی
- وئر، دفن ائلیيک. نه دلیلر راضیلاشدی، نه ده کوراوغلو.
- ایش بئله اولاندا، بیر تابوت دۆزلتدیلر، قارا کجاوه بزه‌يیب جنازه‌نی
- وئردیلر دلیلرین چیينینه. بیچاره دلیلر قمدن دريا کیمی دالغالانادالغالانا
- اۆز قويدولار چنلیبئله.
- کوراوغلو بیر مدت نه ائيله‌يه‌جه‌يینی، هايانا اۆز تۇتاجاغینی کسدیره
- بیلمه‌دی. دلی حسننن دمیرچیوغلو دا قالمیشدیلار اونون يانیندا.
- هاچاننان هاچانا دلی حسن دئدی:
- – کوراوغلو، داي اولان اولوب، کئچن کئچیب. آرتیق فیکیردن بیر کار يوخدو.
- پاشا دا الدن چێخیب. واخت ایتیرمه. سۆر آتینی، گئدک مئيیدیمیزی دفن
- ائله‌يک، سونرا گلیب پاشاينان دا، خوتکارنان دا حسابیمیزی چکریک.
- کوراوغلو دینمزجه، آتینین باشینی دؤندریب اۆز قويدو چنلیبئله.
- قوي بۇننار اؤز دردیينن گئتمکده اولسون، گل سانا بیر آز دا تکتورکماننان
- ائيوازین آتا-آناسیننان دانیشیم.
- ائله کی، قسساب آلی تويدان قايیدیب ائيوازین گله‌جه‌يینی خبر وئردی،
- بیچاره زرقلم آروادین گؤزدری تیکیلدی يوللارا...
- آمما ائيواز لنگیدی. هر گۆن، هر سانیيه زرقله‌مه بیر ایل کسیلدی.
- يازیق آنا حسرته تابلاشا بیمله‌يیب پئشه ائله‌دی آغلاماغی. قسساب آلی
- زرقلمی ها يۇباتدی کی، بۇ گۆن گلر، صاباح گلر، عمل يئمه‌دی، زرقلم
- کیریمک بیلمه‌دی.
- بیر سحر يئنه قسساب آلی مال-حئیوانی راحتلايیب ائوه قايیداندا،
- قاپیيا چاتمامیش، زرقله‌مین باياتیسی اۆرگینه حاکم کسیلدی:
- داغدا جئيران مله‌دی،
- بۇلود لئيسان اله‌دی،
- چاغیریرام، گلمیرسن،
- ائيواز، وفان بئله‌دی؟!
- قسساب آلی باخدی کی، بئله گئتسه، آرواد يئنه ياتاغا دۆشه‌جک. گلیب
- تسکینلیک وئردی:
- – آي آرواد، آخی نیيه گؤزونون ياشینی ائلیگیبسن آبو-لئيسان؟ آدام
- دا ساغ-ساغ بالاسینی آغلیيارمی؟ کیم بیلسین، باشلاری قاریشیب هانسی کئفه؟
- بیر ایکیجه گۆن ده صبر ائله، گؤرک!
- يازیق آنانین صبر ائله‌مه‌يه تاقتی قالمیشدیمی کی؟ گؤردو کی، هئچ
- آلینین اۆرگی اونون اۆرگی دئيه‌نی دئمیر، آغلايا-آغلايا دئدی:
- گؤزوم قالیبدی يوللاردا،
- بیر بالامی آنارام من.
- گله‌جک دئدین، گلمه‌دی،
- اود تۇتارام، يانارام من.
- قمیننن دۆشدوم ياتاغا،
- بالام کئچمه‌دی سول-ساغا،
- دؤنموشم ساری يارپاغا،
- اۇچوب يئره قونارام من!
- باخان يوخدو گؤز ياشیما،
- حسرت قالدیم آداشیما،
- کیمیم دولانسین باشیما،
- پرواناسیز فنارام من!
- بۆلبولو ترک ائتمیش باغام،
- سۇيو قۇروموش بۇلاغام.
- ياغسیز يانان بیر چێراغام،
- کۆلک اثر، سؤنه‌رم من!
- زرقله‌مم، چوخ بدحالام،
- دیلیم سؤز گتیرمیر، لالام،
- منیم کی بیرجه‌دی بالام،
- نیيه اوننان کنارام من!
- بۇ آه-ناله قسساب آلینین دا اۆرگینه اود سالدی. باخدی کی، اولاسی ایش
- دئيیل، دئدی:
- – ایندی کی، بئله اولدو، جانین دا بیر آز ياخشیدی، حاضیرلاشاق، گئدک گلین
- گؤرومونه. بیر سن ده چنلیبئلی گؤر. اوندا دا اۇشاقلاری گتیریب بیر توي دا
- بۇردا ائلریک! – او، آتماجادان دا قالمادی، – ایندی ائيوازی قێنیيیرسان،
- قورخورام، چنلیبئلی گؤرننن سونرا آياغینی دیره‌يه‌سن کی، گئتمیرم،
- قالیرام بۇردا!..
- زرقله‌مین گؤزونه ایشیق، دیزینه تاقت گلدی. ائله بیل اولدو تزه گلین.
- بۇ خبر يايیلدی تکه-تۆرکمانا. چنلیبئله گلین گؤرومونه
- گئتمک اولا، تکه-تۆرکمان ائلی اولا! دئ کور‌اوغلونو ایسته‌ين حاضیرراشدی!..
- اۆچجه گۆندن سونرا قسساب آلی نئچه-نئچه قێرمیزی کجاوه‌سی اولان
- چوخ بؤيوک بیر کارواننان يول باشلادی چنلیبئله.
- کاروانی گؤرن بئله حساب ائدردی کی، چین پادشاهی هیند پادشاهی‌نین
- قێزینی اوغلونا گلین آپاریر!..
- ایش بئله گتیردی کی، جنازه‌نی گتیرن دسته چنلیبئل اته‌يینه چاتاندا
- آلینین کاروانی دا چاتدی...
- دلیلر دايانیب گؤزله‌يیردیلر کی، کوراوغلو گلیب يئتیشسین، بۇندان
- بئله اؤزو قاباغا دۆشسون...
- قسساب آلی ياخینناشاندا، باخدی کی، بۇدو، بیر دسته دۆشرگه سالیب،
- اؤزلری‌نین ده قارا کجاوه‌لری وار. تئز هاي وۇردو، کاروان داياندی:
- – بۇنلارین يانیندان بئله کئچمک ياخشی دئيیل. دردلرینی بیلک، ایزن
- آلاق، اوندان کئچک. بلکه کؤمک لازیمدی!
- قسساب آلی ایره‌لی يئریگیب خبر آلدی:
- خبر آلیم، ار قارداشدار،
- کجاوه‌نیز قارا نیيه؟!
- قلبی قملی، گؤزو ياشدار،
- دۆشموسونوز دارا نیيه؟!
- کیم گؤرسه بۇ درده يانی،
- مرده قۇربان نامرد جانی.
- اۇجا داغلارین ترلانی
- دۇستاق اولوب سارا نیيه؟!
- منه دئيین، قوچ ایگیدلر،
- کیمنن سیزه ديَیب خطر؟
- هوسنن بسدنن گۆللر
- قیسمت اولوب خارا نیيه؟!
- دردینیزی دئيین بیزه،
- کؤمک الی وئرک سیزه.
- آخی سیزین دردینیزه
- تاپیلمايیر چارا نیيه؟!
- قسساب آلی باخدی هئچ کیم دینمیر، يئریننن ترپه‌نیب جاواب وئرمیر.
- بیلدی دردلری آغیردی. ایزن آلماق ایسته‌دی، آمما سؤزو بئله چێخدی:
- آلی بۇردان آرالیدی،
- او خسته‌نیز هارالیدی؟
- اؤلوب، يوخسا يارالیدی،
- اونا ديَیب يارا نیيه؟!
- دلیلر باياقدان تانیمیشدیلار اونو. آمما کیمین نیطقی گتیریردی کی،
- دینه، کیمین قدمی تۇتوردو کی، ایره‌لی يئریيه، جاواب وئره؟!
- ائله بۇ دمده کوراوغلو يئتیشدی. گؤردو نه! قسساب آلی! اونون قێرمیزی
- کجاوه‌لی کاروانی!.. آتدان آشیریلیب، قسساب آلینی آلدی قوللاری‌نین
- آراسینا... هر گؤزوننن بیر دامجی ياش سۆزولوب يئندی بیرجه گۆنون
- ایچینده گؤزلری‌نین آلتیندا داغ کیمی باش قالدیرمیش آلما سۆموکلری‌نین
- اۆستونه... دئيیللر کی، آنادان اولاننان بۇ گۆنه کیمی کور‌اوغلونون گؤزونده
- گؤرونن ياش بۇيدو!..
- او ساعت قسساب آلینین اۆرگینه دامدی کی، ایش ائيوازین باشیندادی.
- آمما بیلمه‌دی اؤلوب، يوخسا يارالیدی. باخدی کی، کوراوغلو يامان بد حالدادی.
- اؤزونو توخدادیب او دا قوللارینی دولادی کور‌اوغلونون بوينونا. سونرا
- بیر آز گئری چکیلیب خبر آلدی:
- آچ سؤيله سیررینی، بیلیم دردینی،
- جۆمله ایگیدلرین باشی، کوراوغلو.
- دئيیللر، گئدنده دۆشمان اۆستونه،
- قويماز داش اۆستونده داشی کوراوغلو!
- کوراوغلو اۆرکدن گلن يانیقلی بیر آه چکیب قسساب آلینین جاوابیندا
- دئدی:
- خبر آلما، قسساب آلی، دردینی،
- زهرنن يئيیبدی آشی کوراوغلو:
- يۆز ایل پاشالارا آل ائيله‌يیبدی،
- آخیردا اولوبدو ناشی کوراوغلو!
- قسساب آلی دئدی:
- قويار دوست يولوندا باشی، جانینی،
- ایچر اووچو ایله دۆشمان قانینی.
- يێخار پاشالارین خانیمانینی،
- بیر دفعه اويناتسا قاشی کوراوغلو!
- کوراوغلو دئدی:
- داها بۇننان بئله آچارمی قالی
- سێنیق قاناد لاچین اولماز هاوالی.
- باخدی ياتیب، اۆز دؤندریب يێغوالی،
- تؤکوبدو قاباغی-قاشی کوراوغلو!
- قسساب آلی آنلادی کی، کور‌اوغلونون دردی چوخ بؤيوکدو، آمما
- نه‌دنسه، آچیق دئمیر. اودو کی، اونون گؤزدرینده‌کی ياشا ایشاره ائله‌دی، بیلدی
- کی، دۆيون بۇننان آچیلاجاق:
- قسساب آلی اۆز تۇتوبدو داغلارا،
- قصدی وار، ایگیدلر يۇردونا وارا!
- ایگید قووغا گۆنو آلسا، مین يارا،
- آخماز گؤزدری‌نین ياشی، کوراوغلو!
- کوراوغلو يئنه بیر آه چکدی. ائله آه چکدی کی، اگر بۇ آهین آلووو، اودو
- اولسايدی، داغلار بیر گؤز قێرپیمیندا اریگیب سۇيا دؤنر، دريايی-عمّانلار
- دا بۇخارا چئوریلیب گؤيه چکیلردی. يوخ، اگر بۇ آه تۆستولو اولسايدی،
- دۆنيانین اۆزونده بیر ایل گؤز-گؤزو گؤرمزدی. او، اللرینی سینه‌سینده چارپازدادی،
- يازیق گؤرکم آلدی، ایستر-ایسته‌مز، ياواش-ياواش دئدی:
- سینه‌مین باشیننان کامان قۇرولسا،
- گؤز قێرپمارام، مین بیر يارا وۇرولسا.
- هانی آماناتیم؟ – دئيه سورولسا،
- قان تؤکر گؤزوننن ياشی کوراوغلو!
- بۇ يئرده قسساب آلی نه قدر ائله‌دیسه، اؤزونو ساخلايا بیلمه‌دی.
- جۇمدو قارا کجاوه‌نین اۆستونه. کجاوه‌نی قۇجاقلايیف دئدی:
- آي آغالار، آي قاضیلار،
- ياتان ائيواز خان اولماسین!
- سینه‌سینده درین يارا،
- اۆرگینده قان اولماسین!
- مارالسیز اولماسین چؤلوم،
- سوناسیز قالماسین گؤلوم،
- مانا گلسین گلن اؤلوم،
- ائيواز يۇخودان اولماسین!
- يازیق جانیم دۆشدو درده،
- آهیم قالخیر پرده-پرده،
- قێلینج وۇرسون مرد نامرده،
- آرادا شیطان اولماسین!
- خۇدام بۇيورماسین فرمان،
- دوستوما گۆلمه‌سین دۆشمان.
- خئيیر ایشه گئدن کاروان
- منزیلده پئشمان اولماسین!
- آلی اولماز آهی-زارسیز،
- داغ باشی قالماسین قارسیز!
- ایگید قالدا هاوادارسیز،
- ایگیدسیز مئيدان اولماسین!
- بۇ ياننان دا تکه-تۆرکمانین ایگیدلری قسساب آلینین بئله
- لنگیدیگینی گؤرنده، يئریدیلر ایره‌لی گؤرسونلر بۇ نه ایشدی...
- قسساب آلی هايقیردی کی، قايیدین کجاوه‌لری قارا بزه‌يین!
- اوننار قايیدیب کجاوه‌لری قارا بزه‌ينده، يازیق زرقلم ائله
- بیرجه دفعه “اۇۇيي” ائله‌دی، هۇشونو ایتیردی.
- قسساب آلی يازیق آنانین بۇ حالینا تاب گتیرمه‌يیب قارا کجاوه‌نی
- سسله‌دی، الینی گؤيلره قالدیردی:
- خۇدايا، عجلین مانا يئتیشسین،
- ائيواز تزه بیتیب، بويا گلیبدی!
- بیر معجزه گؤرست، بالام اويانسین!
- دئيیم کی، ارننر هويا گلیبدی!
- آنان حسرت قالدی گۆل جامالینا،
- باخا بیلمز سنین بئله حالینا!
- علاجی کسیلیب، دۆشوب دالینا،
- قالخ، ائيوازیم! آنان تويا گلیبدی!
- قسساب آلی آهو-زاردا قالیبدی،
- بالا دردی اونو اودا سالیبدی.
- گؤريدیم، نامردمی تورا سالیبدی،
- يوخسا مرد قێلینجی سويا گلیبدی؟!
- قسساب آلی سؤزونو تامام ائله‌دی. اؤزونو توختاتدی. باخدی کی، کور‌اوغلونون
- حالی حال دؤيول، باشیننان دۇمان قالخیر. اونون قولوننان تۇتدو:
- – کوراوغلو! سن دۆنيا گؤرموش آدامسان. اؤزون بیلیرسن کی، تقدیره
- تدبیر يوخدو. ایشدی، اولوب کئچیب. آتالار دئيیب کی، سۇ سنيی سۇدا سێنار. ایگید
- يارانیب کی، قالدا يارالانا، داوادا اؤله. هله اللهین يازیسینی پوزان اولمويوب.
- بیزیمکی ده بئله يازیلیبمیش. اینسان گرکدی کی، ناشوکور اولمويا!
- شۆکور خۇدانین درگاهینا! بۇدو، کۆردوغلو قاباغدادی. قوي ایندی او اولسون
- ایکیمیزین ده اوغلوموز. خیففتنن هئچ نه حاصیل ائله‌مک اولماز. تاپشیریق
- وئر! سۆر آتینی قاباغا! آپاراق مئيیدیمیزی قوياق حاق اؤيونه!..
- کوراوغلو دینمز-سؤيله‌مز، سۆردو آتینی قاباغا. قسساب آلی دا گؤستریشدر
- وئریب، آتینی سۆردو اونون آتینین يانینا...
- دئ چاتدی خبر چنلیبئله!.. هامی ديَدی بیر-بیرینه. بیرجه آندا قێزیل
- قان آغ بۇخاقلاردا چیچک آچدی. فرياد چنلیبئلی يێرغالاماغا باشلادی!..
- جنازه ياخینلاشاندا، آشیق جۆنون قاباغا يئریدی، الینی قۇلاغینا
- وئردی:
- من آشیغام، آلا باخ،
- ياشیلا باخ، آلا باخ.
- يۆز ایل آل ایشده‌دن ار
- بۇ گۆن دۆشوب آلا، باخ!
- من آشیغام، يانانا،
- يا نمکه، يا نانا،
- ائيوازا اوخ ديَیبدی،
- آغلا، قارداش، يان، آنا!
- نیگار خانیم اللری قوينوندا، باتمیش سسنن دئيیردی:
- عزیزیم ائيواز هانی؟
- خان بالام ائيواز هانی؟
- باشیم يامان آغریيیر،
- چاغیرین ائيواز خانی!..
- بیچاره زرقلم هۇشا گلن کیمی اولموشدو. اوتوردوغو قارا کجاوه‌نین
- ایچینده اللرینی قاباغا اۇزادیب يالواریردی:
- عزیزیم، آماناتا،
- آت وئرمز آمان آتا،
- کوراوغلو، خايین اولما،
- وئردیگیم آماناتا!
- ائلمی، ياری گلسین،
- سۆرولر ياری گلسین،
- قوخوسون اوننان آللام
- بالامین ياری گلسین!
- قسساب آلی باخدی بئله گئتسه، مئيیدین گؤتورولمه‌سی لنگیيه‌سیدی، يئنه
- کور‌اوغلويا اۆز تۇتدو:
- – کوراوغلو! سانا دئدیم آهو-زار ائله‌مه‌يین فايداسی يوخدو. مئيیدین
- لنگیمه‌سی ياخشی دئيیل. آخی اؤلوم چوخداندی. تاپشیریق وئر، قوي مئيید
- گؤتورولسون.
- کوراوغلو تاپشیریقلار وئردی. مئيیدی گؤتوردولر.
- تابوت قبریستاننیغا يئتدی. ائله کی، اونو مزارا ساللامالی اولدولار، قسساب
- آلینین اۆرگی تاب گتیرمه‌دی. اؤزونو ساخلايا بیلمه‌يیب شیکايتلندی:
- ظالیم فلک مننن دۆشدو برسته،
- مئيداندا اۆز-اۆزه دۇردو، آي هاراي!
- نامردلیک ائله‌دی، آلنان آپاردی،
- قولومدا تورونو قۇردو، آي هاراي!
- بدبختلیکده جانیم دۆنيادا تکدی،
- گۆنده مانا يئدیردیگی کؤتکدی.
- اوخونو دۆزلتدی، يايینی چکدی،
- سینه‌مین باشیننان وۇردو، آي هاراي!
- ائيواز، منی يالقیز قويما، آماندی،
- آخی بالا دردی چکمک ياماندی؟
- قسساب آلی کؤچور، آخیر زاماندی،
- بالا دردی اونو يوردو، آي هاراي!
- بۇ زامان هۆرو خانیم قفلتن آتدی اؤزونو تابوتون اۆستونه، يانايانا
- دئدی:
- هئچ کیم بئله اینصافسیزلیق ائله‌مز،
- بس سن ائيله‌يیرسن نه‌دن، آي ائيواز؟
- بۇ فلک ظۆلمونه، حاق سیته‌مینه
- تاب ائتمز، اریير بدن، آي ائيواز!
- فلک شۇخلوغومو الیمنن آلدی،
- آهیما باخمادی، گؤيه اۇجالدی.
- پرواز ائيله‌مه‌میش تورپاغا سالدی،
- ائيله‌دی باغریمی زدن، آي ائيواز!
- هۆرونون الیننن گئتدی ایختیيار،
- نه واختاجان آه ائيلیير، آغلیيار؟
- آماندی! منی ده اؤزوننن آپار،
- اۆز دؤندریب يالقیز گئدن، آي ائيواز!
- يازیق قێز بالاجا خنجرینی سینه‌سینه چاخاندا تۇتدولار. اینجاوارا
- يارا آز اولدو.
- کوراوغلو بۇ يئرده لاپ قئيزه گلیب دئدی:
- کوراوغلو بۇ گۆننن کئچیر باشیننان،
- بۇ خبر هر يئره يازیلسین گرک.
- تالان دۆشسون پاشالارین وارینا،
- اللری اللردن اۆزولسون گرک!
- يئریگین، ایگیدلر، مئيدان باشینا،
- زهر قاتین سیز خوتکارین آشینا.
- ال اۇزادین تورپاغینا، داشینا،
- اونون جاهجالالی پوزولسون گرک!
- کوراوغلو اؤلمه‌يیب، ياشايیر هله،
- هويدو، دلیلریم وئرین ال-اله،
- ائيوازین قاتیلی تئز کئچسین اله،
- گؤزدرینه میللر دۆزولسون گرک!
- کور‌اوغلونون سسی داغلاری، داشلاری لرزه‌يه سالسا دا، اولان اولموشدو.
- نوولاسیيدی، مئيیتی تاپشیردیلار مزارا.
- ایزدیهام ياواش-ياواش قبیرستانلیقدان چکیلیردی. يولدا بللی احمد
- ياناشدی دمیرچیوغلونا:
- – آيه، دمیرچیوغلو، بیر سیرر منیم قارنیمی يێرتیر آخی!..
