Wp/vmw/José Craveirinha - Ehantisi

José Craveirinha (namalepa iliivuru, ipuweema ni namalaleya ihapari) – oyariwe oXipamanine, “oLourenço Marque” (olelo oMaputo), mahiku miloko miili ni mathannamararu a mweeri wa “Maio” a mwaakha wa 1922, waari Ettiminku. Mwaana aapapawe yayariwa muttetthe a Alkarve, elapo ya oPortugal, ni amamawe yaari maRonka. Ohuuwale ni amamawe, apapawe vamosa ni amiyawe omphwanya. Osonme exikola ya “Primeiro de Janeiro” yaari ya “Maçonaria”.Ntoko namalaleya ihapari, ookhaliherya mmitthenkesoni sa oMosampiikhi: “O Brado Afrikano”, “Noticias”, “Tribuna”, “Ihapari sa Exekuwa”, Nsu na oMosampiikhi, Ihapari sa oBeira, “Diário de Moçambique”, ni Nsu na wAfrika. Ookhalela mukipitto wawanela omalamaliha othanyana wa nikhuli, omutthenkeso “Noticias” waavaraawe-wu muteko, ni kikhala namalaleya ihapari oopacerya osuwanyeihiwa ni mwiiwanano onaakiherya ihakhi saanamuteko.Orumeela masina ala owirimeeleliha: Mario Vieira, J. C., J. Cravo, Jose Cravo, Jesuino Cravo ni Abilio Cossa. Waari mukhulupale a Mwiiwanano a wAfrika, mwaakha wa 1950. Owo ahitthukweliwa okhuma mwaakha a 1965 mpakha 1969, mwaha wookhalela muhina nikhuru na partiitu-n”esurtaato na muttetthe wa neexexe na FRELIMO.Waari mukhulupale oopacerya a Munyukhu a Mithukumano Suulupale sa Mwiiwanano wAnamalepa oMosampiikhi, okhuma mwaakha wa 1982 mpakha 1987.  Woolemeliheriwa wawe Mwiiwanano wAnamalepa oMosampiikhi (AEMO), wookhaliheryana ni HCB (omutthenkeso ompakiwa maluuxu oKahora Bassa), ootthokiheerya mwaakha wa 2003, etthuvo “José Craveirinha ya soolempwa”.