Wp/wym/Wymysiöejer troht

From Wikimedia Incubator
< Wp‎ | wymWp > wym > Wymysiöejer troht
Jump to navigation Jump to search
Wymysiöejer troht
Wymysiöejer haltogtroht

Wymysiöejer troht ej ju a ocug, wo ma trüg y Wymysoü. Eta dy łoüt wu zajn yn wymysiöeryśa zespułn triöen jum oü. Dos wiöe ju a zir rajhy troht. S’zajn ejwercwencik rek, an ider höt zaj agia noma: błöwerök, ruterök, zejwagułdnikierök, fynfgułdnikierök, błöwśtrimikierök, grinśtrimikierök, noümiöedisierök, ana hefa ondyn. Bym rök wiöe ju a gyśtołt. Der besty wiöe gułd gyśtołt, oba zyłwer gyśtołt, dy ondyn wün myta błimła. Undrum gyśtołt wiöe ju s’jypła, dos ej ju a wajs hemp myta goła oüsgynyty zoha, Ufum rök ej ju a siyctüh. S’besty ej griny zajdan, nöhta zajn ferśidnikia wajsa myta błimła, opeła, a dy śłahsta zajn śtrimikie.

Uf don gyśtołt triöen dy bowa a jüpka, fołdojok oba kacabajka, zy hota fersidnikia borta an bynzeła. Ufum hiöet dy makia hota kroncła, a dy bowa, wo wün siun gytrojyt trüga ejwerzejwa hoüa, der łecty wiöe a gułd hoü, nöhta drymła ana tihła. S’zajn ferśidnikiy tihła-toüruty tihła, wajsy tihła, tjykiśetihła. Uf dy grusa haltag triöen zy oü a drüśkiatüh. Dy bowa triöen oü fynf cajła kiöeroln ana zyłwer kroücła, ferśidnikiy bynzeła, śtrimikie zoka, ana dy siü. Dy kłopa hota ka ekstra ocug ny. Zy trüga świöecy höza, rykla, hüt ana ibercijer.

Yta nimyd gejt ny wymysiöeryś ogycün azu, jok y procesyj oba y toncgrupa.