- دمیرچیوغلو قملی-قملی باخدی اونون اۆزونه:
- – او نه سیرردی ائله، بللی احمد؟
- بللی احمد دۇروخدو. دمیرچیوغلو اونون گؤزدری‌نین ایچینه باخاندا
- دئدی:
- – آجیغین تۇتماز کی؟
- – نیيه تۇتور، دئ.
- بللی احمد اۇدقوندو. دمیرچیوغلو قاشدارینی چاتدی:
- – اوخونو آتیب يايینی نیيه گیزده‌دیرسن؟
- – واللاه، آي قارداش، منی قێناما...
- دمیرچیوغلونون صبری تۆکندی:
- – دی، دین گؤروم!
- بللی احمد گؤزدرینی اونون گؤزونه دیره‌دی:
- – بئله، بیز کی، بۇ قبره تاپشیردیق، بۇ، ائيواز دئيیلدی!..
- دمیرچیوغلونون گؤزدرینه قارانلیق چؤکدو. بیر خئيلی دینه بیلمه‌دی.
- گئجدن-گئج دئدی:
- – بۇ نه سؤزدو، احمد! آغلین باشیندادی؟!
- بللی احمد اونو بئله عذابا سالماغینا، دردینی آرتیرماغینا پئشمان
- اولسا دا دئدی:
- – واللاه، قارداش، نه دئيیرسن دئ، بۇ قبره قويولان ائيواز دئيیلدی.
- يادیندامی، دۇرنا تئلی گتیرمه‌يه گئدنده باغداد باغلاریندا بۇلاغین
- باشیندا اوتورموشدوق. ائيواز قوللارینی چێرمالايیب کاباب چکیردی. سن دئدین
- کی، احمد، گؤرورسنمی، الله قۆدرت قله‌مینی بیرینجی دفعه چکنده
- ائيوازا زیينت وئریب! گؤر او بیله‌يینده‌کی قوشا خال اونا نه ياراشیق وئریر؟!
- دمیرچیوغلونون قاشلاری لاپ چاتیلدی:
- – نوولسون کی؟
- – دايان ده! مئيیت يۇيولاندا سۇيو من تؤکوردوم، او خاللاردان بیر
- نیشانا يوخويدو.
- دمیرچیوغلو کؤکس اؤتوردو:
- – آغزینا سۇ آل! کوراوغلو بۇ سؤزو ائشیتسه باغری چاتدار. ائل سنی داشقالاق
- ائلر. اولا، بۇ سؤز گئجدی. ایکینجیسی ده، سنین فهمینه نه گلیب؟
- بَيم باخمادین کی، مئيیت قاپقارا يانمیشدی؟ بئله گؤرونور کی،
- اولجه آسیبلار، سونرا باشینی کسیبلر. آسیلان بدنده آغ يئر قالارمی
- اوندا خال بیلینه؟
- بۇ سؤزدر بللی احمدی سۇسدوردو. دئمه‌يه سؤزو اولمادی...
- دئيیللر، چننیبئلده چؤپ باشی قالمادی، هر يئری قارا بزه‌دیلر. او
- گئجه سحره‌جن دلیلرین زۆمزومه‌سیننن، جۆنونون باياتیسیننان،
- خانیملارین آغوسوننان، آتدارین کیشنه‌مه‌سیننن يئر-گؤي بیر-بیرینه
- قوووشوب لببئي دئدی، تکجه کور‌اوغلونون سسی چێخمادی.
- سحر آچیلدی. سحر همیشه اۆزونوزه خئيیرریيننن آچیلسین. هامی
- يێغیلمیشدی کور‌اوغلونون باشینا. قسساب آلی دا، آشیق جۆنون دا
- تاپشیرمیشدی کی، بلکه اونو دیندیره بیله‌سینیز...
- دلی حسننن دمیرچیوغلو گؤردو کی، احتیاطسیزلیق ائلیگیبلر،
- آخشامنان بری بره-بندرگاهین هامیسی بوش قالیب. دۆشمن گلیب آياق
- آلمازمی؟..
- اونلار مصلحتدشیب دلیلردن بیر نئچه‌سینی گؤندردیلر قاراوولخانالارا.
- تۆپداغیدان دا آغقايايا گئتمه‌لی اولدو. او، باشی سینه‌سینده
- قملی-قملی گئدیردی. بیر ده او زامان قالدیردی کی، بۇدو، آت دۆزونده
- يهرری-يۆيننی آتدار گؤرونور. قدملرینی برکیدیب او زامان چاتدی
- کی، بس بۇدورانا بیر ملکدی، هۆرودو، پریدی، قێلماندی، ندی بیلمیرم
- اوتوروب ائيوازین باشینی آلیب دیزی‌نین اۆستونه، بیر دیو گؤوده‌لی پهلوان دا
- اونون اۆزونه سۇ سپیر. قۇرويوب قالدی يئرینده. باخدی کی، اۆرگی آز قالیر
- آغزیننان چێخا! الله، بۇ نه سیرر اولا! بیردن آغلینا گلدی کی، بۇ يۇخودو،
- ائيوازی يۇخودا گؤرور. باخدی کی، ائيواز آيری پالتاردادی، قولو دا ساریقلیدی،
- ياراق-ياساغی دا يوخدو. گؤزدرینی گزدیردی کی، عربات دا آتدارین ایچینده
- يوخدو. اليقین ائله‌دی کی، يۇخودا گؤرور ائيوازی. ایندی قورخوسوننان
- گؤزونو قێرپمیردی کی، يۇخوم ديَیشر. ائيوازا دويونجان باخماغا
- چالیشیردی. بیردن باخدی کی، ائيواز ياواش-ياواش گؤزدرینی آچدی، باشینی
- ترپتدی، قالخماق ایسته‌دی، تۆپداغیدانین اۆرگی ده ترپه‌نیب تئللندی، اؤزؤزونه
- دئدی:
- آي آغالار، ائيواز بئله،
- ساغ اولايدی، آيیلايدی.
- گؤرونيدی گۆنش اۆزو،
- چنلیبئله يايیلايدی.
- گئجه دؤنيدی گۆندوزه،
- گؤزدریم باخايدی گؤزه،
- باشدیيايدی شیرین سؤزه،
- يئنه بیزنن سايیلايدی!
- تۆپداغیدان حسرت چکر،
- ائيوازا قۇربان اولسون سر.
- بئله‌جه دۇرايدی سحر،
- منیم باغریم اويولايدی!
- سسه ائيواز دۇروب اوتوردو. آياغا قالخماق ایسته‌ينده پهلوان
- زامین اولدو. قالخیب آستا-آستا يئریدی تۆپداغیدانا طرف. تۆپداغیدان
- کیرپیگینی قێرپدی، گؤزونو آچدی کی، ائيوازدی. گؤزلرینی سیلیب باخدی کی،
- ائيوازدی، يئریگیر اونا ساری. بیردن گئری دؤنوب باشدادی قاچماغا...
- بۇ ياندا بیر ده گؤردولر کی، تۆپداغیدان “ائيواز! ائيواز!” دئيدئيه
- ائله گلیر، ائله بیل بوغاناق گلیر.
- او، يئتیریب اؤزونو آتدی کور‌اوغلونون اۆستونه. دئيیللر، کور‌اوغلونون
- گؤزونده ایکی دامجی ياش دا اوندا گؤرونوب. کوراوغلو بئله حساب ائله‌دی کی،
- تۆپداغیدان دلی اولوب. تۆپداغیدان هسکلیيه-هسکلیيه سوروشدو:
- – کوراوغلو، گئجه‌دی، يا گۆندوز؟
- کور‌اوغلونون دیلی آچیلدی:
- – گۆندوزدو، اوغلوم! اؤزونو توختات! باخ، هامی يانیندادی...
- تۆپداغیدان تۆپورويونو اۇددو:
- – من آت دۆزونننمی گلیرم؟
- – بلی، سن آت دۆزوننن گلیرسن...
- تۆپداغیدان دیکلدی، گؤزونو دولاندیردی دلیلرین اۆزونده، اؤزونو
- ساخلايا بیلمه‌دی، هؤنکوره-هؤنکوره دئدی:
- – ايم گۆندوزدوسه، من آت دۆزوننن گلیرمسه، ائيواز اودو آت
- دۆزونده!
- هامی پئشمان اولدو. اليقین ائله‌دیلر کی، باشینا هاوا گلیب. او باخدی کی،
- هامی سئوینمک عوضینه پئشمان اولدو، بیردن آتیلیب ترپندی آت دۆزونه
- طرف. کوراوغلو هاي وۇردو کی، قويمايین، اؤزونو داش-قايادان آتاجاق!..
- دلیلردن بیر نئچه‌سی دۆشدو اونون دالینجا.
- آشیق جۆنون اونلارین دالینجا باخا-باخا الینی وئردی قۇلاغینا:
- آمان الله! يوخسا جلال پوزولور،
- کور‌اوغلونون باخدی ياتیر، ندی بۇ؟
- نیيه بیردن اللر الدن اۆزولور،
- چنلیبئلین سونو چاتیر، ندی بۇ؟
- قابیمیزدان شربتیمیز چالانیر،
- باغریمیزدا سؤنمز اوجاق قالانیر،
- خزان وۇرور، گۆللریمیز تالانیر،
- گمیمیزمی سۇدا باتیر، ندی بۇ؟
- آشیق جۆنون، قددین يامان بۆکولور،
- قم لینگ سالیر، کؤنلون ائوی سؤکولور،
- يوخسا گؤيدن اۆستونه اود تؤکولور،
- حاق آشینا زهر قاتیر، ندی بۇ؟..
- دلیلر ها اوردا، ها بۇردا، او زامان يئتیردیلر کی، ائيواز تۆپداغیداننان
- سوروشور:
- تۆپداغیدان، بَيان ائيله،
- نیيه گئيیب قارا چنلی؟
- هانی کوراوغلو گؤرونمور،
- نه‌دن آلیب يارا چنلی؟
- تۆپداغیدان جاواب وئردی:
- سنی پریشان گؤرموشم،
- اۆرگیم بیرتهر اولوب،
- چنلیدن گئتدیگین گۆندن
- پئشمیز قم-قهر اولوب.
- آلدی ائيواز:
- نه قمدی چنلیيه گلن،
- بۇ درددی باغریمی دلن.
- سؤيله گؤروم کیمدی اؤلن
- هاچان دۆشوب دارا چنلی؟
- آلدی تۆپداغیدان:
- هارا گئتدین بیلمه‌میشیک،
- هامی ساغدی، اؤلمه‌میشیک.
- نه مدتدی گۆلمه‌میشیک،
- يئدیگیمیز زهر اولوب!
- ائيواز باخدی کی، گۆناهکار اؤزودو، خجالتنن دئدی:
- ائيوازام آلیشار جانیم،
- دردیم چوخدو نئجه دانیم.
- آغلامیر کی، نیگار خانیم،
- گلمه‌يیب کی زارا چنلی؟
- تۆپداغیدان دئدی:
- دلیلر سنسیز قالمیشدی،
- آهی گؤيه اۇجالمیشدی.
- چنلینی ظۆلمت آلمیشدی
- گۆنش دوغوب، سحر اولوب!
- اونلار ائيوازگیلی آرايا آلیب گؤروشدولر. سونرا دا گؤتوروب اۆز تۇتدولار
- کور‌اوغلونون يانینا.
- بۇ طرفدن هامی باخدی کی، بۇدو، ائيواز گلیر.
- هئچ کیم گؤزونه اینانا بیلمیردی. بیردن بللی احمدین سسی ائشیدیلدی:
- – آيه، دمیرچیوغلو، نئجه بیلیرسن! ه، دئمه‌دیممی بیزیم مزارا
- تاپشیردیغیمیز ائيواز دئيیل؟..
- ائيواز ایندی درک ائله‌دی کی، اؤلن اؤزودو، گۆناهی دا نه درجه‌‌ده‌دی.
- کوراوغلو دیللندی:
- – ائيواز بالا! اللهی سئورسن، بیزی تئز آگاه ائله گؤرک، سن ائيوازسانسا،
- بس بیزیم بايازیددن بۇرا چیينیمیزده گتیریب دفن ائله‌دیگیمیز
- کیمدی؟
- ائيواز باشینی سینه‌سینه ايیب دئدی:
- – جان کوراوغلو، گؤرورسونوز کی، من ائيوازام. او گتیردیگینیزین کیم
- اولدوغونو، احوالاتین مغزینی بۇ قێزدان سوروش.
- کوراوغلو مرجان خانیما اۆز تۇتدو:
- – گؤزل بالام! دئ گؤروم بۇ نه احوالاتدی؟
- مرجان خانیم دئدی:
- – مرد کوراوغلو! اولجه‌دن منیم بیر ایلتیماسیم وار، دئيیم،
- قبول ائله‌سه‌نیز احوالاتی دانیشارام، ائله‌مه‌سه‌نیز، بیز گئده‌سیگیک، ائيواز
- اؤزو دانیشار.
- کوراوغلو فیکیرلشمه‌دن دئدی:
- – دئ، خانیم بالام! نه ایلتیماسین اولسا قبول ائلریک!
- مرجان خانیم اۆرکلندی:
- – ایلتیماسیم بۇدو کی، گرک ائيوازین گۆناهلاریننان کئچه‌سینیز!
- – قێزیم، ائيواز کی، ساغدی، اونون نه گۆناهی وار، کئچیرم. ائله بیلیرم
- کی، هامی کئچر.
- هامی بیر آغیزدان اۆرکدن دئدی کی، کئچیریک ائيوازین نه گۆناهی اولسا!
- تکجه هۆرو خانیم اۆرکسیز دیندی. اونون اۆرگی تیتره‌دی. ائله بیلدی کی،
- ائيواز بۇ دۆنيا گؤزه‌لینی اؤزونه گتیریب، ایلتیماس دا بۇ اولار...
- مرجان خانیم دئدی:
- – بۇ احوالات آشیقلارین دانیشدیغی کیمی بیر داستاندی، ایزن وئرین، بۇ
- اوغلان دانیشسین.
- ایزن وئریلدی. کانکانوغلو احوالاتی دانیشاسی اولدو. اونون دانیشدیغی داستانین
- مظمونو بئله يدی:
- کانکانوغلو دئدیگیمیز همین اوغلانین آدی بؤيوککیشیيدی. او، بايازیدده
- کانکان ایرزاقولو دئيیلن بیر کیشی‌نین اوغلويدو. ایرزاقولو کانکانلیق
- ائلیگیب کۆلفتینی دولاندیریردی. بیر گۆن تورپاق اۇچوب اونو هلاک ائله‌دی.
- باشسیز قالان کۆلفتی اون ایکی ياشلی بؤيوککیشی دولاندیرمالی اولدو. بؤيوککیشی
- هانسی ایشدن ياپیشدی، هانسی صنعته يؤنلدیسه، الی گتیرمه‌دی. اون آلتیون
- يئددی ياشیندا آتاسی‌نین دوستلاری اونو ياننارینا آپاردیلار. او دا آتا
- صنعتیينن چؤرکپولو قازانماغا باشلادی...
- ایگیرمی ایکی-ایگیرمی اۆچ ياشلاریندا بؤيوککیشی بیر اوغلان اولدو کی، بیر
- گؤرن بیر ده گؤروم دئيیردی. اونون جامالینا، کمالینا چوخلاری حسد
- آپاریر، چوخ قێزلار-گلینلر اونون خيالیينان ياشايیر، چوخلاری دالدالاردان
- اونو اوغرون-اوغرون، حسرت-حسرت سۆزور، چوخلاری اونون بويبوخونونا
- باخماقدان دويموردو...
- بلی، قێزلار-گلینلر بؤيوککیشی‌نین عاغیل-کمالینا، بوي-بۇخونونا،
- قدد-قامتینه حئیران، حسرت اولدوغو کیمی، پاشالار، بَيلر، آغالار،
- خانلار دا اونون قئيرتینه، قۆووتینه، جسارتینه، جۆرتینه الینین ایشینه
- حئیران حسرتیيدیلر.
- بؤيوککیشی‌نین الیننن صنعت قۇرتارمیردی. سددی-سوراغی ماهاللاردا،
- اؤلکلرده سؤيله‌نیردی. ایندی اونو کانکانوغلو دئيیب آختاریردیلار...
- بیر دفعه حسن خانین اوغلانلاری کانکانوغلونو مۇرادبيلیيه چاغیرتدیریب
- ایش دانیشدیلار. کانکانوغلو هوس و سلیقينن ایشه باشلادی...
- بیر سحر کانکانوغلو اؤز ایشینده ایکن، حسن خانین قێزی مرجان
- خانیم کۆلافیرنگیده گؤروندو. نئجه اولدوسا، کانکانوغلونون گؤزلری
- مرجان خانیمین آلا گؤزلریينن جالاشدی. آمما قێز بیردن گؤروندويو
- کیمی، بیردن ده گؤزدن ایتیب يوخ اولدو. قێزین گؤزوندن کانکانوغلونون
- اۆرگینه دۆشن محبت قێغیلجیمی قوررانماغا، سونرا دا آلیشماغا
- باشلادی..
- الینه چکیج، کۆلونگ آلاندان بری بیرجه دفعه ده ال-آياغینا وۇرمايان
- کانکانوغلو ایندی چکیجی هارا ائندیریردیسه الینه ديَدی، آياغینی يارالادی...
- او، نه قدر اؤزونو جمعله‌دیسه ده ایشله‌يه بیلمه‌دی. حالی گئتدیکجه
- بدلشدی. نه قدر اؤزونو دانلادی، قێنادیسا کی، من هارا، حسن خانین
- قێزی هارا؟ اولمادی! فیکیرلشدیکجه محبت اودو شدّت ائله‌دی. آخیردا ایشی
- قويوب شهره چێخدی، بازاری دولاندی کی، باشی قاریشا، يادیننان چێخا...
- بیر تانیش قاری واریيدی. تصادوفن راست گلمیشدی. بیبیسینه اوخشادیغینا
- گؤره اونا قانی قاينامیشدی. هردن يانینا گئدر، سووقات آپاراردی. قاری‌نین
- دا کانکانوغلونا چوخ بؤيوک محبتی، حؤرمتی واریيدی.
- کانکانوغلو يئنه بازارلیق ائلیگیب قاری‌نین يانینا گلدی. قاری اونو
- گؤرن کیمی سوروشدو:
- – عؤمور-گۆنوم! بت-بنیزین نیيه بئله‌دی؟
- – هئچ، بیبی، بیر بالاجا آغریيیرام.
- – يوخ، بۇ بالاجا آغریماق دئيیل! آنانگیلدن خبر-زاد ائشیتمیگیبسن
- کی؟
- – يوخ ائله آغریيیرام.
- – واللاه، بۇ، آغریماق ایشی دئيیل!
- – به نه ایشی اولار، بیبی؟
- قاری دقتنن کانکانوغلونون گؤزلرینه باخدی:
- – ايم، ائودن آرخايینسانسا، بۇ، محبت دردیدی، گؤزومون
- نۇرو! يا قێزدان خبرسیز عشقه دۆشوبسن، يا دا “يوخ” جاوابی آلیبسان!
- هانسیدی، قادان آلیم؟!
- – هئچ هانسی!
- – دردینی مندن گیزلتمه، بالا، منی ده درده سالارسان!
- – دردیمین درمانی سنده تاپیلماز، بیبی، بیلسن دردین داها
- بؤيوک اولار.
- – دئ، بالا، بیلمک اولماز...
- کانکانوغلو يۇخالیب احوالاتی دانیشدی. قاری دئدی:
- – هه! قاباخکیننان خبرسیز وۇرولماق ياماندی! دۇرما، بیر
- بارماخ کاغیذ ياز، اۆرگینی آچ قێزا. بیر يول تاپیب يئتیررم. محبتین
- اودو گؤزدن کئچر اۆره يه. اير اوندا دا آلیشیبسا، بیر تدبیر فیکیرلشریک...
- کانکانوغلو نامه‌نی يازدی. قاری آلیب دئدی:
- – صاباح يوخ، او بیری گۆن بۇ زامان اولارسان بۇردا.
- کانکانوغلو بیر بالاجا توخدايیب ایشه قايیتدی.
- الی ایشه تزه‌جه ایسینمیشدی، باخدی يان-يؤره‌سینده دانیشیرلار کی، بس
- ایراوان سرداری حسینه‌لی خان مرجان خانیما ائلچی گؤندریب...
- چوخ کئچمه‌دی کی، خاننیخدا شاددیق باشلادی. بیریسی ده کانکانوغلونو
- مۇشدولوقلادی کی، دئمزسنمی، مرجان خانیمی نیشاننادیلار حسینه‌لی
- خانا...
- کانکانوغلو نامه‌سینه رۆسوايچی جاواب آلماسین دئيه ایشی ياریمچیق
- قويوب قايیتدی دۆز بايازیده...
- محبت اودو گۆن-گۆندن شدّت ائلیگیب کانکانوغلونو ايمه‌يه،
- اریتمه‌يه باشدادی. يازیق آناسی، بیچاره باجیلاری ها دولاندیلار باشینا کی،
- دردیندن حالی اولسونلار، بیر چارا آخداریب تاپسینلار، اولمادی...
- آرادان بیر ایل کئچدی، داي کانکانوغلونون الی ایشدن، گؤزو نۇردان
- قالمیشدی...
- بیر گۆن ائوده قملی-قملی اوتوردوغو، اؤز دردیينن اولدوغو واخت
- بیریسی گیردی ایچری. اونا بیر نامه وئریب چێخدی. کانکانوغلو فیکیرلی-فیکیرلی
- نامه‌نی آچدی کی، يازیلیب:
- بیر باخیشدا ایختیياریم
- اللریمنن آلان سنسن!
