Wp/vmw/Mapakeliwo a masoma.

From Wikimedia Incubator
< Wp‎ | vmw
Wp > vmw > Mapakeliwo a masoma.

Manamuna ampakiwa masoma -Wamphula

Mukhalelo omasomani


Ohinatthi ophiya okatthi ekekhayi, aximiravo khansuwela etthu erowa owiranela. Akhulupale anahimeryasa wi anrowa olya enuyi yotthuneyaxa (olya oravo)[1]. Yatthamela vavo anroya wiraneya muteko yattaratariwa , wa khuta mwaana otthuli ya mukwaawe atthamelannene mukina ni mukwaawe, yemenlene, vamosa nale anahoola, wiipaka ni anyakulaka, aruwanasaka yovikana ntita[2].

Nipuro nenno anilatihiwa etthu yoripa, vakhaani, yonyunya, mpakiwa ni etturya, yowetheiwa ni maasi orirya, ni mukottha atthiyana oheliwa munyakani mwa epuri yolopwana. Aniriwa wi eyo, wa mukhalelo ekemi ya ophitaana waya ni atthiyana ya meelo, mulopwana ohitemweke, okhaleke ntoko ephuri yolopwana yakhala niyotthiyana. mutthali ole onitthaniwa nsina na ‘’etthuttha’’[3]. Vaavo amiravo aniira akuxiwaka, mmosa- mmosa, arowaka ori nmukulukhana onooperari. Mulopwana onaaroha yu onikhala otthikittheliwa ni malepa ottela, oripa ni oxeerya ovirikanyihiwa[4]. Khonakuxa vamurettele! Onrya ottyawaka kiyanpharakaserya mmosa waalesa, anirawe xaaka avaraka ilyakh ixikhaani vicupuruni, khuta okatthi otthimakaka, onarimeela niyaayo opakha nipuro nowipittheya, wi ovariwe muteko. Mulopwana owo ni manamuna onapwanyaawe ni onarohaawe aximiravo onsuweliwa ni khinitthaniwa ni nsina na xaaka[5].

Nto nsina nna nivarewiwa muteko otakwani paahi, khanimphiwa owaani, nnakhala khaninsuweliwa ntoko nsina na muthu[6].

Hootthe nuule onooperari, akhala axilopwana araru wala axexe owiilipiha, anarihela vatthi ahikhupanyeryaka mmiravo oruheliwaaya ni xaaka, vookatthi vakhaani, onikhanyereriwa, khiyaweriwa, wa mmosa yaiyaale, onimukhuneela owiittho ni matata, wi mmiravo owo ohoone, enrowa wiiriwa, akhina aninvarelela metho ni miyoono yilipihaka, wi mukulukhana ovare muteko aawe vohikacamiheya[7]. Vowakuveya oniruliwa mukotta oryanyaawe owanre, vowakuveyavo, mukulukhana owo oninthikila munupi, ohiyaka nimateyo vatthiru. Namuku onakhelela emwalyaawe ni khiyahapuwa vo hootthe amurohaka nipuro nitthanliwe, weywo apwehiwaaya wi akhapeleleke nikwatha ninvuvasa mwaha yotthikiliwa, okattheene yoowo anira attottaka vanihutani nopakiwa ni muyeepe wala mukukhu makina aphwanelela muteko yoowo[8]. Ni masooso, amiravo anunnla akhuwelaka vanceene, masi yula waya onimalihiwa ni onyakula ya ale ari anamahoola , ari mpantte mukina, akina yaawosa anixototha anehererya ottwawa, ntoko anhaaya ottwawa mukwaha oyopiha oyo, wiraka wi aneene enuyi elyiwa iwe yonanarywa. Aximiravo anikupali[9]. Masi mmosa mmosa, anipwanyana onipuroni weiyo anrohiwaaya, vaavo, weeyo oniwehiwaaya vekekhayi manamuna akhalaaya otene aya, ohimukotta ni akhumaka ephome, awehexexiwaka naxinamuku aya ni axitityaya, alasa yawehihaka elopwana aya, yalipiheryaka wi yilipiheryeke owereya iwe ni yaleliheryaka wi tho awo avinre menmo omiravo aya, ni wi nohivira mukwaha ola khankhala khala akhalaka mulopwana[10]. Ni tho okatthi yoola aleliwaaya wi iwe khonlyiwa enuyi nnakhala, ni wi enuyi miyaalo iye micikaani anthikilaniwaaya munupi, tho enuyi ti ephome ekhume ni enkhuma. Akilathaleene vathi, metto soperetuliweene mukina ni mukwaawe, aximiravo awo animana vathi ni mattata yiranihaka ahikuwo, avenxaka ntthupi, nniira nivavelaka vanikwattani, wi nakhaliherye oxintta ephome enakhuma mutthanatthanaru[11].

Ethoonyeryo[edit | edit source]

  1. MUACUA, António, Vida Nova, Revista de Formação e Informação cristã, Nampula, 2022, pp 02-12
  2. MUACUA, António, Vida Nova, Revista de Formação e Informação cristã, Nampula, 2022, pp 02-12
  3. MUACUA, António, Vida Nova, Revista de Formação e Informação cristã, Nampula, 2022, pp 02-12
  4. MUACUA, António, Vida Nova, Revista de Formação e Informação cristã, Nampula, 2022, pp 02-12
  5. MUACUA, António, Vida Nova, Revista de Formação e Informação cristã, Nampula, 2022, pp 02-12
  6. MUACUA, António, Vida Nova, Revista de Formação e Informação cristã, Nampula, 2022, pp 02-12
  7. MUACUA, António, Vida Nova, Revista de Formação e Informação cristã, Nampula, 2022, pp 02-12
  8. MUACUA, António, Vida Nova, Revista de Formação e Informação cristã, Nampula, 2022, pp 02-12
  9. MUACUA, António, Vida Nova, Revista de Formação e Informação cristã, Nampula, 2022, pp 02-12
  10. MUACUA, António, Vida Nova, Revista de Formação e Informação cristã, Nampula, 2022, pp 02-12
  11. MUACUA, António, Vida Nova, Revista de Formação e Informação cristã, Nampula, 2022, pp 02-12