Wp/tzo/Bats'i k'op Tsotsil

Bats’i k’op Tsotsil

Li Tsotsile ja’ jun maya k’op ti oy ep buch’utik xk’opojik o li ta Toyol Osil ta Chyapa yu’un li steklumaltak bats’i ants viniketik jtsotsiletike. Li yepal buch’utik xk’opojik ta bats’i k’ope x-ech’ jutuk ta jbok’ ta vo’ krixchanoetik xchi’uk ja’ sk’opik jayib munisipyoetik ta slumal Chiapa: Sots’leb, Chamo’, Sakabch’en, Ch’enalo’, Pantelo’, Vityupan, Chalchivitan, Voske, Tsimojobel, Ni’bak, Bochil, Suyalo’, Vitstan, San Lucas, Akala, Jobel, Venustiano Carranza, Mitontik, Rayon xchi’uk Amatan. Ja’ no’ox jech noxtok, li jtsotsiletike lok’emik ta sa’el yosilik ta skoj politika xchi’uk relijyon ta yosilal chyapa xchi’uk ta yantik lumetik, jech noxtok oy buch’utik lok’emik skoj chanun xchi’uk sventa sa’el k’usitik yan xkuxiik o, skotol taje ja’ yu’un ti stak’ jtatik jteklumetik ti xk’opojik ta tsotsil ta sjunul yosilal chyapa xchi’uk ta yosilal Mejiko. Ja’ no’ox jech noxtok stak’ tael jteklumetik ti xk’opojik ta tsotsil li ta Estados Unidose. Li INEGI chal ti oy 417 462 buch’utik xk’opojik ta tsotsil ti chapbil li ta slajeb senso sventa jnaklejetik xchi’uk naetik yu’un INEGI ta (2010), ja’ yu’un li tsotsile ta sjo’obal no’ox oy li ta bats’i k’opetik ti oy buch’utik mas xk’opojik o li ta Mejikoe, ja’ no’ox ta yolon oy li ta Nauat, Maya ta Yukatan, Miksteko xchi’uk Sapoteko.