Wp/vmf/Frangng (Schdamm)

From Wikimedia Incubator
< Wp‎ | vmfWp > vmf > Frangng (Schdamm)
Jump to navigation Jump to search


It's unclear about subdialect using for this page. Please clarify it.


Dybbische Bewaffnung fo am fränggischn Ghriichär aus där Völgerwanderungsdsajd midd Schwärdd (Schbaadha), Saggs, Franzisgha, Schbangahelm, Landsnschbidsn und Schildbuggel-Germanischs Nadsionalmuseum, Nämmbärch

Die Frangng sinn a Volgsschdamm, der wo si im driddn Jahrhundärd aus a bôr glännere germanische Schdämm im Gebied um änn undärn Rain (Niiderrain) bild hôd. Vo dô aus sin´s ibbern Rain niibä´ und hôm si Gebiede im haidich´ng Frangreich erobärd, däj wo dômôls nu zum Römerreich ghärd hôm.

Am Ofang hômms no kann richdichng Keenich ghabbd, sondern blos a bôr glännere Keenich und Loghalhärscher. Ärschd där Keenich Gloodwich hôd se um fümbfhunderd nach Grisdus rumm vereinichd und a fränghischs Großreich gründed. Der hôdd ah die Schwôbm, oddär wie se dômôls ghassn ham Alamannâ besiechd. Im seggsdn Jahrhunderd sinn die Frangng waidä´ nach Osdn zoong und hôm di Düringer aa nu besiechd. Zu derâ Zaid wärns a es haidiche Gebied Frangng erraichd hôm. Des Gebied hamms zärschd Osdfrangng (Francia Orientalis) gnennd, wall ja es ganze Reich zu der Zaid Frangng ghassn hôd. Haid hasd des Gebied blos no Frangng und haid nenna si eichndli a blos no die Laid in Frangng selber Frangng. Där mächdigsde frängische Härrscher wôr dä´ Karl dä´ Große. Der hôd aa no die Saggsn undäworfm und said dämm sinn däj aa im Frängischn Reich drin gwesn. Aus´m Frängischn Reich hômm si schbäder Frangghreich und Dajdschland endwiggld.

Urschbrung[edit]

Di Frangng sin zum ärschdn môll während di Angriffe afs römische Imberium zwischa 257 und 261 nach Grisdus in die andigng Gwälln aufdauchd. Dô wärns als a Völgerbund hiigschdelld, der wo aus meerere, glännere Volgsschdämm bschdädd, di wo vorhär zwischern Rhein und där Weser gwoond hôm. Gands ausdrügglich als frängische Schdämm wärrn di Chamaven, di Chadduarier, die Brugdärer, die Amsivarier und ab 357 di Saalier oddär Saalfrangng gnännd. Bei di Dubandn wôs märs ned sichär, ôbbär mache sôông, dass di aa zu di Frangng ghärd hômm[1]. A brinzibielle Zwadaalung fo di Frangng in Ribuarier (Rainfrangng) und Salfranggng wärd ofd as di zwa aldn Gsedsbicher, där Lex Salica und där Lex Ribuaria herglaid. Allerdings is däs umschriddn wall zum baischbill die Ribuarier ned vorm 7. Jôrhunderd gnännd wärn (die Lex Ribuaria wärd ausm 8. Jôrhunderd schdamma)[2]. Um di glaihe Dsaid wärn aa di Masuarier gnennd, di um Maasdrichd gwoond hôm wärn[3]. Die Salfrangng sin 358 nach Doxandrien (Di Geengd zwischâ Maas und Schelde) aidrunga, wôss aingdli zum Römmerraich ghärrd hôd, hômm ôbär alds Föderaadn dô woona däffm[4].

In där Välgäwandärungsdsaid 400 worn die massdn Frangng Födäraadn, aldso Verbündede fo di Römär. Wie 406/407 däi riisiche Välgärlawiine as Wandaaln, Sueem und Alana ibärn Rain kumma und nach Gallien aigfalln is, hômm si di Frnagng dageenggschdälld und zumindesd verhindärd, dass die Browinz Germania secunda (dômôls di Geechngd um Kölln rum) blündärd worn is. Nach´m Dood vom Kaisär Honorius sinn die Frangng aa immär widär geechar´s römische Raich vorgschdoosn. Där Aedsius hôd´s dann 428 widdär ibärn Rain zurüggdriim, iinâ ôbbär dann doch lingsrainische Siidlungsgebiide zugwiisn. Ob di Salfrangng bai dänna Agdsionâ miidgmachd hômm, wass mär ned so gnau.Um 440 sinn di Salfrangng undär im Keeni Glodio fo Doxandrien nach Arras und Kambräi (Cambrai) vorgschdoosn, wo´s a Niidärlôche geechern Aedsius eigschdeggd hômm. In däi naia Gebiide hômm´s obbär drodsdeem blaim däffm. Um Kambäi und Durnai (Tournai) hômm si a bôôr glännere Keenichraich bild. Däi Keeni in dämm Gebiid wôrn schainbôr alle meer oddär wenicher värwnd und hômm gräsdndaals zur Sibbe där Merowingär ghärrd[5].

Die Verdrääche vom Aedsius mid di Frangng wôrn bis 455 güldich. Blôus wäi annär fo di Rainfrnagngkeeni gschdorm is, hôds Schdraid zwischär i Bräidär geem. Där glännäre is zu di Römär und där grässere hôd Hilfe baim Addila gsuchd. Där Schdraid hôd ledsdnendes zu di Auslöser vom großn Hunnâaifall im Jôôr 451. In där folgnden Schlachd af di Kadalaunischn Fäldär wôrn di Saalischn und fill fo di Rainfrangn af dä Saidn fo di Römer gschdanna. Däi Laid fom äldärn Brôudär hômm ôbbär af där Saidn fom Addila gkämbfd. Där Addila hôd däi Schlachd verlorn und is abzoong. Ab 455 sinn di Saalfrangng undär Glodio bis zor Somme vorgschoosn und die Rainfrangng hôm zaidwailich sogôr Driir bsedsd[6].

Gwällnbeleech[edit]

  • Walter Pohl: Die Völkerwanderung. Eroberung und Integration Kohlhammer, 2002, 266 Seiten. ISBN 3170155660
  • Eugen Ewig: Die Merowinger und das Frankenreich. Kohlhammer; Auflage: 5., aktualis. A. (23. November 2006) ISBN 3170194739
  1. Ewig, 2006, S. 9
  2. Pohl, 2002, S. 167
  3. Ewig, 2006, S. 13
  4. Ewig, 2006, S. 11
  5. Ewig, 2006, S. 12-14
  6. Ewig, 2006, S. 14