Wp/wls/Lotu mavae i 'Uvea mo Futuna

I te kamata'aga, ne'e tahitahiga te talanoa'i o te 'u lotu mavae i 'Uvea mo Futuna, mai tona 'alu'aga ae ne'e kei tahi te tauhi ki te lotu katolika pea mālohi te alu’aga o te tauhi o te ma’uli fatogia i te nofo fakafenua. Ne'e tapu i te 'u ta'u 1980 te lau o te Tohi Tapu pea ne'e ko te 'u pelepitelō tahi pē ne'e feala ke fai akonaki.

Ko te 'u lotu mavae ae kua mafola i 'Uvea mo Futuna ne'e au mai fuli pe e 'ihi kaiga 'uvea pe futuna ne'e ma'uli i Niu Kaletonia mo Falani i te 'u ta'u 1980-90.

Ko te 'u kautahi lotu aia ko te ‘Ēkelesia o te Evaselio i Ono i Futuna pea muli ki ai te kau Fakamo'oni o Sehova i 'Uvea, te ‘Ēkelesia o te Penikosite, te ‘Ēkelesia Molomone mo te ‘Ēkelesia o te ‘Aho Fitu.

E mole ilo'i papau te kaugamālie o te kaiga kua kau i te 'u lotu mavae aeni kae e lau ki te toko 200 ape i te ta'u 2001.

Ko te 'u maga’i lotu aeni e kau ki ai te kaiga kua fakafisi ki te lotu katolika pea mo ana to'oto'oga. ‘Uhi ko te kua fio o te lotu katolika mo te aga'ifenua, ne'e fakatū'ā ihi o nātou i te kamata'aga. Pea fakamulimuli pea sītu'a te kaiga lotu mavae ki te ma'uli fakafenua o te kolo, o te pālokia mo te fenua. Mole kei fatogia te tokolahi o te’u kautahi aia he mole kei alu tahi te akonaki a te’u kautahi lotu fo'ou aeni mo he ma'uli fakafenua e tu’u tahi mo te lotu katolika.

Ko he koga fo'ou i te ma'uli a te haha'i 'uvea mo futuna kae ko he koga kua māhani ki ai te kaiga o te 'u motu e 'ovi mai: Ha'amoa, Fisi, Tuvalu, Toga, Niuē he lahi ai te 'u maga’i lotu kehekehe pea toe malohi ai mo te aga'ifenua.

I te temi nei, kua fetogi te ma’uli fakalotu mo fakafenua i ‘Uvea mo Futuna kae tāfito i ‘Uvea. Kua sītu’a ihi kaiga ki te aga’ifenua o mulimuli ki te lotu kua nātou ma’uli ai.

E feala ape he fakatauhoa o te aga’ifenua mo takita lotu mavae pe he’e lotu? E toe fakatahi ape te kaiga o hoko atu te fatogia mo te ma’uli fakafenua, logo lā te kua lotu kehekehe? E hoko mai ape he ‘aho kua feala ke to’o kehe ai te lotu katolika mai te kakano o te ‘uhiga ‘uvea mo futuna?

Ko ni fehu’i ma’uhiga e tonu ke fakasiosio mo talanoa ki ai te kaiga ‘uvea mo futuna, ke tu’u ma’u ai pe te tokalelei pea ke tou liliu ki he ma’uli fakatahi mo fetokoni’aki.