- آپاریب صبری-قراریم،
- منی درده سالان سنسن!
- منی سالان قم بحرینه،
- وئرن محبت قهرینه.
- اود وۇران کؤنلوم شهرینه،
- ائدن تالان-تالان سنسن!
- کاش اولايدین منیم ياریم،
- عهدینه دۆز وفاداریم،
- الدن آلیب ایختیياریم،
- سؤزو چێخان يالان سنسن!
- ياخشی تاپمیشدیم بابیمی،
- گئتدین، آپاردین تابیمی،
- هر گۆن کؤنول رۆبابیمی،
- ال اۇزادیب چالان سنسن!
- يازیق مرجان دؤندو قۇلا،
- گۆجونن ساتدیلار پۇلا،
- مانا يۆز گؤز تیکن اولا،
- آخیر ياریم اولان سنسن!
- کانکانوغلو دلی کیمی اولدو. اؤزونو آتدی چؤله، قاچدی اورا-بۇرا. هاياندايدی
- نامه گتیرن!
- بۇ بیر پارچا کاغیذ اونون بیر ایلده الیندن گئتمیش قۆووتینی، دیزیندن
- گئتمیش تاقتینی، گؤزوندن گئتمیش نۇرونو بیره-بئش اؤزونه قايتاردی...
- داي کانکانوغلو دۇروب دینجله بیلمه‌دی. آج آسلان کیمی اؤزونو
- يئتیردی مۇرادبيلیيه. قارینی آختاردی. خبر وئردیلر کی، “بیر اوغلوم
- ایتیب!” – دئيه درده دۆشدو، او دردنن ده آلتی آي بۇندان قاباق دۆنيادان
- کؤچدو...
- کانکانوغلو اونو دا بیلیردی کی، مرجان خانیمین قاپیسینی يالنیز
- دیلنچیلر آچا بیلر. اودو کی، اؤزونه بیر دست دیلنچی پالتاری دۆزلتدی. بیر
- طرفه چکیلیب اؤزونو ائله‌دی قوجا، آخساق بیر سايیل. الینه قێریق بیر عصا آلیب
- آخسايا-آخسايا چاتدی مرجان خانیمین ایمارتی‌نین قاپیسینا. اونا ديَیب
- دولاشان اولمادی. کئچدی ایچری. مرجان خانیمین قاپیسینی او زامان آچدی کی،
- بۇدو، حسینه‌لی خان اوتوروب نازبالینجین اۆستونده، مرجان خانیمی دا
- اوتوردوب يانیندا، ارکنن دئيیر:
- – بالام، بۇ نه ایناددی سن ائلیگیرسن؟! نیيه ایرازیلیق وئرمیرسن کی،
- تويوموزو باشلیياق؟! داي سن نه واختی گؤزدويورسن، مرجانیم منیم؟!
- مرجان خانیم دئدی:
- – سانا دئدیم کی، مننندیسه، من هله تويا راضی دئيیلم! بیر ایل
- ده گؤزله‌مه‌لیسن!
- حسینه‌لی خان دئدی:
- – آي اللهین بنده‌سی! ایسته‌يینی منه دئ گؤروم ندی؟! بالام، مال
- دئيیرسن منده، پۇل دئيیرسن منده، شان-شؤهرت دئيیرسن منده.
- زور-قۆووت دئيیرسن، او دا منده. داي سنین اؤزگه ایسته‌دیگین ندی؟!
- مرجان خانیم دئدی:
- – زورونو، قۆووتینی، مالینی، دؤولتینی منه گؤرستمه! بۇ، ایگیده
- ياراشان صیفت دئيیل، حسینه‌لی خان! بۇنلارین هئچ بیرینده منیم گؤزوم
- يوخدو. منیم ایسته‌يیمه قالسا، گؤزله‌يه‌جکسن، سنین زورونا قالسا، اونو
- سیز بیلرسینیز!
- حسینه‌لی خان هله ده ائله بیلیردی کی، قێز ناز ساتیر، شێلتاقلیق ائله‌يیر.
- فیکیرلشدی کی، يقین مئيلی ناغدی داش-قاشدی. اودو کی، چێخاردیب گتیردیگی
- ان باهالی بويونباغینی سالدی اونون بوينونا. قێزین اعتراض ائله‌مه‌مه‌سی،
- اونون قاردان آغ، پیله‌دن يۇمشاق اللری حسینه‌لی خانین شهوت
- دۇيغوسونو گۆجلندیردی، قێزین اینجه بیلکلرینی بیردن-بیره الینه کئچیریب
- اونو اؤپمک ایسته‌دی. ایش بۇ يئره چاتاندا، دیلنچی تاب ائله‌مه‌دی، دئدی:
- ائي سئوگیلیم، اینصاف ائله،
- گۆل اۆستونه خاری قويما!
- عهده وفايا گلمیشم،
- پوزولان ایلقاری قويما!
- آلدانما دؤولت-وارینا،
- گئتمه اغيار بازارینا،
- تۆلک ترلان شیکارینا،
- يئریش چکن ساری قويما!
- آمما نه مرجان خانیم، نه ده حسینه‌لی خان اونون ناله‌سینی
- ائشیده‌جک حالدا دئيیلدی. ائهتیراس حسینه‌لی خانی تامام يولدان چێخارمیش،
- ایختیيارینی الیندن آلمیشدی. مرجان خانیم دا آسلان آغزیندا قالمیش قۇزو
- کیمی جابالايیردی کی، بیلکلرینی اونون الیندن چێخارتسین. گۆل ياناغینی
- اونون مۇردار آغزینا قۇربان وئرمه‌سین. دیلنچی دئيیردی:
- مجنونام لئيلی داغیندا،
- دولانیرام سوراغیندا،
- گؤزلریمین قاباغیندا،
- گئدن ایختیياری قويما!
- سس بۇ دفعه مرجان خانیما چاتدی. ائله بیل، بۇ سسدن اونا ار قۆووه‌سی
- يئتیشدی، پهلوان زورو گلدی. بیر گۆج وئریب بیلکلرینی بۇ جاناوارین
- پنجه‌سیندن قۇرتاردی، اؤزونو دیلنچی‌نین اۆستونه آتدی...
- اؤزونو رۆسواي گؤرن، گؤزلری قێزمیش حسینه‌لی خان، مرجان خانیما
- دا درس وئرمک مقصدیينن خنجرینی چکیب قالدیردی کی، دیلنچی‌نین
- سینه‌سیندن وۇرسون، دیلنچی گؤيده بیله‌يیندن تۇتوب ائله سێخدی کی، خنجر
- الیندن يئره دۆشدو. ایشی بئله گؤرن خان آرادان چێخماغی قنیمت بیلدی...
- ایکی حسرتلی بیر مدت دینمز-سؤيله‌مز بیر-بیری‌نین اۆزونه باخدی.
- گئجدن-گئجه کانکانوغلو دئدی:
- حسرتینن اریمیشم،
- سسیم باتیب، کیریمیشم،
- آياغینا يئریمیشم،
- چکم آهو-زاری قويما!..
- حسن خانین اوغلانلاری حسینه‌لی خان دا يانلاریندا گیردیلر ایچری.
- اونسوز دا قان-قان دئين محمود خان قێلینجینی چؤلده چکمیشدی. ایسته‌دی
- کی، سايیلین باشینی آيیرسین بدنیندن، دیلنچی اۆز تۇتدو مرجان خانیما:
- يازیق سايیل چکر آهی،
- سنسن اونون قیبلگاهی!
- سانا گتیردیم پناهی،
- اؤلدوروللر، باری قويما!
- مرجان خانیم کئچدی قارداشی‌نین قاباغینا:
- – نه ایش گؤرورسن، آيه؟! ایندی ده منیم آتامین اوجاغینا دیلنچی قانی
- تؤکورسن؟! گؤرمورسن، يازیغین بیریدی؟ سايیلنان سنین نه ایشین؟!
- محمود خان هیککه‌لی-هیککه‌لی باغیردی:
- – ائله سنین اؤزون ده يازیق سايیلین تايیسان! اونا سێغینیب داغ بويدا
- کیشینی...
- مرجان خانیم اؤزونو بیر آز کؤورک، بیر آز دا غضبلی گؤستره‌رک
- دئدی:
- – آيیب اولسون حسن خانین اوغلانلارینا! حسینه‌لی خان دا اۇتانسین،
- هئچ دانیشماسین! – او، بیر آز دا کؤورلدی، – دیلنچی اولاندا نه اولار! منی
- بۇ کیشی‌نین يانیندا بیيابیر ائلیگیردی...
- محمود خان دوداغینی چئينه‌دی. مرجان خانیم سؤزونه داوام
- ائله‌دی:
- – بیلیرم، سیزین بۇ هشیرینیزین هامیسی اوندان اؤتریدی کی، من تويا
- ایرازیلیق وئرم. الله خاطیرینه، منیم داي سؤزوم يوخدو، گئدین، تويونوزون
- تداروکونده اولون!..
- مرجان خانیمین بۇ سؤزلری دۆنيايی-عالمی خانلارین گؤزونده نۇرا،
- چێراغبانا دؤندردی، يازیق سايیلین گؤزلرینده ده جهنم ظۆلمتینه
- چئویردی...
- محمود پاشا سئوینمیش، اۆزونو تۇتدو حسینه‌لی خانا، وجدنن
- دئدی:
- – حسینه‌لی خان! عزیزیم! اؤزون ياخشی ائشیتدین باجیمین سؤزلرینی! دی
- گئت حاضیرلیغینی گؤر، گل گلی‌نینی آپار! آمما باخ بۇردا، باجیمین
- يانیندا دا دئيیرم، اؤيونون بؤيوک خانیمی باجیمدی ها!..
- ایندیيه‌جن گۆنو اۆستونه وئریلدیگینی بیلمه‌ين مرجان خانیم ایکراه
- حیسسیينن اۆزونو چئویردی. حسینه‌لی خان بۇنا اهمیت وئرمه‌يیب
- الینی گؤزونون اۆستونه قويدو:
- – منیم گؤزوم اۆسته!
- محمود خان اۆزونو تۇتدو دیلنچیيه:
- – قۇربان اولاسان منیم باجیما! قۇربان اولاسان آتامین بۇ ناحاق
- قان گؤرمه‌میش اوجاغینا! باشیمیز قاریشیقدی. گئت، تويدا گلرسن، سنه
- چوخلو انام وئره‌رم!
- دیلنچی ایسته‌دی چێخسین، مرجان خانیم قويمادی:
- – دايان، آي يازیق! او نیسيه‌دی. هله منیم قاپیمدان سايیل بوش
- قايیتمايیب.
- او، پرده‌نین دالینا کئچدی، چوخ چکمه‌دی کی، بیر پارچا چؤرک گتیریب
- قويدو دیلنچی‌نین چانتاسینا. کانکانوغلو تئز چێخیب وئردی اؤزونو بیر دالدايا.
- چؤرگی چێخارتدی کی، مرجان خانیم بويونباغینی، بیر نئچه قێزیل، بیر
- بارماق دا کاغیذ قويوب آراسینا، باخدی کاغیذدا يازیب کی، گئج گلدین،
- من ایراوانا گئده‌سی اولدوم. سنی گؤزله‌يه‌جه‌يم، من يا سنینم، يا
- قارا تورپاغین! بی‌ایلقار، بی ایمان! کانکانوغلو ایراوانا گئتمه‌يه حاضیرلاشدی،
- حسینه‌لی خان دا توي تداروکونه باشلادی.
- آمما ایکی گۆندن سونرا توي خبری‌نین عوضینه واي خبری يئتیشدی
- کی، حسینه‌لی خانین توي آغامتی گلنده، کوراوغلو خويدان قايیدیرمیش،
- راستلاشیبلار، کوراوغلو اونو دۆنيادان کؤچوروب.
- احوالات بئله اولموشدو:
- خوي ماهالیندان رحیم آدلی بیر کندلی کور‌اوغلويا خبر چاتدیرا
- بیلمیشدی کی، ماهالین حاکمی ظالیم کبیر خان بیر جۆت اوغلومو شره سالیب
- تۇتدوروب، يئتیشمه‌سن، الدن گئده‌سیدیلر. کوراوغلو بئله هايدان قالاردیمی؟!
- خبری ائشیدن کیمی، بیر دسته دلی گؤتوروب اۆز تۇتدو خويا. کوراوغلو
- او زامان اؤزونو يئتیردی کی، رحیم کیشی‌نین اوغلانلاری دار آغاجی‌نین آلتیندادیرلار.
- کبیر خان هئچ بئله ایش گؤزله‌مزدی. دوغرودو، کور‌اوغلونون آدی، سسی
- ایران خانلاری‌نین دا، بَيلری‌نین ده، لاپ شاهین دا يۇخوسونو عرشه چکمیشدی،
- داي کبیر خانین آغلینا هاردان گلردی کی، او، بۇ يئرده اؤزونو چاتدیرار.
- نه باشینیزی آغریدیم، کوراوغلو کبیر خانین آشینا سۇ قاتدی. رحیم
- کیشی‌نین ده، چوخلو يوخسوللارین دا وايینی تويا دؤندردی.
- کوراوغلو گئری قايیتماق ایسته‌ينده، رحیم کیشی‌نین اوغلانلاری آشیق
- جۆنونا يالواردیلار کی، کوراوغلو بیزی ده قاتسین دلیلری‌نین جرگه‌سینه.
- آشیق جۆنون کور‌اوغلودان ایلتیماس ائله‌ينده، کوراوغلو رحیم کیشی‌نین
- اۆزونه باخدی. رحیم کیشی آچیق اۆرکله دئدی:
- – جان کوراوغلو! منیم اوغوللاریم اؤزلرینی سنین دلیلرینه تاي
- تۇتوللارسا، چؤرگیم ایتمه‌يیب. کیچیک اوغلوم پاشا بسیمدی. قوي بۇنلار دا
- اولسون سنین. بیرجه اونو آرزو ائله‌يیرم کی، تويلاریندا بیزی اۇنوتماياسان...
- رحیم کیشی‌نین مردانه‌لیگی، اوغلانلاری‌نین حرکتی کور‌اوغلونون
- خوشونا گلدی. اونلاری دا قوشدو دلیلرین جرگه‌سینه، اۆز تۇتدو چنلیبئله.
- دسته خويون ارازیسیندن چێخیب سلماسین اته‌يینه چاتاندا بیر تاجیر
- دسته‌سیينن قاباقلاشدی. تاجیرباشی جانینی قۇرتارماق اۆچون اۇيدوردو کی،
- تبریزه گئدیرم، هر ایل اوردا بؤيوک ایمام احسانی وئریرم کی، الله
- منه بیر اؤولاد اتا ائله‌سین.
- تاجیرباشی نه بیليدی کی، اون ایلدن بری ظۆلم ائلیگیب ياری آج-ياری توخ،
- چوخ زامان آياخيالین دوه اووساری چکدیردیگی، دیلی قارنیندا بیلدیگی يارمممد
- کیشی اونون يالانینی چێخارداجاق، اۆزونه دۇراجاقدی، نه پادشاهدان
- قورخاجاق، نه زینداندان، نه ده دار آغاجیندان.
- يارمممد کیشی کور‌اوغلونو تانیمیشدی. اونا گؤره ده ایره‌لی يئریدی،
- سلام وئریب دئدی:
- – آي يوخسوللارین پناهی، ائلین دیرگی! بۇ تاجیرباشی هر نه کی عرض
- ائله‌دی، هامیسینی يالان دئدی. بۇنون دۆزدو، زۆريتی يوخدو، آمما زۆريتدن
- اؤتری بیر قارا قۇروش دا خرج ائلمیر. بۇنون پئشه‌سی پادشاها قۇللوق
- ائله‌مک، هم اونو دۆنيانین آز تاپیلان ناز-نعمتیينن تعمین ائله‌مک،
- هم ده اونا مملکتین باش ترپه‌دن ایگیدلریننن يالان-گرچک
- خبر چاتدیریب اونلاری گۆدازا وئرمکدی. منی ده اؤلومه وئریردی، آند
- ایچدیریب دار آغاجیندان قۇرتاریب کی، عؤمروم بويو بئله‌جه آياقيالین اووسار
- چکم. اگر بۇنون اینصافی وارسا، نیيه منیم حالیم-گۆنوم بۇدو؟
- کیشی‌نین حالی هامی‌نین اۆرگینه اود سالدی، کور‌اوغلونون سینه‌سینه داغ
- چکدی. او، دلی بیر نره چکیب حؤکم ائله‌دی، تاجیرباشی ایله مممديارین
- گئيیمینی ديَیشدیرتدی. سونرا دا تاجیرباشی‌نین تورونا دۆشنلرین ایسته‌يه‌نینی
- خلاص ائله‌يیب ائوینه گؤندردی. تاجیرباشیيا اۆز تۇتدو:
- – سنی اؤلدورمورم. ائله بیلمه کی، سنه رحمیم گلیر. يوخ، سنی
- اؤلدورمورم اونا گؤره کی، گئدیب قۇللوق ائله‌دیگین شاها دئيه‌سن کی، بۇ
- دفعه اونون اۆچون آپاردیقلارینی پايلاياجاغام بۇ ماهاللارین يوخسوللارینا.
- قوي اونلارین دا عؤمرونده بیر دفعه آغیزلارینا شاه يئمی ديَسین.
- بیر ده دئيرسن کی، مملکتینده تؤرتدیگی بۇ ظۆلمه سون قويماسا،
- چنلیبئلدن کؤچوب ساوالاندا مسکن سالاجاغام!
- تاجیرباشی زاریيا-زاریيا دئدی:
- – کوراوغلو، سنین مردلیگین عالمه بللیدی. مردلیک ائله، آتیمی، بیر
- نئچه گۆنلوک ده آزوقه وئردیر منه گئدیب بیر يانا چێخیم.
- کوراوغلو گۆلدو:
- – تاجیرباشی، بلکه ده منیم مردلیگیم عالمه بللیدی، اونو ياخشی
- بیلمیرم. آمما اونو بیلیرم کی، آغلیم باشیمدادی، آخماق دئيیلم.
- سن گرک بۇ پالتاردا، بۇ کؤکده گئدیب بیر يانا چێخاسان کی، ائله‌دیگین
- ظۆلمون قدرینی بیله‌سن. بیر ده، قورخما، سن ده آخماق دؤيولسن کی،
- بۇ آرالاردا تاجیرباشی اولدوغونو بیلدیریب اؤزونو عجلین الینه وئره‌سن.
- گئت، سنه ياخشی يول!.. آمما تاپشیریغیمی اۇنوتما ها!
- بلی، کوراوغلو دئدیگی کیمی ده ائله‌دی. پادشاها گئده‌سی نه واردیسا يول
- اۇزونو پايلايا-پايلايا اۆز تۇتدو چنلیبئله. دلیلرین کئفی قالخمیشدی
- آلا بۇلوددان يۇخاری. آرازی کئچندن بیر گۆن سونرا کوراوغلو گؤزل بیر
- سئيرانگاها چاتدی. يؤنو بۇ طرفه گئدنده ده بۇ چمنگاهدان کئچمیشدی،
- آمما دايانا بیلمه‌میش، عهد ائله‌میشدی کی، گرک قايیداندا
- بۇردا بیر منزیل ائلیگیب دلیلره دینجلیک وئرم. او ساعت هاي وۇردو، دسته
- تؤکولدو چمنگاها، چادیرلار قۇرولدو. کور‌اوغلونون گؤستریشی ایله بیر
- چارهوووزون باشیندا لاپ ایری چادیر قۇردولار کی، بۇرادا اوتوروب صؤحبت
- ائده‌جک، آشیق جۆنونا قۇلاق آساجاقدیلار.
- دلیلر بئش گۆن ایدی دینجه‌لیردیلر. اونلار مشق زامانلاری سۆلئيمانی
- دا، کریمی ده بۆتون سێناقلاردان کئچیرمیشدیلر. هر ایکی قارداش شئشپر
- شاققیلداتماقدا، نه بیلیم، بۆتون داوا فندلری‌نین هامیسیندا کور‌اوغلونون
- دا، آشیق جۆنونون دا، بۆتون دلیلرین ده اۆرگینجه ایمتاهان وئرمیشدیلر.
- يئنه آخشام يئمه‌يیندن سونرا هامی بؤيوک آلاچیغا يێغیشمیشدی.
- حالايپوزانین خاهیشی ایله آشیق جۆنون تزه ایگیدلره لقب وئره‌جکدی.
- دلیلر يئربيئر اولاندا کوراوغلو آشیق جۆنونون اۆزونه باخدی. آشیق
- جۆنون سازی کؤينه‌يیندن چێخاردی، دۇروب اورتايا چێخدی، سازینی زیلینی زیل،
- بمینی بم ائله‌دی، سینه‌سینه باسیب اوخودو:
- چوخ دولاندیم، داغلار گؤردوم دۆنيادا،
- چنلیبئلین اۇجا داغی گؤزلدی!
- آغقايانین دۆشمن کئچمز کئچیدی،
- گۆللو يالین جۆت بۇلاغی گؤزلدی!
- سؤز دلیلری يئریندن اويناتدی. اونلارین آلقیش سسلری چادیری تیترتدی.
