Wq/skr/اساں خلق کوں سلام کیتے
اَساں خلق کوں روز سلام کیتے
اَساں رب دے نال کلام کیتے
رب ڳوٹھیں وچ رب سالھیں وچ
رب گھوٹ کنّوار دیاں ڳالھیں وچ
رب کانیں کاہیں ٹالھیں وچ
رب کُل فقیری حالیں وچ
رب ساݙے وݨ وِسرام کیتے
اَساں رب دے نال کلام کیتے
رب مکھݨ ماکھیوں مِٹھا ہے
اساں رڄ خلقت وچ ݙٹھا ہے
او جھوک اساݙی وٹھا ہے
او پہلے ݙینہوں کٹھا ہے
اساں اوندے نال آرام کیتے
اساں رب دے نال کلام کیتے
رب کل دی ڄئی دے میلے وچ
رب لُہندیاں دے پُتریلے وچ
رب روہی وچ رب بیلے وچ
رب بھوئیں تے شام سویلے وچ
اوں ہر جاء درشن عام کیتے
اساں رب دے نال کلام کیتے
رب کٌل وستی دے ٻالیں وچ
رب اُڄڑی ماء دے حالیں وچ
او جھمر کھیݙ دھمالیں وچ
او خلق دے کل سوالیں وچ
اوکوں ہر ہر جاہ پرنام کیتے
اساں رب دے نال کلام کیتے
شمیم عارف قریشی