Jump to content
- ਕਸ਼ਮੀਰ, ਜੰਨਤ ਦੀ ਨਜ਼ੀਰ : ਇਸ ਦਾ ਅਰਥ ਹੈ ਕਿ ਕਿਸੇ ਨੇ ਸਵਰਗ ਵੇਖਣਾ ਹੋਵੇ ਤਾਂ ਕਸ਼ਮੀਰ ਵੇਖ ਲਵੇ, ਕਸ਼ਮੀਰ ਦੀ ਧਰਤੀ ਸਵਰਗ ਜਿੰਨੀ ਹੀ ਖੂਬਸੂਰਤ ਹੈ।
- ਕਸਾਈਆਂ ਦੇ ਪੱਠੇ ਤਾਂ ਕੱਟੇ ਵੀ ਨਹੀਂ ਖਾਂਦੇ : ਜ਼ਾਲਮ ਦੀ ਦਿੱਤੀ ਰਿਆਇਤ ਲੈਣ ਦਾ ਛੇਤੀ ਕੀਤੇ ਕੋਈ ਹੌਸਲਾ ਨਹੀਂ ਕਰਦਾ। ਹਰ ਕੋਈ ਜਾਣਦਾ ਹੁੰਦਾ ਹੈ ਕਿ ਇਸ ਰਿਆਇਤ ਦੇ ਬਦਲੇ ਉਸਨੂੰ ਕੋਈ ਵੱਡੀ ਕੀਮਤ ਤਾਰਨੀ ਪੈ ਸਕਦੀ ਹੈ।
- ਕਸਾਈ ਕੀ ਤੇ ਸਫ਼ਾਈ ਕੀ : ਕਸਾਈ ਦੀ ਦੁਕਾਨ ਤੇ ਸਫ਼ਾਈ ਨਹੀਂ ਰਹਿ ਸਕਦੀ। ਹਰ ਪਾਸੇ ਮਾਸ ਦੀਆਂ ਬੋਟੀਆਂ, ਉੱਤੇ ਭਿਣਕਦੀਆਂ ਮੱਖੀਆਂ ਦੀ ਭਰਮਾਰ ਰਹਿੰਦੀ ਹੈ।
- ਕਸਾਈ ਵਿਹੜੇ ਬੱਕਰੀ, ਅੱਜ ਵੀ ਮੋਈ ਕੱਲ੍ਹ ਵੀ ਮੋਈ : ਮੌਤ ਦੇ ਮੂੰਹ ਆਇਆ ਬੰਦਾ ਮੁਸ਼ਕਿਲ ਹੀ ਬਚਦਾ ਹੈ।
- ਕਸੂਰ ਬੇ ਦਸਤੂਰ, ਨਿੱਕੇ ਕਰਿੰਡੇ ਤੇ ਵੱਡੇ ਸੂਰ : ਕਸੂਰ ਸ਼ਹਿਰ ਦੇ ਲੋਕਾਂ ਬਾਰੇ ਕਿਹਾ ਗਿਆ ਹੈ ਕਿ ਇੱਥੋਂ ਦੇ ਵਸਨੀਕ ਬੜੇ ਲੜਾਕੂ ਸੁਭਾ ਦੇ ਹੁੰਦੇ ਹਨ।
- ਕਹਾਂ ਧੀ ਨੂੰ, ਸੁਣਾਵਾਂ ਨੂੰਹ ਨੂੰ : ਪ੍ਰਤੱਖ ਤੌਰ ਤੇ ਗੱਲ ਕਹਿਣੀ ਕਿਸੇ ਹੋਰ ਨੂੰ ਪਰ ਉਹਦੇ ਜ਼ਰੀਏ ਸੁਣਾਉਣੀ ਕਿਸੇ ਦੂਸਰੇ ਨੂੰ।
- ਕਹਿਣ ਕਮਲੇ, ਸੁਨਣ ਬੌਰੇ : ਮੂਰਖਾਂ ਦੀਆਂ ਗੱਲਾਂ ਮੂਰਖ ਹੀ ਸੁਣਦੇ ਹਨ। (ਬੌਰੇ = ਬਾਵਰੇ, ਮੂਰਖ)
- ਕਹਿਣ ਗੁੰਗੇ, ਸੁਣਨ ਬੋਲੇ : ਜਿਹੋ ਜਿਹੇ ਕਹਿਣ ਵਾਲੇ, ਓਹੋ ਜਿਹੇ ਹੀ ਅੱਗਿਓਂ ਸੁਣਨ ਵਾਲੇ।