- کوراوغلو گؤردو بۇرنونون اۇجو گؤينه‌دی، گؤزلری ياشاردی. يادینا سالدی کی،
- بیرجه دفعه ده بۇرنونون اۇجو نیگار خانیم:
- ...هر قۇش بالاسیينان گزر،
- نیيه سنین بالان يوخدو؟
- – دئينده بئله گؤينه‌يیب. آمما اؤزونو او يئره قويمادی، زارافاتا سالیب
- آشیق جۆنونو قێنادی:
- – نه تئز قریبسه‌دین، آي آشیق جۆنون، چنلیبئلدن اؤتری؟ بۇرا دا
- صفالی يئردی، دئدیم دلیلر بیر-ایکی گۆن دینجلسین! سن حالايپوزانین
- خاهیشینی يئرینه يئتیر. يوخسا احتیاط ائله‌يیرسن کی، تاجیرباشی اؤزونو شاها
- يئتیرر، خبر وئرر، شاه دالیمیزجا دۆشر؟ قورخما، تاجیرباشی‌نین اؤيودنه‌سیهتینی
- ياخشی وئرمیشم، سن اؤز ایشینده اول.
- آشیق جۆنون بیر آز دا تأثیرلندی، آوازینی بیر خئيلی اۇجالتدی:
- چيیرتکه‌يه نصیحتله کار آشماز،
- اؤلموشلری زمیلره داراشماز.
- کور‌اوغلويا آرخايینلیق ياراشماز،
- دلیلرین قووغا چاغی گؤزلدی!
- سؤز کور‌اوغلونو برک تۇتدو. يئنه ساغ الی ایله بیر سێغال سول بێغینا، بیر
- سێغال دا ساغ بێغینا چکدی، ایسته‌دی کی، دینسین، باخدی کی، آشیق جۆنون دۆز
- آياق پرده‌دن باشلاماقدادی. دینمه‌دی، آشیق جۆنون سؤزونو تامام
- ائله‌دی:
- آشیق جۆنون، قمین نَيین قمیدی؟
- سؤزونو دئ، ایشرت ائيله، دمیدی.
- قێي وۇراندا کریم قارتال کیمیدی،
- سۆلئيمانین اوخ آتماغی گؤزلدی!
- يئنه “آفرین! احسن!” صدالاری چادیری دولدوردو. کور‌اوغلونون عینی
- لاپ آچیلدی:
- – سؤزونون آخیرینی ياخشی گلدین، آي آشیق جۆنون! يوخسا ائله بۇ ساهات
- يولا دۆشمک امرینی وئریردیم. آمما...
- کور‌اوغلونون سؤزو آغزیندا قالدی. کئشیکچیلردن بیری ایچری گیردی، ایره‌لی
- يئریگیب دئدی:
- – کوراوغلو، خئيلی آرالیدا، گۆن‌باتان طرفده بیر بؤيوک کارواندی-ندی
- دۆشوب...
- کوراوغلو دا اونون سؤزونو ياریمچیق قويدو:
- – نیيه کارواندی-ندی دئيیرسن، بیلمه‌دین کی، نچیدی، نکارادی؟
- – يوخ، کوراوغلو، بۇنو اسساه اؤيرنه بیلمه‌دیک. کیلید قۇلامین بیز
- گۆن‌باتان طرفینديیک. گؤردوک او طرفدن زۇرنا-دف سسی گلیر. دئمیرممی
- خئيلی آرالیدی. ياواش-ياواش گئدیب ياخینلاشدیق، ائله اونو اسساه
- ائلیيه بیلدیک کی، بؤيوک يێغینجاقدی. دئيه‌سن توي دم-دسگاهدی. بئله
- مصلحت ائله‌دیک کی، خبر وئرک، نئجه دئسه‌نیز، ائله ده ایش گؤرک.
- کوراوغلو سوروشدو:
- – دئيیرسن توي دم-دسگاهینا اوخشايیر، هه؟
- – بلی، کوراوغلو.
- کوراوغلو اۆزونو حالايپوزانا تۇتدو:
- – بیر دسته گؤتور، چوخ ياخین دۆشمه‌يین، ديَیب-دولاشمايین. ائله
- اۆستلرینده گؤز اولون. ترپنسه‌لر، قويمايین. گئجله‌مه‌لی اولسالار،
- سحره قدر گؤزله‌يین، سحر کیم اولدوقلارینی آيرید ائلرسینیز.
- تۆپداغیدان: – باش اۆسته، – دئيیب آياغا قالخدی. ایسته‌دیگی ایگیدلردن
- بیر نئچه‌سینه ایشاره ائله‌دی، چێخدیلار. کوراوغلو اۆزونو تۇتدو آشیق جۆنونا:
- – آشیق جۆنون، آفرین سنه کی، تزه ایگیدلرین لقبینی لاپ اۆرگیمجن
- وئردین! اوخ سۆلئيمان. قارتال کریم! ياراشیر! مۆبارک اولسون!
- هامی بیر آغیزدان “مۆبارک اولسون” دئدی. کوراوغلو سؤزونو داوام
- ائله‌دی:
- – ایش ده کی، بئله دۆشدو، آرخايین صؤحبتینی ائله، سحری گؤزله‌مه‌لی
- اولدوق.
- بلی، سحر آچیلدی، همیشه سحر اۆزونوزه خئيیره آچیلسین! حالايپوزان
- گؤردو بۇ دم-دسگاه لاپ بؤيوکدو، اؤزو ده آرخايینلیقدی، هله
- ترپنمکنن ایشلری يوخدو. بیر آز دا گؤزله‌دی، لاپ ایشیقلاشدی، هامی قالخیب
- يۇيوندو. گۆن چێرتاندا اۆچ نفر ده گؤتوروب يئریدی دۆشرگه‌يه. بیریسی
- قاباقلارینا دۇردو:
- – کیمسینیز، کیمی ایسته‌يیرسینیز؟
- – ائله بۇ دسته‌نین باشچیسینی گؤرمک ایسته‌يیریک، قارداش.
- – ائله بیلیرسینیز کی، آساندی بۇ دسته‌نین باشچیسینی گؤرمک؟
- – نیيه چتیندی کی؟
- – بیلیرسینیز بۇ دسته‌نین باشچیسی کیمدی؟
- – يوخ، بیلمیریک. بیلمک ایسته‌يیریک.
- – ائله اونچون بئله دانیشیرسینیز دا!
- – يوخسا نئجه دانیشاردیق کی؟
- – يوخسا؟ يوخسا دیلینیز سؤز تۇتمازدی!
- – نیيه؟
- – دئيیم، اوندا بیلرسن! بۇ دم-دسگاه ایروان سرداری حسینه‌لی
- خانیندی، بیلدین؟
- – بیلدیم. بیلیرسن من کیمم؟
- – کیمسن؟
- – قوچ کور‌اوغلونون دلیسی حالايپو...
- حالايپوزانین سؤزو آغزیندا قالدی. بۇ آدام کور‌اوغلونون آدینی ائشیدن
- کیمی چۇل تکین سریلدی يئره، دئ بیلدیرمی اؤلوبسن، يوخسا بۇ ایلمی. اونا
- کیمی ایکی باشقاسی اؤزونو يئتیردی. بیریسی قێژقیریلدی حالايپوزانین اۆستونه:
- – نئيله‌دی، ه بۇنا؟!
- – هئچ نه.
- – به نیيه بئله اولدو بۇ؟
- – اونو سن بیلرسن. يقین اۆستونده اۆرکگئتمه‌سی وارمیش. بیز اوندان
- حسینه‌لی خانی سوروشدوق، او دا بئله‌جه سریلدی يئره.
- – نئينیرسینیز سیز حسینه‌لی خانی؟
- – ائلچیگیک، سؤزوموز وار.
- – کیمین ائلچیسیسینیز؟
- – کور‌اوغلونون.
- – نه-ه-ه-ه؟..
- اونو دا، يولداشینی دا اسمه‌جه تۇتدو. آمما هۇشداری باشلاریننان
- چێخمادی. ائله‌جه دیللری قێفیللاندی، گئجدن-گئج بیری‌نین دیلی توپوق وۇرماغا
- باشلادی:
- – گئ-گئ-گئدک.
- حسینه‌لی خانین چادیری‌نین قاپیسیندا اۆچ آدام سیگیرمه قێلینج دايانمیشدی.
- بۇ گلنین دیری‌باشی بیری‌نین قۇلاغینا پێچیلداياندا الیننن قێلینج
- دۆشدو. مخلس، حسینه‌لی خانا چاتدیردیلار کی، اۆچ آدام قاپیدا دۇروب
- اونو گؤرمک ایسته‌يیر. اؤزدری ده دئيیرلر کی، کور‌اوغلونون ائلچیلریگیک.
- حسینه‌لی خانین دا جانینا اۆشوتمه دۆشدو. آمما اؤزونو بیر تهر توخدادیب
- امر ائله‌دی کی، چؤلده قوللارینی باغلايیب گتیرین ایچری. چؤلده ایسته‌دیلر
- کی، بۇنلارین قوللارینی باغلاسینلار، حالايپوزان بیریسینه بیر شاپالاق
- چکدی، يازیق يئددی دفعه فێررانیب دۆز ایگیرمی آرشین آرالیدا جۆللاندی يئره.
- بۇنو گؤرنده او بیریلر ال ترپتمه‌دیلر، حالايپوزان اونلاری او طرف بۇ
- طرفه ایتله‌يیب گیردی ایچری. حسینه‌لی خان اۇدقونوب قێشقیردی:
- – بۇ نه ادبسیزلیکدی؟!
- – ادبسیزلیک سیزدن باش وئردی، خان! بۇ دا تزه قايدادی کی، ائلچی‌نین
- قاپیدا قوللارینی باغلادیب قبول ائله‌يه‌سن؟
- حسینه‌لی خانین آغلی تزه-تزه باشینا يێغیلدی. باخدی کی، يامان
- يئکه قلت ائله‌يیب. آمما اؤزونو توخداق تۇتوب دئدی:
- – بۇ هانسی قايدادی کی، هر يئتن اؤزونو کور‌اوغلونون ائلچیسی آدلاندیریر.
- – اینانماماقدا حاقلیسان، خان. آمما بۇ حقیقتدی کی، من کور‌اوغلونون
- ائلچیسی يوخ، دلیلریننن بیری حالايپوزانام. اؤزو ده کور‌اوغلونون
- تاپشیریغی ایله آخشامدان بری سنین کئشیگینی چکمیشم. ایندی ده بیلمه‌لیيم
- کی، هارادان گلیب هارايا گئدیرسن.
- حسینه‌لی خانین گؤزلری ایریلدی:
- – دوغرو دئيیرسن؟
- – بیزیم دیلیمیزه يالان گلمز، خان!
- – هاردادی ایندی کوراوغلو؟
- – قاپیيا چێخسان، ال قويوب گؤزونون اۆستونه باخسان گۆندوغانا،
- گؤررسن!
- – دوغرو دئيیرسن؟
- – اینان، خان! يالان خانلاردا، پاشالاردا اولور، بیزیم کیمیلره وئریرلرمی،
- بیزده ده اولا!
- حسینه‌لی خان باشینی اللری‌نین آراسینا آلدی، بیر خئيلی فیکیرلشدی،
- سونرا بیردن باشینی قالدیردی:
- – سن نیيه منه خان دئيیرسن کی؟
- – بس نه دئيیم، خان؟
- – آخی من خان دئيیلم!
- – بس نسن، خان؟
- – من بیر تاجیر اوغلويام. دده‌‌م منی نیشانلاندیراندان سونرا،
- الله اؤلننرینه رحمت ائله‌سین!..
- – الله رحمت ائله‌سین!
- – هه، آتام منی نیشانلاندیراندان سونرا تويوما حاضیرلاشاندا وفات
- ائله‌دی. اۆچ ایلدی ياسینی ساخلايیرام. ایندی بۇ ائلیمنن-گۆنومنن گئدیرم
- گلینیمی گتیرمه‌يه...
- – يالانی ترگیت، خان. سن ایراوان سرداری حسینه‌لی خانسان. من ده
- خوي ماهالی‌نین خانی کبیر خانین کیچیک قارداشیيام. بیز بیر دفعه گؤروشموشدوک
- آخی. نیيه يادیندان چێخیب؟ اؤزوم ائله دئدیم کی، سنین بۇ دلدوز
- کئشیکچیلرین منه ديَیب توخونماسین.
- حسینه‌لی خانین گؤزلری دیریلدی. باخدی کی، جانی‌نین اۇيوشوغو آچیلیر.
- ارکله حالايپوزانین سینه‌سینه بیر پنجه وۇردو، سئوینجله دئدی:
- – بس نیيه منیم اۆرگیمی اۆزورسن، آي ظالیم!
- – اۆرگین نیيه اۆزولور آخی؟
- – ه، بیلمیرسن، کور‌اوغلونون اؤزو بیر شئي اولماسا دا آدی يامان آغیردی؟
- ائشیدنده آدامین اۆرگی اۆزولور؟ ه، منیم هۇشوما باخ! بیر فیکیرلشمیرم
- کی، آخی کور‌اوغلونون بۇرالاردا نه آزاری اولا! چنلیبئل هارا، بۇرالار
- هارا؟.. هه، دئ گؤروم کبیر خان نئجه‌دی، اؤزون نه تهرسن؟ دئيیرم
- آخی، آي الله، بۇ منه تانیش گلیر، هارداسا گؤرموشم بۇنو!
- – تانیدین ایندی؟
- – به تانیماياندا!..
- – باخ بئله! سن نئجه‌سن؟
- تۆپداغیدان بئله دئيیب گۇيا ارکله اونون ساغ چیينینه ياخین دؤشونه
- بیر بالاجا پنجه وۇردو. حسینه‌لی خان شێرپ دالی اۆسته ديَدی يئره. گؤزلرینه
- قارانلیق چؤکدو، ائله بیلدی کی، بیر يانینی چاپدیلار. او اؤزونه
- گلنه‌جن حالايپوزان الیندن تۇتوب قالدیردی. حسینه‌لی خان بیر آز او
- طرف بۇ طرفه سيللندی، يوخ-يوخ بیر تهر اؤزونو توخداتدی:
- – ه، سنی آند وئریرم اللها، دئ گؤروم کیمسن؟
- – يالانا-يالان اولدو، بدله-بدل، خان، اللها نیيه آند وئریرسن،
- من حالايپوزانام...
- بۇ دمده قاپیداکی دلیلر دؤزه بیلمه‌يیب گیردیلر ایچری کی، آي
- قارداش، آي حالايپوزان، نیيه بئله لنگیگیرسن، ایندیجه کوراوغلو دالیمیزجان
- آدام گؤندره‌جک آخی!..
- حسینه‌لی خان باخدی يوخ، کاروانی يامان يئرده آخشاملادیب. يئنه
- باشینی آلدی اللری‌نین آراسینا، بیر خئيلی فیکیرلشندن سونرا بیردن قالخدی
- آياغا:
- – دئيیرسن کوراوغلو بۇ ياخیندادی هه؟
- – بلی، خان.
- – گئدک اونون يانینا.
- – گئدک.
- حسینه‌لی خان آداملارینا تاپشیریقلار وئریب دۆشدو حالايپوزانین
- يانینا.
- بۇ طرفدن ده کوراوغلو ایسته‌يیردی کی، حالايپوزانین دالیسینجان آدام
- گؤندرسین، بیر ده باخدیلار، بۇدو، حالايپوزان يانیندا دا بیریسی گلیر.
- حسینه‌لی خان ياخینلاشاندا قێلینجینی آچیب سالدی بوينونا.
- کوراوغلو اؤيرننده کی، بۇ ایراوان سرداری حسینه‌لی خاندی، هاي
- وۇردو هامی توپلاشدی بؤيوک چادیرا. هر کس اؤز يئرینده ايلشنده
- حسینه‌لی خان ائله قێلینجی بوينوندا يئریدی کور‌اوغلونون قاباغینا، دیز
- چؤکوب دئدی:
- – کوراوغلو، من ایراوان سرداری حسینه‌لی خانام. بۇ آيدیندی کی، بیز
- دۆشمنیک. بۇ يئرده منیم سندن آمان ایسته‌مه‌يه حاقیم يوخدو.
- آمما ایزن وئر، اۇتانمازلیق ائلیگیم، سندن آمان ایسته‌يیم!..
- – ایسته، خان.
- – حالايپوزان ياخشی گؤردو. ائشیتدیگیمه گؤره آخشامدان بری سنین
- گؤزون منیم کاروانیمدا اولوب. بیلمه‌میش اولمازسان کی، بۇ کاروان توي
- کاروانیدی.
- – اؤيرنمیشم، خان.
- – گؤر، مۆمکوندورسه، آمان وئر، منی مۇراز اۆسته قويما!
- – توي سنیندی، خان؟
- – بلی، قوچ کوراوغلو!
- – يالان دئمیرسن کی؟
- – آند اولسون بیر اولان اللها، يالان دئمیرم!
- کوراوغلو حالايپوزانین اۆزونه باخدی. حالايپوزان دئدی:
- – دۆز دئيیر، کوراوغلو، اؤيرنمیشم، توي خانین اؤز تويودو.
- کوراوغلو مجلیسه گؤز گزدیردی. هامی‌نین اۆزونده مرحمت گؤردو.
- تکجه تاجیرباشی‌نین پالتارینی گئيینمیش کیشینی اۆزوندن ناراحات گؤردو،
- ایسته‌دی اونو دیندیرسین، آمما نه فیکیرلشدیسه، آيری شئيه يوزوب دیندیرمه‌دی.
- بۇنو کیشی ده حیسس ائله‌دی، اۆرگی آتلاندی، آمما کور‌اوغلونون اونو بئله
- سۆزوب دیندیرمه‌مه‌سی حالینی بیر آز دا پوزدو. چۆنکی کیشی‌نین سؤزو واردی،
- آمما جۆرتی چاتمیردی دینسین، سؤزونو دئسین. کوراوغلو هامی‌نین اۆزوندن
- اوخودو کی، خانا آمان وئرمک اولار. او دینمک ایسته‌ينده، خان اونو
- قاباقلادی، اولجه ایسته‌دی دئسین کی، قفلمده دۆنيا مالیندان نَيیم
- وارسا گؤتور، منی آزاد ائله، اۆرگی گلمه‌دی، بۇ فیکرینی اۇدوب دئدی:
- – اگر آمان وئرمک مۆمکون اولماسا، قوچ کوراوغلو، هئچ قێلینجینی
- منیم مۇندار قانیما بۇلاما، اؤز قێلینجیمنان وۇر بوينومو...
- کوراوغلو ایکراه دۇيدو، قاشلارینی چاتدی:
- – کیشیسن بئله ازیلمه، خان! آمانداسان.
- او، اۆزونو حالايپوزانا تۇتدو:
- – حالاپوزان، آپار بۇنو هاردان گتیرمیسن، قوي اوردا. اؤزو ده گؤر
- تاجیرین قفله‌سینده لايیقلی بیر شئي وارسا، آدینیزدان قوي خانا تويپايی
- اولسون.
- ائله بیل بۆتون دۆنيا وئردین خانا. چادیردان چێخماغا اۆرگی تلسسه
- ده، اؤزونو آغیر گؤسترمه‌يه چالیشدی.
- تاجیرباشی‌نین پالتارینی گئيمیش کیشی يئنه بیر-ایکی دفعه اۇدقوندو، آغزینی
- آچماق ایسته‌دی، باجارمادی. اۆرگینده اؤزونو سؤيدو، دانلادی کی، واللاه،
- منیم کیمی قورخاق ياشاماقدانسا ياشاماماق ياخشیدی. نیيه من دینه
- بیلمیرم آخی؟ کوراوغلو منی آسماياجاق ها. ایراوانین سردارینا رحم
- ائلیين آدامدان دا آدام چکینرمی؟ آمما باخدی کی، داها گئجدی،
- حسینه‌لی خان چادیرین آغزینا چاتیب. ائله بۇ دمده حسینه‌لی خان دا
- فیکیرلشدی کی، آي ائویم يێخیلسین، نیيه بئله گئدیرم، هئچ اولماسا يالاندانسا
- دا نیيه گۇرولدامیرام؟ قوي دئيیم کی، بلکه سیزه بیر شئي لازیمدی.
- قوي بیر دیل-آغیز سادا ائله‌يیم دانا! اونا گؤره ده چادیرین قاپیسی‌نین
- آغزیندا داياندی، گئری دؤندو:
- – کوراوغلو، سن سخادا دا منی اۆستله‌دین. سنین آياغیندان اؤپمه‌يه
- اؤزومو لايیق بیلمیرم، هئچ اولماسا، ایجازه وئرردین، آتینین دێرناغیندان
- اؤپره‌دیم، بۇ ائيیلیکدن بیر میثقال چێخاردیم...
- کوراوغلو گؤردو خان خریفله‌يیر، دئدی:
- – خان، ياخشی اولار هئچ بۇ تمنناها دۆشمه‌يه‌سن. بیل کی، قێرات
- دوست-دۆشمنی مندن ياخشی تانیيیر...
- خان بیر ده گئری دؤنمک ایسته‌ينده ائله بیل کیشیيه جۆرت گلدی، دیلی
- آچیلدی، کور‌اوغلويا دئدی:
- – کوراوغلو، ایزن وئرسيدین، منیم خاندان بیر سۇالیم واردی...
- خان ایسته‌دی کی، سێپیخسین، کوراوغلو اونو داياندیردی:
- – خان، زحمت اولماسین، بۇ کیشی‌نین سؤزو وار دئيه‌سن.
