Wp/vmw/Armando Guebuza

Armando Emílio Guebuza (namatthara sa poliitika oMosampiikhi) – waari nfalume elapo-awe, woomuranttela Joaquim Chissano, okhuma mahiku manli a mweeri wa Fevereiro a 2005 mpakha mahiku muloko ni mathanu a mweeri wa “Janeiro” a 2015, oranttelinwaawe ni Filipe Nyusi. Amwaarawe aniitthaniwa Maria da Luz Guebuza. Epartiitu onttharelaawe ti FRELIMO. Nfalume akhalayi elapo ya oMosampiikhi, Armando Guebuza, oyariwe etistritu ya oMurupula, oprovinsiya ya Wamphula, mahiku yettaka miloko miili a mweeri wa “Janeiro” a mwaakha wa 1943 ni vanto orina iyaakha miloko mithannamiili n”ithannatthaar sa mannuwelo-awe. Owo surtaato. Oikelin”he mpartiitu FRELIMO mwaakha wa 1963, okathi vaakhani wa ekhotto yowoopola elapo ya oMosampiikhi, iwe khalayi waari “oLourenco Marque” ni khikhuma mMosampiikhi mwaakha wa 1964 orowaka osoma oXikola emosa yoosuwanyeya elapo ya w”Ukraaniya, ekwartelo ya Perenvalny. Mwaakha wa 1992 ahitthonmwa ohoolela nikhuru naafalume nathoonyiherya omatthokiheriwoni wa Ettikitti ya Murettele woomalela, wiireliwa elapo ya oMosampiikhi. Mwaakha wa 2008 ahithanliwa okhala Sakrataari Muulupale a FRELIMO, ori muteko omukhalin”he namwiilepiha epartiitu-awe omukhalela mwaathanle oyensi wa onfalume a mwaakha wa 2004, amuxinttale-awe. Mahiku miloko miili ni mathannamararu a mweeri wa “Outubro” a mwaakha wa 2009, ahitthikela tho othanliwa woowi opwaherye olamulela, wampwaheryo wa iyaakha thanu, noomala ophwanya mithanlo wa mphimo a ipurusentu miloko mithannamiili n”ithanu wa sotheene. Nihiku nimosa na mweeri wa Julyu a mwaakha wa 2014 ahittottopeliwa ni Epuruseera Yuulupale ya mutthokelo “Ordem do Infanfo ya D. Henrique ooPortugal”.