Wp/vmw/Esomeliwo soolempwa ya oMosampiikhi

Esomeliwo soolempwa ya oMosampiikhi – ti, ikwaha sinceene, iye soolempwa ni nttaava na ekunya – soosuwelexiwa otakaahereyaka ni malove oMosampiikhi – sootthokihiwa ni anamalepa elapo yeela ya oMosampiikhi. Nlelo ekhaani, masi yookhalana ni anamathoonyiherya anroromeleya ntoko José Craveirinha, Paulina Chiziane ni Mia Couto, okhalaka mukhanyereryo esomeliwo ya ilapo sinlavula ekunya. Esomeliwo yoolempwa oMosampiikhi, ntoko isomeliwo ikina sa wAfrika, wa ilapo sapuheriwa ni elapo ya oPortugal, waari ovalihaniwa wa esomeliwo ya ekunya ya oPortugal. Wa mulikanyiho sa soolempwa, otthokiheriwa soosonmwa onkawanyeya okhuma mwaakha wa 1940, variyari wa soolempwa sooniheriwa ni anamasuwela oosomexa, okathi yoowo ni anamalepa, yakhootta opuheriwa wa muxovo ni akunya ooPortugal, ntoko mulikanyiho “Brado Literário” yooniheriwe elapo yeela okhuma mwaakha a 1918 mpakha 1974 ni soolempwa ni Rui Nogar, Marcelino dos Santos, José Cravereirinha, Orlando Mendes ni Virgílio Lemos, vamosa ni akina. Mwaakha wa 1975, okathi woponwaaya wa malamuleliwo-aya, elapo ya oMosampiikhi nanleelo yaari otteywene wa “mutthokelo woosoma soolempwa”, ori muromolelo watthokiheriwe ni namuupuwela Antonio Candido, yoowo alakiherya wira “mutthokelo woosoma soolempwa” onvira ophwanyaneyaka wakhala wira nikhuru naanamalepa, anlepela muxovo, onsiveliwa ni siiso onakuxereriha woowi namalepa onatthikela tho olepa soosonmwaka, mpakha omihoolo. Okhuma mwaakha wa 1964, okathi opacerihiwaaya ekhotto ya kapwitthi yiireliwa woopola elapo, mpakha mwaakha a 1975, elapo ya oMosampiikhi ephwannyaaya woopowa waya muhina mwa poliitika, isomeriwo saari muhina mwa soolempwa sooluluwana ni ehantisi-aya ni sookhumelela saya, ekhotto ya kapwitthi ni wiilamula, ntoko mulikanyiho wa “Chigubo” yooniheriwe mwaakha wa 1964 ni Craveirinha, noolumo nenna wa nttaava na muttetthe yoole nin”himya wira “mukhuwo wa ekhotto”.