- خان دئدی:
- – کوراوغلو، بۇ کیشی‌نین نه سؤزو اولاسیدی کی. سن قانینی ایچمه‌يه حاضیر
- اولدوغون دۆشمنینه آمان وئریرسن. بیلیرسن کی، آمان وئردیگین بۇ آدامین
- دۆنيا بويدا گۆناهلاریندان کئچیرسن. داي بۇ کیشی‌نین نه سؤزو اولا؟
- – نیيه، قوي آرزوسو قالماسین.
- – نه دئيیرم.
- خان کیشی‌نین يؤر-يؤنده‌میندن باخدی کی، بۇ، کوراوغلو دلیسی دؤيول،
- تاجیردی. بیلدی کی، تاجیردن خئيیرلی سؤز چێخماز، ندیسه پاخیللیغیندان بیر
- چۇغوللوق ائله‌يه‌جک، اونو دا کوراوغلو وئجه قويماياجاق. آمما کیشی هئچ
- کیمین گؤزله‌مه‌دیگی بیر سۇاللا خانا مۇراجعت ائله‌دی:
- – خان، من بیلمک ایسته‌يیرم گؤرک سن توي ائله‌يیب ائوینه گتیره‌جه‌يین
- قێز سنی ایسته‌يیر، يا يوخ؟
- چوخلاری سۇالی يئرسیز حساب ائله‌دی. کیمی آچیقدا، کیمی اۆرگینده کیشیيه
- گۆلدو. حسینه‌لی خان بۇنو سئزدی، اودو کی، بیر آز دا تمکینله جاواب وئردی:
- – عمی، بیزیم شریعته گؤره قێز ایسته‌مسه، کبین کسیلمز، کسیلسه ده
- باش تۇتماز.
- – اۆرکدن دئيیرسن بۇ سؤزو؟
- – بلی، اۆرکدن!
- کیشی کور‌اوغلويا طرف دؤندو:
- – کوراوغلو، خان يالان دئيیر. اونونکو مۇراز دئيیل، شهوتدی. من
- بیلدیگیمی دئمه‌سم، گۆناها باتارام. ائله آز قالمیشدی کی، گۆناهکار اولوم.
- منیم بیلدیگیم ده بۇدو کی، بۇ خان او قێزی آلسا، اؤزونه اؤورت ائلسه، ظۆلم
- الی ایله ایش گؤرور.
- هامی بیر-بیری‌نین اۆزونه باخدی. کوراوغلو قاشلارینی چاتدی:
- – خان، بۇ سؤزه جاوابین ندی؟
- – کوراوغلو ساغ اولسون. من ياخشی گؤرورم کی، بۇ آدام سیزدن دئيیل،
- بیزدندی. ندیسه، بۇنون مننن غرضلیگی وار، يالان دانیشیر.
- کوراوغلو دئدی:
- – بۇ شکسیزدی کی، بۇ آرادا يالان وار. آمما يالانین بۇ کیشیدمی،
- يوخسا سندمی اولدوغونو آيدینلاشدیرماق مۆشکولدو...
- کوراوغلو فیکیر ایچینده اۆزونو آشیق جۆنونا تۇتدو:
- – آشیق جۆنون، بیزه کؤمک ائله، چتینه دۆشموشوک.
- آشیق جۆنون ایره‌لی چێخدی، اۆزونو خانا تۇتدو:
- – خان، نیشانلین هارداندی، کیملردندی؟
- خان چتینه دۆشدو، ککله‌دی. کیشی دئدی:
- – کوراوغلو، بۇنون نیشانلیسی مۇرادبيلیدندی. سنین دده‌‌نین دۆشمنی
- اولان حسن خانین قێزی مرجان خانیمدی.
- کوراوغلو سوروشدو:
- – خان، آشیق جۆنونا جاواب وئر، کیشی دۆزمو دئيیر؟
- کیشی‌نین دۆشمنچیلیگی آرايا آتماسی خانین اۆمید چێراغینا ياغ سالدی،
- اودو کی، دئدی:
- – دۆز دئيیر، کوراوغلو.
- آشیق جۆنون دئدی:
- – اوندا بۇردا بیر چتینلیک يوخدو. مۇرادبيلی چوخ دا اۇزاق دؤيول،
- آدام گؤندرریک، اؤيرنر. ایشی بئله قۇراق. خان نیشانلیسینا اؤز دستیينن
- بیر نامه يازسین کی، فیلان شهرده‌يم، گلیرم، بۇردا کامیل بیر زرگره
- راست گلمیشم، بیليی‌نین اؤلچوسونو وئر، سنه بیر جۆت تزه بیلرزیک
- باغلاتدیریم. نامه‌نی خانین ایناندیغی آدام بیزیم ده بیر آدام آپارار،
- هر شئي آيدین اولار.
- بۇ تدبیر خانین اۆرگینه اود سالدی. کوراوغلو يئنه ایشی تاپشیردی حالايپوزانا:
- – ایشی يؤنونه قوي. بیزدن کیم گئتسه، اؤزونو خانین ياخین آدامی کیمی
- گؤسترسین. آمما تئز قايیتسینلار.
- نامه‌نی خانا يازدیردیلار. حالايپوزان کور‌اوغلونون تاپشیریغی ایله خانی
- اؤز چادیریندا گؤز دۇستاغی ائله‌دی. قفله‌سینه گؤزتچیلر قويدو، خانین باش
- وزیری ایله بیر آدام گؤندره‌سی اولاندا قارتال کریم يالواردی کی، قوي
- من گئدیم. حالايپوزان کور‌اوغلويا گنشدی، کوراوغلو بۇنا دا راضیلاشدی.
- وزیرله قارتال کریم آتلارینا میندیلر و نظرده تۇتولدوغو
- واختدان تئز اؤزلرینی چاتدیردیلار مۇرادبيلیيه.
- دئ حسن خانین اوغلانلاری اؤزلرینی لعلیک-گیريان ائله‌دیلر. وزیر
- گلمکلری‌نین مقصدینی بیلدیرنده، بئله مصلحت گؤردولر کی، اونلار
- مرجان خانیمین ایمارتینه، اونون يانینا گئتسیننر. بئله ده ائله‌دیلر.
- مرجان خانیم قوناقلارینی حؤرمتله قبول ائله‌دی. وزیری تانیيیردی، اودو
- کی، وزیردن خبر آلدی:
- – وزیر، بۇ اوغلان کیمدی، خانین نَيیدی؟
- اولدن شرطلشدیکلری کیمی وزیر قارتال کریمی مرجان خانیما
- تقدیم ائله‌دی:
- – خانین باجیسی اوغلودو، خانیم. آدینا قارتال کریم دئيیللر. خانین
- ایستکلیلریندندی.
- مرجان خانیم قارتال کریمی بیر ده باشدان آياغا، آياقدان باشا
- سۆزدو، گۆلومسه‌يیب دئدی:
- – آدام هئچ اینانا بیلمیر کی، بۇ اوغلان حسینه‌لی خانین باجیسی
- اوغلودو. هئچ ياراشدیرا بیلمیرم.
- وزیر بیجلیکده تۆلکونو سۇيا سۇسوز آپارار، سۇسوز گتیرردی. او ساعت
- مثلای آنلادی، يوزدوردو:
- – حاقین وار، خانیم. کریم خانین اؤگئي باجیسی‌نین اوغلودو، رعیت
- قێزیندان اولوب، عؤمرونون چوخونو کندده کئچیریب.
- مرجان خانیم کؤکس اؤتوردو:
- – دئيیرم آخی!.. هه، قوناغا نیيه گلمیسن دئمزلر. آمما بیلیرم
- کی، سیز بیر ایشه گلمیسینیز، ائشیدیرم، وزیر.
- وزیر قۇرجالاندی، بوغازینی آریتدی ایچینی چکدی:
- – گلمه‌يیمیزین مقصدینی کریم دئيه‌جک، خانیم.
- مرجان خانیم کریمین اۆزونه باخدی، چالیشدی کی، گؤزلری ایله گؤزلرینی
- تۇتسون، قارتال کریم ایمکان وئرمه‌دی، گؤزونو يئره دیکیب دئدی:
- – دايیم نامه ده يازیب. دیلجاوابی دا دئيیم کی، زرگر چوخ ماهیر
- صنعتکاردی.
- او، نامه‌نی مرجان خانیما وئردی. مرجان خانیم اوخويوب گۆلدو، ائله
- گۆله-گۆله دئدی:
- – کریم، بیر منیم گؤزومه باخ گؤروم!
- کریم بیر تهر اؤزونو اله آلیب مرجان خانیمین گؤزونون ایچینه
- باخماغا چالیشدی. مرجان خانیم سوروشدو:
- – دئيیرسن، زرگر چوخ ماهیردی هه؟
- – ماهیردی، خانیم.
- – دايینی چوخ ایسته‌يیرسن، کریم؟
- – بلی، خانیم.
- – دايین دا سنی چوخ ایسته‌يیرمی؟
- – چوخ ایسته‌مسه، بۇ ایشه منی گؤندرردیمی؟
- – اولسون. بیرجه نۇموت آرام اولون، نامه‌نین جاوابینی يازیم، آپارین.
- اونلار گؤزله‌مه‌لی اولدولار. مرجان خانیم او بیری اوتاغا کئچدی. آمما
- جاوابین يازیلماسی خئيلی لنگیدی. نهايت، مرجان خانیم جاوابی قارتال
- کریمه تقدیم ائله‌دی:
- – قارتال قارداش، امینم کی، نامه‌نی يولدا اوخويان اولماياجاق.
- آمما اگر دوغرودان دا سن دايینی، دايین دا سنی چوخ ایسته‌يیرسینیزسه،
- اوردا دايیندان توققه ائله، قوي ائله اوخوسون کی، سن ده ائشیده‌سن.
- – باش اۆسته، خانیم! امینم کی، دايیم منیم بئله توققمی رد
- ائله‌مز.
- وزیر چوخ ياخشی بیلیردی کی، مرجان خانیمین نامه‌سیندن نه خانا،
- نه ده اونون آداملارینا اۇغور گتیره‌سی هئچ نه اولماياجاقدی. اونا گؤره ده
- چوخ فیکیرلشدی کی، يولدا نامه‌نی قارتال کریمین الیندن چێخارسین، آمما
- باجارا بیلمه‌دی. همین گۆنون سحریسی گۆن چئشت يئرینه قالخاندا اؤزلرینی
- يئتیردیلر کور‌اوغلويا. کوراوغلو يئنه هامینی يێغدی بؤيوک چادیرا،
- خانی دا گتیرتدی، نامه‌نی وئردی اونا، اؤزونه ده تاپشیردی کی، جاوابی برکدن
- اوخوسون. خان نه قدر ائله‌دیسه دیلی سؤز تۇتمادی. کوراوغلو باخدی
- خاندا نامه اوخوياسی حال يوخدو، اۆزونو تۇتودو آشیق جۆنونا:
- – آشیق جۆنون، دئيه‌سن، خانین ساوادی چاتمادی، آل نامه‌نی اوخو گؤرک
- کیشی‌نین نیشانلیسی نه يازیر.
- آشیق جۆنون نامه‌نی آلدی، باخاندا حئیرت ائله‌دی:
- – جان کوراوغلو، قێز نامه‌سینی شعرنن يازیب. بۇ، قوشمادی. ایزن وئر،
- سازنان اوخويوم، گۆناه ائله‌مه‌يک. آخی قوشمانی سازنان اوخوماماق
- گۆناهدی.
- کوراوغلو ایزن وئردی، آشیق جۆنون يئنه سازی‌نین آشیقلارینا ال آتدی، ساز
- ائله‌يیب سینه‌سینه باسدی، اوخودو:
- محبت ساتیلماز دۆنيا مالینا،
- بیر ياخشی فیکیرلش، خان، آغلین اولسون!
- سنده‌کی عشق دئيیل، اۇيوب شهوته
- آز بئله گیريان اول، يان، آغلین اولسون!
- لئيلیيم، مجنونوم صحرا دولاشیر،
- اصلیيم، کرمیم ارزوروم آشیر،
- سنه اولان کینیم قاينايیب داشیر،
- ایچمک ایسته‌يیرم قان، آغلین اولسون!
- مرامیم اؤزگه‌دی، اولمورام آرام،
- گۆنده گؤز-گؤز اولوب دئشیلیر يارام.
- مزارین اولارام، سنین اولمارام،
- مرجان بیر ده دئيیر، قان، آغلین اولسون!
- دۆشمن قێزی اولسا دا، کوراوغلو دا، آشیق جۆنون دا، بۆتون دلیلر ده
- مرجان خانیمدا اولان عهده، ایلقارا، وفايا، عاغیلا، کمالا احسن دئدیلر.
- کوراوغلو هاي وۇروب قرار، گؤستریش وئردی:
- – حسینه‌لی خانی وئریرم يارمممد کیشی‌نین ایختیيارینا. قوي
- نئجه بیلیر ائله ده جزا وئرسین. آمما قالان قفله نه وارسا، وئرین وزیره،
- يولا سالین گئتسین. اؤزونوز ده يێغیشین، دۆشک يولا، چوخ گئجیکدیک، ایندی
- چنلیبئلین گؤزو يولدا قالیب.
- دئمه، يارمممد کیشی حسینه‌لی خاندان چوخدان يانیقلیيمیش.
- اؤز بیلدیگی کیمی جهنمه واصیل ائله‌دی. کور‌اوغلونون دسته‌سی گۆنورتا
- يئمه‌يیندن سونرا اۆز تۇتدو چنلیبئله.
- حسینه‌لی خانین اؤلومو مرجان خانیمی نه قدر سئویندیردیسه، توي
- آغاماتی‌نین الدن چێخماسی محمود خانی بیر او قدر ياندیردی...
- آرادان چوخ کئچمه‌دی، گۆن او گۆن اولدو محمود خانین طالعيی تزه‌دن
- گتیردی، باخت اۇلدوزو لاپ يۆکسکدن دوغدو: خوتکار چاغیریب بايازیدین
- پاشالیغینی تاپشیردی اونا، باجیسی مرجان خانیمی دا نیشانلادی ولیهه‌دی
- امیر خانا.
- آمما مرجان خانیم ایکی آياغینی بیر باشماغا قويدو کی، دا من
- اره گئتمیرم...
- محمود پاشا چوخ ياخشی بیلیردی کی، اونون آياغینا جیدار اولان بۇ
- قوهوملوغا خلل گتیرن کانکانوغلودو. اودو کی، اونو بیر يانلیق ائله‌مکدن
- اؤترو فۆرصت گزیردی.
- ائيواز تۇتولوب زیندانا سالینان گۆنون سحریسی بايازید اطرافیندا نه
- قدر الی قێلینج تۇتان واریيدیسا، يێغیلیب زیندانی داغیتماق، ائيوازی خلاص
- ائله‌مک اۆچون تدبیر تؤکمه‌يه باشلادیلار. کانکانوغلو دا بۇ دسته‌ديدی.
- او نئجه دئيللر، بۇ ایشی دۆزلدن، دسته‌يه باشچیلیق ائلیين ائله اونون
- اؤزويدو.
- ائيواز تۇتولانین اۆچونجو گۆنو کانکانوغلو دسته‌نی چکدی بیر طرفه.
- دسته چوخ بؤيوک اولدوغوندان اونو بؤلدو کیچیک دسته‌لره. اونلارا باشچیلار
- سئچدی. هانسی دسته‌نین هاياندان گله‌جه‌يینی، کیمین نه ایش گؤره‌جه‌يینی،
- دؤنه-دؤنه تاپشیراندان سونرا، گئدیب مۆعيين اولونموش واخدی، ایشاره‌نی
- گؤزله‌ميی تاپشیردی. هامی اؤز کم-کسیرینی دۆزلتمه‌يه، واخدی گؤزله‌مه‌يه
- داغیلدی. کانکانوغلو دا ائوه گلیب حاضیرلیق گؤرمه‌يه باشدادی.
- کانکانوغلو تزه‌جه قێلینجینی سیلیب قێنینا قويموشدو. سلیم قاپیدان
- گیردی:
- – بؤيوککیشی، مرجان خانیم دئدی کی، اوننان واجیب ایشیم وار، اؤزونو
- يئتیرسین منه.
- کانکانوغلو ایسته‌دی کی، گئتمه‌يه، آمما اؤزونو ساخلیيا بیلمه‌يیب
- سلیمنن پالتارینی ديَیشدی.
- کانکانوغلو اؤزونو يئتیردی مرجان خانیمین قۇللوغونا. مرجان
- خانیم اونو چکیب آپاردی دۆز زیرزه‌میسینه. قارشیسیندا اوتوردوب گؤزلرینی
- دیره‌دی گؤزلرینه، يازیق-يازیق دئدی:
- – بؤيوککیشی! دئ گؤروم، مانا اولان محبتیندن بیر نیشانا
- قالیب، يا يوخ؟!
- کانکانوغلو هله وضعیتدن، مقصددن باش چێخارماسا دا دئدی:
- – مرجان خانیم! منیم سنه اولان محبتیمی سوروشورسانسا، هر
- گۆن بیره مین قات آرتیر! آمما اؤزون بیلیرسن وضعیت پیسدی. من بیر لۆت
- کانکان اوغلويام، پۇلوم يوخ، دؤولتیم يوخ، شان-شؤهرتیم يوخ...
- قارداشین دا ساتیر سنی پۇلا، شؤهرته؟..
- مرجان خانیم دايانا بیلمه‌دی:
- – دۆز دانیشمیرسان، عزیزیم! سن اؤز قیيمتینی ياخشی بیلمیرسن.
- قارداشیم منی شؤهرته ساتیرسا، گرک، آغلی اولسا، ائله سنه وئريدی.
- – گؤرمورسنمی، هئچ الله دا کاسیبین طرفینده دئيیل! تزه‌جه
- حسینه‌لی خاندان خلاص اولموشدوق، امیر خانی عاریز ائله‌دی بۇ ياندان!
- داي بۇندان بئله بیز نئيلیيه بیلریک، هانسی سمته اۆز تۇتوب بیر سێغیناجاق
- تاپا بیلریک کی، خوتکارین حؤکمو اورايا ایشله‌مه‌سین، بیزی آخداریب تاپماسین،
- محبتیمیزی داشا وۇرماسین؟! گل داها سن مندن ال چک، گئت
- امیر خانا، سن خوشبخت اول!..
- مرجان خانیم دئدی:
- – سن دوغرو دانیشیرسان، بؤيوککیشی! ایندی ایش چوخ پیس يئره ایلیشیب، کاروانیمیز
- يامان يئرده آخشاملايیب! دۇردوقجا ایشلر دولاشیب بۇ يئره
- چاتدی. من بیر يئر بیلیرم کی، اورايا خوتکارین يوخ، لاپ باباسی‌نین دا
- حؤکمو ایشله‌مز! اورايا قاچا بیلسک، کامیمیزا چاتار، قورخوسوز ياشاياریق!..
- – سن نه دانیشیرسان، مرجان خانیم؟! عثمانلی تورپاغیندا او نئجه
- يئردی کی، خوتکارین حؤکمو اورايا ایشلمیيه، اوردا راحت ياشاماق اولا؟! دئ
- گؤروم، او نئجه يئردی کی، منیم کیمیلری اوردا مۇرادینا چاتا، کامینا
- يئتیشیب خوشبخت اولا؟! گؤره‌سن، يئر اۆزونده ائله بیر بۇجاق، ائله بیر تورپاق
- وار؟!
- – داي هله او يئرلره ال آتما، چوخ اۇزاقلارا گئدیب اؤزونو يورما. دئ
- گؤروم، قاچماقنان نئجه‌سن؟
- – او يئر منی چوخ دۆشوندورور آخی!
- – دئدیم چوخ اؤزونو يورما. اورا چوخ دا اۇزاق دئيیل! آمما يولو چوخ
- چتیندی. نئجه‌سن قاچماغینان؟
- سۇالین تکرار اولونماغی کانکانوغلونو آلدی:
- – قاچاق دئيیرسن، قاچاق ده!..
- مرجان خانیمین قاشلاری چاتیلدی:
- – بۇ نئجه جاوابدی، بؤيوککیشی؟!
- کانکانوغلو دیلینی بئله سۆرودو کی، مرجان خانیمنان سؤز آلا.
- آمما باخدی قلبینه ديَدی. اودو کی دئدی:
- – مرجان خانیم! من باشیمنان، جانیمنان حاضیر. دی واخت قوي،
- حاضیرلاش!
- – واخت؟.. واخت بۇ گئجه!..
- کانکانوغلونون بوغازی قۇرويان کیمی اولدو. دۇروخدو، دیللنمک
- ایسته‌دی، نه دئيه‌جه‌يینی بیلمه‌دی.
- مرجان خانیم اونون بۇ حالینی گؤروب دئدی:
- – بۇ نه صیفتدی، سن دۆشدون، ائي ایگیدلیگی عالمه سس سالمیش کانکانوغلو؟!
- من نئجه اولوب کی، ایندیيه‌جن سنین بئله قورخاق اولدوغونو
- بیلمه‌میشم؟! بۇ حال قورخاقلیقدان چوخ، دؤنوکلويه اوخشايیر. بلکه ده
- مننن دؤيولسن؟! بئله‌دیرسه، گئدیب ائوینده اوتورا بیلرسن!..
