Wq/kaa/Ibrayım Yusupov
Ibrayım Yusupov (tolıq atı Ibrayım Yusupovich Yusupov, 5-may 1929-jıl, Shımbay rayonı, QQASSR, ÓzSSR, SSRA – 24-iyul 2008-jıl, Nókis, Qaraqalpaqstan, Ózbekstan) — qaraqalpaq shayırı, XX ásir qaraqalpaq ádebiyatınıń iri tulǵası, awdarmashı, dramaturg hám pedagog. Qaraqalpaqstan hám Ózbekstan xalıq shayırı. Ózbekstan Qaharmanı (2004-jılı). Qaraqalpaqstan Respublikası mámleketlik gimniniń sóziniń avtorı.
Citataları
[edit | edit source]- Ómir — bul adamǵa berilgen biybaha, teńi-tayı joq, bir párshe waqıt. Waqıt bolǵanda da insanıy pazıyletke tolı — súyiw sezimine, biyik maqsetli oy pikirge tolı, gúreslerge hám jigerli miynetke tolı, qıyın sınaqlarǵa hám quwanısh qayǵıǵa, jaqsı niyet, árman-tileklerge tolı waqıt ol.
Ómir saǵan kóp nárse beredi. Bergendi alaberiwiń hám onı artıǵı menen qaytarıp bere biliwiń kerek. Ómir — qısqa pursatlı dem. Biraz jaǵdayda adam ruwzıgershilik mashqalasında júrip, ir-tır aytısıp júrip, ómirdiń ótkenin bilmey qaladı. Sońında qattı ókingen boladı. Biraq, keshikken pushaymannan endi payda joq. Ómir — jasawdı ǵaniybet bilgenge uzaq pursatlı dem, adam bir ómirdiń ishinde-aq aqıl toplap, erjetip, kóp nárse úyrenip, oqıp, tereń bilim alıp, turmıs qurıp, gúresip-jeńip, ullı islerdi atqarıp úlgere aladı.
Usınday az ómirde Tolstoy, Balzak,
Hárbiri,azda bolsa júz kıtap jazdı`.
Hár kisi ózinshe ómir súredi:
Birew belgi salar, ataǵı ólmes,
Birewler kóp nárse islep úlgeredi,
Birewler tırnaǵında egep úlgermes.
(Ómir filisofiyası.1959-j)
- Jazıwshılıq — bul oqıw hám jazıw, ómirińshe oqıw, úyreniw, izleniw,jazıw degen sóz. Men oqıp boldım, endi tek jazıwım kerek dewshilerdi, yaǵnıy, oqımay júrip jazatuǵınlardı, ásirese, házirgi dáwirde ozıq oylı jámiyet oqımaydı...
- Shayırlıq — ol júrek tili, hújdan hawazı.
Shayır júregi — ómir sulıwlıǵına toyımsız, adam quwanıshı ushın, adam qayǵısına qarsı mártlershe gúresetuǵın, adam azabı menen sızlap awıra biletuǵın, adamnıń asqar biyik ármanları menen lapıldap janatuǵın júrek.°