- ਕਹਿਣਾ ਸੌਖਾ, ਕਰਨਾ ਔਖਾ : ਕਿਸੇ ਨੂੰ ਸਲਾਹ ਦੇਣੀ ਸੌਖੀ ਹੈ ਪਰ ਖ਼ੁਦ ਉਸ ਤੇ ਅਮਲ ਕਰਨਾ ਬੜਾ ਮੁਸ਼ਕਲ ਹੁੰਦਾ ਹੈ।
- ਕਹਿਣਾ ਕੁਝ ਤੇ ਕਰਨਾ ਕੁਝ : ਜਦੋਂ ਕਿਸੇ ਮਨੁੱਖ ਦੀ ਕਹਿਣੀ ਅਤੇ ਕਰਨੀ ਵਿੱਚ ਬਹੁਤ ਫ਼ਰਕ ਹੋਵੇ ਤਾਂ ਇਹ ਅਖਾਣ ਢੁੱਕਦਾ ਹੈ।
- ਕਹਿਣਾ ਜੀ, ਤੇ ਲੈਣਾ ਕੀ : ਜ਼ੋਰਾਵਰ ਤੋਂ ਭਾਵੇਂ ਕੋਈ ਵੀ ਲਾਭ ਨਾ ਲੈਣਾ ਹੋਵੇ, ਫਿਰ ਵੀ ਉਸਨੂੰ ਸਤਿਕਾਰ ਨਾਲ ਬੁਲਾਉਣਾ ਪੈਂਦਾ ਹੈ।
- ਕਹਿਣਾ ਮੋੜਨਾ ਨਹੀਂ, ਡੱਕਾ ਤੋੜਨਾ ਨਹੀਂ : ਕਿਸੇ ਦੇ ਆਖੇ ਹੋਏ ਕੰਮ ਨੂੰ ਨਾਂਹ ਵੀ ਨਹੀਂ ਕਰਨੀ ਅਤੇ ਕੰਮ ਕਰਨਾ ਵੀ ਨਹੀਂ।
- ਕਹਿਣੇ ਕੀ ਸੋਭਾ ਨਹੀਂ, ਡਿੱਠਾ ਹੀ ਪ੍ਰਵਾਨ : ਕਿਸੇ ਬਾਰੇ ਲੋਕਾਂ ਕੋਲੋਂ ਸੁਣ ਕੇ ਹੀ ਕੋਈ ਰਾਇ ਕਾਇਮ ਕਰ ਲੈਣੀ ਗਲਤ ਹੁੰਦੀ ਹੈ। ਕਿਸੇ ਨੂੰ ਵੇਖ ਪਰਖ ਕੇ ਹੀ ਉਹਦੇ ਬਾਰੇ ਕੋਈ ਰਾਏ ਬਣਾਉਣੀ ਚਾਹੀਦੀ ਹੈ।
- ਕਹੀਂ ਕੀ ਈਂਟ ਕਹੀਂ ਕਾ ਰੋੜਾ, ਭਾਨਮਤੀ ਨੇ ਕੁਨਬਾ ਜੋੜਾ : ਜਦੋਂ ਥਾਂ ਥਾਂ ਦੇ ਲੋਕ ਇਕੱਠੇ ਕਰਕੇ ਝੂਠ ਮੂਠ ਦੇ ਰਿਸ਼ਤੇਦਾਰ ਬਣਾਏ ਹੋਣ ਤਾਂ ਕਹਿੰਦੇ ਹਨ।
- ਕਹੀ, ਕੁਹਾੜੀ, ਤੰਗਲ਼ੀ;ਸੰਭਲ ਸੰਭਲ ਵਾਹ : ਖੇਤੀ ਦੇ ਤਿੱਖੇ ਸੰਦਾਂ ਜਿਵੇਂ ਕਹੀ, ਕੁਹਾੜੀ ਅਤੇ ਤੰਗਲੀ ਆਦਿ ਨੂੰ ਸੰਭਲ ਕੇ ਵਰਤਣਾ ਹੀ ਚੰਗਾ ਹੈ, ਨਹੀਂ ਤਾਂ ਇਹ ਫੱਟ ਵੀ ਲਾ ਜਾਂਦੀਆਂ ਹਨ।
- ਕਹੀ ਕੁਹਾੜੀ ਤੰਗਲ਼ੀ, ਦੂਜੇ ਹੱਥ ਸੁਹਾਵੇ : ਔਖਾ ਕੰਮ ਕਰਦੇ ਦੂਸਰੇ ਹੀ ਚੰਗੇ ਲੱਗਦੇ ਹਨ, ਖ਼ੁਦ ਨੂੰ ਉਹ ਕੰਮ ਬੜਾ ਔਖਾ ਪ੍ਰਤੀਤ ਹੁੰਦਾ ਹੈ।
