Jump to content

Wp/vmw/Ethale

From Wikimedia Incubator
< Wp‎ | vmw
Wp > vmw > Ethale

Ethale

[edit | edit source]

Awo yoonaya yaahipwaha esara, yaalikana ni nrima masi khinakhanle, awosa yaanoona ovoreya, yaanoona ovoreya mwaha woomoona mookwaaxa mukumi, awosa yaatthuna omoona owo akhwiiyeene, ntokoni hiihaale asookwaaxa akina akhwiiyaaya, ookhweene yintaleliweene saaneene vatthayani. Masi mookwaaxa aniikhoottiha okhwa, aniikhoottiha okhwa wiira ahiive nttaava na emakhuwa, nttaava mwaanihiku naari na apapawe. - Akhweya yaakhanle ebuukhu emosa, emosa paahi, ya nttaava na emakhuwa miyo kaamookhwa- aahimya mookwaaxa akukumelaka. Amiravo yaamuhela mookwaaxa mmayithoni mwaya ni oweha woosareya esara, awosa yaatthuna paahi omoona mookwaaxa akhwiiyeene. Akhwiiyeene masi akhwiiyeene saaneene. Ni murima woosareya esara ni ohimutthuna yaamwaattamela mookwaaxa, ni yaamuhela mwaalo woononiwa saaneene va mmilo vawe, yaatthunaaya waari omwiiva mookwaaxa paahi. -Muhipakesa yeeyo. Nyuwosa khamunsuwela! - Nihinsuelaahu ti xeeni? - Ankohasa amiravo. - Otthuna okhwa honkihalela, masi miyo kakhwa, nttaava nimmookhwa ni miyo nkintthuna. Kintthuna wiira nenlo nihale vaava, nyuwosa mphenteke ni nihiwulihekeni muru nenlo. Ti yeeyo paahi. - Nenlo exeni? - Nttaava na emakhuwa, oelo khiivo mookwaaxa onkhwa meekhawe. Vamosa ni yoowo onnivitheliwa nttaava na emakhuwa.