- غضبدنمی، قهردنمی، بیلمیرم، مرجان خانیمین گؤزلری
- دولموشدو. او، دۇرماق ایسته‌ينده، کانکانوغلو بیله‌يیننن ياپیشدی:
- – مرجان! بیلیرسن من هئچ زامان هئچ نه‌دن قورخمامیشام!
- محبتیم ده ار محبتیدی! من سئویندیگیمنن بۇ حالدايام!..
- آمما...
- – آي محبتده ار اولان! بۇ يولدا آمما اولماز! بۇ گئجه قاچمالیيیق!
- يوخسا، بیر ده منی او دۆنيادا گؤررسن!..
- – آي محبت مليی! گرک سئونلر او دۆنيانی دیله گتیرمه‌سینلر
- آخی؟!
- – بؤيوککیشی! سؤزو اۇزاتدیق. ایش او يئرده‌دی کی، بیز بۇ گئجه قاچمالیيیق!
- دۇر! واخت ایتیرمه!
- کانکانوغلونون يئنه رنگی ديَیشدی:
- – مرجان، آخی بۇ ایشده تلسمک خئيیر وئرمز؟! قوي نیزام حاضیرلیق
- گؤروم! هئچ اولماسا، بۇ گئجه‌لیگینه آمان وئر، سحر آخشام اولوم سنین
- قۇللوغوندا!
- مرجان خانیم آياغا قالخدی:
- – سن يا قورخورسان، يا دا مندن دؤنوبسن، کانکانوغلو! سانا
- جان ساغلیغی! گئده بیلرسن!
- کانکانوغلو يئنه اونو بیلکله‌دی:
- – بۇ داریخماغین سببینی بیلیم!
- – سببی؟ محبت!
- – بیلمه‌سم اولماز، مرجان!
- – گتیر سوروشما!
- – بیلمه‌سم، چاتدار باغریم!
- – سبب محبتدی، اصل محبت! لئيلی محبتی، اصلی محبتی،
- شیرین محبتی! بیر ده مجنون محبتی، کرم محبتی،
- فرهاد محبتی! بیلدین!
- – ياخشی! بۇ محبت بۇ گئجه تۆکنه‌سیدی؟!
- – دئيه‌سن ال چکمه‌يه‌جکسن آخی؟
- – ال چکه‌سی دئيیلم! سببی دئ!
- – منی سحر گؤندریرلر ایستانبولا. اگر بۇ گئجه قاچا بیلمه‌سک،
- زهر ایچه‌جه‌يم!..
- ائله بیل کانکانوغلونا زهرلی اوخ ديَدی. بیر قێوریلیب آچیلدی، دیک آياغا
- دۇردو:
- – حاضیر اول! گئجه ياری منی گؤزله!
- – گئجه ياری نیيه؟
- – اونو سوروشما!
- – بیلمه‌سم اولماز.
- – يولدا بیلرسن.
- مرجان خانیم باخدی سؤز چوخ اۇزانیر، کانکانوغلو دا اونون دئدیگینی
- دئمیر، دئدی:
- کانکانوغلو، اگر منی سئویرسن،
- آخشامنان قاچماغا گله‌سن گرک!
- فرهاد کیمی کۆلونگونو گؤتوروب
- بیسوتون داغینی دله‌سن گرک!
- کانکانوغلو يئنه يالوارماغا باشلادی:
- ایلتیماس ائيله‌رم، آي آلاگؤزلوم،
- قوي قالسین ودیمیز سحره، مرجان!
- نه ایش اولسا اؤز يولونا قويارام،
- چکرم هر ایشی تهره، مرجان!
- مرجان خانیم دئدی:
- قبول ائت جانانین ایلتیماسینی،
- چتیندی تۇتاسان مردین ياسینی!
- يا سیله‌سن بۇ کؤنلومون پاسینی،
- يا منیم يولومدا اؤله‌سن گرک!
- کانکانوغلو باخدی مرجان خانیم اونو اؤلومنن قورخودور، اؤلومنن
- سێنايیر، دئدی:
- ترلان کیمی قێي وۇرارام، اۇچارام،
- دمیردن سدد اولسا، چئينر آچارام!
- يا اؤللم، يا سنی آلیب قاچارام،
- قۇش کیمی قونارام يهره، مرجان!
- مرجان خانیم گئنه بالتاسینی کؤکدن وۇردو:
- من مرجانام، ياخشی، يامان سئچه‌رم،
- محبت يولوندا جاننان کئچه‌رم.
- سحره قالاراسا، زهر ایچه‌رم،
- دئيیرم، بۇ باشدان بیله‌سن گرک!
- بیچاره کانکانوغلو گئنه اوخ ديَمیشه دؤندو. کؤکسونو اؤتوروب ایستریسته‌مز
- دئدی:
- يازیق کانکانوغلو آهوزاردادی،
- بیر ياننان سئوگیلیم اینتیظاردادی، –
- بیر بللی ایگیدین عؤمرو داردادی،
- اؤلدورللر، قالسا سحره، مرجان!..
- مرجان خانیم قاشلارینی چاتدی:
- – آچیق دانیش گؤروم، سن نه دانیشیرسان آخی؟! نه ایگید، نه دار؟ کانکانوغلو
- قالمیشدی اودنان سۇيون آراسیندا. ایندی نه ائله‌سین؟ ائيوازدانمی –
- ائل ایچینده‌کی آدیندان-سانیندانمی، تاي-تۇش آراسینداکی حؤرمتیندن،
- اعتباریندانمی کئچسین، محبتیندنمی؟! سیرری آچسینمی، آچماسینمی؟..
- آخی، ائيواز مرجان خانیمین آتاسی‌نین قاتیللریندندی! سیرری آچسا بیردن
- قێز ایشی پوزار، قارداشینا خبر وئرر. آچماسا دا مۆمکون دئيیل. يوخ،
- يوخ، دئدی:
- – مرجان خانیم! بیلیرسن کی، قارداشین ائيواز خانی تۇتوب سالیب زیندانا!
- اؤزو ده نامردلیگینن تۇتوب! مردلیگینن تۇتسايدی، درد ياریيدی،
- ایشیم اولمازدی!..
- کانکانوغلو دۇروخدو. مرجان خانیم اونو تلسدیردی:
- – سؤزونون جانینی دئ گؤروم.
- کانکانوغلو بئله حساب ائله‌دی کی، ایشی پوزدو، مرجان خانیمی غضبلندیردی.
- اودو کی، اؤزو ده قاشلارینی چاتیب دئدی:
- – ایندی بیز بؤيوک بیر دسته دۆزلتمیشیک کی، بۇ گئجه زیندانی داغیدیب
- ائيوازی قاچیراق!.. اولا، اگر سن ده منی من سنی سئودیگیمین میننن
- بیرجه‌سی قدر سئویرسنسه، گئجه ياریيا قدر مانا مؤهلت وئر، اونو خلاص
- ائلیگیب، هر حاضیرلیغنان اولوم يانیندا! ایکینجیسی ده، اگر بۇ سیرری آچسان...
- مرجان خانیم اونا سؤزونون دالینی گتیرمه‌يه ایمکان وئرمه‌دی،
- ساریلدی بوينونا:
- – آي ظالیم اولمامیش! بۇنو سحردن دئينن دانا! ائله من ده
- سنی اونا گؤره چاغیرمیشام! گرک بۇ گئجه ائيوازی خلاص ائلیيک، اوننان
- برابر قاچاق چنلیبئله! منیم دئدیگیم يئر باخ، او چنلیبئلدی!
- – آمما منیم تدبیریم اؤزگه‌دی: سیز دۆز حرکت ائلمیرسینیز.
- بیلمیرسینیزمی پاشانین زیندانی مؤحکم، کئشیکچیسی ده چوخدو؟! هله
- دئيه‌سن، پاشا زیندانا باسقین اولاجاغیندان شککه دۆشوب، کئشیکچیلرینی
- چوخالدیب، آيیق-سايیق دۇروب... اودو کی، سیزین تدبیرینیز چتین باش تۇتار،
- قانی-قاداسی چوخ اولار. چوخ جاوان کوررانار، بلکه ده ائيوازین اؤلمه‌يینه
- بايیس اولارسینیز!
- – آمما بۇدو، منیم زیرزمیمنن زیندانا بئشجه آددیم يولدو.
- سن بۆتون يولداشلارینی خبردار ائله، قوي بۇ گئجه‌لیيه گؤزله‌سینلر.
- اؤزون ده اۆرگینه ياتان دوستلاریننان بیرینی گؤتوروب ال-آياق چکیلنده
- اول يانیمدا. لاغم آتاق، ائيوازی قاچیراق! نه سس اولسون، نه قێرغین، نه ده
- قادا! اگر ایشیمیز باش تۇتماسا، زیندان دۇرور، سیز دۇرورسونوز!..
- کانکانوغلو باخدی دوغرودان دا، بۇ تدبیر اونلارین تدبیریننن چوخ
- ياخشیدی، چوخ آسان، قانسیز-قاداسیزدی. بۇ فۆرصت گؤيدن دۆشمه اولدوغوندان
- راضیلاشدی. اؤزو ده واخت ایتیرمه‌يیب اؤزونو يئتیردی دوستلارینا. هامینی
- يێغدیردی بیر يئره، احوالاتی دانیشدی. هامی بۇ تدبیری بَيندی. دسته
- باشچیلاریندان بیری دئدی:
- – تدبیر چوخ عاغیللی تدبیردی. قوي بۇ کانکان میرزه‌لی اولسون کانکانوغلونا
- يولداش. قالان هامی اؤز دسته‌سیينن حاضیر اولسون دؤيوشه. او
- طرفلرده گۆدوکجو قوياق. دئمک اولماز، بیردن بۇردا کلک-ملک،
- فئل-مئل اولار.
- بلی، ال-آياغ يێغیشاندا، کانکانوغلو هر بیر حاضیرلیغیينان اولدو
- مرجان خانیمین قۇللوغوندا. اونسوز دا مرجان خانیم هر شئيی حاضیر
- ائله‌میشدی. باشلادیلار ایشه. هر ایکی ایگید ایشه ائله گیریشدی کی، آز بیر واختدا
- لاغم ياریدان کئچدی. آمما بیردن قاباقلاری چێخدی سال داشا. آلتدان وۇردولار،
- اولمادی، اۆستدن وۇردولار، اولمادی، علاج داشی دئشمه‌يه قالدی. چوخ
- چتینلیک چکسه‌لر ده، داشی دئشدیلر...
- سحره آز قالیردی. ائيواز باخدی قۇلاغینا تاپپیلتی گلیر. قۇلاق وئریب
- گؤردو، ندیسه، زینداندی. بئله حساب ائله‌دی کی، چنلیبئلدن گلیب زیندانی
- داغیدیرلار. اۆرگی آتلاندی، اؤز-اؤزونه اوخودو:
- دلی کؤنول، جؤولان ائله هاوالان،
- چنلیبئلدن هاراي گلدی يئتیشدی!
- قدیربیلن قوچ ایگیدلر آتداندی،
- چنلیبئلدن هاراي گلدی يئتیشدی!
- قانسیز اولماز کور‌اوغلونون مئيدانی،
- دۆشمنین يۆز اولسا، قۇرتارماز جانی.
- سؤکولور پاشانین دمیر زیندانی،
- چنلیبئلدن هاراي گلدی يئتیشدی!
- اۇچام او داغلارا، قايیدام گلم،
- نامرد دۆشمنیمین باغرینی دلم!
- يولومو گؤزده‌يیر آنام زرقلم،
- چنلیبئلدن هاراي گلدی يئتیشدی!
- ياغیلارا اؤلوم يازان گلیبدی،
- دۆشمننره قبیر قازان گلیبدی،
- تۆپداغیدان، حالايپوزان گلیبدی،
- چنلیبئلدن هاراي گلدی يئتیشدی!
- کۆردوغلو اولوبدو ائيوازا قارداش،
- دلی حسن کسر، دێغیررانار باش،
- دمیرچیوغلو قويماز داش اۆستونده داش،
- چنلیبئلدن هاراي گلدی يئتیشدی!
- سؤز تاماما يئتر-يئتمز، کانکانوغلو حاضیر اولدو ائيوازین يانیندا.
- جۇمدو کی، ائيوازین ال-آياغینی آچسین، ائيواز دئدی:
- – دئ گؤروم، سن کیمسن، نه ائله‌مک ایسته‌يیرسن؟
- – اونو سوروشما، ائيواز! واخدیمیز آزدی!
- – دئمه‌سن اولماز!
- – آخی واخت يوخدو! سحر آچیلیر! بیز سنی خلاص ائله‌مه‌يه گلمیشیک.
- قالانینی يولدا بیلرسن!..
- – يوخ، گرک کیم اولدوغونوزو، نه مقصدنن منی خلاص ائله‌مک
- ایسته‌دیگینیزی دئيه‌سن!
- کانکانوغلو ها ائله‌دی، اولمادی. علاجسیز قالیب احوالاتی قێساجا دانیشدی.
- ائيواز احوالاتدان خبردار اولاندا، میننتدارریخ ائلیگیب دئدی:
- – چوخ ساغ اولون، عزیزلریم! چوخ اذیت چکیبسینیز، جفانیز بؤيوکدو،
- فداکارلیغینیزین هددی-حۆدودو يوخدو، ياخشیلیغینیز عوضسیزدی!
- آمما ایندی بۇ ایش باش تۇتماز! ایندی قاچماق اولماز!
- – نیيه، ائيواز؟!
- – اؤزون دئدین کی، سحر آچیلیر. بۇدو ائي، قۇلاق وئر، خوروزدار بانناشیر.
- بۇندان سونرا بیز هئچ يانا قاچیب چێخا بیلمریک. بیز او يانا، او قێز
- کی، دئيیرسن، اونا خاتا توخونار! هر سحر ایشیقلاشار-ایشیقلانماز، گلیب
- منی يوخلويوللار، چوخ چکمز کی، يوخلويوب منی گؤرمزلر، لاغیمی
- تاپیب ایشی بیلللر، بیزی تۇتاللار! آنجاق علاج اوندادی کی، بۇ گلن آخشامی
- گؤزدويک. اؤلدوم، بورجومو اؤده‌دیم، قالسام، قاچاریق!..
- کانکانوغلو گئنه چوخ دیرندی، اولمادی. قايیتدی مرجان خانیمین
- يانینا. مرجان خانیم تله‌سیک سوروشدو:
- – سحردی! نئيله‌يه بیلدینیز؟
- کانکانوغلو احوالاتی دانیشیب دئدی:
- – ائيواز ترسلیک ائلیگیر!
- مرجان خانیم دئدی:
- – ائيواز دۆز دئيیر. اونا يئمک آپارین. اؤزوندن ده اؤيره‌نین گؤرک
- آيری بیر تدبیری، باشقا بیر سؤزو يوخدو کی؟! سوروشون گؤرک بیز نئجه
- ائله‌يک کی، اونو يوخلاياندا لاغیمی گؤرن اولماسین؟
- کانکانوغلو يئمک گؤتوروب قايیتدی:
- – ائيواز، مرجان خانیم سنین حاقلی اولدوغونو دئيیر. ایندی دئ گؤرک،
- نئيله‌يک کی، سنی يوخلاياندا لاغیمی گؤرن اولماسین؟ بیر ده بلکه آيری
- تدبیرین، تاپشیریغین اولا؟
- ائيواز دئدی:
- – لاغیمی گؤرمکلریندن آرخايین اول. منی ائله قاپیدان باخماغنان
- يوخلايیرلار. اؤزگه تاپشیریغیم دا بۇدو کی، باجارسانیز، چنلیبئله بیر
- آدام قاچیرین. احتیاط ایگیدین ياراشیغیدی آخی. بیر ده يوللاردا آدام قويون.
- منیم وعده‌‌م کئچیب. اليقیندی کی، کوراوغلو منی آختاریر. ایشدی، بۇ
- طرفلره گلن اولسا، خبر وئرسینلر.
- کانکانوغلو سوروشدو:
- – تۇتاق کی، ياراقلی-ياساقلی آدام گؤردوک، نه‌دن بیلک کی، چنلیبئلدندی؟
- – دۆز دئيیرسن. اگر ائله آدام گؤرن اولسا، ياناشیب مرجان خانیمین
- آدینی وئرسین کی، مرجان خانیم سنی گؤزله‌يیر. بیزیم اۇشاقلار عاریفدیرلر،
- اونلاردان اولسا، دئيه‌جک کی، گؤستر اونون يئرینی، اؤزگه‌سی اولسا، دئير من
- هارا، مرجان خانیم هارا! بئله نم-نۆم ائله‌يننن کئچسینلر...
- بلی، علاج گؤزده‌مه‌يه قالدی. کانکان میرزه‌لینی خبره قاچیردیلار،
- بیر-ایکی يئره ده آدام قويدولار کی، گلن اولسا خبر وئرسین.
- گۆنورتا اۆسته سلیم قانتر ایچینده کانکانوغلونو تاپدی:
- – مرجان خانیم دئيیر، تئز يئتیرسین اؤزونو منه.
- کانکانوغلو تلاشلا سوروشدو:
- – خئيیر اولا، سلیم؟ بیر ایش باش وئرمه‌يیب کی؟
- سلیم هئچ نه بیلمه‌دیگینی سؤيله‌دی. واخت ایتیرمک اولمازدی.
- پالتارلارینی ديَیشدیلر. کانکانوغلو اؤزونو يئتیردی مرجان خانیما:
- – خئيیر اولا، مرجان؟
- ائله خئيیری يوخدو! بۇ ساعت اؤيرنمیشم کی، قارداشیم اؤز آداملارینی
- يێغیب تدبیر ایسته‌يیب. قوچو مئهدی تدبیر تؤکوب کی، گئجه ایکن ائيوازی
- آسسینلار. ایشی ده تاپشیریبلار اونون اؤزونه. ایندی گرک بیز آخشامدان قاچاق
- کی، بیر يانا چێخا بیلک. هله آداملار داغیلاندان سونرا قارداشیمنان
- قوچو مئهدی تک قالیب آيری نه تدبیر تؤکوبلر، بیلمیرم.
- کانکانوغلو دئدی:
- – نه تدبیرین وار، دئ، يئرینه يئتیریم.
- – دۇرماق اولماز! بیلیرسن کی، آخشامدان شهردن آتنان چێخماق
- اولماز. اودو کی، گرک آتلاری شهردن چێخاریب ياخین کندلرین بیرینده
- قوياسان، پیيادا چێخاق، اوردان مینیب گئدک.
- کانکانوغلو باش اۆسته دئيیب چێخماق ایسته‌ينده مرجان خانیم
- داياندیردی:
- – داریخما، داریخما، احتیاطلی اول!
- کانکانوغلو يئنه ترپنمک ایسته‌ينده داياندی:
- – مرجان خانیم، بس آخی او ایستانبول، زهر...
- مرجان خانیم گۆلوب سؤزونو کسدی:
- – ائله شئيلر يوخدو. اؤزوم ائله دئيیردیم کی، ایشی سحره قويماياسان!
- کانکانوغلو واخت ایتیرمه‌يیب آتلاری حاضیر ائله‌دی، ناللادیب شهردن
- کنارداکی دوستونون يانینا آپارماغا باشدادی. اۆچونجو آتی آپارماغا
- قايیدیردی، شهرین گیره‌جه‌يینده‌کی دره‌ده باشینا پالاز آتیب گؤتوردولر.
- او زامان گؤزونو آچدی کی، زینداندا ائيوازین يانیندادی.
- کانکانوغلو ائله بیلیردی کی، لاغمین اۆستو آچیلیب. آغزینی آچیردی کی،
- ائيوازدان سوروشا، ائيواز اونو قاباقلادی:
- – آه، منیم قارداشیم! سیز منیم اۇجومنان اؤزونوزو بلايا
- سالدینیز! دئ گؤروم، مرجان خانیمین باشیندا نه وار؟
- کانکانوغلو باخدی کی، بۇردا آرخايینلیقدی، دئدی:
- – قلبینی سێخما، ائيواز، هئچ نه يوخدو. منی اؤزگه سببدن
- تۇتوبلار. بۇ ساعت ایشین اساسینی بیله‌رم.
- اینجاوارا، اونون ال-آياغینی ایپنن ساریمیشدیلار. خجالت چکه-چکه
- ائيوازین يانینا سۆروندو:
- – دیشلریننن آچ منیم قوللاریمی!..
- ائيواز، اولجه ائله‌مک ایسته‌مه‌دی. فیکیرلشدی کی، چێخیب او قێزی دا سالار
- ایشه. بیر ده اۆرگینده اؤزونو دانلادی کی، بۇ، منیم يولومدا اؤزونو
- اؤلومه وئریر، قوي آچیم، بلکه خلاص اولا. ایپی چئينه‌دی. اللری آچیلان کانکانوغلو
- آياقلارینی دا اؤزو آچیب لاغنان اؤزونو آتدی مرجان خانیمین
- يانینا.
- مرجان خانیم اونو گؤرنده دلی کیمی اولدو:
- – سن نه ایش گؤرورسن، آي ظالیم؟ بۇ بويدا دا سايمازلیق اولار؟
- گۆنون گۆنورتاسیندا اؤز پالتاریننان گلیرسن!.. اگر گؤرن اولدوسا، ایشیمیز
- بیتدی!..
- کانکانوغلو باخدی بۇردا دا آرخايینلیقدی، اؤزونو او يئره قويمادی:
- – اؤزون دئمه‌دینمی تئز قاچماق لازیمدی. داي منی نیيه قێنايیرسان؟
- مرجان خانیمین نفه‌سی دارالدی:
- – من بئله دئمیشم؟ سن اۇشاق کیمی ایش تۇتورسان...
