Wp/vmf/Schdraabhägâr

Der ardigl is in Hâunlâuisch gschriiwn.

 schnaawâr midrâr ufhengung ausâm hooldsring un âm schniirle. Damidâr fâj ordendlich ufgrâjmd wärd und'n ghôônâr âmend ufm bâudâ leechâ lesd woâr dan roschd.

 schdraabhägâr is â sôrdâ fon haumesâr, wo mr im hâuâlâuischâ benudsd. An andrâr nôômâ dâfiir is schnaawâr.

Dr nôôm ghumd dôôfâu, dasmâr gands friâr im Schdall mid schdraawich ausm wald âjgschdrajd had, des had mr jee nach grees dan foorhäär glôôhagâ miâsâ.

 schdraabhägâr is ned gands sâu lang wi ân undârarm un ned gands sâu braad wi â hend, had â reechd dige, ajsârne glingâ, diâ schnajdâ fon därâ wo manchmôôl vornâ rund und schmôôlâr wärd, hoochdsâucha is und sich dâbaj dan um iwâr 180° dreed, so das mr es an dem ajsâdsibfâle an âm nôôchl ufhenga ghâu. Dr grif is endweeder aus hoolds, efdâr isâr aus demsälwâ schdig ajsâ rausgschafd wiâ di glingâ un is dsu âm hâulâ, undâ ned gands gschlosânâ dsilindâr gschmiid.

Schdraabhägâr benudsd mr fôr ärwâdâ ufm hâuf, baj denâ mr ewâs ned ds'hards und digs, ewâs äâr lufdichs un logârs glôôhagâ wil. Alsâ dsum bajschbiil schdrôâ; odâr diâ ausgnaschdâdâ ghôrdsâ äschdlâ fon beem un âa ruâdâ fon dâ biisch, diâ mr bajde uf âjhajdliche leng fôrs wälâbischâlâ machâ bringâ wil. Mr nimd dâ schdraabhägâr dâbaj in diâ guâd hend, midâr andârâ held mr des glôôdsajch uf ân hagschdoog und haud dôô dan meeglichschd glajch lange schdigâr ôô. Dsum schbeldâ fon ned dsâ grôâsâ un hardâ hooldswärchl, wiâ dsum bajschbiil bajm schbächdâlâ machâ, ghâumâr alâfals aa ân schdraabhägâr nemâ. Diâ midâm ajsârnâ grif hen dâ fôrdaal, das dr schdiil niâ logâr wärd, un aa eeâr âmôôl ân schbridsâr wasâr fârdrechd; dâfiir schbiird mr baj denâ dâ schlôôch ärchâr im handglenggh, sii leechâ im windâr arch ghald in dâr hend, un wen's schdôô un bôô friârd, bäbâ se sogôôr feschd, alsâ lesd mr dan besr d'hend dâfoo.

Wal hajd diâ majschdâ lajd aa ufm land nime mid hoolds hajdsâ, brauchâ se aa schdraabhägâr imâr wenichâr. ausârdeem ghumd des wärgdsajch, was mr hajd nimd, majschdens aus denâ grôôsâ ghedâläädâ, un diâ hen iwârool des sälwe ôôgebod: nôr bajlâr. s'gajd neemlich ghâum meâ schmiid uf dâ därfâr, diâ woo friâr aa diâ schdraabhägâr gmachd hen, un jeedâr dâbaj diâ sâjne â bisâle andârs. (Denggâd nôr an diâ fârschiidânâ formâ, schdiil un schbidsâ, diâ obâ beschriiwâ sân.) Wal des ajsâ, aus denâ se gmachd wôôrâ, gha bsondârs guâds wôôr, hen se aa arch groschd, nôr wemâr se ofd benudsd had, wôôrâse imâr schwards un blanggh. Wächâ dem allâ gajd's hajd ghâum meâ schdraabhägâr.