Wq/skr/کتاب
میں اپݨے سمورے سرائیکی وسیب دے نینگراں کوں ہک سنیہا ݙیوݨ چاہندا
ہک کتاب وچ اتنا طاقت ہوندی ہے کے او دنیا وچ انقلاب پیدا کر سڳدی ہے. ساݙی اڄ دی پوسٹ سرائیکی وسیب دے نینگریں دے دل وچ کتاب دی محبت، پیار ، رغبت شوق ترغیب تے اہمیت پیدا کرݨ ہے. فضول زندگی جیوݨ کنوں چنڳا ہے بندہ اپݨے آپ کوں باشعور بݨاوݨ دی کوشش کرے. دنیا جہان دے مشہور لیڈراں وچ ہک خوبی ضرور ہوندی ہے او کتاب دا مطالعہ کریندے ہن.
✅قرآنِ پاک دی روشنی وچ
قرآنِ مجید دی پہلی وحی دا آغاز ہی "پڑھݨ" دے حکم نال تھیا جیندے وچ ساکوں پتہ لڳدے کہ اسلام وچ پڑھائی دی کیا قدر ہے
پہلی وحی (سورۃ العلق) "پڑھو (اے نبیﷺ) اپݨے رب دے ناں نال جئیں پیدا کیتا۔ جئیں انسان کوں ڄمے ہوئے خون توں بݨایا۔ پڑھو! تہاݙا رب ٻہوں کریم اے، جئیں قلم دے ذریعے علم سکھایا۔" (سورۃ العلق: 1-4)
علم الے تے جاہل دا فرق "فرما ݙیو! کیا علم الے تے علم نہ رکھݨ الے برابر تھی سڳدن؟" (سورۃ الزمر: 9)
علم وچ اضافے دی دعا "تے دعا کرو اے میݙے رب میݙے علم وچ اضافہ فرما۔" (سورۃ طہٰ: 114)
✅احادیثِ مبارکہ دی روشنی وچ حضور اکرم ﷺ نے علم حاصل کرݨ کوں ہر مسلمان دا فرض قرار ݙتے تے کتابی علم کوں محفوظ کرݨ دی تلقین فرمائی اے۔
علم حاصل کرݨ فرض اے "علم حاصل کرݨ ہر مسلمان (مرد تے تریمت) تے فرض اے۔" (ابنِ ماجہ)
جنّت دا رستہ "جیہڑا شخص علم دی تلاش وچ کہیں رستے تے چلدے اللہ تعالیٰ اوندے کیتے جنت دا رستہ سوکھا کر ݙیندے " (صحیح مسلم)
علم کوں لکھ تے محفوظ کرو نبی کریم ﷺ نے فرمایا "علم کوں قید کرو۔" صحابہؓ نے پچھیا علم کوں قید کرݨ دا کیا طریقہ اے؟ فرمایا "اونکوں لکھ تے محفوظ کر گھنوں۔" (طبرانی)
مرݨ دے بعد فائدہ ݙیوݨ والا عمل "جݙاں انسان مر ویندے تاں اوندیاں نیکیاں دا سلسلہ ختم تھی ویندا اے مگر ترے چیزاں جاری رہندن صدقہ جاریہ، ایجھا علم جیندے توں نفع چاتا ونڄے، تے نیک اولاد جیہڑی دعا کرے۔" (صحیح مسلم)
✅کتاب دی اہمیّت دے حوالے نال چند مشہور شخصیات دیاں ڳالھیں تہاݙے سامݨے پیش کریندا پیو غور نال پڑھسو.
(1) البیرونی خیالات دی جنگ وچ کتاباں ہتھیاراں دا کم ݙیندین۔
(2) کارلایل کتاب گھر وانڳوں ہے ایندے وچ بندے کوں رہوݨا چاہیدا ہے. کیوں جو دنیا وچ کتاباں حکومت کریندن.
(3) جم روہن کتاب کوں مُل گھنݨ تہاکوں مہنگا نہ لڳسی ، پر کتاب نہ پڑھݨ تہاکوں مہنگا ضرور لگ سڳدے.