- کانکانوغلو باخدی قێز اونون گؤرونمه‌يیننن قورخور، دئدی:
- – واللاه، ائله گلمیشم کی، بیر ایننی-جیننی گؤرمه‌يیب.
- – آتلار حاضیردی؟
- – به نه! حاضیردیلار.
- – اللها پناه! اوندا سنی گیزله‌دیم، قارانلیق قوووشسون.
- کانکانوغلو باخدی واخت وار، چێخیب او بیری آتی دا آپارماق قرارینا
- گلدی:
- – من بۇردا گیزله‌نیب دۇرا بیلمنم. بیر چێخیم هرله‌نیم. بیردن
- چنلیبئلدن گلن اولار!..
- مرجان خانیم چوخ دئدی، کانکانوغلو آز ائشیتدی. آخیردا قێزین علاجی
- کسیلدی، سلیمی چاغیردی، اونلار پالتارلارینی ديَیشدیلر، کانکانوغلو اؤزونو
- آتدی چؤله.
- قاش قارالیردی. گؤيون اۆزونو قارا بۇلود آلمیشدی. تک-تک ياغیش آتیردی.
- کانکانوغلو ایستانبول داروازاسینا چاتاندا باخدی کی، بیر آتلی گلیر. آياغینی
- ساخلادی. آتلی ياخینلاشاندا باخدی کی، نرین بیریدی، ياراق-ياساغینا دا
- سؤز اولا بیلمز. اليقین ائله‌دی کی، بۇ، يا کور‌اوغلودو، يا دا دلی حسن!
- باخدی گئریدن بیری ده گلیر. اۆرگی آتلاندی کی، چننیبئللیلرین آغزی
- آچیلیب. ياناشدی قاباقدا گلنه:
- – آغا، مرجان خانیم سیزی گؤزله‌يیر...
- اونون آغزیندان سؤز قۇرتارمامیش آتلی امر ائله‌دی:
- – دۆش قاباغیما! سؤزون يالان اولسا، باشین اؤزونون دئيیل!
- کانکانوغلو اليقین ائله‌دی کی، بۇ، کور‌اوغلودو. دۆشدو قاباغا...
- همین آدام مرجان خانیمین قاپیسینی او زامان آچدی کی، قێز هر
- شئيی حاضیر ائله‌يیب، يؤنو او طرفه بالاجا خنجرینی بئلینه باغلايیردی.
- قاپی آچیلاندا اۆرگی آتلاندی، ائله بیلدی گلن کانکانوغلودو. وجده
- گلیب دئدی:
- – گل، آي منیم سروریم، گل! من سنین قۇللوغوندا حاضیرام!
- قاپینی آچان آدام دا وجده گلدی:
- – من ده سنین قۇللوغوندا قۇل اولوب دۇرموشام، آي منیم بخت
- اۇلدوزوم، آي منیم مله‌يیم! بیر گۆل اۆزونو بری دؤندر گؤروم، سنه
- نه اولوب کی، بئله رحمه گلیبسن.
- مرجان خانیم سسدن آلمادی. گئری دؤننده آز قالدی کی، قێشقیریب
- يێخیلسین، هۇشونو ایتیرسین. آمما اؤزونو هۆنرنن اله آلدی!..
- قاپی‌نین آغزیندا دۇران کیم اولسا ياخشیدی؟
- او، امیر خانیيدی.
- ایندی مرجان خانیمین حالینی اؤزونوز فیکیرلشین... قشش ائله‌مزدیمی،
- اؤزونو ایتیرمزدیمی؟
- يوخ، مرجان خانیم ار کیمی داياندی. اؤزونو سئوینن گؤستردی. بیر
- کؤورکلیکنن دئدی:
- – بۇ نه لايیخدی، آي اوسماننی تورپاغی‌نین گله‌جک خوتکاری؟ هئچ گؤر
- چوبان بۇنو ائلرمی کی، سن ائله‌يیرسن؟! بۇ بويا گلیبسن، بیلمیرسن کی،
- زنن خايلاغی‌نین اۆستونه ایزین آلمامیش قاپی آچمازلار؟!.
- امیر خان باخدی کی، دوغرودان دا يامان قانمازلیق ائله‌يیب، ککله‌يککله‌يه
- دئدی:
- – مرجان خانیم، دوغرو بۇيورورسان، سهو ائله‌میشم! گؤزلرینه
- قۇربان اولوم، منی باغیشلا! آمما اصلینده گۆناه سنده‌دی. واللاه،
- سنین قۇللوقچون مرجان خانیم سیزی گؤزدويور دئينده هئچ بیلمه‌دیم
- سئویندیگیمدن نئيلیگیم! آخی نئجه سئوینمیگیم! بۇدو، نئجه مدتدی
- يولا گلمیين، منی آتشی-فراغیندا ياندیران بیر يار بۇ گۆن يولومدا
- آدام قويوب، منی گؤزله‌يیب، اینتیظاریمی چکیب... سێنسین منیم قدملریمی
- کی، تئز گلمه‌میشم، سنی اینتیظاردا قويموشام! باشینا دولانیم،
- قوي قايیدیم، تزه‌دن گلیم!..
- مرجانا دا بۇ لازیمیيدی. ایره‌لی يئریدی، لاپ مۆلايیملیکنن دئدی:
- – هه، عزیزیم! اینجیمه، قوي ايین-باشیمی دۆزلدیم.
- امیر خان گئری چکیلدی. مرجان خانیم کانکانوغلونو سسله‌دی:
- – آيه، آي مايماغین بیری مايماخ، ایچری گل!
- کانکانوغلو اندیکمیش اؤزونو آتدی ایچری:
- – بۇ دا کوراوغلو! مرجان، داي نه ایسته‌يیرسن؟!.
- مرجان خانیم آمان وئرمه‌دی:
- – کاروانیمیز پیس يئرده آخشاملايیب! بۇ، امیر خاندی. لنگیمک
- اولماز، چاغیر اونلاری ایچری. اؤزونو توخ ساخلا! من نه دئسم، اونو ائلرسن!
- صبرینی الدن قويما!..
- امیر خانگیلی چاغیردیلار ایچری. مرجان خانیم قۇ تۆکوندن اولان
- نازبالینجلارین ایکیسینی قويدو اۆست-اۆسته، امیر خانا اوتورماغی تکلیف ائله‌دی.
- امیر خان ایره‌لی يئریگیب مرجان خانیمین بهیشت قوخولو الیننن اؤپدو،
- بارداش قۇروب نازبالینجلارین اۆستونده اوتوراندا، ائله بیلدی کی، بۆتون
- دۆنيانین شاهی اولدو، قێزیل تاختدا ايلشدی، دئ باشدادی باسیب-باغلاماغا:
- – مرجان خانیم! ایندی گؤر سنین او عزیز آتانین قانینی کور‌اوغلودان نه
- ساياق آلاجاغام! بَيم من اؤلموشم کی، اونون قانی يئرده قالا؟!
- منه ده امیر خان دئيللر!.. او نئجه ائيوازیيدی کی، منیم نیشاننیمی
- آپ-آپ-آپار...
- او، ککله‌دی. باخدی کی، هئچ بۇ سؤزون يئری يوخويدو. بیر تهر اؤزونو
- دۆزلتدی:
- – البته، سنین بیر تئلینی وئرمه‌رم مین هۆرو کیمی کنیزه!
- قويارام ایندی اللرینی قوينوندا. الله قويسا، گلر او گۆن کی، اونو ائله‌رم
- سنین قاواغیندا قاراواش!.. سحر اللهین ایزنیينن، سنین او آلا
- گؤزلری‌نین قاواغیندا گرک ائيوازا اولجن ساغ-ساغ بیر الی-ولی
- داغی چکم، سونرا دا کسم باشینی! دئيیرم، مرجان خانیم! اونون
- قانیندان ایچریک، ایزین وئرسن، تويوموزو باشلاریق، اونون باشینی دا قوياریق
- خونچامیزا...
- سؤزون بۇ يئرینده مرجان خانیم دؤزمه‌دی، قاشلارینی چاتدی:
- – امیر خان! منیم ننم ده گئدیب گؤرسه کی، بیر قۇردون
- آياقلارینی ساریيیب يێخیبلار يولون ایچینه، سالار داشی باشینا، سويار دریسینی،
- گتیرر کی، نه وار، نه وار، من ده اووچويام! بیلیرسن کی، ائيوازی تۇتان
- اوغوللار وار! عهدیم وار کی، ائيوازین باشینی اؤزوم کسم! سنی
- چاغیرماقدا مقصدیم آيریدی: گرک سحر گئدیب کور‌اوغلونون باشینی
- گتیره‌سن، ایکیسی‌نین باشینی قوشا قوياق خونچامیزا!..
- سؤزلر اولدو زهرلی اوخ، امیر خانین بۇ تايیندان ديَیب او تايیندان
- چێخدی. قووشورولوب دئدی:
- – نوولو! مرجان خانیم، اونو دا ائلریک!.. ایندی رۇسغات وئر من
- پاشانین حۆضورونا تشریف آپاریم!
- امیر خان بۇنو دئيیب دیک آياغا قالخدی.
- يقین کی، اؤزونوز بۇ دمده کانکانوغلونون حالینی گؤزونوزون
- قاباغینا گتیریرسینیز. اونون حالی سیزین فیکیرلشدیگینیزدن ده بدیيدی.
- آخی، گئجه کئچیب گئدیر، او طرفده دار آغاجداری قۇرولوردو!..
- امیر خان آياغا قالخاندا، ائله بیل، دۆنيانی اوندان آلیب وئردیلر
- کانکانوغلونا. او، اؤزونو يێغیشدیردی کی، امیر خان چؤله چێخاندا اؤزونو
- اۆستونه آتسین، يا جانینی وئرسین، يا دا اونو بیر ياننیق ائله‌سین کی، واخدیندا
- بیر يانا چێخا بیلسیننر...
- آمما بیردن يئنه ایش اؤزگه جۆر اولدو: مرجان خانیم ایره‌لی يئریگیب
- گۆله-گۆله امیر خانی مذمّت ائله‌دی:
- – سن نه يامان ديَمدوشرمیشسن، آي دلی اوغلان! آي مننن
- اؤتری صبری-قراری اولمايان يار! بس بیردن-بیره نه اولدو بئله اۆز دؤندردین،
- بئله تئز دويدون؟ سؤزدریم خطرینه ديَدی؟ من هنک ائله‌دیم،
- آي باشیمین تاجی! گل اوتور! سحر الله قويسا، ائيواز اولاجاخ سنین
- ایخدیياریندا! اؤزون نئجه بیلیرسن، ائله ده ائله! آمما گرک اونون
- قانیندان گؤندره‌سن، بیر ایچم!.. قوياراممی گئجه واخدی گئده‌سن؟!
- يول گلیب يورولوبسان. اؤزوم سنین ال-آياغینی يۇيوب راحت ائله‌مه‌سم
- اولماز. اوتور!
- بۇ دیل امیر خانی ائله مست ائله‌میشدی کی، بۇ ساعت بۆتون دۆنيانین
- وارینی بیر آلما بويدا ائلیگیب اۇزاداسان، اؤزونو گؤرمزلیيه قويار، گؤزونون
- اۇجوينان دا باخمازدی.
- او ساعت اوتوردو. او، بهلولو باشیندان تئز ائله‌مکدن اؤترو دئدی:
- – بهلول، دۇر گئت راحت اول! سحر گلرسن، پاشادان سانا انام آلیب
- وئره‌رم!
- اونسوز دا ایشدن شککه دۆشوب ناراحات اولان بهلول بۇردان تئز چێخیب
- اؤزونو پاشايا يئتیرمکدن اؤترو سینوي گئدیردی. تئز قالخدی آياغا...
- کانکانوغلو مرجان خانیمین بۇ حرکتینه مات قالمیشدی. شۆبهه
- اونو گؤتورموشدو. حاضیرلاشیردی کی، آتیلیب ایکیسینی ده دوغراسین...
- مرجان خانیم اونون وضعیتینی گؤروب دئدی:
- – آي گدا! ياتما. يۇخودا سانا پلوو وئرللر! آپار بهلولو يولا
- سال، گئت دینجل، سحر تئزدن گل!..
- کانکانوغلوندا ترپنمک اقتداری هاردايدی؟! بهلول قاپیدان
- چێخاندا، مرجان خانیم ایره‌لی يئریدی، کانکانوغلونون قولوندان تۇتدو:
- – گئنه نیيه کار قۇلاغینا سالیبسان؟ آي او بیری قۇلاغی دا تۇتولموش!..
- اونو چؤله ایتله‌دی:
- – قويما! بهلولون ایشینی بیتیر، باغچادا منی گؤزله!..
- کانکانوغلو يۇخودان آيیلان کیمی بیردن آتیلدی چؤله، اؤزونو يئتیردی
- يازیق بهلولا. تۇتماغیينان جاننان ائله‌ميی بیر اولدو.
- چوخ کئچمه‌دی کی، مرجان خانیم گؤروندو. کانکانوغلو يئریدی ایره‌لی:
- – سن نه ائله‌مکده‌سن! گئجه کئچیب گئدیر!..
- – امیر خانی بیهوش ائلیگیب اۇزاتمیشام يئره! سن نئيله‌دین؟
- – من اونو باياقدان بیهوش ائله‌میشم. دی دۇرما! امیر خان
- آيیلاناجان بیر يانا چێخاق!..
- مرجان خانیم آراملا دئدی:
- – سانا دئمه‌دیممی توخداخ اول! ایندی سلیمی چاغیر. امیر خانی گؤتورک
- زیندانا! اونو ائيوازنان ديَیشک! بئله اولسا، سحره قدر آرخايینلیق
- اولار!..
- مرجان خانیمین عاغیلاسیغماز بۇ تدبیری کانکانوغلونو وجده
- گتیردی:
- – منه هئچ کیم لازیم دئيیل، آي عاغیل درياسی!
- او اؤزونو ایچری آتاندا، سلیمین سسی ائشیدیلدی:
- – کؤمکدن ضرر گلمز، آي زمانه‌سی‌نین رۆستمی-زالی! منی
- ده يولداش ائله!
- امیر خانی گؤتوردولر زیندانا. اونو ائله‌دیلر ائيواز، يێخدیلار يئره.
- آمما کانکانوغلو ائله ائله‌دی کی، آسسالار، ترپه‌نیب آسانلارا اذیت وئرمه‌سین.
- آسماسالار، دینیب هئچ کیمی يۇخودان اوياتماسین. اونلار چێخماق
- ایسته‌ينده، کانکانوغلو دۇروخدو. مرجان خانیم هؤوسله‌دن چێخدی:
- – داي دۇرماق واخدی دئيیل آخی!
- کانکانوغلو دئدی:
- – مرجان خانیم! سن بیلمیرسن، آمما ائيواز بیلیر: گرک من ده
- زیندانداکی ائيوازین يانیندا اولام کی، سحره قدر آرخايینلیق اولا!
- مرجان خانیم دینمک ایسته‌دی. کانکانوغلو آمان وئرمه‌يیب احوالاتی
- دانیشیدی. مرجان خانیم چاشباش قالاندا، سلیم ایره‌لی يئریدی:
- – منیم ال-آياغیمی ساریيین قويون بۇردا. کانکانوغلو، سويون
- پالتارینی! بێي، ائله سنین پالتارین منده‌دی دانا! دی دۇرمايین! ساریيین
- ال-آياغیمی!..
- بیردن کانکانوغلو اؤزونو آتدی چؤله. يازیق بهلولو هوپ گؤتوردو
- ایچری. سلیم کانکانوغلونون پالتارینی سويونمالی اولدو. اونو دا ائله‌دیلر
- کانکانوغلو، قويدولار زیندانداکی ائيوازین يانینا. دئ ترپندیلر.
- چؤله چێخاندا، کانکانوغلو امیر خانین آتینی آچدی. مرجان خانیم
- گئنه دیللنمه‌لی اولدو:
- – آرتیخ آت نَيینه گرکدی، بؤيوککیشی؟!
- – او آتلارین بیری ناللاناندا مێخا دۆشوب، آخسیيیر.
- بهلول دا آتدیيدی آخی. سلیم ده اونون آتینی آچدی:
- – من ده سیزنن اولمالیيام!..
- دۆشدولر يولا...
- بۇنلارین يولو دۆشدو آلا داغدان. سحره قدر آت سۆردولر. سحر
- گۆن وۇراندا، يئتیشدیلر آلا داغداکی قێولا بۇلاغینا. تهلوکه‌‌دن سوووشدوقلارینی
- گؤرن مرجان خانیم دئدی:
- – بۇردا دۆشک. هم آتلار اوتلاسین، دینجلسین، هم ده اؤزوموز چؤرک
- يئيیب دینجلک.
- دۆشدولر. بیر آز دینجه‌لندن سونرا مرجان خانیم دئدی:
- – بؤيوککیشی، بۇ اکینلر گؤرسه‌دیر کی، ياخینلاردا کند وار. بلکه بیر
- سێنیخچی تاپاسان. ائيوازین قولو يامان شیشیب.
- کانکانوغلو دۇرماق ایسته‌ينده، سلیم خاهیش ائله‌دی قويون من
- گئدیم. راضیلاشدیلار.
- چوخ کئچمه‌دی سلیم بیر آتدیينان قايیتدی. آتدی آتیننان آشریلیب اونلارنان
- گؤروشدو. سونرا دۆشدو مرجان خانیمین آياقلارینا.
- معلوم اولدو کی، او، سلیمین بؤيوک قارداشیدی. سلیم بالاجا واخدی
- دیلندیکلری زامان ایتیبمیش. بۇ تصادوف نتیجه‌سینده تاپیشیبلار. اونون آدی
- مۇرغوزويدو.
- مۇرغوز اونلاری ائوینه آپاردی. سێنیقچی گتیردیلر. ائيوازین قولو ساریندی.
- بیر گۆن دینجه‌لیب او بیری گۆنون آخشامی دۆشدولر يولا. سلیم خاهیش ائله‌دی
- کی، ایزن وئرین، بیر مدت قارداشیمین يانیندا قالیم. ایزن وئردیلر.
- سحر دان يئری آغاراندا، کانکانوغلوينان مرجان خانیم باخدیلار
- کی، باشی قارلی اۇجا داغلارین اته‌يینده‌دیلر. گؤردولر کی، ائيواز اؤزوندن
- ایختیيارسیز، آتینی قاباخدا سۆرور. بیلدیلر کی، بۇرا هارادیسا، چنلیبئله
- ياخین يئردی. اودو کانکانوغلو گئریدن ائيوازی سسله‌دی:
- – ائيواز! دئ گؤرک، داها بۇردان بئله بیزه بیر خطر ديَمز کی؟
- ائيواز آتین باشینی چکیب آلا گؤزلرینی بیر ده دولاندیردی. چنلیبئلین
- قارلی زیروه‌لری گؤزلری‌نین قاباغیندا جیلوه‌لندی. آتین باشینی گئری چئویریب
- دئدی:
- عزیز قارداش، بۇرا مردلر يۇردودو،
- ناموس بۇرالاردا، آر بۇرالاردا!
- ترلان اويلاغیدی بۇ داغلار تامام،
- قاناد چالا بیلمز سار بۇرالاردا!
- کوراوغلو بسلیگیب چنلیبئل باشی،
- ایگید بره‌سیدی اونون هر داشی.
- جانیننان يئي بیلر يولداش يولداشی،
- يئتیشر يارینا يار بۇرالاردا!
- بۇرا اويلاغیدی شۇخ گؤزللرین،
- ساخلیيیر سیررینی ار اوغلو ارین.
- سۇيو مجون اولار، هاواسی سرین،
- قالار تزه قارا قار بۇرالاردا!
- ایگیدلر مشق اۆچون دۆشنده بسه،
- دیل آچار قايالار، وئرر سس-سسه.
- نامردلیينن خاتا ديَمز هئچ کسه،
- قۇرولماز مظلوما دار بۇرالاردا!
- گۆنده اۆچ يول آغیر مجلیس قۇرولار،
- يئيیلر، ایچیلر، داماق دۇرولار،
- کیم تۇتسا باشینی، دردی سورولار،
- ایسدسه، يئتیشر نار بۇرالاردا!
- بۇ آزاد داغلاری گز وعده‌‌سینده،
- بۆلبول گۆلو سسدر ياز وعده‌‌سینده،
- گۆل بۆلبوله چاتار اؤز وعده‌‌سینده،
- قونماز گۆل اۆستونه خار بۇرالاردا!
- مرجان، خان ائيوازین خلاصکاریدی،
- کانکانوغلو اونون ایخدیياریدی،
- کوراوغلو مرددرین قوچ سرکاریدی،
- عجم ده، تۆرکمان دا وار بۇرالاردا!
- سؤز تامام اولدو. ائيواز آتین باشینی دؤندردی چنلیبئله. بیر ده
- گؤزونو دولاندیراندا، نه اولدوسا، کئفی پوزولدو، رنگی قارالدی، قاشقاباغی
- تؤکولدو. آتین باشینی چکیب دۇردو.
- کانکانوغلو آتینی ایره‌لی سۆردو:
- – ائيواز، سنه نه اولدو؟
- ائيواز دینمه‌دی.
