Wq/skr/عید اوکھی وی ہائی
عید اوکھی وی ہائی
عید سوکھی وی ہائی
عید آوݨ لڳی
رنگ ݙکھاوݨ لڳی
کہیں کوں خوشی ملی
کہیں کوں غم مل ڳیا
کہیں کوں آپݨے اعمالیں
دی اجرت دے وچ
میݙے خالق دا خالص
کرم مل ڳیا
کہیں دے زخمیں تے
مرحم لڳے عید تے
کہیں کوں عمراں دا
چوڑھا زخم مل ڳیا
کہیں دی غربت نکھیڑے
دا موجب بݨی
کہیں دی دولت کوں
نکھڑیا صنم مل ڳیا
عید ہر کہیں دے کیتے
برابر تاں ہائی
پر مقدر ونڈارے کریندا ریہا کہیں کوں سنگتی ناں
سکھڑیں مبارخ ݙتی
کہیں کوں گھٹ گھٹ
گلتھے بھریندا ریہا۔
کہیں کوں وافر ملیے
کھاوݨیں عید تے
کہیں کوں سینویاں
وی مسیں ادھاریاں ملیاں
کہیں دی خاطر اصولیں
کوں تروڑیا ڳیا
کہیں کوں رسمیں ، رواجیں
دیاں گاریاں ملیاں
کہیں دے رووݨ تے
کہیں نہ توجہ ݙتی
کہیں دے دڑکے کوں
وی تابعداریاں ملیاں
کہیں کوں سائیکل
مہیا وی نئیں تھی سڳی
کہیں کوں اعلٰی قسم
دیاں سواریاں ملیاں
کوئی تاں محفل دی
مستی دے وچ رہ ڳیا
کہیں کلہیپے دے وچ
جام پیتی رکھیے
کہیں دےقہقہے
محلے ءِ چ سݨیندے ریہے
کہیں تاں مجبور
تھوڈیں کوں سیتی رکھیے
مختصر جھئیں
چہریں تے شادابی ہائی
باقی چہرے تاں
میکوں کماݨیں ملیے
کہیں کوں کوٹھیں
تے کاریں دی عیدی ملی
کہیں کوں فطراݨے دے
محض داݨیں ملیے
کہیں کوں سیتے سلائے
سوٹ نویں ملیے
کہیں کوں لوکیں دے
لتھے پراݨیں ملیے
کہیں کوں چپل مہیا
وی نئیں تھی سڳیے
ٻال کتنے میکوں
پیروراݨیں ملیے
جیرھا روزی کماوݨ
کراچی ݙو ڳئے
کیا ݙساواں کیویں
ول کے آئے عید تے
کہیں تاں عصمت مسائیں
جان آپڑیں بچائی
کہیں دے لاشیں کوں
ایدھی پچائے عید تے
عصمت گورمانی سئیں