(4) ہینری (امریکی شاعر) ساریاں چنڳیاں کتاباں دا مطالعہ ایوے ہے جیوے پچھلی صدی دے بہترین انسانیں نال ڳالھ مہاڑ کرݨ وانڳوں ہے۔ جہڑی کتاب کوں ول ول پڑھݨ دا دل نہ کرے، او کتاب کوں ہک واری وی نہ پڑھو۔
(5) نامعلوم میکوں خوش رہوݨ سانڳے صرف ݙو سرہاݨیں تے کتاباں دی لوڑ ہے۔
(6) ابراہم لنکن میں کتاباں پڑھݨ دے شوق وچ پنجاہ پنجاہ میل دا پندھ کر تے اپݨے دوستاں کنوں کتاباں منگ تے گھِن آندا ہامی
(7) سید عطا اللہ شاہ بخاری ٻہوں ساریاں کتاباں پڑھݨ توں بہتر اے جو کم دیاں چند کتاباں پڑھ گھدیاں ونڄن۔
(8) شورش کاشمیری کجھ کتاباں تہاݙے علم وچ ودھارا کریندن ، کجھ غور و فکر کرݨ دی عادت ݙیندن ، کجھ زبان دی طاقت ودھیندین. کتاب دی سچی تعریف اے ہے جو اینکوں پڑھ تے تہاݙا اے احساس تکڑا تھی ونڄے جو تساں ہک چنڳے دوست دی سنگت وچ وقت ڳزارے۔
(9) لیو ٹالسٹائی گندیاں کتاباں ہک زہر الی کار ہن جہڑیاں جسم کوں نئیں بلکہ روح کوں مار ݙیندین۔
(10) ایمرسن کتاباں دے مطالعے نال انسان دا مستقبل سوجھل تھی ویندے.
(11) سعس کتابیں نال محبت آپے نئیں تھیندی بلکہ کرݨی پوندی اے۔
(12) نامعلوم کتاب نال جھیڑا نہ کرو، کتاب پڑھدیں ہوئیں الجھن وچ نہ پووں جتݨا ڳالھ سمجھ آندی اے سانبھ گھِنو۔
(13) مظہر اسلام کتاباں استاد وی ہن تے دوست وی، عظیم رہنما وی ہن تے شخصیت ساز وی... کتاباں معاشرے دا اثر قبول کر تے لکھیاں ونڄݨ تاں اے سماج دی تشکیل وی کریندن. کتاب ہک ہوندی اے پر اوندے زاویے ہزار ہوندن۔ کتاب دی ہک خوبی اے ہے جو ایندا پڑھݨ الا زندگی دے کہیں وی شعبے نال تعلق رکھدا ہووے، اے اوندے نال مخاطب ہوندی ہے.
(14) گورچ فوک چنڳیاں کتاباں او نئیں جہڑیاں ساݙی بھک مکا ݙیون، بلکہ چنڳیاں کتاباں او ہن جہڑیاں ساݙے علم دی بھک کوں ودھا ݙیون۔
(15) سعدی شیرازی اگر کہیں ݙنگر اُتے کتاباں لݙ ݙتیاں ونڄن تاں اوندے نال نہ او محقق بݨدے تے نہ ہی عقلمند۔
(16) مولانا سید احسن مارہروی ݙو چوریاں جائز ہن دل دی تے کتاب دی۔
(17) رشید احمد صدیقی الہامی تے قانونی کتابیں دا ترجمہ اوکھا ہوندے۔
(18) نامعلوم وݙے بندے زندگی وچ گھٹ تے کتابیں وچ زیادہ ملسن۔
(19) اسامہ غازی چنڳیاں کتاباں پڑھیے بغیر توساں چنڳی کتاب نیوے لکھ سڳدے۔
(20) سونو شرما کتاب وچ ہک شخص اپݨی ساری زندگی دا تجربہ مفت ݙیندے پر لوک ول وی قدر نئیں کریندے۔
(21) علامہ اقبال دے انگریز استاد اگر میں سمندر وچ بحری جہاز تے سفر کریندا پیا ہوواں تے کتاب دا مطالعہ وی کریندا پیا ہوواں تے اچانک طوفان آ ونڄے جیندے پاروں جہاز پاݨی وچ ٻݙݨ لڳے تے لوک ایتھاں اُتھاں اپݨی جان بچاوݨ کیتے بھڄدے پئے ہوون، تاں میں اوں ویلے وی کتاب دا مطالعہ کرݨ بند نہ کریساں۔
(22) چینی دانشور جݙاں بندہ ݙاہ کتابیں پڑھ گھندے تاں او ݙاہ ہزار میل دا سفر طے کر گھندے.
(23) صلاح الدین نیازی اگر کہیں بندے نے اے ڄاݨݨا ہووے جو اللہ اوندے اُتے راضی ہے تے کیا او زندگی وچ کامیاب انسان بݨسی، تاں او اے ݙیکھے جو کیا او کتاب دا مطالعہ کریندے. توساں میکوں ہک ݙینہہ کیتے بُکھا تریسہ جیل وچ قید کر ݙیو، تے اڳلی سویرے میݙے سامݨے میز تے پاݨی تے کھاوݨ دی کہی شے دے نال ہک کتاب وی رکھ ݙیو تاں سب توں پہلے میݙا ہتھ کتاب دو ویسی۔
✍️شان سرائیکی