- مرجان خانیم دا آتینی قاباغا سۆردو، سوروشدو کی، ائيواز سنه، نه
- اولدو؟ ائيواز دینمه‌دی. ائيواز، دردینی دئ! ائيواز دینمه‌دی. قارداش، آخی
- بیردن-بیره نیيه بئله ائله‌دین؟ ائيواز دینمه‌دی کی، دینمه‌دی. ائله بیل،
- دیلینه قێفیل وۇرولموشدو... مرجان خانیم دئدی:
- – ائيواز! بلکه بیزی گتیرمه‌يینه پئشمان اولوبسان؟ بلکه
- قورخورسان بیزنن گلميی‌نین اۆستونده اۆزونه سؤز گله؟ بلکه کوراوغلو
- بیزی قبول ائله‌مز؟ ایسده‌يیرسن، قايیدیب گئدک!
- ائيوازدان سس چێخمادی. مرجان خانیمی قهرری غضب آلدی. گؤزلری
- دولدو، قهرنن دئدی:
- من آشیغام، سینه‌ده،
- قار اریير سینه‌ده،
- قادام نامرده ديَسین،
- اونون کؤلگه‌سینه ده!
- او، آتینین باشینی دؤندردی گئریيه، اۆز تۇتودو کانکانوغلونا:
- – قايتار آتینی گئری! بئله‌لرینه پناه آپارماقدانسا، اؤلومه گئتمک
- ياخشیدی. گؤرونور، داي، بیزیم بۇردان بئله گئتمه‌يیمیزه راضی دئيیل!
- اونلار آتلاری گئری دؤندرنده، ائيواز يۇخودان آيیلان کیمی اولدو،
- فیکیردن آيریلیب آتینی سۆردو مرجان خانیمین آتینین قاباغینا.
- من آشیغام، کۆسن ار،
- آغاج بارا، کۆسنر،
- کیمه شیکايت ائيلر،
- بیر گدادان کۆسن ار؟!
- مرجان خانیم ائله حالدايدی کی، چێرتیق وۇرسان، قانی داماردی. او، آياقلارینی
- آتین يانلارینا سێخدی، جیلووو ترپتمک ایسته‌ينده ائيواز باخدی کی،
- گئدیر، آتینی اونون آتینین قاباغینا سۆروب دئدی:
- بیر دردیم وار، بۇ داغلاردان بؤيوکدو،
- اونونچون قارالدی قانیم، اینجیمه!
- باغیشلا تاقسیریم، قۇلام، خاتام وار.
- اینصافا گل، مرجان خانیم، اینجیمه!
- سؤز مرجان خانیما اثر ائله‌دی. آمما قهرینی آزالتمادی. آلا
- گؤزلری لاپ دولوب گیله‌لندی، تیترک سسنن دئدی:
- سننن اینجیمیرم، آي اینسان اوغلو،
- فلک وۇروب منه ال، اینجیمیشم!
- اؤز قارداشیم ياغی چێخیب اؤزومه،
- کؤمک ائتمز اؤزگه ائل، اینجیمیشم!
- ائيواز دردی‌نین وجینی دئمک ایسته‌دی:
- داغلار کیمی چن-دۇمانا بۆرونوم،
- هانسی اۆزنن کور‌اوغلويا گؤرونوم؟..
- قوي يێخیلیم آياغینا سۆرونوم،
- کس باشیمی، آخیت قانیم، اینجیمه!
- آمما مرجان خانیم ائيوازین سؤزوندن هئچ نه آننايا بیلمه‌دی،
- داها دا هم شۆبهه‌سی آرتدی، هم ده ائيوازا آجیغی تۇتدوغوندان اؤز
- دردینی اؤزونه دانیشدی:
- من ایللرنن گؤز ياشیمی تؤکموشم،
- قم الیندن الیف قددیم بۆکموشم،
- محبت اۇجوندان نه‌لر چکمیشم،
- دئيه بیلمز اونو دیل، اینجیمیشم!
- ائيواز دا اؤز دردیندن دانیشدی:
- دردیم وار گؤيده‌کی اۇلدوز سانیندا،
- گۆناهکارام کور‌اوغلونون يانیندا.
- ایتر اعتباری ائيواز خانین دا،
- نه گیزله‌دیم، سندن دانیم، اینجیمه!
- مرجان خانیم يئنه آنلیيا بیلمه‌دی کی، ائيوازین کور‌اوغلونون
- يانیندا نه گۆناهی اولا. نه فیکیرلشدیسه، قارا قاشلاری لاپ گلیب بیر-بیرینه
- قوووشدو، غضبنن دئدی:
- مرجانا دئ، قاشین نیيه چاتیرسان،
- آچیخ دانیش، نیيه ياسا باتیرسان؟
- يايین گیزده‌دیرسن، اوخون آتیرسان،
- بئله ایشدریندن بیل، اینجیمیشم!
- ائيواز باخدی دردینی سؤزنن دئيه بیلمه‌دی، دیلنن دئدی:
- – مرجان خانیم، بۇدو، اۆچ گۆندو بیز يول يولداشیيیق. هئچ سوروشمورسونوز
- کی، من بايازیده نیيه گئتمیشم. نئجه گئتمیشم؟ دئمیرسینیز
- آخی سیزی بۇ اذیتلره نیيه سالمیشام؟!
- باخدیلار کیشی‌نین اوغلو دۆز دئيیر، سوروشدولار.
- ائيواز، احوالاتی بیز نئجه بیلیریکسه، ائله‌جنه دانیشیدی اونلارا. آخیردا
- دا دئدی کی، ایندی من چنلیبئله نه اۆزنن قايیدیرام؟ آتیم يوخ، قێلینجیم
- يوخ، گئيیمیم ده اؤزومونکو دئيیل. هۆنریم نه اولوب کی، ساغ
- قولومو آسمیشام بوينومنان؟
- باخدیلار کی، دوغرودان دا ائيوازین دردی بؤيوک، گۆناهی دا چوخدو.
- آمما نه ائله‌مک اولاردی. مرجان خانیم اینجیدیگینه پئشمان اولوب
- شۆبهه‌لندیگینه گؤره خجالت چکه-چکه دئدی:
- – آتالاریمیز کئچنه گۆذشت دئيیبلر، ائيواز! نه تؤکولن دولار، نه
- ده کئچن قايیتماز. ایگید يارانیب کی، باشی قووغا-قال چکه، گاه وۇرا، گاه
- وۇرولا. دۆشمننیک قۇمار کیمی بیر شئيدی، گاه بیر طرف آپارار، گاه دا
- او بیری طرف. کوراوغلو سنین ساغ اولماغینا شۆکور ائله‌مه‌لیدی. من ایلتیماس
- ائده‌رم، گۆناهیندان کئچر. الله قويسا، ساغالان کیمی ده گئدیب لئيلی
- خانیمی گتیررسن...
- ائيوازین عینی خئيلی آچیلدی. باشلادیلار يوللارینا. مرجان خانیم سؤزو
- ائله باشلادی، ائله گتیردی کی، هر شئي ياددان چێخدی...
- اونلارین باشی شیرین صؤحبته ائله قاریشمیشدی، آغقايادان نئجه کئچدیکلریندن
- خبرلری اولمادی. بیر ده ائيواز باشینی او زامان قالدیردی کی،
- آت دۆزونده‌دیرلر. گؤزونو دولاندیردی کی، هر يئر قارا بويانیب، بربندرگاهلار
- دا بومبوشدو. ائله بیل، چنلیبئل يئریننن کؤچوب. ائله بیرجه
- دفعه، – آمان الله، کیمین باشیندا نه ایش وار؟ – کور‌اوغلونونمو، نیگار
- خانیمینمی؟.. دئيیب هۇشونو ایتیردی. کانکانوغلو اونو تئز تۇتا بیلدی، آتدان
- يێخیلماغا قويمادی...
- کانکانوغلو آخیردا دئدی:
- – مرجان خانیم ائيوازین باشینی آلدی دیزی‌نین اۆستونه، من ده اۆزونه سۇ
- سپیردیم کی، او دلی آدام گلدی، ائيواز آيیلیب اونا ياخینلاشاندا قايیدیب
- قاچدی، بیر ده گلدی. اؤزگه‌لر ده گلدیلر، بیزی گتیردیلر. بۇدو سیزین قارشینیزدايیق.
- آمما منی بیر شئي ناراحات ائله‌يیر، میرزه‌لی گؤزومه ديَمیر.
- يقین باشیندا ایش وار. گرک ایزن وئره‌سینیز قايیدام اونون دالینجان...
- کانکانوغلونون سؤزونون دالینی هئچ کس ائشیتمه‌دی. ائله بیل، قاباغی
- چیللکن باغمیش داغ سئلی‌نین قاباغی آچیلدی. هامی آخدی اوننارین اۆستونه.
- دئ اؤپن کیم، قۇجان کیم، ایندی ده سئویندیگیندن آغلیيان کیم!.. باشینیزی
- نه آغریدیم، کانکانوغلو او زامان گؤزونو آچا بیلدی کی، آخشام اولوب،
- شاملار يانیب. ائيوازنان ایکیسی ده بیر خانادادیلار. باخدی کی، بیر آرواد
- ائيوازا دئيیر:
- – ائيواز، بالا! بس آدام آناسینی بئله اۇنودار؟
- سۆفره آچیلدی. يئدیلر-ایچدیلر. ائله سۆفره تزه يێغیلمیشدی، بیر نفر
- قاپینی آچیب دئدی:
- – نیگار خانیم! مجلیس آرسته اولوب. کوراوغلو دئدی اۇشاقلاری دا، زرقلم
- باجینی دا گؤتوروب گلسین.
- اونلار دۇروب مجلیسه يوللاندیلار. کانکانوغلو يولدا فیکیرلشدی کی،
- فۆرصت تاپیب کور‌اوغلودان ایزن آلسین، میرزه‌لی‌نین دالینجا گئتسین. اونلار
- مجلیسه داخیل اولاندا کانکانوغلو نه گؤرسه ياخشیدی؟ – باخدی کی، میرزه‌لی
- قان-ترین ایچینده دۇروب کور‌اوغلونون قاباغیندا، تؤوشويه-تؤوشويه دئيیر:
- – بايازیددن چێخار-چێخماز منی تۇتدولار، قايتاردیلار دۆز محمود
- پاشانین يانینا. پاشا منی چوخ دؤيدو، چوخ سؤيدو، چوخ هده-حربه
- گلدی کی، دئ گؤروم، منیم آتیمی مینیب هارا گئدیردین؟ دینمه‌دیم کی،
- دینمه‌دیم. بیر ایسته‌دی کی، جللادا امر ائلیيه، باشیمی بدنیمنن آيیرا،
- سونرا نه فیکیرلشدیسه، امر ائله‌دی کی، آپاریب بۇنو سالارسینیز مینیب قاچدیغی
- آتین تؤوله‌سینه. قوي ائيوازی بیر تهر ائله‌يیم، اوندا باخارام ایشینه.
- منی سالدیلار تؤوله‌يه. ائله او گۆن سحر آتدارا يئم وئریب چێخدیقلاری
- اولدو. ایکی گۆن تؤوله‌يه گلن اولمادی. آتدار دا آجیندان قێریلیردی، من ده.
- اۆچونجو گۆن قاپی آچیلدی، ایکی آدام گیردی ایچری. باخدیم بیری او بیرینه دئيیر
- کی، محمود پاشا نئجه مدتدی منیم قمر آتیمی گؤزومون قاباغیندا
- مینیر. ایندی گرک اونون تويونا بۇ آتین اۆستونده باخام!.. بۇنلارین
- هره‌سی بیر آتا ياناشدی کی، آچالار، بیردن منی گؤردولر. بیری آتیلدی اۆستومه
- کی، آي يازیق، پاشانین هانسی غضبینه دۆشوبسن، دۇر، بۇ آتلاردان بیرینی
- مین، چێخ پاشانین تويونون تاماشاسینا. ال-آياغیمی آچدیلار. داي سوروشا
- بیلمه‌دیم کی، آي قارداش، نه پاشا، نه توي. هره‌سی بیر آتی چکدی چؤله. گؤزلریمی
- سیلدیم کی، لاپ دیبده‌کی آخورا بیر آت باغلانیب. ياناشدیم. بیر آز دلیلیک
- ائله‌دی، يوخ-يوخ، يهری باسدیم بئلینه، چکدیم چؤله. بئلینه آتیلما-
- غێمنان گؤتورولميی بیر اولدو. ها ائله‌دیم يۆيه‌نینی يێغا، باشینی بیر يانا
- دؤندره بیلمه‌دیم کی، گؤرم نه تويدو. ائله اونو قنیمت بیلدیم کی، اؤزومو
- برک ساخلايیم. آت قۇش اولموشدو. اینجاوارا، دۆز گلیب بۇرا چێخمیشام.
- آماندی، کوراوغلو! دۇرما! اؤزونو يئتیر، اۇشاقلار يامان داردادیلار!..
- گۆلوشون شاققیلتیسی مجلیسی تیترتدی. میرزه‌لی قالدی چاشباش کی، ايم
- بۇرا چننیبئلدیسه، من کور‌اوغلونون حۆضوروندايامسا، بۇ نه شاققاناخدی،
- آخی ائيواز داردادی... فیکیرلشدی کی، اؤزگه يئرده، کور‌اوغلونون دۆشمنی‌نین
- مجلیسینده‌يم، منی اله سالیبلار.
- کانکانوغلو اؤزونو ساخلايا بیلمه‌دی، آتدی میرزه‌لی‌نین اۆستونه. بیچاره
- میرزه‌لی ایندی گؤزونو سیلدی کی، سحردن بری قنشرینده اوتوران دوغرودان
- دا مرجان خانیمیيمیش. گؤرورموش، آمما آغلینا سێغمیرمیش کی، او اولا.
- ائله بۇ دمده دلی مئهتر قاپینی آچدی کی، کوراوغلو، مۇشدولوغومو
- وئر، او آدام مینیب گلدیگی آت عرباتدی!..
- آرا ساکیت اولدو، کوراوغلو اۆز تۇتدو آشیق جۆنونا:
- – آشیق جۆنون، دؤوران ائله!
- آشیق جۆنون ائله بۇنا بندیيمیش. ساز چوخدان کؤينکدن چێخیب کؤکله‌نیبمیش.
- آياغا قالخماسیينان سازی سینه‌سینه چکیب اوخوماسی بیر اولدو:
- زحمت چکیب، قال ائيله‌يیب، يورولوب،
- نامرددن قۇرتاریب مردی مرجانیم!
- آسلانین ائرکيی، دیشیسی اولماز،
- ار ایستنن يئرده اردی مرجانیم!
- آشیق جۆنونون بیر ياخشی خاصيتی واریيدی، هر تزه سؤز اوخوياندا
- ترجومان، مادی-معنا ائلیيردی. يئنه سازی ساغ قولتوغونون آلتیننان
- کئچیریب سؤزو ترجومان ائله‌دی. هامی يئر-يئردن مرجان خانیما دا،
- جۆنونا دا “آفرین”، “احسن!” دئدی، آشیق جۆنون سازی سینه‌سینه چکمک
- ایسته‌ينده، هاردانسا بیر يانیقلی باياتی سسی ائشیدیلدی:
- من آشیق، ائيلیيه نه،
- تک ایگید ائيلیيه نه؟
- ائل يێغیلسا ائله‌مز
- اؤزونه ائيلیينه!..
- آمما باياتیيا ائله فیکیر وئرن اولمادی. آشیق جۆنون اوخودو:
- ایگیدلر اويلاغی دۆشوب يادینا،
- پناهلانیب کور‌اوغلونون آدینا.
- داردا چاتیب خان ائيوازین دادینا،
- داغیدیب مؤهنتی، دردی مرجانیم!..
- باياتی سسی يئنه گلدی:
- من آشیغام، آدادا،
- گمیم قالیب آدادا!
- نه قارداش وار، نه آتا،
- کیمیم گلسین آ دادا!..
- يئنه فیکیر وئرن اولمادی. فیکیرلشدیلر کی، هلبت جاوان-جولوخدو.
- آشیق جۆنون لاپ وجده گلمیشدی، اوخودو:
- نیگار خانیم دۇرنا تئلی گتیرسین،
- بزک وۇرسون، توي ایشینی بیتیرسین،
- خۇدام اونو مۇرازینا يئتیرسین،
- گؤزللر ایچینده بیردی مرجانیم.
- بۇ دفعه باياتی لاپ آيدین گلیر، آيدین ائشیدیلیردی. هامی گۇش ائله‌دی کی،
- اوخويان زنن خايلاغیدی، اؤزو ده جاواندی:
- عزیزیم، سینه‌سینه،
- اوو آولا سینه-سینه.
- فلک بیر اوخ آتیبدی،
- ديَیب قێز سینه‌سینه!..
- بیردن يادلارینا دۆشدو کی، اوخويان لئيلی خانیمدی. کوراوغلو هاي وۇردو،
- اونو گتیردیلر مجلیسه. اوننان برابر پاشا دا، قاصید ده مجلیسه گتیریلدی.
- ایچری گیرنده، اۆچونون ده باشی ايیلدی سینه‌سینه. بۇنو بئله گؤرن
- آشیق جۆنون سازین لاپ زیلینده – بوغاز پرده‌سینده لئيلی خانیمین باياقکی
- باياتیسینی بئله اوخودو:
- من آشیق سینه‌سینه،
- اوو آولا سینه-سینه،
- نامردلیينن ایش گؤرن،
- باش اير سینه‌سینه!
- سونرا دا اؤز سؤزونون مؤهوربندینی اوخودو:
- آشیق جۆنون آلقیش وئرسین دیلیننن،
- خوش دولانسین ایل کئچدیکجن ایلیننن،
- چنلی‌نین گئتمیشدی جانی الیننن،
- قايتاردی اؤزونه وئردی مرجانیم!
- آلقیش سسی بۇ دفعه لاپ چنلیبئلی تیترتدی.
- آداملار ساکیتلشنده کور‌اوغلونون سسی ائشیدیلدی:
- – ایندی هر کس گۆناهینی بوينونا آلیب جزاسینی ایسته‌يه‌جک. اول سؤز
- پاشانیندی.
- پاشا باشلادی يالوارماغا:
- – کوراوغلو! آتام-آنام سانا قۇربان! منی دولاندیر بۇ مجلیسده‌کیلرین
- باشینا، بۇ دفعه آمان وئر، گۆناهیم بؤيوکدو، کئچ گۆناهیمدان،
- اؤلدورمه منی. سنه دوست اولماغا لايیق اولماسام دا داها بۇندان بئله
- دۆشمن ده اولمارام! ال منیمدی، اتک سنین، کس الیمی، اته‌يینی کسمه!..
- کوراوغلو اونو اوتوردوب قاصیدی قالدیردی. يازیق قاصیدده دیل نه گزیردی
- سؤز دئيه. کوراوغلو اونو دا اوتورتدو. لئيلی خانیمی قالدیردی. لئيلی خانیم
- دئدی:
- – کوراوغلو، منیم گۆناهیم ائله بؤيوکدو کی، جزاسی اؤلومدو. بۆتون
- بۇ ایشلری من ائله‌میشم، باشینیزا نه گلیبسه منیم اۇجباتیمناندی.
- آمما بیرجه ایلتیماسیم وار، قوي منی بۇردا اؤلدوروب دفن ائله‌سینلر،
- قبریم دا چنلیبئلده اولسون.
- کوراوغلو اونو دا اوتوردوب سؤزه باشلادی:
- – ناشوکور پاشانین گۆناهی چوخ، جزاسی اؤلومويدو. قورخاقلیق ائله‌دی،
- جزاسینی ایسته‌مه‌دی. اونو باغیشدیيیرام بۇ گۆنکو گۆنه، بیر ده مهبوب
- خانیما. سحر قاصیدیينن آپاریب يولا سالارسینیز گئدر. لئيلی خانیمین
- مردلیگی نامردلیگیندن چوخدو. اونون گۆناهلاریندان کئچیرم، اؤزونو
- ده وئریرم تۆپداغیدانا!..
- ائله بیل، کوراوغلو تۆپداغیدانین اۆرگیندن حالیيمیش. آز قالدی کی،
- آتیلیب دۆشسون...
- پاشا مجلیسین هاواسیندان ایستیفاده ائله‌دی، ایره‌لی يئریدی:
- – جان کوراوغلو! مۆمکونسه، بیزی ایندی آزاد ائله.
- کوراوغلو گۆلدو:
- – بۇرا چنلیبئلدی، آسدان پاشا! بۇردا خيانت اولماز. سؤز بیردی.
- بیر ده آخی تويو اولانین بیری ده سنین اؤولادیندی. قال، ایشتیراک ائله، الله
- مۆبارک ائله‌سین دئ، خئيیر-دۇعا وئر.
- اۆچ ایگیدین، اۆچ گؤزه‌لین تويو قۇرولدو. ائيوازین تويو تزه‌لنمیشدی،
- زرقلم ده، قسساب آلی دا دینه-ایمانا گلمیشدیلر.
- کوراوغلو بۇ تويلاری ائله باشلادی، قێرخ گۆن ائله شنلیک اولدو کی، چنلیبئلده
- هله رۇزیگارین گؤزو بئله شنلیک، بئله شاددیخ، بئله توي-بۇسات گؤرمه‌میشدی.
- سۇبايلارینیزا قیسمت اولسون بئله تويلار، منیم عزیزلریم!
قایناق‌لار
- Azadliq . org