Wq/skr/نذیر فیض مڳی
نظم ۔۔۔۔۔کاروکاری
چھوٹا ہک معصوم ایاݨاں
دِل ٻَدھ پیو دے نال الاݨاں
ابا سئیں توں رنج نہ تھیویں
ڳالھ میݙی تے انج نہ تھیویں
میکوں ہک وسواس پیا کھاوے
مسئلہ میکوں سمجھ نہ آوے
"بَھیرو" بھیݨ کوں رل مِل ساریں
ڳچی گُھٹ تے کیوں چا ماریے
ٻیٹھی ہئی او واݨ وٹیندی
کٙہیں دا ہئی او کیا وڳڑیندی؟
تیکوں حال مٙیں ݙینداں ٻچڑا
سچی گالھ ݙسیندا ٻچڑا
کٙہیں کوں ایہو حال نہ ݙسییں
لڄ دی ڳالھ اے ، ڳالھ نہ ݙسییں
گذری رات کوں دھمی ویلھے
غیر جُوان دے نال کھڑی ہئی
پاتی پیار دھمال کھڑی ہئی
ابّا! خوف خدا توں ڈریں
کاوڑ نہ کہیں ڳالھ تے کریں
پٙر تاں "پیڑے" پُتر وی تیݙے
ایہو ۔۔۔جیہا ہک جُرم کیتا ہا
اوندے سانگے۔ ۔۔۔۔
در در پَڳوں رولیاں ہانی
چٙٹی دے وچ۔۔۔۔۔۔۔۔
سوہݨیاں دھیریں گھولیاں ہانی
پُتر توں ساہ چا واریا ہاوی
اونکوں کیوں نہ ماریا ہاوی؟؟
نذیر فیض مڳی